Referensi tu Parpunguan Hangoluan dohot Pangkobasion Na Laho Diparsiajari
4-10 DESEMBER
ARTA NA ARGA NA ADONG DI BIBEL | SEPANIA 1–HAGGAI 2
”Lului ma Jahowa Tagan So Ro Dope Ari RimasNa”
(Sepania 2:2, 3) Tagan so songgop dope uhumi, songon hurangkam do laho salpu ari, tagan so songgop dope tu hamu parpiar ni rimas ni Jahowa, tagan so songgop dope tu hamu ari pangarimasan ni Jahowa. 3 Lulu i ma Jahowa, sude hamu, ale angka na unduk roha di tano on, hamu angka na mangaradoti uhumna; lulu i hamu ma hatigoran, lulu i haserepon, anggiat tung diondingi hamu di ari pangarimasan ni Jahowa.
w01-IN 15/2 18-19 ¶5-7
Lului ma Jahowa Tagan So Ro Dope Ari RimasNa
5 Ra, hea do didok rohamuna, ’Nunga tardidi ahu, jala nunga gabe Sitindangi Ni Jahowa. Ai aha pola na ingkon huulahon muse?’ Sasintongna, gumodang muse na umringkot asing ni mangalehon diri tu Jahowa jala tardidi. Bangso na dipillit Debata do Israel najolo. Alai di tingki ni si Sepania, ndang olo halak Jahudi mangolu hombar tu janji ni nasida tu Debata. Ujungna, gabe ditadingkon Debata ma bangso i. Saonari on, molo naeng ’mangalului Jahowa’ hita, ingkon olo do hita maraleale tu Debata dohot tu organisasiNa di tano on. Lapatanna, ingkon tapahombar do caranta mangida sude na adong di portibi on tu cara ni Debata dohot pangkilalaanNa. Talului ma Jahowa marhite mamparsiajari Bibel, mangarimangi, jala mangulahon parentaNa di parngoluonta ganup ari. Molo tapangido panogunoguon sian Debata marhite martangiang jala mangihuthon tondi parbadiaNa, gabe lam solhot ma paralealeonta tu Ibana, jala lam marsitutu ma hita laho manomba Ibana sian nasa roha, ateate, dohot sian nasa gogonta.—5 Musa 6:5; Galatia 5:22-25; Pilippi 4:6, 7; Pangungkapon 4:11.
6 Na paduahon, di Sepania 2:3 dipangido do hita asa ’mangalului hatigoran’. Godang do sian hita na ingkon mambahen godang hamubaon di parngoluonna asa boi tardidi, alai ingkon tongtong do hita mangihuthon uhum ni Debata saleleng ngolunta. Adong pigapiga halak naung denggan mangulahon on di mulana. Alai ujungna gabe olo nasida mangihuthon portibi on, songon mangkalomohon na rorang, margabus, dohot mangulahon dosa na asing. Tutu, ndang mura asa boi gabe halak na tigor. Alai, molo marsitutu do hita sian roha laho mambahen las roha ni Jahowa, gabe ummura ma hita mangalo giotgiot ni roha na dihalomohon portibi on. Ndang dihalomohon Debata be halak Juda ala nasida mangihuthon angka bangso na so manomba Ibana. Alani i, gabe ”sitiru Debata” ma hita, jala gabe ”jolma na imbaru, na tinompa suman tu Debata, di bagasan hatigoran dohot hapolinon na marhasintongan”.—Epesus 4:24; 5:1.
7 Na patoluhon na ringkot sian Sepania 2:3, asa diondingi hita di ari rimas ni Jahowa, ingkon ’talului do haserepon’. Ganup ari, godang do tajumpangi angka halak na so patuduhon haserepon, baoa manang borua, na matua manang na poso. Sada haotoon do di nasida molo marserep ni roha jala unduk. Godang na dipangido nasida, holan mangkaringkothon dirina sandiri, jala mangkaringkothon na porlu di nasida be. Ndang denggan molo songon i do parangenta! Saonari on, ringkot do hita asa ’mangalului haserepon’. Songon dia carana? Unduk ma hita tu Debata, tajalo ma sipasingot sian Ibana, jala taihuthon ma na dihalomohon rohaNa.
Mangalului Arta na Adong di Bibel
(Sepania 1:8) Jadi di ari pamelehon ni pelean sipotongon tiniti ni Jahowa, marlulu ma ahu dompak angka induk dohot dompak angka anak ni raja dohot dompak sude halak angka na marpangkean na pulik luat.
w07-IN 15/11 11 ¶3
Angka na Ringkot sian Buku Nahum, Habakuk, dohot Sepania
1:8. Adong pigapiga halak di tingki ni si Sepania na ”marpangkean na pulik luat”. Marsitutu do nasida asa boi dijalo angka bangso di humaliangnasida. Sada haotoon do di angka na manomba Jahowa saonari molo nasida mangihuthon portibi on!
