Nunga naeng manogot tingki didok si Petrus na so ditanda ibana Jesus. Nunga diadili jala dileai anggota Sanhedrin Jesus. Dung tiur ari, marpungu ma muse anggota Sanhedrin laho mangadili Jesus. Dibahen nasida pe songon i, asa unang tarboto do naung diadili nasida Jesus di borngin i.

Disungkun nasida ma, “Molo na tutu do ho Kristus, paboa ma tu hami.” Didok Jesus ma, “Nang pe hupaboa tu hamu, tong do ndang porsea hamu. Jala molo husungkun pe hamu, ndang na alusanmuna ahu.” Barani do Jesus patuduhon ibana do na dipaboa di Daniel 7:13. Didok ma, “Alai mulai sian tingki on, hundul ma Anak ni jolma i di siamun ni Debata na marhuaso i.”​—Lukas 22:67-69; Mateus 26:63.

Didok nasida ma muse, “Antong, Anak ni Debata do ho?” Dialusi Jesus ma “Tutu, songon na nidokmuna i ma.” Lam pos ma roha ni nasida mandok naung dileai Jesus Debata. Didok nasida ma, “Boasa pola luluanta be angka saksi?” (Lukas 22:70, 71; Markus 14:64) Diikat nasida ma tangan ni Jesus jala diboan tu Gubernur Pontius Latus.

Diida si Judas Iskariot do diboan Jesus tu si Latus. Manolsoli ma ibana ala diboto laho diuhum mate nama Jesus. Alai ndang sian ias ni roha ibana manolsoli. Dipaulak ibana ma 30 logam perak i tu angka malim kepala. Didok ma tu nasida, “Nunga mardosa ahu, ai hujehehon do halak na so marsala.” Alai ndang parduli nasida. Didok ma, “Aha parsoalan ni i tu hami? Urusanmu ma i!”​—Mateus 27:4.

Disampathon ibana ma 30 logam perak i tu bagas joro, dung i maningkot ma ibana. Tingki digantungkon ibana dirina tu dangka ni hau, ponggol ma i. Dabu ma ibana tu batu, mapultak ma butuhana.​—Ulaon ni Apostel 1:17, 18.

Torang dope ari tingki diboan Jesus tu jabu ni si Pontius Latus. Alai ndang olo halak Jahudi masuk tusi. Ai didok do gabe ramun nasida molo masuk tu jabu ni na so sisomba Jahowa. Gabe ndang boi be nasida mangulahon Perayaan Roti na So Marragi tanggal 15 Nisan. Ai ari Paska do i didok nasida.

Dung i, kaluar ma si Latus jala didok ma, “Hajahaton aha do diulahon ibana?” Didok nasida ma, “Ai molo ndang parjahat ibana, ndang pasahatonnami ibana tu ho.” Diboto si Latus do ra, na laho diuhum nasida Jesus. Didok ibana ma, “Boan hamu ma ibana jala uhumi hamu ma ibana hombar tu patikmuna.” Didok halak Jahudi ma, “Ndang marhak hami laho mambunu sasahalak.” Sian alus ni nasida i, tarida ma na naeng pamateon ni nasida do Jesus.​—Johannes 18:29-31.

Molo dipamate nasida Jesus saleleng perayaan Paska, olo gabe muruk halak Jahudi. Alai molo halak Rom do na mandok ingkon diuhum mate Jesus ala mangalo pamarenta, ndang salahonon ni halak Jahudi be nasida.

Ndang didok angka pamimpin agama be na mangaleai Debata Jesus. Alai didok nasida do tu si Latus, “Tardapot do ibana [1] mangaliluhon bangsonami. [2] Diorai do manggarar pajak tu Kesar jala [3] didok do ibana Kristus, raja i.”​—Lukas 23:2.

Nunga dipillit halak Rom si Latus gabe gubernur ni halak Jahudi. Alani i, ingkon denggan do paresoon ni si Latus, atik na tutu do didok Jesus dirina sahalak raja. Ditogihon si Latus ma Jesus masuk jala didok ma, “Raja ni halak Jahudi do ho?” Olo do gabe dirimpu si Latus na naeng dialo Jesus uhum ni nasida. Manang naeng dialo Jesus Kesar umbahen na mangangku raja ibana. Ala naeng diboto Jesus boha pandapot ni si Latus taringot ibana, didok Jesus ma, “Sian roham do sungkun-sungkunmi manang na adong do halak paboahon tu ho taringot tu ahu?”​—Johannes 18:33, 34.

