Ise do na Digokkon Debata Mangan?

Di jabu ni halak Parise dope Jesus dung dipamalum ibana sahalak baoa na sigurbahon i. Diparrohahon Jesus godang do halak na ro mamillit hundul di inganan na sangap. Alani i, dipaboa Jesus ma parsiajaran taringot tu toruk ni roha.

Didok Jesus ma, “Molo digokkon sasahalak hamu tu pesta parbogason, unang ma hundul di inganan na sangap. Atik boha adong digokkon halak na umsangap sian hamu. Dung i, ro ma halak na manggokkon i jala dohononna ma tu hamu, ‘Loas ma baoa on hundul di hundulanmi.’ Ujungna maila ma hamu jala pinda tu hundulan na di pudi.”​—Lukas 14:8, 9.

Didok Jesus ma muse, “Molo digokkon hamu, laho ma hamu tu inganan na di pudi jala hundul ma disi. Dung i ro ma halak na manggokkon hamu i mandok, ‘Tu jolo ma hamu hundul ale dongan.’ Gabe sangap ma hamu di jolo ni sude na ro.” Ndang holan patuduhon parange na denggan na nidokna dison. Dipaboa Jesus ma, “Ai patutoruon do ganup halak na patimbo dirina, jala patimboon do manang ise na patutoru dirina.” (Lukas 14:10, 11) Dijujui ibana do angka na manangihon i asa marsitutu patuduhon toruk ni roha.

Dung i dipaboa ibana ma tu halak Parise na manggokkon i, songon dia sasintongna pesta na dihalomohon Debata. Didok ma, “Molo naeng gokkononmu halak mangan arian manang borngin, unang ma gokkon ale-alem manang haha anggim manang keluargam manang hombar jabum na mora. Ai gokkonon ni nasida do ho muse laho mambalos na binahenmi. Alai molo naeng mambahen pesta ho, gokkon ma na pogos, na pangpang, na lumpu dohot na mapitung. Marlas ni roha ma hamu, ai ndang adong lehonon ni nasida laho mambalos i tu hamu.”​—Lukas 14:12-14.

Ndang sala molo marpesta manggokkon ale-ale, tondong, manang tetangga. Alai parohon pasu-pasu do molo tagokkon na pogos, na pangpang, manang na mapitung. Dung i didok Jesus ma tu parjabu i, “Dapotmu ma balosna di haheheon ni halak na mangulahon na sintong.” Adong ma sahalak sian na ro i mandok, “Marlas ni roha ma na mangan di Harajaon ni Debata.” (Lukas 14:15) Tutu ma na nidokna i. Alai ndang sude olo manjalo gokkon i. Didok Jesus ma muse sada tudosan:

“Adong ma sahalak baoa na mambahen pesta jala godang ma halak digokkon . . . disuru ibana ma hatobanna mandok tu halak na digokkon i, ‘Ro ma hamu, ai nunga rade be sude.’ Alai marsidalian ma nasida sude, didok na parjolo i ma tu ibana, ‘Adong hutuhor ladang, jadi naeng idaonku ma i. Santabi ma, ndang boi ahu ro.’ Jala na asing mandok, ‘Adong hutuhor lima pasang lombu, jadi naeng paresoonku jolo i. Santabi ma, ndang boi ahu ro.’ Na asing muse mandok, ‘Baru mangoli dope ahu, alani i ndang boi ahu ro.’”​—Lukas 14:16-20.

Ndang tutu sidalian ni nasida i! Somalna nunga dipareso ladang manang pahan-pahanan andorang so dituhor. Alani i ndang porlu be i paresoonna tingki i. Jala nunga sae be pesta parbogason ni baoa na patoluhon. Alani i, boi do ibana ro tu pesta ni na manggokkon i. Gabe muruk ma na manggokkon i jala didok ma tu hatobanna:

“Hatop ma ho laho tu angka sirpang ni dalan dohot tu gang di kota. Boan ma tuson angka na pogos, na pangpang, na mapitung dohot na lumpu.” Alai dung mulak hatoban i, ndang gok dope inganan i. Dung i didok tuan i ma, “Laho ma ho tu angka dalan dohot tu angka gang jala togihon ma nasida ro asa gok jabungki. Hudok ma tu hamu, ndang adong nanggo sahalak sian na digokkon i mandai sipanganon na huparade.”​—Lukas 14:21-24.

Tudosan ni Jesus i manggombarhon songon dia Debata Jahowa manggokkon angka halak marhite Jesus Kristus, asa dohot tu Harajaon banua ginjang. Angka pamimpin agama ni halak Jahudi do na parjolo digokkon tingki marbarita Jesus.Alai godangan sian nasida ndang olo. Dung i digokkon Jesus ma muse angka halak Jahudi na lea dohot tu angka halak na mangihuthon agama ni halak Jahudi. Dungkon i, digokkon ma muse angka halak na so Jahudi.​—Ulaon ni Apostel 10:28-48.

Tutu ma hata ni sahalak sian na ro i na mandok, “Marlas ni roha ma na mangan di Harajaon ni Debata.”