Referensi tu Parpunguan Hangoluan dohot Pangkobasion na Laho Diparsiajari
5-11 SEPTEMBER
ARTA NA ARGA NA ADONG DI BIBEL | 1 RAJA-RAJA 9-10
“Mangargai Bisuk na sian Jahowa”
w99-IN 1/7 30 ¶6
Mangida Bagas ni Bisuk ni Jahowa
Tikki ro Ratu Syeba mandapotton si Salomo, dibahen ibana do “akka sukkun-sukkun na maol” tu si Salomo. (1 Raja-Raja 10:1) Sarupa do bahasa Heber ni hata sukkun-sukkun na maol di ayat on, tu hata “tudos-tudos” na di Psalmen 49:4. Alai dang sarupa on tu tudos-tudos manang teka-teki na biasa. Alana di bahasa Heber, hata tudos-tudos na di Psalmen 49:4 sarupa do lapatanna tu sukkun-sukkun na maol. Misalna taringot dosa, hamatean dohot tobusan. Jadi akka sukkun-sukkun na penting do na dibahas Ratu Syeba dohot si Salomo tikki i, lao mamboto sadia bagas bisuk ni si Salomo. Didok Bibel, “Disukkun ibana ma sude sukkun-sukkun na adong di rohana. Dialusi si Salomo ma sude sukkun-sukkun ni ratu i. Ai dang adong na maol sukkun-sukkunna i di raja i.”—1 Raja-Raja 10:2b, 3.
w99-IN 1/11 20 ¶6
Manfaatna Molo Murah Hati
Marbisuk hian do si Salomo diida Ratu Syeba. Gabe longang ma rohana jala serep ma rohana mandok, “Marlas ni roha ma akka pejabat dohot akka parkarejom na toktong rap dohot ho ganup ari. Ai boi do begeon ni nasida akka podam!” (1 Raja-Raja 10:4-8) Dang ala tabo parngoluon di istana makana didok Ratu Syeba marlas ni roha akka pejabat ni si Salomo dohot akka parkarejona. Alai ala na boi do diida nasida langsung na marbisuk si Salomo dibahen Debata. Gabe sitiruon do Ratu Syeba tu akka naposo ni Debata saonari on. Porlu do tajaha jala taulahon poda na dilehon Jahowa dohot na dilehon Anakna Jesus Kristus, asa gabe halak na marbisuk hita.
w99-IN 1/7 30-31
Mangida Bagas ni Bisuk ni Jahowa
Ala diida Ratu Syeba massai marbisuk Raja Salomo jala mamora hian ibana, “gabe longang situtu ma rohana”. (1 Raja-Raja 10:4, 5) Piga-piga halak mandok, sappe “dang boi marhosa” Ratu Syeba i alani longangna. Jala adong sahalak sarjana na mandok, sappe pingsan do ibana alani longangna. Dang soal aha na masa tikki i, pasti longang situtu do roha ni Ratu Syeba mangida i sude. Asing ni i, didok Ratu Syeba do marlas ni roha akka parkarejo ni si Salomo. Alana boi dibege nasida langsung poda sian Raja Salomo. Jala dipuji Ratu Syeba do Jahowa ala dibahen Ibana si Salomo gabe raja. Dilehon Ratu Syeba do muse akka hadiah na massai arga tu si Salomo. Holan mas na dilehon ibana pe molo dihepengkon tu hepeng saonari, totalna hira-hira 40 juta dolar AS. Jala Raja Salomo pe dilehon ibana do hadiah tu Ratu Syeba, i ma “sude pangidoan ni Ratu Syeba”.—1 Raja-Raja 10:6-13.
Arta na Adong di Bibel
w08-IN 1/11 22 ¶4-6
Diboto Hamu do?
Sadia godang do sebenarna mas ni si Salomo?
Didok di Bibel, dilehon si Hiram raja na sian Tirus do opat ton mas tu Raja Salomo. Dilehon Ratu Syeba do tong mas tu si Salomo nasa i godangna. Jala lobi sian 15 ton mas na diboan akka kapal ni si Salomo sian Opir. Didok di Bibel, “Ganup taon diboan do 666 talenta mas tu si Salomo”, manang lobi sian 25 ton. (1 Raja-Raja 9:14, 28; 10:10, 14) Memang tutu do adong nasa i godang ni mas di tikki i? Sadia godang do biasana mas sippanan ni harajaon di jaman i?
Adong sada inskripsi kuno na manuratton taringot i. Didok akka pakar boi do dihaporseai inskripsi i. Dipaboa di inskripsi i, dilehon si Firaun Tutmose III na sian Mesir do (milenium kedua SM) 13,5 ton mas tu kuil Amun-Ra di Karna. Di abad na paualuhon SM, dijalo Raja Asiria Tiglath-pileser III do lobi sian opat ton mas na gabe setoran sian Tirus. Jala nasa i do tong godang ni mas na dipelehon Sargon II tu akka dewa Babilon. Didok muse di inskripsi i, ganup taon dibuat Raja Filipus II na sian Makedonia (359-336 SM) do lobi sian 28 ton mas sian tambang Pangaeum di Trake.