(Haggai 2:9) Jadi gumodang ma hamuliaon ni joro parpudi on sian parjolo i, ninna Jahowa Zebaot, jala di hajongjongan on lehononku do hadameon, ninna Jahowa Zebaot.
w07-IN 1/12 9 ¶1
Angka na Ringkot sian Buku Haggai dohot Sakaria
2:9—Boasa ’gumodang hamuliaon ni joro parpudi on sian parjolo i’? Adong tolu alana: Na parjolo, ala umleleng do jongjong joro ni si Serubabel sian joro ni si Salomo. Joro ni si Serubabel jongjong saleleng 580 taon, i ma sian taon 515 SM sahat tu 70 M. Molo joro ni si Salomo, lelengna jongjong saleleng 420 taon, i ma sian taon 1027 SM sahat tu 607 SM. Na paduahon, di joro ni si Serubabel, Jesus do na mangajar disi. Na patoluhon, umgodang do halak na ro tu joro ni si Serubabel sian na ro tu joro ni si Salomo laho manomba Debata.—Ulaon ni Apostel 2:1-11.
Panjahaion Bibel
(Haggai 2:1-14) Paduapulu sada arihon di bulan sipaha pitu, ro ma hata ni Jahowa marhite sian panurirang si Haggai, songon on: 2 Ua dok ma tu si Serubabel, anak ni si Sealtiel, pangarajai sian Juda dohot tu sintua ni malim Josua, anak ni si Josadak, dohot tu pasipasi ni bangso i, songon on: 3 Ise dope sian hamu na mangolu, angka na sanga marnida joro on di hamuliaonna parjolo i? Hape aha diida hamu disi anggo nuaeng? Nda hira na soada do dietong rohamuna martimbangkon parjolo i. 4 On pe, ale Serubabel, pir ma tondim ninna Jahowa; pir ma dohot tondim ale sintua ni malim Josua, anak ni si Josadak; pir ma dohot tondim sandok bangso ni tano i, ninna Jahowa, jala datdati hamu mangula, ai ahu do donganmuna, ninna Jahowa Zebaot. 5 I ma hata na hupadanhon i tu hamu di haruruarmuna sian Misir, nang: Tondingku marsihohot do jongjong di tongatongamuna; unang hamu mabiar! 6 Ai songon on do hata ni Jahowa Zebaot: Saotiknari nama ulahanku ma mangkuturi langit dohot tano dohot laut ro di darat. 7 Huturonku ma dohot saluhut angka bangso parbegu, jadi ro ma hasudungan ni roha ni saluhut angka bangso parbegu, jala gohanku ma joro on hamuliaon, ninna Jahowa Zebaot. 8 Ahu do nampuna perak, jala ahu nampuna sere, ninna Jahowa Zebaot. 9 Jadi gumodang ma hamuliaon ni joro parpudi on sian parjolo i, ninna Jahowa Zebaot, jala di hajongjongan on lehononku do hadameon, ninna Jahowa Zebaot. 10 Paduapulu opat arihon, dibulan sipaha sia paduataonhon hinarajahon ni si Darius, ro ma hata ni Jahowa marhite sian panurirang Haggai, songon on: 11 Boti hata ni Jahowa Zebaot: Ua usoi ma angka malim taringot tu patik i, songon on: 12 Ida ma, tung sura diboan manang ise juhut na badia di bagasan suhi ni ulosna, dung i dolos suhi ni ulosna tu sagusagu manang tu lompan, manang tu anggur, manang tu miak, manang tu sipanganon dia pe, tung badia ma i binahen ni? Jadi didok angka malim i ma mangalusi: Ndangana. 13 Dung i ninna si Haggai ma: Tung sura dijama manang ise na ramun binahen ni bangke saluhutna ondeng, tung ramun ma angka i? Jadi didok angka malim i ma mangalusi: Ramun ma i tutu. 14 Dung i ninna si Haggai ma mangalusi: Laos songon i do bangso na sansundut on maradophon ahu, ninna Jahowa, laos songon i do saluhut jadijadian ni tangannasida ro di na pinelehonnasida disi: Sai na ramun do i.
11-17 DESEMBER
ARTA NA ARGA NA ADONG DI BIBEL | SAKARIA 1-8
”Marsigantung Nasida tu Suhisuhi ni Ulos ni Sada Halak Jahudi”
(Sakaria 8:20-22) Songon on do hata ni Jahowa Zebaot: Ro dope anggo sogot angka bangso dohot pangisi ni angka huta bolon. 21 Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi! 22 Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa.
w14-IN 15/11 27 ¶14
”Hamu . . . Gabe Bangso ni Debata Nuaeng”
14 Najolo, disurirangkon angka panurirang do molo di tingki parpudi, godang do angka halak na laho manomba Jahowa raphon angka naposoNa. Si Jesaya mandok, ”Jala torop angka bangso mandapothon tusi angka na mandok: Beta hita tanangkohi ma dolok ni Jahowa, tu bagas ni Debata ni si Jakkob, asa diajarhon tu hita angka dalanna, jala mardalani hita di angka lapangna. Ai marharoroan sian Sion do sogot patik i, jala sian Jerusalem hata ni Jahowa.” (Jes. 2:2, 3) Disurirangkon si Sakaria do, ”ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa”. Nasida marroan ”sian saluhut dila ni bangso parbegu”. Jala, manomba Debata ma nasida raphon bangso Israel di partondion, i ma angka na miniahan. Didok nasida ma, ”Rap hita sauduran, ai nunga hubege hami: Debata do donganmuna.”—Sak. 8:20-23.