Didok si Latus ma “Ai na dirimpu ho do halak Jahudi ahu? Bangsomi dohot angka malim kepala do na pasahathon ho tu ahu. Aha huroha diulahon ho?” (Johannes 18:35) On patuduhon na so diboto si Latus do manang aha taringot tu Jesus.

Tingki dialusi Jesus sungkun-sungkun ni si Latus, Harajaon ni Debata do na tongtong diingot ibana. Alai gabe tarsonggot do si Latus mambege alus ni Jesus.

Tangkas do didok Jesus tu si Latus na sahalak raja ibana. Alai ndang na laho manaluhon Rom ibana di tingki i. Didok Jesus do, “Ndang sian portibi on Harajaonku. Molo sian portibi on Harajaonku mangalo do angka naposongku asa unang dipasahat ahu tu halak Jahudi. Alai ndang sian portibi on Harajaonku.” (Johannes 18:36) Jadi ndang sian portibi on Harajaon ni Jesus.

Alai disungkun si Latus ma muse, “Antong tutu do ho raja?” Didok Jesus ma, “Tutu, songon na nidokmi ma, raja do ahu. Alani i do ahu tubu jala ro tu portibi on, ai ingkon paboaonku do hasintongan i. Manang ise na mangoloi hasintongan i, tangihononna do soarangku.”​—Johannes 18:37.

Nunga hea didok Jesus tu si Tomas, “Ahu do dalan dohot hasintongan dohot hangoluan.” Saonari dipaboa Jesus ma tu si Latus na laho paboahon “hasintongan” do ibana ro tu tano on, i ma hasintongan taringot tu Harajaonna. Dipaboa Jesus do taringot i sian nasa gogona nang pe ingkon mate ibana. Disungkun si Latus ma muse, “Aha ma i hasintongan i?” Alai ndang dipaima ibana Jesus mangalusi. Ai nunga diboto ibana ndang marsala Jesus.​—Johannes 14:6; 18:38.

Dung i didapothon si Latus ma angka halak na di luar ni jabuna. Olo do ra jongjong Jesus di lambungna. Didok si Latus ma tu angka malim kepala dohot tu angka halak i, “Ndang adong dapot ahu sala ni baoa on.” Gabe muruk ma nasida mambege i, didok ma, “Dibahen ibana do hagunturon tu bangso on marhite pangajarionna di saluhut Judea, mulana di Galilea jala saonari nunga sahat tuson.”​—Lukas 23:4, 5.

Marsuraki ma angka malim kepala dohot pangituai. Gabe sungkun-sungkun ma roha ni si Latus boasa mansai sogo roha ni halak Jahudi tu Jesus. Didok ibana ma tu Jesus, “Na so dibege ho do godang ni hata ni nasida laho mangalo ho?” (Mateus 27:13) Alai ndang olo Jesus mangalusi. Gabe longang ma roha ni si Latus mangida i.

Sasintongna, ndang olo si Latus manguhumi Jesus. Tingki didok halak Jahudi manggunturi Jesus ‘mulai sian Galilea’, gabe dirimpu si Latus ma ibana halak Galilea. Alani i, disuru ibana ma asa diboan Jesus tu si Herodes Antipas (anak ni si Herodes Agung). Ai di Jerusalem do si Herodes Antipas tingki Paska. Ibana do na mamarenta di Galilea jala ibana do na mamonggol ulu ni si Johannes Pandidi. Nunga dibege ibana na boi Jesus mambahen tanda halongangan manang mukjizat. Gabe dirimpu ibana ma Jesus do si Johannes Pandidi naung hehe sian hamatean.​—Lukas 9:7-9.

Las ma roha ni si Herodes ala nunga pajumpang dohot Jesus. Alai ndang na laho mangurupi Jesus ibana, manang naeng mamboto atik na tutu Jesus marsala. Holan naeng ‘idaonna do Jesus mambahen tanda halongangan’. (Lukas 23:8) Alai ndang dibahen Jesus tanda halongangan di jolo ni si Herodes. Jala tingki disungkuni si Herodes Jesus, ndang olo ibana mangalusi. Gabe jut ma roha ni si Herodes dohot angka tentarana. Dipangkehon ma tu Jesus baju na arga jala “direhei” ma ibana. (Lukas 23:11) Dung i disuru si Herodes ma asa diboan muse Jesus tu si Latus. Marmusu do saleleng on si Herodes dohot si Latus. Alai gabe mardongan ma nasida tingki i.