Tikki ditaluhon Aleksander Agung (336-323 SM) kota Persia na di Susa, adong hira-hira 1.180 ton mas na dibuat ibana sian i. Jala hampir 7.000 ton mas na dibuat ibana sian sude luat na di Persia. Jadi dang sadia dope godang ni mas ni si Salomo dibandingkon tu godang ni mas ni si Aleksander Agung.
12-18 SEPTEMBER
ARTA NA ARGA NA ADONG DI BIBEL | 1 RAJA-RAJA 11-12
“Malo ma Hamu Mamillit Halak na Lao Gabe Pasanganmuna”
“Ise na Mangalehon Dirina tu Jahowa!”
7 Taingot ma Raja Salomo. Tingki poso dope ibana, solhot do parale-aleonna tu Jahowa. Dibahen Jahowa do ibana gabe marbisuk, jala disuru do ibana paulihon bagas joro di Jerusalem. Alai dung leleng, sega do parale-aleonna tu Jahowa. (1 Raj. 3:12; 11:1, 2) Boasa? Di patik ni Debata, dipodai do angka raja asa “unang godang niolina, ai angka i do na mangela rohana sian Jahowa”. (5 Mus. 17:17, Bibel siganup ari) Hape, adong do 700 istrina jala 300 gundikna! (1 Raj. 11:3) Jadi, ndang diihuthon si Salomo patik i. Ala sian bangso na asing do godangan istrina i, gabe dohot do si Salomo manomba gana-ganaan. Jadi, mangalo patik ni Debata do si Salomo ala mangoli tu angka borua sian bangso na asing.—5 Mus. 7:3, 4.
Songon dia Hamu Boi Manjaga Roha?
6 Lomo do roha ni Sibolis asa sarupa hita dohot ibana mangalo Jahowa. Jala dijujui ibana do asa taharingkothon dirinta sandiri. Nang pe ndang boi dipaksa Sibolis hita asa songon ibana, alai marsitutu do ibana mambahen marragam cara asa saut lomo ni rohana. Umpamana, dirajai Sibolis do angka halak na di portibi on. (1 Joh. 5:19) Lomo do roha ni Sibolis asa sega ‘hasomalanta na denggan’ manang ‘parangenta’ molo mardongan hita dohot angka halak di portibi on. (1 Kor. 15:33; surat na di toru.) Songon i ma na masa tu Raja Salomo. Dioli ibana do godang angka borua na so manomba Jahowa. Alani i, gabe dirajai angka istrina i ma ibana. Ujungna gabe dao ma ibana sian Jahowa.—1 Raj. 11:3.
“Ise na Mangalehon Dirina tu Jahowa!”
9 Didok di Bibel, “tarrimas ma Jahowa mida raja Salomo, ala marbalik rohana sian Jahowa”. Sian on taboto, ndang lomo roha ni Jahowa mangida na mardosa. Alai sasintongna, marsitutu do Jahowa mangurupi si Salomo. Dipatuduhon Jahowa do diriNa “pola dua hali” tu si Salomo. “Nunga pola [didokkon] Ibana tu rajai taringot tu hata on, na so tupa ihuthononhon angka debata sileban; alai ndang diradoti ibana tona ni Jahowa.” Ujungna, gabe sogo ma roha ni Jahowa mangida si Salomo jala ndang diurupi Jahowa be ibana. Pamarentaon ni angka pinomparna pe ndang be mamarenta tu saluhut bangso Israel. Jala gok do parsoalan ni nasida saleleng marratus taon.—1 Raj. 11:9-13.
Arta na Adong di Bibel
Olo do Ibana Diurupi Jahowa?
Dipapungu si Rehabeam ma tentarana laho marporang tu sampulu marga na mangalo nasida. Alai, disuru Jahowa ma panurirang Semaya laho mandok tu nasida, “Unang ma laho hamu marporang mangalo angka hahaanggimuna halak Israel, mulak be ma tu jabuna. Ai Ahu sandiri do mambahen umbahen na masa i.”—1 Raj. 12:21-24, Bibel siganup ari.
Mura do si Rehabeam mangoloi Jahowa? Boha ma annon pandapot ni halak taringot ibana? Nunga dipaboa ibana, laho uhumonna do nasida mamangke “linsinglinsing na marsugasuga”. Hape, ndang adong dibahen ibana manang aha pe tu angka na mangalo i! (Bandingkon 2 Kronika 13:7.) Manang aha pe annon pandapot ni halak taringot ibana, alai ‘ditangihon nasida do hata ni Jahowa, laho ma nasida mulak hombar tu hata ni Jahowa’.
Parsiajaranna tu hita: Marbisuk do hita molo taoloi Debata, nang pe adong na mangalesengi hita. Sai dipasu-pasu Debata do hita molo unduk tu Ibana.—5 Mus. 28:2.
Ala unduk si Rehabeam, pasu-pasu aha do dapotna? Tongtong do ibana gabe raja di Juda dohot di Benjamin. Dipajongjong do kota-kota na baru, jala dibahen do piga-piga kota gabe lam togu. (2 Kron. 11:5-12) Alai na rumingkot, dioloi ibana do parenta ni Jahowa. Alani i, ro ma piga-piga halak sian harajaon sampulu marga i mangurupi ibana mangulahon panombaon na sintong. Alana, nunga manomba gana-ganaan be godangan halak disi. (2 Kron. 11:16, 17) Jadi saleleng unduk si Rehabeam tu parenta ni Jahowa, hot do harajaonna.