(Sakaria 8:23) Songon on do hata ni Jahowa Zebaot: I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna.
Naeng Ihuthononnami do Ho
4 Nang pe ndang boi taboto goar ni angka na miniahan, songon dia do hita boi rap ”sauduran” dohot nasida? Bibel mandok, adong sampulu halak baoa ”marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna”. Nang pe ayat ni Bibel mandok sahalak Jahudi, alai hata ”Debata do donganmuna” on lapatanna ndang holan sada halak Jahudi, alai on patuduhon punguan ni halak na miniahan. Nang pe ndang diboto birubiru na asing goar ni sude halak na miniahan, alai diboto do na rap nasida dohot punguan ni na miniahan on manomba Jahowa. Jala ndang mangihuthon sada sian nasida. Asa boi hita rap sauduran dohot nasida, ingkon mangihuthon sada pamimpin, i ma Jesus, ala didok di Bibel holan ibana do na ingkon taihuthon.—Mat. 23:10.
w09-IN 15/2 27 ¶14
”Diihuthon nasida do Birubiru i”
14 Jesus Kristus mandok molo sude na talehon tu angka anggina, sasintongna, na mangalehon tu ibana do i. (Jaha Mateus 25:40.) Jadi, marhite aha do angka halak na marpangkirimon asa mangolu di tano on boi mangurupi angka anggi ni Kristus na miniahan? Na umringkot, i ma marhite mangurupi nasida di ulaon marbarita na uli. (Mat. 24:14; Joh. 14:12) Saleleng marpulu taon sahat tu saonari, lam moru do bilangan ni angka na miniahan. Alai lam godang do bilangan ni angka birubiru na asing. Molo parsidohot do angka halak na marpangkirimon di tano on di ulaon marbarita, manang gabe perintis, on patuduhon na diurupi nasida do angka na miniahan laho mangalului gumodang halak na olo gabe sisean ni Jesus. (Mat. 28:19, 20) Asing ni i, boi do hita mangurupi ulaon on marhite mangalehon sumbangan.
Mangalului Arta na Adong di Bibel
(Sakaria 5:6-11) Jadi ningku ma: Aha do i antong? Dung i ninna ibana ma: Ampang do i, na ruar i. Dung i ninna ibana muse: I do tudosan ni hajahatonnasida di tano on. 7 Dung i ida ma, hinsat do sada pingkul simbora, huhut adong disi sada parompuan, hundul di parsitongaan ni ampangi. 8 Dung i ninna ibana ma: I ma hajahaton i. Jadi direongkon ibana ma nasida tu tongatonga ni ampangi, jala ditipahon simbora na sangkimpal i tu babana. 9 Dung i manaili ma ahu dompak ginjang, asa maralatan, jadi huida ma ruar dua parompuan jala alogo di bagasan habongnasida, jala habongnasida, songon angka habong ni siboru tasik, jala diluahon ampangi tu holangkolang ni tano on dohot langit. 10 Dung i ningku ma tu suruan angkuphu mangkatai: Tudia boanonnasida ampangi. 11 Dung i ninna ibana ma tu ahu: Laho paulihon di ibana sada jabu di tano Sinear: Jala ia dung dipadiri, patindangonna ma disi di atas hajongjonganna.
Pangkorhon ni Parnidaan ni si Sakaria tu Hita
18 Sian parnidaan on botoon ni halak Jahudi ma, nasida pe martanggung jawab do manjaga panombaon tu Jahowa tongtong ias. Ndang boi adong hajahaton di tongatonga ni naposo ni Debata. Saonari nunga di togutogu Jahowa be hita tu organisasiNa na ias. Tahilala do holong dohot parlinggomanNa. Alani i, ganup hita, martanggung jawab manjaga organisasi ni Jahowa asa tongtong ias. Tung na so jadi adong hajahaton di tongatonga ni naposo ni Jahowa.
(Sakaria 6:1) Dung i humusor muse ahu manaili dompak ginjang, asa maralatan, jadi huida ma opat hureta, angka na ruar sian holangkolang ni na dua dolok i, jala sian tombaga do dolok i.
Linggoman ni Raja dohot Hureta do Hamu
7 Di Bibel, jotjot do hata dolok dipangke laho manggombarhon harajaon manang pamarentaon. Dos do dua dolok di parnidaan ni si Sakaria tu dolok na di buku Daniel. Sada sian dolok i manggombarhon pamarentaon ni Jahowa na manongtong. Na sada nai, manggombarhon Harajaon ni Messias, jala Jesus ma Rajana. (Dan. 2:35, 45) Di ujung ni taon 1914, marharajaon ma Jesus. Mulai sian i, nunga jongjong be harajaon na dua i. Boi ma harajaon na dua i manggohi sangkap ni Debata di tano on.