Dung mulak muse Jesus tu si Latus, dijou ibana ma angka malim kepala, pamimpin ni halak Jahudi, dohot angka halak. Didok ma tu nasida, “Di jolomuna do hupareso ibana, alai ndang adong jumpangku sala ni ibana songon na nidokmuna i. Si Herodes pe songon i, disuru do muse ibana mulak tu hami, ndang adong diulahon halak on manang aha pe na mambahen ibana patut diuhum mate. Alani i, linsinganku ma ibana dung i paluaonku ma.”​—Lukas 23:14-16.

Naeng dipalua si Latus do Jesus. Ai diboto ibana do, ala na mangiburu do angka malim umbahen na ditangkup Jesus. Asing ni i, tingki hundul ibana manguhumi Jesus, disuru tunggane boruna ma sasahalak mandok, “So tung dibahen ho manang aha tu halak na mangulahon na sintong i. Ai susa do ahu borngin on dibahen nipingku alani ibana.”​—Mateus 27:19.

Boi do si Latus paluahon Jesus?

Dipangido godang halak do asa dipamate Jesus. Didok si Latus ma tu nasida, “Ndang adong jumpangku sala ni ibana songon na nidokmuna i. Si Herodes pe songon i.” (Lukas 23:14, 15) Ala naeng dipalua si Latus Jesus, didok ibana ma muse, “Somal do hupalua tu hamu sasahalak tingki Paska. Lomo do rohamuna molo hupalua Raja ni halak Jahudi i?”​—Johannes 18:39.

Diboto si Latus do adong sahalak parjahat na dipenjara na margoar si Barabas. Sahalak pangarampok, panggunturi, jala pambunu do ibana. Didok si Latus ma, “Ise ma dipangido rohamuna paluaonku, si Barabas do manang Jesus na digoari Kristus?” Alai dijujui angka malim kepala do angka halak i asa mangido si Barabas na dipalua. Tingki disungkun si Latus, “Ise ma dipangido rohamuna paluaonku di hamu sian na dua on?” Dialusi nasida ma, “Si Barabas.”​—Mateus 27:17, 21.

Gabe didok si Latus ma, “Antong aha ma bahenonku tu Jesus na digoari Kristus on?” Dialusi nasida ma, “Uhum mate ibana tu hau!” (Mateus 27:22) Dipangido angka halak i do asa dipamate Jesus, hape ndang marsala ibana. Alani i didok si Latus ma, “Boasa? Ai hajahaton aha diulahon ibana? Ndang adong dapothu manang aha na mambahen ibana patut diuhum mate. Alani i, linsinganku ma ibana dung i paluaonku ma.”​—Lukas 23:22.

Nang pe lomo roha ni si Latus asa malua Jesus, alai sai didok angka halak i do, “Uhum mate ibana tu hau!” Ai nunga dijujui angka pamimpin agama nasida mandok songon i. (Mateus 27:23) Naeng dibunu nasida do Jesus nang pe ndang parjahat manang pambunu ibana. Olo do ra disi angka sisean ni Jesus tingki i. Alai sai martabuni-tabuni do nasida ala mabiar. Hape lima ari naung salpu, denggan do dijalo nasida Jesus di Jerusalem songon sahalak Raja.

Diboto si Latus ma na so boi ibana paluahon Jesus. Alani i, disunsi ibana ma tanganna di jolo ni angka halak jala didok ma, “Ndang dohot ahu martanggung jawab tu hamamate ni baoa on. Marsapata tu hamu ma i.” Alai didok angka halak i do, “Marsapata tu hami dohot tu pinomparnami ma mudarna.”​—Mateus 27:24, 25.

Dioloi si Latus do pangidoan ni nasida, nang pe diboto ibana ndang marsala Jesus. Dipalua ibana ma si Barabas jala disuru ma Jesus asa dilinsingi.