19-25 SEPTEMBER
ARTA NA ARGA NA ADONG DI BIBEL | 1 RAJA-RAJA 13-14
“Boasa Ikkon Sai Merasa Puas Hita jala Sai Talului Petunjuk ni Jahowa?”
w08-IN 15/8 8 ¶4
Toktong ma Ihutton Petunjuk ni Jahowa
4 Dung i didok si Jerobeam ma tu naposo ni Debata na sittong i, “Tu jabu ma jolo hita, asa rap mangan hita. Adong naeng lehonokku tu ho.” (1 Raj. 13:7) Jadi aha ma na diulahon naposo ni Debata na sittong i? Dioloi ibana do hata ni si Jerobeam? Hape baru dope ibana paboahon barita panguhuman tu si Jerobeam? (Ps. 119:113) Manang ikkon tolakonna do pangidoan ni raja i? Hape hira na manolsoli do raja i idaon. Ala na mora do si Jerobeam, pasti boi do lehononna hadiah na arga tu akka halak. Jadi molo holongan di arta do naposo ni Debata na sittong i, pasti oloanna do pangidoan ni raja i. Alai nungnga didok Jahowa hian tu naposo ni Debata na sittong i, “Unang ma mangallang roti manang minum ho disi, jala unang ma sian dalan haroroanmi ho mulak.” Alani i, didok naposo ni Debata na sittong i ma tu si Jerobeam, “Tung dilehon ho pe satonga hamoraonmi tu au, dang olo au ro tu jabum. Jala dang olo au mangallang roti manang minum di inganan on.” Dung i, lao ma naposo ni Debata na sittong i sian dalan na asing maninggalhon Betel. (1 Raj. 13:8-10) Aha ma na boi tatiru sian naposo ni Debata na sittong i?—Rom 15:4.
w08-IN 15/8 11 ¶15
Toktong ma Ihutton Petunjuk ni Jahowa
15 Aha ma muse na boi taparsiajari sian kesalahan na dibahen naposo ni Debata na sittong i? Poda 3:5 mandok, “Marhaposan tu Jahowa ma ho sian nasa roham, jala unang ma ho mangasahon pikkiranmu sandiri.” Dang diandalhon naposo ni Debata na sittong i be Jahowa. Alai holan na sittong menurut pikkiranna ma na diihutton. Alani kesalahanna i, gabe mate ma ibana jala dang lomo be roha ni Debata tu ibana. Sian kejadian on boi ma hita marsiajar porlu do toktong setia jala toktong mangandalhon Jahowa.
w08-IN 15/8 9 ¶10
Toktong ma Ihutton Petunjuk ni Jahowa
10 Sebenarna boi hian do dang tartipu naposo ni Debata na sittong i dibahen panurirang na matua i. Jala boi hian do ibana marpikkir, ‘Boasa melalui halak na asing suru-suruan ni Jahowa paboahon petunjuk na baru lao tu au?’ Asing ni i, boi hian do muse sukkunonna langsung tu Jahowa taringot petunjuk na baru i. Alai dang diulahon ibana songon i. Bibel mandok, ‘Lao ma ibana tu jabu ni panurirang na matua i, mangallang roti, jala minum rap dohot ibana.’ Gabe dang lomo be roha ni Jahowa mangida ibana. Dung i, tikki mulak ibana tu Juda ro ma singa mangaroro ibana jala pamatehon ibana. Gabe ngeri hian do ujung ni ngolu ni naposo ni Debata na sittong i.—1 Raj. 13:19-25.
Arta na Adong di Bibel
w10-IN 1/7 29 ¶5
Akka na Denggan do na Diida Ibana
Molo taida ayat di 1 Raja-Raja 14:13, adong na rikkot na boi taparsiajari taringot sifat ni Jahowa dohot taringot aha na diida Ibana sian hita. Didok di ayat i, “adong do na denggan” sian si Abia diida Jahowa. Berarti ikkon jolo manat do diselidiki Jahowa sude na di roha ni si Abia asa boi dapotna na denggan sian i. Molo dibandingkon si Abia tu keluargana, songon on ma didok sahalak pakar, songon sada mutiara ma ibana di tonga-tonga ni setumpuk karikkil. Diargai Jahowa do sifat na denggan na dipatudu si Abia i, jala dilehon do pasu-pasu tu ibana. Dipatudu Jahowa ma asi ni rohana tu ibana, nang pe jahat sude keluargana.