8 Boasa sian tombaga dolok i dibahen? Ala marhillong jala arga do tombaga. Najolo, disuru Jahowa do halak Israel mamangke tombaga laho mambahen undungundung (tabernakel), dohot bagas joro. (2 Mus. 27:1-3; 1 Raj. 7:13-16) On patuduhon sun denggan do pamarentaon ni Jahowa dohot Harajaon ni Messias. Dame ma ngolunta, marlas ni roha jala gok ma pasupasu na tahilala.
Panjahaion Bibel
(Sakaria 8:14-23) Ai songon on do hata ni Jahowa Zebaot, songon sangkap ni rohangku na jolo naeng manorui hamu, uju marronirimas ahu mida ompumuna ninna Jahowa Zebaot, jala ndang marpangulahi rohangku. 15 Suang songon i sangkaphu di angka ari on naeng marpangulahi rohangku mambahen na denggan tu Jerusalem dohot tu pinompar ni Juda. Dibahen i unang hamu mabiar. 16 Alai on ma hata angka sibahenonmuna. Ganup ma mandok hata hasintongan tu donganna, hasintongan dohot uhum! Hadameon ma panguhumonmuna di partungkoanmuna. 17 Jala unang dipingkiri roha ni manang ise bahen hamagoan ni donganna, jala unang mangapian hamu di tolontolon sipaotooto, ai luhut angka sisongon i huhagigihon do, ninna Jahowa. 18 Dung i ro ma muse hata ni Jahowa Zebaot tu ahu: 19 Songon on do hata ni Jahowa Zebaot: Parpuasaon di bulan sipaha opat dohot parpuasaon di bulan sipahalima dohot parpuasaon di bulan sipaha pitu dohot parpuasaon di bulan sipaha sampulu ingkon manjadi las ni roha do i dohot hasonangan tu pinompar ni si Juda, dohot manjadi angka pararirayaon bolon; asal dihaholongi hamu hasintongan dohot hadameon. 20 Songon on do hata ni Jahowa Zebaot: Ro dope anggo sogot angka bangso dohot pangisi ni angka huta bolon. 21 Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi! 22 Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa. 23 Songon on do hata ni Jahowa Zebaot: I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna.
18-24 DESEMBER
ARTA NA ARGA NA ADONG DI BIBEL | SAKARIA 9-14
”Tongtong ma Tading di ’Rura ni Angka Dolokku’ ”
(Sakaria 14:3, 4) Dung i borhat ma Jahowa, asa marmusu dompak angka bangso parbegu i, songon na somal ibana marporang, di ari tongtangan i. 4 Jadi ojakkononna ma patna di ari na sasada i di atas ni dolok Jetun, tondong ni Jerusalem tungkan habinsaran. Dung i bola dua ma dolok Jetuni sian habinsaran tungkan hasundutan, gabe tubu rura na lambas situtu, gabe morot na satonga ni dolok i tungkan utara, na satonganari tungkan dangsina.
w13-IN 15/2 19 ¶10
Tongtong ma Tading di Bagasan Rura Parlinggoman ni Jahowa
10 Tingki tarbola dolok i, na sada tu utara, sada nai tu selatan, alai tongtong do jongjong pat ni Jahowa di dolok i. Gabe adong ma rura na lambas situtu di tongatonga ni patNa i. Rura i manggombarhon parlinggoman sian Debata. Di rura i ma angka naposo ni Jahowa boi mandapot parlinggoman di bagasan huasoNa dohot Harajaon Messias ni AnakNa. Sai dijaga Jahowa do asa tongtong adong panombaon na sintong. Andigan do tarbola angka dolok i? Tarbola ma dolok i tingki nunga jongjong Harajaon Messias di ujung ni Tingki Angka Parbegu, i ma di taon 1914. Jadi, andigan ma angka na mangulahon panombaon na sintong mulai maporus tu rura parlinggoman i?
(Sakaria 14:5) Jadi maporus ma anggo hamu tu rura ni angka dolokku, ai sahat do rura ni angka dolok i ro di Asel. Maporus ma tutu hamu, songon hapoporusmuna maradophon lalo uju di angka ari ni si Usia, raja sian Juda. Dung i ro ma Jahowa Debatangku, udur dohot ibana saluhut angka na badia.
w13-IN 15/2 20 ¶13
Tongtong ma Tading di Bagasan Rura Parlinggoman ni Jahowa
13 Tongtong ma hita marsihohot tu Jahowa jala togu di bagasan hasintongan. Molo taulahon i, Debata pe sai rade do mangurupi hita, songon i nang Jesus, AnakNa i. Ndang loasonNa manang aha pe mambahen hita gabe ’tarrampas sian tangan ni Damang’ i. (Joh. 10:28, 29) Rade do Jahowa mangalehon pangurupion asa boi hita tongtong mangoloi Ibana, jala asa tongtong marsihohot gabe pangisi ni Harajaon Messias. Di tingki haporsuhon bolon na naeng ro, lam tahaporluhon do gumodang pangurupion sian Jahowa. Alani i, saonari tongtong ma hita tading di bagasan rura parlinggoman i.