Dung dilinsingi Jesus, diboan angka tentara ma ibana tu jabu ni Gubernur. Marpungu ma angka tentara i laho manginsaki Jesus. Didandan nasida ma suga-suga gabe songon mahkota jala dibahen ma i tu ulu ni Jesus. Dilehon nasida ma muse hau-hau tioponna, jala dipangkehon ma jubah na rara tu ibana na somal dipangke angka pamimpin. Didok nasida ma, “Horas, Raja ni Jahudi!” (Mateus 27:28, 29) Asing ni i, ditijuri nasida ma Jesus jala dipastapi bohina. Dung i, dibuat nasida ma hau-hau i sian tangan ni Jesus jala diantuk ma uluna. Gabe lam bagas ma masuk suga-suga i tu ulu ni Jesus.

Alai sai sip do Jesus. Gabe longang ma roha ni si Latus mangida i. Diboan ibana ma Jesus tu angka halak i jala didok ma, “Ida hamu ma! Huboan do ibana tuson, asa diboto hamu ndang adong dapothu diulahon ibana na sala.” Dirimpu si Latus do gabe asi roha ni nasida mangida Jesus. Ai nunga marlungkaan sude dagingna. Didok ibana ma, “Ida hamu ma baoa on!”​—Johannes 19:4, 5.

Ala asi roha ni si Latus tu Jesus, mangelek do ibana mandok hatana tu nasida. Ai sai sip do Jesus nang pe nunga marlungkaan dagingna.

Sai dipangido angka malim kepala do asa diuhum mate Jesus, nang pe nunga dipungkuli jala direhei Jesus. Jala sai naeng dipalua si Latus do Jesus. Alai sai didok nasida do, “Uhum mate ibana tu hau! Uhum mate ibana tu hau!” Didok si Latus ma, “Hamu ma na mamboan ibana jala na manguhum mate ibana, ai ndang adong dapothu diulahon ibana na sala.”​—Johannes 19:6.

Ndang porsea si Latus tingki didok halak Jahudi na mangalo Kesar Jesus. Alani i didok halak Jahudi ma, “Adong do patiknami. Jala mangihuthon patiknami, ingkon mate do ibana. Ai didok ibana do dirina anak ni Debata.” (Johannes 19:7) Nunga hea didok nasida songon i tingki diboan nasida Jesus tu Sanhedrin. Jala on dope hea dibege si Latus songon i.

Masuk ma muse si Latus tu jabuna. Jala dilului ibana ma muse dalan laho paluahon Jesus. Olo do ra ala diingot ibana nipi ni tunggane boruna. (Mateus 27:19) Na diboto si Latus, halak Galilea do Jesus. Hape dibege ibana sian halak Jahudi, didok Jesus do dirina “anak ni Debata”. (Lukas 23:5-7) Gabe didok si Latus ma tu Jesus, “Sian dia do haroroanmu?” (Johannes 19:9) Sungkun-sungkun do roha ni si Latus atik na tutu do Jesus sian surgo.

Nunga tangkas dipaboa Jesus tu si Latus na raja do ibana jala ndang sian portibi on Harajaonna. Alani i, ndang dialusi Jesus be sungkun-sungkunna i. Gabe hansit ma roha ni si Latus jala didok ma, “Ndang alusanmu ahu? Ndang diboto ho na marhuaso ahu paluahon ho dohot manguhum mate ho?”​—Johannes 19:10.

Didok Jesus ma, “Ndang marhuaso ho tu ahu, molo so Debata na mangalehon huaso i tu ho. Alani i, umbalga do dosa ni halak na pasahathon ahu tu ho.” (Johannes 19:11) Olo do ra si Kayapas, angka malim, dohot si Judas Iskariot maksud ni Jesus. Umbalga do dosa ni nasida sian dosa ni si Latus.

Gabe longang ma roha ni si Latus mambege hata ni Jesus i. Jala mabiar do ibana atik na tutu Jesus ro sian surgo. Alani i, naeng dipalua ibana ma muse Jesus. Alai dipabiar-biar halak Jahudi ma ibana. Didok ma, “Molo dipalua ho ibana, ndang dongan ni Kesar ho. Manang ise na mambahen dirina raja, na mangalo Kesar do i.”​—Johannes 19:12.

