DIBOTO Jahowa do na laho marsitaonon anakNa jala mate. On tarida sian surirang di 1 Musa 3:15. Songon dia do panghilalaan ni Debata tingki mate anak haholonganNa? Bibel patuduhon tudosanna. Disuru Debata si Abraham mamelehon si Isak, anak haholonganna.

Togu do haporseaon ni si Abraham tu Debata. Nunga dijanjihon tu ibana taringot Sipalua, na ro sian pinompar ni si Isak. Ala porsea si Abraham na boi paheheon ni Debata si Ishak, dioloi ibana do laho mamelehon anakna i. Alai, ro ma surusuruan ni Debata mangambati si Abraham asa unang dipelehon si Isak. Las do roha ni Debata tu si Abraham ala rade ibana mamelehon anak haholonganna. Dung i, diulahi Debata ma janjiNa tu si Abraham.

Anak ni si Isak, si Esau dohot si Jakkob. Ndang songon si Esau, dapot pasupasu do si Jakkob ala diargai na ringkot di partondion. Diganti Debata ma goar ni si Jakkob gabe si Israel, 12 marga di Israel digoari do mangihuthon goar ni anak ni si Jakkob. Songon dia do keluarga ni si Jakkob gabe sada bangso?

Mulana, digadis hahana ma si Josep gabe hatoban tu Mesir. Alai, dipasupasu Debata do si Josep ala tongtong marsihohot. Nang pe godang hasusaan na masa tu ibana, dipillit si Firaun do si Josep gabe panggomgomi di Mesir, jala dilehon huaso na balga tu ibana. Tingki i, masa ma haleon di tano Kanaan, disuru si Jakkob ma angka anakna tu Mesir manuhor sipanganon ni nasida saleleng haleon i—si Josep do na mangaradoti sipanganon di Mesir. Jumpang ma si Josep dohot angka hahana jala nunga marhamubaon nasida, ala diida si Josep songon i, ditogihon ma nasida asa pinda saluhutna tu Mesir. Dilehon do tano asa boi denggan parngoluon nasida dohot pinomparna. Jala diboto si Josep, Debata do na mandongani nasida asa manggohi bagabagaNa.

Sahat tu na matua, di Mesir do si Jakkob dohot pinomparna. Andorang so mate, dipaboa ibana sada surirang taringot Sipalua naung dijanjihon hian, na gabe panggomgomi ro sian anakna si Juda. Disurirangkon si Josep muse boanon ni Debata do sude pinompar ni si Jakkob ruar sian Mesir.

—Dibuat sian 1 Musa bindu 20 sahat tu 50; Heber 11:17-22.

ADONG do jolma na boi marsihohot tu Debata nang pe diunjuni? On ma sungkunsungkun ni Sibolis na boi dialusi sada baoa na margoar si Job.

Maringanan dope halak Israel di Mesir, adong ma sahalak sisolhot ni si Abraham na margoar si Job, na maringanan di tano Arab. Tingki i, marpungu ma angka surusuruan di jolo ni Debata, Sibolis pe ro do disi. Didok Jahowa do pos ni rohaNa tu si Job naposoNa na marsihohot, jala ndang adong na marhaporseaon songon ibana di tano on. Alai ninna Sibolis, mangoloi pe si Job ala dipasupasu jala diramoti Jahowa do ibana. Ninna muse, autsura dibuat na adong di si Job buraanna do Debata.

Dipaloas do Sibolis mambuat arta ni si Job, dung i mate anakhonna jala dibahen ma ibana marsahit. Ndang diboto si Job, boasa masa i, ninna rohana boasa ma dipaloas Debata pangunjunan on. Alai, nang pe songon i ndang gabe ditadingkon si Job Debata.

Ro ma tolu aleale ni si Job mandapothon ibana. Panghataion ni nasida on ma na godang tarsurat di buku Job. Ninna nasida tu si Job, masa pangunjunan i alani dosana do. Jala ndang disarihon Debata naposoNa manang ndang pos rohaNa tu nasida. Alai, ndang porsea si Job tu hata ni alealena i. Didok ibana ingkon marsihohot do ibana tu Debata sahat tu na mate!

Alai, adong do na humurang sian si Job, ninna rohana sumintong ibana sian Debata. Ditangihon si Elihu do sude panghataion ni nasida i. Dipasingot si Elihu ma si Job ninna ma: umbalga do Jahowa sian sude jolma. Dipinsang si Elihu do huhut angka aleale ni si Job na jungkat.

Dung i, dialusi Jahowa ma si Job. Huhut dipatudu Jahowa angka na tinompaNa na mambahen longang, diurupi si Job asa mangantusi na so adong lapatan ni jolma martimbangkon huaso ni Jahowa. Ditangihon si Job do pinsangpinsang ni Debata jala disolsoli ma angka hatana. Ala ”parholong roha do Jahowa jala parasiroha godang,” dipaulak do hahipason ni si Job, artana dua hali lompit jala dilehon sampulu anak di ibana. (Jakobus 5:11, Bibel Siganup Ari) Nang pe manaon pangunjunan, alai marsihohot do si Job tu Jahowa, jala boi dialusi ibana hatahata ni Sibolis na mandok dang adong jolma na marsihohot tu Jahowa molo diunjuni.

—Dibuat sian buku ni si Job.