(Sakaria 14:6, 7) Jala di ari na sasada i, ndang adong hatiuron, mangkolom ma angka panondang di langit. 7 Jala sada sambing do ari i, sasada Jahowa umbotosa, so haru arian, so hara borngin. Alai marhira bodari tiur ma muse.
(Sakaria 14:12) ”Alai on do torutoru sipasonggopon ni Jahowa tu saluhut bangso, angka na marporang dompak Jerusalem: Merus bahenonna sibukna, andorang diojakkon dope patna, matana pe malala do di bagasan liangna, busuk dohot dilana di bagasan pamangannasida.
(Sakaria 14:15) ”Laos songoni do pangonai ni torutoru i tu hoda, hoda na marsahe, halode, unto, lombu ro di nasa dorbia angka na di parsaroannasida, suman tu torutoru ondeng.
w13-IN 15/2 20 ¶15
Tongtong ma Tading di Bagasan Rura Parlinggoman ni Jahowa
15 Di tingki ari rimas ni Debata, aha do na masa tu angka halak na so di bagasan ”rura na lambas situtu” i? ”Ndang adong hatiuron” di nasida, alana ndang lomo roha ni Debata mida nasida. Di parporangan i, gabe mangkolom ma angka sinjata ni angka bangso, na digombarhon songon ”hoda, hoda na marsahe, halode, unto, lombu ro di nasa dorbia”. Dibahen Jahowa do muse angka sahit manang ”torutoru”. Sahit on ma na laho pasohon angka musu. ”Matana pe malala do . . . busuk dohot dilana.” Lapatan ni i, ndang boi be nasida mangalo jala dipahohom ma nasida. (Sak. 14:6, 7, 12, 15) Sude na mangihuthon Sibolis ndang boi malua, manang didia pe nasida. (Pgk. 19:19-21) ”Jala bangke angka naung marragean binunu ni Jahowa, marpeahan ro di ari na sasada i, sian ujung ni tano on sahat ro di ujung ni tano on.”—Jer. 25:32, 33.
Mangalului Arta na Adong di Bibel
(Sakaria 12:3) Dung i masa ma di ari na sasada i, ahu sandiri mambahen Jerusalem gabe batu pangujian gogo di saluhut angka bangso; nasa na naeng mangkindat maraprap bahenonna, jala marpungupungu naeng mangalo huta i nasa bangso parbegu di tano on.
w07-IN 15/12 22-23 ¶9-10
Tung So Adong Sinjata na Mampan tu Hamu
9 Dipaboa si Sakaria do boasa angka bangso ndang marlomo ni roha mangida halak Kristen na sintong jala mangorai nasida. Didok do di Sakaria 12:3, ”Masa ma di ari na sasada i, ahu sandiri mambahen Jerusalem gabe batu pangujian gogo di saluhut angka bangso.” Jerusalem na didok dison, i ma ”Jerusalem na di banua ginjang i”. On manggombarhon Harajaon na di banua ginjang na gabe inganan ni halak Kristen na miniahan. (Heber 12:22) Adong dope pigapiga halak di tano on na laho mangingani Harajaon i. Di tingki saonari on, rap ma nasida dohot angka ”birubiru na asing” laho manjujui angka halak asa mamillit Harajaon ni Debata. (Johannes 10:16; Pangungkapon 11:15) Alai, songon dia do angka halak manjangkon i? Jala songon dia do Jahowa mangurupi angka halak Kristen na sintong saonari on? Taboto ma alusna molo umbagas muse taparsiajari taringot Sakaria bindu 12. Dung i, gabe lam pos ma rohanta, ’tung so adong sinjata na mampan’ laho mangalo angka na miniahan dohot angka dongannasida na marsihohot.
10 Di Sakaria 12:3, disurat do taringot angka bangso na mandapot luka. Boasa boi masa i di nasida? Dihalomohon Debata do asa tarsar barita na uli taringot Harajaon on. Unduk do Sitindangi Ni Jahowa laho mangulahon on. Alai, gabe dos songon ”batu pangujian” ma nasida di angka bangso ala paboahon barita Harajaon i. Marsitutu do nasida mangalo batu i marhite mangorai angka parbarita. Alai, gabe dapot nasida ma luka ala mangorai ulaon on. Gabe roa ma goar nasida di angka halak ala ndang marhasil sude na diulahon nasida. Ndang boi nasida pasohon angka parbarita na marsitutu paboahon ”barita na uli sisalelenglelengna” taringot Harajaon Messias. (Pangungkapon 14:6) Adong do sahalak panjaga ni penjara di sada negara di Afrika, na hea mangida angka naposo ni Jahowa na dipungkuli disi. Ibana mandok, ”Ndang adong lapatanna nang pe dipungkuli nasida. Ndang na olo nasida pasohon ulaonna i. Gariada, gabe lam godang do nasida.”