Dipajongjong si Latus ma muse Jesus di jolo ni angka halak. Hundul ma ibana jala didok ma, “Ida hamu ma! On do rajamuna!” Alai ndang asi roha ni halak Jahudi tu Jesus. Didok nasida ma, “Pamate ma ibana! Pamate ma ibana! Uhum mate ma ibana tu hau!” Didok si Latus ma, “Pamateonku ma rajamuna on?” Sasintongna ndang lomo roha ni halak Jahudi tu pamarentaon ni halak Rom. Alai didok angka malim kepala ma, “Holan Kesar i do rajanami.”​—Johannes 19:14, 15.

Ala sai didok halak Jahudi songon i, diloas si Latus ma asa diuhum mate Jesus. Dibungka angka tentara ma jubah na rara i sian Jesus jala dipangkehon ma abit luarna. Dung i, disuru ma Jesus mamboan hau na gabe ingananna digantungkon.

Ari Jumat tanggal 14 Nisan do tingki i, jala nunga arian. Nunga hurang modom Jesus mulai sian ari Kamisna i, hansit do ditaon ibana ala dipungkuli dohot dilinsingi. Alani i, ndang margogo be ibana mamboan hau na borat i. Gabe dipaksa angka tentara ma si Simon na sian Kirene mamboan i. Ai pas lewat do ibana tingki i. Godang ma halak na mangihuthon ibana. Adong ma na manompuhi andorana alani lungun ni rohana mamereng na masa i.

Didok Jesus ma tu angka borua na tangis-tangis i, “Unang ma ahu tangisi hamu ale angka boru Jerusalem. Alai tangisi hamu ma dirimuna dohot ianakhonmuna. Ai na ro ma tingkina dohonon ni halak ma, ‘Marlas ni roha ma borua na mandul, na so hea tubu-tubuan jala na so hea patarushon!’ Dohonon ni nasida ma tu angka dolok, ‘Tipa ma hami!’ dohot tu angka dolok-dolok, ‘Hungkupi ma hami!’ Ai molo songon on do dibahen nasida tingki mangolu dope hau i, lam boha ma molo dung mahiang hau i?”​—Lukas 23:28-31.

Bangso Israel do maksud ni Jesus. Dos songon hau na laho mate do nasida. Alai ndang mate nasida, ala disi dope Jesus dohot angka siseanna. Dung mate Jesus jala ndang diihuthon angka siseanna be agama Jahudi, gabe ndang marale-ale be bangso i tu Debata dos songon hau na mate. Mangangguhi ma nasida tingki ro tentara Rom manaluhon bangso i!

Diboan ma Jesus tu inganan na margoar Golgata manang Inganan ni Tangkurak. Ndang dao inganan i, ai boi do angka borua “manatap-natap sian na dao”. Disi ma Jesus diuhum mate rap dohot dua parjahat.​—Markus 15:40.

Dung i, dibungka ma baju ni nasida jala dilehon ma anggur na marsampur mir dohot pogu. Olo do ra angka borua na di Jerusalem na mambahen i. Dilehon nasida ma i tu angka tentara Rom laho diinum angka halak na laho diuhum mate, asa unang pahansithu dihilala nasida. Tingki didai Jesus i, ndang olo ibana manginum. Boasa? Ai naeng hilalaonna do na hansit i, laho patuduhon na boi ibana martahan sahat tu na mate.

Dipapeak ma Jesus di sada hau. (Markus 15:25) Dung i dipakkuhon ma tanganna dohot patna tu hau i. Hansit situtu ma dihilala ibana. Tingki dipajongjong hau i, lam hansit ma dihilala ibana ala gabe ditarik borat ni dagingna ma angka lukana. Alai ndang muruk ibana tu angka tentara i. Didok ibana do, “Ale Amang, sesa ma dosa ni nasida, ai ndang diboto nasida na binahen ni nasida i.”​—Lukas 23:34.

Tingki diuhum mate halak Rom sasahalak, disurat nasida do di papan alani aha ibana diuhum. Dung i dibahen ma i di ginjang ni uluna. Alani i, disurat si Latus ma, “Jesus halak Nasaret Raja ni Halak Jahudi.” Disurat do i di bahasa Heber, Latin, dohot Junani asa boi sude halak mangantusi. On patuduhon na jut situtu roha ni si Latus ala dipamate halak Jahudi Jesus. Gabe didok angka malim kepala ma, “Unang ma surat, ‘Raja ni Halak Jahudi’, alai surat ma, ‘Didok ibana do dirina Raja ni Halak Jahudi.’” Alai ndang olo be si Latus manangihon nasida. Didok ibana ma, “Naung husurathon i, hot ma i songon i.”​—Johannes 19:19-22.