26 SEPTEMBER–2 OKTOBER
ARTA NA ARGA NA ADONG DI BIBEL | 1 RAJA-RAJA 15-16
“Tiru ma Semangat ni si Asa”
w12-IN 15/8 8 ¶4
“Ai Pasu-pasuonna do Ulaonmuna”
Dung tarbagi bangso Israel gabe dua harajaon saleleng 20 taon, gabe lam jahat do pangalaho ni halak Juda ala diihutton nasida hasomalan agama na so sittong. Jadi tikki gabe raja si Asa taon 977 SM, hampir sude do halak Juda dang hasea pangalahona. Haru di istana ni raja pe, godang do inganan pamelean tu akka dewa kesuburan ni halak Kanaan. Alai dang songon i si Asa. Didok Bibel, “Diulahon si Asa do na denggan dohot lomo ni roha ni Jahowa Debatana. Diruppakkon ibana ma akka langgatan pamelean tu debata na asing, akka inganan panombaon, akka tugu sisombaon, dohot akka tiang sisombaon.” (2 Kron. 14:2, 3) Asing ni i, dipalao si Asa do sian Juda “akka bawa na mangulahon seks dohot bawa” na adong di bait, i ma akka bawa na mangulahon sodomi ala manomba Debata na so sittong. Alai dang holan i na diulahon si Asa. Didok Bibel, “Disuru ibana do halak Juda mangalului Jahowa Debata ni akka ompu ni nasida. Jala disuru ibana do nasida mangulahon Patik dohot paretta ni Debata.”—1 Raj. 15:12, 13; 2 Kron. 14:4.
Tasomba ma Jahowa sian Nasa Roha!
7 Sian dia do taboto molo hita nunga manomba Jahowa sian nasa roha? Tasungkun ma dirinta: ‘Huoloi do Jahowa tingki adong situasi na maol? Marsitutu do ahu manjaga huria asa tongtong badia?’ Pingkirhon ma taringot tu habaranion ni si Asa tingki palaohon ompung boruna sian harajaonna. Sipata, porlu do hita barani songon si Asa. Umpamana, songon dia do molo adong keluarga manang donganmuna na dipabali sian huria? Marsitutu do hamu asa unang mardongan be tu nasida? Aha do na diulahon hamu molo masa sisongon i?
it-1-IN 204
Si Asa
Sipata hurang marbisuk do memang si Asa. Alai unggodang do akka sifatna na denggan martimbakkon kesalahanna. Alani i ma sian sude raja pinoppar na sian si Juda, dianggap do ibana sada sian akka raja na setia. (2Kron 15:17) Saleleng 41 taon ma si Asa mamaretta di Juda. Alani i, tikki mamaretta ibana nungnga adong ualu raja ni Israel na margatti-gatti mamaretta, i ma si Jerobeam, si Nadab, si Baesa, si Elah, si Zimri, si Omri, si Tibni (alo ni si Omri na rap mamaretta Israel), dohot si Ahab. (1Raj 15:9, 25, 33; 16:8, 15, 16, 21, 23, 29) Dung mate si Asa, gabe raja ma anakna, si Jehosapat.—1Raj 15:24.
Arta na Adong di Bibel
w98-IN 15/9 21-22
Jonok do Hubunganmuna tu Debata?
Misalna tajaha ma jo nubuat taringot hukuman tu halak na mambangun muse kota Jeriko dohot penggenapanna. Molo tajaha nubuatna di Josua 6:26 mandok, “Manang ise na naeng pajongjokkon kota Jeriko on muse, hona bura ma ibana di jolo ni Jahowa. Molo dibahen ibana fondasi ni kota on, mate ma anakna siakkangan. Jala molo dibahen ibana akka pintu gerbang ni kota on, mate ma anak siappudanna.” Saut ma na didok ni ayat on hira-hira 500 taon dukkon i. Boi do tajaha i di 1 Raja-Raja 16:34 na mandok, “Tikki mamaretta si Ahab, dipadenggan si Hiel halak Betel i ma kota Jeriko. Ala dibahen ibana fondasi ni kota i, mate ma si Abiram anakna siakkangan. Jala ala dibahen ibana akka pintu gerbang ni kota i, mate ma si Segub anakna siappudan. Gabe saut ma hata ni Jahowa na pinaboana marhite si Josua anak ni si Nun.” Holan Debata na mangolu do na boi paboahon nubuat sisongon i jala pasautton i.
3-9 OKTOBER
ARTA NA ARGA NA ADONG DI BIBEL | 1 RAJA-RAJA 17-18
“Sadia Leleng Nai do Hamu Mardua Roha?”
Haporseaonta Mangurupi Hita Marbisuk Manontuhon Sipilliton!
6 Tingki di Tano Kanaan, ingkon dipillit halak Israel do laho manomba Jahowa manang debata na asing. (Jaha Josua 24:15.) Ra, ndang pola maol laho mamillit i. Alai, na pinillit ni nasida boi parohon hangoluan manang hamatean. Di tingki ni angka Panguhum, dipillit halak Israel do mangulahon na sala. Ndang disomba nasida be Jahowa, alai debata na asing do na disomba. (Pangh. 2:3, 11-23) Di tingki ni panurirang Elia, ingkon dipillit nasida do laho manomba Jahowa manang manomba Baal. (1 Raj. 18:21) Mura do mamillit on, alana manomba Jahowa do na dumenggan. Ndang olo halak na marbisuk manomba ganaganaan. Alai, ndang olo halak Israel manontuhon sipilliton. Didok di Bibel, mardua roha do halak Israel. Alani i, dijujui si Elia ma nasida asa manomba Jahowa, Debata na sintong.