(Sakaria 12:7) Jadi jumolo lehonon ni Jahowa tua tu angka undungundung ni Juda, asa unang manenganenga hamuliaon ni bagas ni si Daud dohot hamuliaon ni isi ni Jerusalem mangasta Juda.
w07-IN 15/12 25 ¶13
Tung So Adong Sinjata na Mampan tu Hamu
13 Jaha Sakaria 12:7, 8. Di Israel najolo, angka parmahan dohot angka pangula do na somal tading di undungundung (tenda). Alani i, tingki ro musu mangaroro, nasida ma na parjolo sahali na mangkaporluhon pangurupion. Alana nasida tading di luar ni tembok kota Jerusalem. Saonari, ”angka undungundung [manang kemah] ni Juda”, on manggombarhon angka halak na miniahan na tading dope di tano on. Dos songon angka pangula dohot angka parmahan na tading di luar ni tembok kota Jerusalem, halak na miniahan mangkaporluhon pangurupion. Alana nasida do na parjolo sahali diroro Sibolis.
Panjahaion Bibel
(Sakaria 12:1-14) Songon on ma hata ni Jahowa, na paherbang langit jala na paojak tano on, jala na jumadihon tondi ni jolma di bagasan dirina. 2 Ida ma ahu sandiri mambahen Jerusalem gabe panginuman hamabuhon di saluhut angka bangso humaliang, sahat ibana huhut tu Juda di hatutungkum ni Jerusalem. 3 Dung i masa ma di ari na sasada i, ahu sandiri mambahen Jerusalem gabe batu pangujian gogo di saluhut angka bangso; nasa na naeng mangkindat maraprap bahenonna, jala marpungupungu naeng mangalo huta i nasa bangso parbegu di tano on. 4 Di ari na sasada i, ninna Jahowa: Jimbolangon ma bahenonku nasa hoda, jala jolma na mangkunduli lalaen ma. Alai anggo mida pinompar ni Juda mangaranap ma matangku; ianggo hoda ni angka bangso papitungonku ma sudena. 5 Dung i dohonon ni angka induk ni Juda ma di bagasan rohanasida: Bahen hagogoon di ahu do angka isi ni Jerusalem marhitehite Jahowa Zebaot Debatanasida i. 6 Di ari na sasada i ahu sandiri mambahen angka induk ni Juda, songon hudon parapiapian di holangkolang ni soban, jala songon tulbu di holangkolang ni tibalan, asa suda dipangan nasida saluhut angka bangso humaliang tungkan siamun dohot tungkan hambirang. Alai anggo Jerusalem hot do tongtong di ojahanna hian di Jerusalem. 7 Jadi jumolo lehonon ni Jahowa tua tu angka undungundung ni Juda, asa unang manenganenga hamuliaon ni bagas ni si Daud dohot hamuliaon ni isi ni Jerusalem mangasta Juda. 8 Di ari na sasada i Jahowa ma gabe partanobatoan humaliang isi ni Jerusalem, asa manang ise sian nasida na tarsulandit di ari na sasada i, sobokkon si Daud jala pinompar ni si Daud tudoshon Debata, songon suruan ni Jahowa di adopannasida. 9 Marlulu ma ahu di ari na sasada i mamansingkon saluhut bangso parbegu, angka na ro mamorang Jerusalem. 10 Jadi usehononku ma tu pinompar ni si Daud dohot tu isi ni Jerusalem tondi parasian dohot partangiangon, gabe paberengberengon nasida ma ahu, naung tinullang nasida; jala andungannasida ibana, songon pangandungion di anak sasada, jala habot situtu rohanasida taringot tu ibana songon habot ni roha mida anak buhabaju. 11 Di ari na sasada i masa ma pangandungion bolon di Jerusalem, songon pangandungion uju di Hadadrimmon di rura Megiddo. 12 Mangandungi ma isi ni tano on: Marompuompu pulik be pinompar ni ompu ni si Daud pulik, jolma nasida pe pulik; pinompar ni ompu ni si Natan pulik, jolmanasida pe pulik. 13 Pinompar ni ompu ni si Lepi pulik, jolmanasida pe pulik; pinompar ni ompu ni si Simei pulik, jolmanasida pe pulik. 14 Suang songon i sude pinompar ni ompu na asing, ganup ompu pulik be, jala jolmanasida pulik.
25-31 DESEMBER
ARTA NA ARGA NA ADONG DI BIBEL | MALEAKI 1-4
”Las do Roha ni Jahowa Mida Parsaripeonmuna?”