Sai dipandok angka malim ma hata na so tutu taringot tu Jesus songon na didok nasida di jolo ni Sanhedrin. Alani i, gabe direhei angka halak na lewat ma Jesus. Didok ma, “E ho na naeng mangarumpakkon bagas joro jala pajongjongkon i muse di bagasan tolu ari, palua ma dirim, turun ma ho sian hau partinaonan i!” Dipandok angka malim kepala dohot siboto surat do muse, “Molo Kristus do ibana, Raja ni Israel, turun ma ibana sian hau partinaonan i, asa taida jala porsea ma hita tu ibana.” (Markus 15:29-32) Gariada dohot do dua parjahat na di siamun dohot di hambirang ni Jesus manginsaki ibana. Hape ndang marsala ibana.

Dohot do opat tentara ni Rom na di jolo ni Jesus manginsaki ibana. Huhut manginum anggur, direhei nasida ma Jesus. Hape diboto nasida do ndang boi Jesus turun laho mambuat i. Didok nasida ma muse, “Molo ho do Raja ni Halak Jahudi i, palua ma dirim.” (Lukas 23:36, 37) Direhei jala disiksa nasida do halak na gabe dalan, hasintongan, dohot hangoluan. Alai sabar do Jesus mambege i. Ndang olo ibana mamburai halak Jahudi, angka tentara Rom, dohot dua parjahat na rap diuhum mate dohot ibana.

Dibuat angka tentara i ma abit luar ni Jesus. Diribaki ma i gabe opat. Dung i dibahen nasida ma undi laho mambagi i. Dibuat nasida ma muse abitna na asing na ditonun “sian ginjang sahat tu toru, ndang marpanjaruman”. Didok nasida ma, “Unang ma taribaki abit on. Tabahen ma undi laho manontuhon manang di ise abit on.” Gabe saut ma surirang na mandok, “Dibagi nasida do angka [abithu], mandabu [undi] do nasida taringot tu bajubajungku.”​—Johannes 19:23, 24; Psalmen 22:19.

Dung piga-piga jom, diboto sahalak parjahat i ma na tutu Jesus i raja. Dimuruki ibana ma parjahat na sada nai. Didok ma, “Na so dihabiari ho do Debata? Dos do panguhuman na tu ho dohot tu ibana. Ai na patut do hita hona uhum. Tajalo do upa ni pambahenanta, alai anggo ibana ndang adong diulahon na sala.” Dung i didok ma tu Jesus, “Ingot ma ahu molo dung masuk ho tu Harajaonmi.”​—Lukas 23:40-42.

Didok Jesus ma, “Tutu do na hudok on tu ho sadari on, rap do ho dohot ahu di Paradeiso.” (Lukas 23:43) Dijanjihon Jesus do tu parjahat on hangoluan di paradeiso na di tano on. Ndang sarupa na didok Jesus on tu janjina tu angka apostel na laho rap mamarenta dohot ibana di surgo. (Mateus 19:28; Lukas 22:29, 30) Olo do ra halak Jahudi parjahat i. Alani i, diingot ibana ma Porlak Eden na dilehon Debata tu si Adam, si Hawa, dohot pinomparna. Saonari gabe mangkirim ma ibana laho mangolu disi.

Hira-hira “jam 12 arian” ma saonari. Mangkolom ma sude inganan i “sahat tu jam tolu botari”. (Markus 15:33) Ndang alani gerhana matahari on. Ai Paska do tingki i jala torang do ari tingki Paska alani bulan purnama. Asing ni i, holan piga-piga menit do somalna gerhana matahari. Tangkas ma, Debata do na mambahen mangkolom inganan i!

Gabe mabiar ma angka halak na mangarehei Jesus mangida i. Saleleng na golap i, ro ma opat borua tu hau inganan ni Jesus dipakkuhon. Nasida, i ma omak ni Jesus, si Salome, si Maria Magdalena, dohot si Maria omak ni si Jakobus na Umposo.