Dihatindangkon Ibana do Panombaon na Sintong
15 Ujungna, dipagogo angka malim ni Baal i ma “soarana be manjoujou jala dirarihi dagingna marhitehite podang dohot hujur marningot hasomalannasida, pola sap mudar dagingnasida i”. Alai, ndang marlapatan i! Alana, “ndang adong soara manang alus manang panangihon pe”. (1 Raj. 18:28, 29) Ndang tutu adong Baal. Sibolis do na mamangke i, asa mandao jolma sian Jahowa. Na ringkot taingot, molo ndang Jahowa na tabahen gabe tuan di hita, on parohon hailaon dohot arsak ni roha.—Jaha Psalmen 25:3; 115:4-8.
Dihatindangkon Ibana do Panombaon na Sintong
18 Andorang so martangiang si Elia, ra didok roha ni bangso i, margabus do Jahowa songon Baal. Alai dung martangiang, mago ma ganggu ni rohanasida i. Dipaboa tu hita, “Madabu ma api sian Jahowa jala suda dipangan pelean situtungon ro di soban dohot batu dohot tano i, pola didilati dohot aek di bagasan bondar.” (1 Raj. 18:38) Tontu, alus na mambahen longang situtu do on! Alai, aha do na diulahon bangso i?
Arta na Adong di Bibel
w08-IN 1/4 19, kotak
Sai Jaga do Ibana jala Sai Dipaima Ibana do Jahowa
Sadia Leleng do Sebenarna Dang Ro Udan di Jaman ni si Elia?
Dung masa logo ni ari tolu taon, dipaboa si Elia ma tu Raja Ahab na lao ro nama udan. Olo do ra sitolu taon i dietong mulai sian tikki parjolo sahali si Elia paboahon naeng masa logo ni ari i. (1 Raja-Raja 18:1) Dung dipaboa si Elia naeng ro nama udan, pittor diparo Jahowa ma udan i. Adong do piga-piga halak na marpikkir, di ujung ni taon patoluhon do ro udan i. Alai takkas do dipaboa Jesus dohot si Jakobus, “tolu satonga taon” do dang ro udan di jaman ni si Elia. (Lukas 4:25; Jakobus 5:17) Na maralo do hata ni Jesus i dohot pandapot ni akka halak?
Daong. Molo tajaha di Bibel, biasana leleng do masa logo ni ari di jaman ni Israel, boi sappe onom bulan. Jadi tikki ro si Elia manjuppangi si Ahab paboahon na lao masa logo ni ari, nungnga masa logo ni ari i saleleng onom bulan jala parah situasina. Jala tikki didok si Elia na lao ro nama udan di taon na patoluhon sebenarna nungnga tolu satonga taon masa logo ni ari. Jadi sebelum marpungu akka halak di Dolok Karmel lao mangida tanda halongangan na binahen ni Jahowa, sebenarna nungnga “tolu satonga taon” dang ro udan.
Pikkirhon ma aha pengaruhna tu si Ahab tikki parjolo sahali si Elia manjuppangi ibana. Porsea do akka halak di tikki i na boi dewa Baal parohon udan, termasuk ma i si Ahab. Jadi ala palelengku do masa logo ni ari i, boi do gabe sukkun-sukkun roha ni akka halak, ‘Didia do Baal i? Andigan do paroonna udan?’ Jadi pasti maila do akka halak na manomba Baal tikki didok si Elia dang boi ro udan molo so diparettahon Debata.—1 Raja-Raja 17:1.
10-16 OKTOBER
ARTA NA ARGA NA ADONG DI BIBEL | 1 RAJA-RAJA 19-20
“Pangido ma Bantuan sian Jahowa”
Marhaposan tu Jahowa Tingki Marsak
5 Jaha 1 Rajaraja 19:1-4. Alai di sada tingki, gabe mabiar do si Elia. Alana didok Ratu Isebel, naeng bunuonna do ibana. Alani i, lari ma si Elia tu Berseba. Gabe metmet ma rohana sampe “mangidohon mate” ibana tu Debata. Boasa songon i pangkilalaan ni si Elia? Ala halak na so sempurna do ibana jala “dos do pangkilalaanta dohot ibana”. (Jak. 5:17) Ra dihilala si Elia pe songon i, ala marsak do ibana jala palojahu. Marisuang do dihilala ibana manjujui halak Israel laho manomba Jahowa. Jala dirimpu ibana, holan ibana nama na manomba Jahowa. (1 Raj. 18:3, 4, 13; 19:10, 14) Ra songgot do rohanta ala hea dihilala si Elia songon i. Alai, diantusi Jahowa do songon dia pangkilalaanna.
Debata Mangapul Rohana
13 Songon dia do pangkilalaan ni Jahowa mangida sian surgo, panurirang na dihaholongi Ibana peak di bona ni hau, jala sai mangido asa tumagonan ibana mate? Taboto ma, dung renge si Elia modom, disuru Jahowa do surusuruanNa mandapothon ibana. Lambok do surusuruan i mandungoi si Elia, jala mandok, “Hehe ma ho mangan!” Dungo jala mangan ma si Elia, ala nunga diparade surusuruan i sipanganon ni si Elia. Las dope roti i, jala adong aek siinumon. Mandok mauliate do ibana tu surusuruan i? Ndang dipaboa taringot i. Alai na taboto, mangan, minum jala modom do muse si Elia. Na mandele do ibana umbahen ndang olo mangkatai? Mandapothon tiur ni ari, didungoi surusuruan i ma ibana muse, jala lambok didok, “Hehe ma ho mangan, ai dalan na dao do sidalananmu.”—1 Raj. 19:5-7.