(Maleaki 2:13, 14) Pambahenanmuna angkupni on do: Dihungkupi hamu do langgatan ni Jahowa dohot iluilu, partangison dohot hoihoi, alani ndang adong be rohana manailihon pelean sipanganon, manang marlomo ni roha manjangkon manang aha sian tanganmuna. 14 Lam didok hamu dope: Ala ni aha do? Ala Jahowa do sitindangi di holangkolangmi dohot jolmam di haposoonmu, naung tinoisanmi, atik pe nasida tuan laenmu jala jolma ni parjanjianmu.
jd-IN 125-126 ¶4-5
Na Boi Ulahononmuna asa Parsaripeon Tongtong Palashon Roha ni Jahowa
4 Di tingki ni si Maleaki, i ma hirahira dung taon 500 SM, godang do angka halak Jahudi na marsirang. Didok si Maleaki ma tu nasida, ”Jahowa do sitindangi di holangkolangmi dohot jolmam di haposoonmu, naung tinoisanmi.” Alani i, gabe dihungkupi ma langgatan ni Jahowa dohot ”partangison dohot hoihoi” ni angka tungganeboru, ala ditadingkon tungganedolinasida. Jala angka malim pe ndang parduli tu parsoalan on!—Maleaki 2:13, 14.
5 Songon dia pangkilalaan ni Jahowa mangida parsaripeon ni godang halak Jahudi di tingki ni si Maleaki? Disurat si Maleaki, ”Ai huhagigihon do parsirangan, ninna Jahowa Debata ni Israel. Jala didok si Maleaki do muse ’ndang mubauba anggo Jahowa’. (Maleaki 2:16; 3:6) Jadi tangkas ma, sian najolo pe ndang dihalomohon Jahowa adong parsirangan. (1 Musa 2:18, 24) Alai on ma na masa di tingki ni si Maleaki, songon i nang di tingkinta saonari. Adong na mamillit asa marsirang, holan ala dongan saripe nasida ndang songon na dihalomohon nasida. Alai, boi do Jahowa mangida roha ni nasida na angkal situtu. (Jeremia 17:9, 10) Diboto Ibana, nang pe hira na sintong alasan ni halak laho marsirang, adong do sangkap na roa di roha ni nasida. ”Sude do patar jala bungka diida Ibana, jala tu Ibana do hita papatarhon tanggungjawabta.”—Heber 4:13, Bibel siganup ari.
(Maleaki 2:15, 16) Jala ndang anggo ibana na sasada i mambahen songon i, laos tading dope di ibana pasipasi ni tondi. Alai aha do diulahon na sasada i? Na mangalului pinompar sian Debata do ibana. Dibahen i jaga hamu ma tondimuna, unang tung ditoisi manang ise jolma ni haposoonna. 16 Ai huhagigihon do parsirangan, ninna Jahowa Debata ni Israel, nang halak na manghungkupi pangarupaon marhite sian ulosna, ninna Jahowa Zebaot. Dibahen i jaga hamu ma tondimuna, unang datdati hamu mangose!
w02-IN 1/5 18 ¶19
Dihagigihon Jahowa do Angka na Marjehe
19 Dipaboa si Maleaki do muse, adong do angka tungganedoli na tongtong marsihohot tu tungganeboruna. ’Laos tading dope di nasida pasipasi ni tondi.’ (Mal 2 Ayat 15) Saonari on, angka baoa sisongon i do na adong di organisasi ni Debata, i ma angka baoa na ’mambahen sangap’ tu tungganeboruna be. (1 Petrus 3:7) Ndang olo nasida mamungkuli manang tarrimas situtu tu tungganeboru ni nasida. Ndang olo nasida mangulahon seks na mangkaringkothon diri sandiri. Jala ndang olo nasida menggoda borua na asing manang mangida angka na porno. Diboto nasida do, boi do i mambahen hansit roha ni tungganeboru ni nasida. Songon i nang angka tungganeboru di organisasi ni Jahowa, sude do nasida marsihohot tu tungganedolina nang tu Debata dohot angka uhumNa. Sude baoa dohot borua on mamboto aha na dihagigihon Debata, jala diulahon nasida do sude hombar tu uhum naung diparsiajari nasida. Tongtong ma tatiru nasida, ’mangoloi Debata’ jala mandapot pasupasu marhite tondi parbadiaNa.—Ulaon ni Apostel 5:29.
Mangalului Arta na Adong di Bibel
(Maleaki 1:10) Tung ise ma sian hamu tagamon, na hum mangkinsu angka pintu ni joro i? Asa unang magopo nian panutungna di pelean di atas langgatanki. Ndang lomo rohangku mida hamu, ninna Jahowa Zebaot, jala ndang huhalomohon pelean sipanganon sian tanganmuna.
w07-IN 15/12 27 ¶1
Angka na Ringkot sian Buku Maleaki
1:10. Ndang lomo roha ni Debata tu pelean ni angka malim na gabe pangahut, na mangido asa digarar angka ulaonna di bagas joro songon manutup pintu dohot mambahen api di langgatan. Alani i, sai tongtong ma sude na taulahon dohot na talehon laho manomba Debata, sudena i alani holong tu Debata dohot tu dongan jolma, ndang alani laho mandapot untung di hita.—Mateus 22:37-39; 2 Korint 11:7.