Jongjong do apostel Johannes rap dohot omak ni Jesus di jonok ni “hau partinaonan”. Diida si Maria ma anakna i hansitan. Songon na ditusuk “sada podang na ganjang” ma dihilala ibana. (Johannes 19:25; Lukas 2:35) Nang pe hansit dihilala Jesus, alai dipingkiri do omakna. Dibahen ibana ma nasa gogona laho mandok tu omakna, “Inang, i ma anakmu!” Jala didok ma tu si Johannes, “I ma inangmu!”​—Johannes 19:26, 27.

Nunga mabalu ra omak ni Jesus tingki i. Jala diboto Jesus do ndang porsea dope angka anggina tu ibana. Alani i ma dipangido ibana asa diparrohahon apostel Johannes omakna. Ai ndang holan na ringkot di pardagingon na diparrohahon Jesus. Alai dipingkiri do songon dia asa tongtong togu haporseaon ni omakna. Sitiruon do on!

Dung torang muse ari, didok Jesus ma, “Mauas ahu.” Gabe saut ma sada surirang taringot tu Messias. (Johannes 19:28; Psalmen 22:16) Diboto Jesus do ndang na laho urupan ni Amana ibana tingki i, laho patuduhon na boi do ibana martahan sahat tu ujungna. Dung i didok Jesus ma muse, “Eli, Eli, lama sabakhtani?” lapatanna, “Debatangku, Debatangku, boasa tadingkononmu ahu?” Gabe adong ma halak na disi mandok, “Dijou ibana do si Elia.” Dung i marlojong ma sahalak sian nasida mambuat bunga karang. Disornophon ma i tu anggur na asom jala dibahen ma i tu hau-hau laho dilehon tu Jesus. Alai didok na asing ma, “Pasombu ma jolo! Taida ma manang na ro do si Elia paturunhon ibana.”​—Markus 15:34-36.

Dung i didok Jesus ma, “Nunga marujung!” (Johannes 19:30) Nunga diulahon Jesus sude na dipangido Debata. Ujungna didok Jesus ma, “Ale Amang, tu tanganmu ma hupasahat hosangkon.” (Lukas 23:46) Pos do roha ni Jesus na laho paheheon ni Jahowa ibana. Dung didok songon i, mate ma ibana.

Dung i masa ma gempa na gogo jala marbolaan ma angka dolok batu. Alani gogo ni gempa i, gabe marbungkaan ma angka kuburan na di Jerusalem jala marsampatan ma angka bangke na di bagasanna. Diida angka halak do na masa i, dung i laho ma nasida tu “kota na badia” laho paboahon na masa.​—Mateus 12:11; 27:51-53.

Tingki mate Jesus, ribak dua ma tire na di bagas joro sian ginjang sahat tu toru. Tire on ma na adong di tonga-tonga ni Inganan na Badia dohot Inganan na Mansai Badia. On patuduhon na muruk situtu Debata tu angka halak naung mambunu Anakna. Jala on pe patuduhon naung boi do angka jolma masuk tu surgo na dos songon Inganan na Mansai Badia.​—Heber 9:2, 3; 10:19, 20.

Mabiar ma sude halak. Gabe didok sahalak komandan ni tentara na jongjong di jolo ni Jesus ma, “Tutu do ibana Anak ni Debata.” (Markus 15:39) Olo do ra diida ibana tingki diadili Jesus di jolo ni si Latus. Saonari gabe pos ma rohana na so marsala Jesus jala tutu do ibana Anak ni Debata.

Dung diida angka halak na masa on, mulak ma nasida tu jabuna huhut “ditompuhi andorana” ala maila jala lungun rohana. (Lukas 23:48) Godang do na mangida sian na dao tingki na mate i Jesus. Adong do sian nasida angka borua na hea marbarita rap dohot Jesus.

Ari Jumat botari tanggal 14 Nisan do tingki i. Naeng tanggal 15 Nisan nama satongkin nai. Nunga mate be Jesus. Alai mangolu dope dua parjahat na rap diuhum mate dohot ibana. Mangihuthon Patik, ndang boi ‘marborngin bangke gantung di hau’. Alai ingkon dikubur do i sadari i.​—5 Musa 21:22, 23.

Di ari Jumat i do diparade angka halak sipanganon. Jala di ari i do nasida pasaehon ulaonna. Alana dung bonom mata ni ari, dimulai ma ari Sabbat na “balga”. (Johannes 19:31) Tanggal 15 Nisan, i ma ari parjolo sian pitu ari Perayaan Roti na So Marragi. Di tingki i, diulahon ma i pas di ari Sabbat mingguan. Jala ganup ari parjolo sian perayaan i pe didok do Sabbat. (3 Musa 23:5, 6) Ala adong dua Sabbat di ari i, gabe didok ma i Sabbat na balga.