Debata Mangapul Rohana
21 Tangkas do disurat di Bibel, ndang adong Jahowa di bagasan tanda halongangan i. Diboto si Elia do molo Jahowa ndang debata sileban songon Baal, na dihaporseai parohon udan. Jahowa do Sitompa saluhut, jala dao do gumogo Ibana sian angka na tinompaNa, haru langit ni langitan ndang siat gabe ingananNa! (1 Raj. 8:27) Songon dia do on mangurupi si Elia? Taingot ma, mabiar do ibana. Alai, ndang mabiar be ibana tu si Ahab dohot tu si Izebel, dung diboto ibana Jahowa pargogo na so hatudosan do na mandongani ibana!—Jaha Psalmen 118:6.
Debata Mangapul Rohana
22 Dung mintop api i, dibege si Elia ma soara na lambok. Dipaboa si Elia ma muse na di rohana. Gabe lumbang ma pangkilalaanna dungkon i. Tarapul do roha ni si Elia mambege soara na lambok i. Dipapos Jahowa do roha ni si Elia na dihaholongi do ibana. Songon dia carana? Dipaboa Jahowa ma na laho bahenonNa porang mangalo Baal di Israel. On patuduhon, ndang marisuang ulaon ni si Elia saleleng on. Alana, ndang adong na boi mangambati sangkap ni Debata. Jala parsidohot do muse si Elia pasauthon i, marhite mangulahon parenta na disuru Jahowa tu ibana.—1 Raj. 19:12-17.
Arta na Adong di Bibel
w97-IN 1/11 31 ¶1
Setia jala Rela Berkorban
Godang do naposo ni Debata saonari na rela berkorban songon si Elisa. Adong do piga-piga halak na olo manggadis “tano” ni nasida, maninggalhon karejo ni nasida, asa boi mangurupi daerah na makkaporluhon parbarita manang asa boi karejo di Betel. Adong do muse na sappe pinda tu negara na asing lao mangurupi proyek konstruksi ni organisasi. Asa boi diulahon nasida i, olo do nasida mangulahon karejo na so pola sangap diida halak. Nang pe dang sangap karejo ni nasida di jolo ni halak, alai sangap do karejo ni nasida di jolo ni Jahowa. Jadi diargai Jahowa do sude halak na olo rela berkorban lao mendukung kegiatan organisasi jala pasti pasu-pasuon ni Jahowa do nasida.—Mrk 10:29, 30.
17-23 OKTOBER
ARTA NA ARGA NA ADONG DI BIBEL | 1 RAJA-RAJA 21-22
“Tiru ma Cara ni Jahowa Mamakke Huasona”
it-2-IN 1215
Jahowa Pamimpin ni Akka Tentara
Dung jonok halak Israel tu kota Jeriko, ro ma suru-suruan ni Jahowa. Disukkun si Josua ma tu suru-suruan i, alo ni halak Israel do ibana manang na dang. Didok suru-suruan i ma, “Daong, pamimpin ni tentara ni Jahowa do au.” (Jos 5:13-15) Asing ni i, songon on ma na didok nabi Mikaya tu Raja Ahab dohot tu Raja Jehosapat taringot suru-suruan ni Jahowa, “Huida do Jahowa hundul di tahtana jala huida do sude tentara na di surgo jongjong di labbungna, di sabola kanan dohot di sabola kirina.” (1Raj 22:19-21) Di bukku Jesaya adong do hata na mandok, “Jahowa Pamimpin ni Akka Tentara”. Sian on taboto ma, godang hian do malaikat ni Jahowa. Dang holan punguan kerubim, serapim, dohot malaikat na asing. (Jes 6:2, 3; 1Mus 3:24; Pgk 5:11) Asing ni i, denggan do nasida sude diatur. Alani i ma didok Jesus, boi do dijou ibana “marribu suru-suruan”. (Mat 26:53) Tikki martangiang si Hiskia asa diurupi Jahowa ibana didok ibana do, “Jahowa Pamimpin ni Akka Tentara, Debata ni Israel, na hundul di tahta na di ginjang ni akka kerubim.” Olo do ra na didok ni si Hiskia dison taringot poti parpadanan dohot akka patung kerubim na adong di tutup ni poti parpadanan i, na manggombarhon tahta ni Jahowa na adong di surgo. (Jes 37:16; bandingkon tu 1Sam 4:4; 2Sam 6:2.) Tikki dikepung akka tentara ni Siria jabu ni si Elisa, gabe mabiar do pangurupina. Alani i dibahen Jahowa ma tanda halongangan, gabe boi ma diida pangurupi ni si Elisa i “gok akka kareta porang na marapi dohot akka hoda di dolok na di sakaliling ni si Elisa”, i ma akka suru-suruan ni Jahowa.—2Raj 6:15-17.