(Maleaki 3:1) Ida ma, suruanku ma suruanku, asa dipadiri dalan di jolongku. Dung i tompu ma ro tumopot jorona Tuhan, na niluluanmuna dohot suruan ni parpadanan na hinalungunhonmuna. Ida ma, na ro ma ibana, ninna Jahowa Zebaot.
w13-IN 15/7 10-11 ¶5-6
”Ida ma, sai na dongananku do hamu ganup ari”
5 Marratus taon andorang so dipaboa Jesus tudosan taringot eme dohot simaremeeme, nunga disuru Jahowa panurirang Maleaki asa manurirangkon angka na masa na adong di tudosan na dipaboa Jesus i. (Jaha Maleaki 3:1-4.) Di abad na parjolo, si Johannes Pandidi ma suruan na mamungka dalan. (Mat. 11:10, 11) On masa di taon 29 M, i ma tingki naung jonok panguhuman tu bangso Israel. Jesus ma na gabe suruan paduahon. Dua hali ma dipabadia ibana bagas joro di Jerusalem. (Mat. 21:12, 13; Joh. 2:14-17) Ulaon pabadiahon on masa, dungkon tardidi Jesus sahat tu andorang so mate dope ibana.
6 Songon dia surirang ni si Maleaki on digohi muse di tingki na asing? Di tingki parpudi, on digohi andorang so taon 1914. Si C. T. Russell dohot angka donganna ma mamungka dalan songon na diulahon si Johannes Pandidi. Dipapatar nasida ma hasintongan na sian Bibel. Diajarhon Siswa-Siswa Alkitab i ma hasintongan taringot tobusan ni Kristus, api na roko, jala andigan do ujung ni Tingki ni Angka Parbegu. Alai, godang dope kelompok agama na mangangku mangihuthon Kristus. Jadi, sian sude angka kelompok i, dia do na gabe dipatudos songon eme? Alani i, di taon 1914 ma mulai dipabadia jala dipadenggan Jesus panombaon na sintong tu Jahowa. On masa sian taon 1914 sahat tu 1919.
Panjahaion Bibel
(Maleaki 1:1-10) On ma hata lumbalumba ni Jahowa tu Israel marhite sian pamangan ni si Maleaki. 2 Nunga huhaholongi hamu, ninna Jahowa. Alai didok hamu do: Marhitehite aha hami dihaholongi ho? Nda si Esau do nian haha ni si Jakkob? Ninna Jahowa, hape si Jakkob do hubahen hasudungan ni rohangku. 3 Alai anggo si Esau nunga huhagigihon, jala hubahen angka dolokna gabe halongonan, jala partalianna nunga hupasahat tu antuasu angka na di parhorsihan. 4 Tung sura dohonon ni Edom: Nunga nian tartaban hami, alai marhobas ma hami mangulahi paulihon angka turanggong! Songon on do hata ni Jahowa Zebaot: Nasida paulihon, ahu muse mangaloha; gabe goaran ni halak nasida luat ni hajahaton, jala bangso panginonaan ni rimas ni Jahowa salelenglelengna. 5 Ingkon sanga idaon ni matamuna ma i, gabe dohononmuna ma: Timbul do Jahowa sogot salpu sian parbalohan ni Israel. 6 Ingkon pasangapon ni anak amana, jala anak somang tuanna. Molo ama ahu didia do hasangaponku? Molo tuan ahu, didia do biar mida ahu? Songon on do hata ni Jahowa Zebaot tu hamu malim angka na palea goarhu; hape lam didok hamu do: Marhitehite aha hupalea hami goarmi? 7 Diboan hamu do tu atas ni langgatanku sagusagu na ramun; hape lam didok hamu do: Marhitehite aha marlea ho hubahen hami? Ala na nidokmuna i: Meja ni Jahowa, nunga tung lea ibana! 8 Molo diboan hamu na mapitung bahen pelean, ndang pola na roa i nimmu! Manang ia diboan hamu na pangpang dohot na marsahit, ndang pola na roa i! Ua tung boan hamu ma i tu jolo ni indukmu, tung tagamon ma halomohononna ho, manang tung tagamon sorta ma pamerengna mida ho? Ninna Jahowa Zebaot. 9 Nuaeng pe, ua marsomba ma hamu tu bohi ni Debata, asa asi rohana di hita! I ma na masa sian tanganmuna; tung tarbahen ma lomo rohana marnida hamu? Ninna Jahowa Zebaot. 10 Tung ise ma sian hamu tagamon, na hum mangkinsu angka pintu ni joro i? Asa unang magopo nian panutungna di pelean di atas langgatanki. Ndang lomo rohangku mida hamu, ninna Jahowa Zebaot, jala ndang huhalomohon pelean sipanganon sian tanganmuna.