Alani i, dipangido halak Jahudi ma tu si Latus asa diponggolhon pat ni Jesus dohot pat ni dua parjahat i. Ai gabe maol ma nasida marhosa molo dibahen songon i, jala hatop ma mate. Dung i diponggol angka tentara i ma pat ni dua parjahat i. Ala nunga mate Jesus, ndang diponggol nasida be patna. Gabe saut ma surirang di Psalmen 34:21 na mandok, “Ibana mangaramoti holiholina sudena, ndang maponggol nanggo sada.”

Laho mamboto atik na tutu do Jesus nunga mate, ditullang sahalak tentara ma hujurna tu rusuk ni Jesus. Gabe kaluar ma, “mudar dohot aek”. (Johannes 19:34) Saut ma muse surirang na mandok, “Paberengberengon nasida ma ahu, naung tinullang nasida.”​—Sakaria 12:10.

Adong ma “sahalak baoa na mora” na margoar si Josep sian Arimatea. Sahalak anggota ni Sanhedrin do ibana jala diida ibana do tingki dipamate Jesus. (Mateus 27:57) “Burju do ibana jala diulahon na sintong.” Ai maima-ima do ibana tu “Harajaon ni Debata”. Sasintongna, “sisean ni Jesus do ibana alai ndang dipaboa ibana tu halak na asing, ala mabiar do ibana tu halak Jahudi”. Jala ndang lomo rohana diuhum mate Jesus. (Lukas 23:50; Markus 15:43; Johannes 19:38) Dibaranihon ibana ma mangido bangke ni Jesus tu si Latus. Disungkun si Latus ma tu komandan ni tentara atik na tutu Jesus mate. Dung i, diloas ma si Josep mambuat bangke ni Jesus.

Nunga dituhor si Josep abit linen na arga jala na ias laho mambungkus bangke ni Jesus. Dung i dipaturun ibana ma bangke ni Jesus sian hau. Dohot do si Nikodemus mangurupi ibana. “Ibana do na hea manjumpangi Jesus borngin-borngin.” (Johannes 19:39) Diboan ibana ma hira-hira 30 kilogram miak mir na dicampur dohot gaharu. Dibahen ma i tu abit linen i jala dibungkus ma bangke ni Jesus. Ai songon i do hasomalan ni halak Jahudi.

Adong do kuburan na so hea dipangke di liang batu puna ni si Josep. Dipeakkon ma bangke ni Jesus disi. Digulingkon nasida ma batu na balga manutup kuburan i. Hatop do i diulahon nasida, ai ari Sabbat nama satongkin nai. Diurupi si Maria Magdalena dohot si Maria omak ni si Jakobus na Umposo do nasida. Pintor mulak ma nasida tu jabuna “paradehon angka rempah-rempah dohot miak na angur” na laho dibahen tu bangke ni Jesus dung sae ari Sabbat.​—Lukas 23:56.

Marsogotna i didok angka malim kepala dohot halak Parise ma tu si Latus, “Tuan, huingot hami do didok panipu i tingki mangolu dope ibana, ‘Hehe do ahu di ari patoluhon.’ Alani i, parentahon ma asa dijaga kuburan i sahat tu ari patoluhon, asa unang ro angka siseanna manangko bangkena jala dohononna ma tu angka halak, ‘Nunga hehe ibana sian na mate!’ Dung i, gabe umbalga ma gabus na parpudi on sian na parjolo i.” Didok si Latus ma, “Boan hamu ma panjaga tusi. Manat ma jaga hamu kuburan i.”​—Mateus 27:63-65.

Di ari Minggu manogot, laho ma si Maria Magdalena, si Maria omak ni si Jakobus, dohot angka borua na asing mamboan angka rempah-rempah na laho dibahen tu bangke ni Jesus. Didok nasida ma, “Ise ma manggulingkon batu sian kuburan i di hita?” (Markus 16:3) Alai nunga kosong jala tarbungka be kuburan i alani gempa bumi. Jala nunga digulingkon suru-suruan batu na manutup kuburan i.