“Ulu ni Ganup Bawa i ma Kristus”
9 Serep ni roha. Jahowa do na umbisuk sian sasudena. Nang pe songon i olo do Ibana manangihon pandapot ni naposona. (1 Mus. 18:23, 24, 32) Hea do dipangido Jahowa pandapot ni akka suru-suruan. (1 Raj. 22:19-22) Nang pe sempurna Jahowa, alai dang dipangido Ibana hita asa sempurna. Gariada diurupi Ibana do hita asa marhasil. (Ps. 113:6, 7) Didok di Bibel olo do Jahowa “mangurupi” hita. (Ps. 27:9; Heb. 13:6) Disadari Raja Daud do boi pe ibana marhasil mangulahon akka ulaonna, ala na serep do roha ni Jahowa na olo mangurupi ibana.—2 Sam. 22:36.
it-1-IN 617
Gabus
Songon i ma sikap ni akka halak di jamanta saonari on. Bibel mandok, “Dipasombu Debata nasida dililuhon. Ujungna, porsea ma nasida tu akka hata na so tutu”. Alani i, gabe dang porsea be nasida tu barita na uli taringot tu Jesus Kristus. (2Tes 2:9-12) Hea do masa sisongon i marratus taon naung salpu di jaman ni Raja Ahab na sian Israel. Tikki naeng marporang Raja Ahab mangalo Ramot-gilead, disukkun ibana ma i tu akka panurirang na so sittong. Didok akka panurirang i, na lao monang do si Ahab mangalo Ramot-gilead. Alai molo si Mikaya, panurirang ni Jahowa mandok, na lao talu do ibana. Alana nungnga mandapot parnidaan nabi Mikaya. Di parnidaan i diida si Mikaya do Jahowa makkatai tu akka suru-suruan. Jala diloas Jahowa do sada suru-suruanna mambahen margabus akka panurirang ni si Ahab. On berarti, dibahen suru-suruan i ma akka panurirang i makkatahon gabus songon na di bagasan roha ni nasida. Jala lomo hian do roha ni si Ahab mambege informasi na sian panurirang na so sittong i. Nang pe nungnga dipasingot nabi Mikaya si Ahab, dang olo ibana manangihon. Unlomo do rohana tu akka pangoto-otoi i. Akibatna gabe mate ma ibana.—1Raj 22:1-38; 2Kron 18.
Arta na Adong di Bibel
Songon dia do Halak na Botul-Botul Bertobat?
4 Ala dang olo si Ahab dohot si Izebel muba, disuru Jahowa ma panurirang Elia paboahon na lao dihukum nama nasida. Didok Jahowa ikkon pamateonna do sude keluarga ni si Ahab. Tikki mambege i, marsak do si Ahab jala “dipatutoru” ibana do dirina.—1 Raj. 21:19-29.
5 Nang pe dipatutoru si Ahab dirina, alai sian tindakanna patuduhon dang botul-botul ibana bertobat. Misalna dang dihancurhon ibana akka patung Baal. Jala dang disuru ibana bangso Israel asa mulak muse manomba Jahowa. Godang nai dope tindakan ni si Ahab na patuduhon dang botul-botul ibana bertobat.
6 Sada tikki, diajak si Ahab ma Raja Jehosapat kerja sama lao mangalo Siria. Alai didok si Jehosapat, sebelum mangalo Siria, jolo disukkun ma jo panurirang ni Jahowa. Di tikki i, adong do panurirang ni Jahowa na margoar si Mikaya. Alai dang lomo roha ni si Ahab tu ibana. Didok si Ahab, “Sogo do rohakku tu ibana. Ai dang hea na denggan dipaboa ibana taringot tu au.” Nang pe songon i, toktong do halak i lao manukkun panurirang Mikaya. Jala memang dung disukkun, dang songon na diharappon si Ahab na dipaboa si Mikaya. Sasittongna, adong hian dope kesempatan ni si Ahab muba jala mangido asi ni roha ni Jahowa. Alai dang i na diulahon ibana. Gariada gabe muruk do ibana jala dipenjarahon ibana si Mikaya. (1 Raj. 22:7-9, 23, 27) Nang pe dipenjarahon ibana si Mikaya, alai dang boi i mangabbati surirang na dipaboa si Mikaya taringot ibana. Jala ujungna, toho do surirang i masa. Mate tarbunu do si Ahab di parporangan.—1 Raj. 22:34-38.
24-30 OKTOBER
ARTA NA ARGA NA ADONG DI BIBEL | 2 RAJA-RAJA 1-2
“Sitiruon taringot Pelatihan”
Songon dia do Angka Sintua Mangajarajari Donganta Baoa Asa Tarparbaga?
15 Surat ni Bibel taringot si Elisa patuduhon tama do mangargai angka sintua na marpangalaman. Dunghon ro si Elia dohot si Elisa manopot punguan panurirang di Jeriko, laho ma nasida sian i tu aek Jordan. “Dung i dibuat si Elia ma sampesampena, disorpi ma i jala dilibashon tu aek, jadi tolak ma i tu jae tu julu.” Marsik do aek Jordan dibolus, jala mardalan “nasida huhut mangkatai.” Ndang hea ro tu roha ni si Elisa na diantusi ibana do sude manang aha pe. Alai dirohahon ibana do sude na didok ni guruna i jala marsiajar sian sude na binahenna. Dung i laho ma si Elia diboan habahaba jala mulak ma si Elisa tu aek Jordan. Dilibashon ibana ma abit ni si Elia tu aek Jordan jala didok ma “Didia do nuaeng Jahowa, Debata ni si Elia?” marbagi ma muse aek i.—2 Raja 2:8-14.
Songon dia do Angka Sintua Mangajarajari Donganta Baoa Asa Tarparbaga?
16 Dos do diida hamu halongangan na dibahen si Elisa tu halongangan na parpudi na dibahen ni si Elia? Aha do na diajarhonna tu hita? Nang pe naung si Elisa manggantihon si Elia gabe panurirang alai ndang dibahen ibana guru lomona. Diihuthon ibana do dos songon na dibahen ni si Elia. Ala diargai ibana guruna, laos pos ma roha ni angka panurirang tu si Elisa. (2 Raja 2:15) Manurirangi ma si Elisa saleleng onompulu taon jala dilehon Jahowa do godang huaso dohot angka tanda halongangan gumodang sian na dibahen si Elia. Aha do parsiajaran na denggan tu angka parsiajar saonari?
Arta na Adong di Bibel
w05-IN 1/8 9 ¶1
Akka na Denggan sian Bukku Dua Raja-Raja
2:11—Tudia do sebenarna si Elia tikki diboan ibana “tu langit marhite halisuksung”? Hata “langit” di ayat on maksudna i ma atmosfer. (Psalmen 78:26; Mateus 6:26) Jadi tikki diboan kareta porang na marapi i si Elia tu langit, maksudna na diboan do ibana satokkin tu atmosfer jala dipapinda tu tempat na asing di tano on. Dung i disi ma ibana tinggal. Alana piga-piga taon dukkon i, dibahen si Elia do surat tu si Jehoram, raja ni Juda.—2 Kronika 21:1, 12-15.
31 OKTOBER–6 NOVEMBER
ARTA NA ARGA NA ADONG DI BIBEL | 2 RAJA-RAJA 3-4
“Buat ma Anakmon”
“Huboto do, na Hehe do Ibana”
7 Haheheon na paduahon na disurat di Bibel, i ma di masa ni si Elisa. Di huta Sunem, adong ma sahalak Israel, i ma borua na so boi marianakhon. Ala burju ibana manamue si Elisa, dibahen Jahowa ma ibana boi marianakhon nang pe nunga matua tungganedolina. Alai ndang piga leleng, mate ma anakna i. Mansai lungun ma rohana. Alani lungun ni rohana, laho ma ibana manjumpangi si Elisa tu Dolok Karmel, 30 kilometer sian jabuna. Disuru si Elisa ma pangurupina, i ma si Gehasi laho pahehehon anakna i. Alai ndang boi. Dung i, ro ma borua i tu jabu ni si Elisa.—2 Raj. 4:8-31.
“Huboto do, na Hehe do Ibana”
8 Alani i, laho ma si Elisa dohot borua i naeng pahehehon anakna i. Martangiang ma si Elisa tu Jahowa, jala dipahehe ma dakdanak i. Tingki diida borua i naung hehe anakna i, las situtu ma rohana! (Jaha 2 Rajaraja 4:32-37.) Ra, diingot ibana do tangiang ni si Hanna. Ndang boi si Hanna marianakhon. Alai dibahen Jahowa do ibana boi marianakhon. Gabe adong ma anakna, i ma si Samuel. Alani i, didok ibana, Jahowa do na ‘patuathon tu banua toru dohot pahehehon muse’. (1 Sam. 2:6) Haheheon na masa di huta Sunem, patuduhon margogo do Jahowa pahehehon halak naung mate.
Arta na Adong di Bibel
it-2-IN 185 ¶5
Panurirang
“Akka Pinoppar ni Panurirang.” Songon na dipaboa di Gesenius’ Hebrew Grammar (Oxford, 1952, hal. 418) sian bahasa Heber do dibuat istilah on, i ma mib beneh han nevi im, ben (anak ni), manang beneh (akka anak ni). Hata on boi do lapatanna “anggota ni serikat kerja, sada organisasi, sada suku, manang sada golongan manang aha pe”. (Bandingkon tu Nehemia 3:8 na mandok, “sibahen miak na angur i”. Molo di bahasa Heber lapatanna, “anak ni sibahen miak na angur i”.) Jadi hata “pinoppar ni akka panurirang”, boi do lapatanna punguan manang kelompok ni akka halak na dipillit Debata gabe panurirang. Di Bibel, adong do dipaboa taringot kelompok ni akka panurirang na sian Betel, Jeriko, dohot sian Gilgal. (2Raj 2:3, 5; 4:38; bandingkon tu 1Sam 10:5, 10.) Si Samuel ma pamimpin ni akka panurirang na di Rama. (1Sam 19:19, 20), jala hea do si Elisa gabe pamimpin ni akka panurirang di jamanna. (2Raj 4:38; 6:1-3; bandingkon tu 1Raj 18:13.) Menurut catatan sejarah, sederhana do parngoluon ni akka panurirang. Nasida sandiri do na mambangun jabuna jala dang hea nasida manuhori akka barang. Nang pe sering nasida rappak tinggal jala rappak mangan dohot panurirang na asing, olo do sahalak panurirang manjalo tugas na ikkon diulahon sahalakna.—1Raj 20:35-42; 2Raj 4:1, 2, 39; 6:1-7; 9:1, 2.