Nunga parjolo sahat si Petrus dohot si Johannes tu Jerusalem laho paradehon na porlu tu ulaon Paska. Dung i, ro ma Jesus dohot sampulu siseanna tusi. Nunga botari tingki turun Jesus dohot angka apostel i sian Dolok Jetun. On ma na parpudi Jesus mangida Jerusalem sian Dolok Jetun sahat tu na dipahehe ibana.

Dung i, sahat ma Jesus dohot angka sisean i di Jerusalem. Laho ma nasida tu jabu naung diparade gabe inganan ni nasida mangarayahon Paska. Nangkok ma nasida tu kamar parginjang jala nunga rade be sude. Dung i didok Jesus ma, “Nunga maima-ima rohangku laho mangan Paska rap dohot hamu andorang so marsitaonon ahu.”—Lukas 22:15.

Di tingki i, nunga somal diparade anggur tingki mangarayahon Paska. Dung dilehon sasangkir anggur tu Jesus, martangiang ma ibana jala didok ma, “Buat ma on jala ganup ma hamu manginum sian on. Ai hudok ma tu hamu, sian saonari ndang inumonku be anggur sahat tu na ro Harajaon ni Debata.” (Lukas 22:17, 18) Hata ni Jesus i patuduhon nunga jonok be hamateanna.

Tingki mangarayahon Paska i nasida, jongjong ma Jesus, dibungka ma abit luarna jala dibuat ma anduk. Dung i dibahen ma aek tu baskom jala disunsi ma pat ni angka apostelna. Somalna, parjabu do na mangulahon i. Hatobanna ma ra na disuru. (Lukas 7:44) Alai tamu do nasida sude tingki i. Alani i, Jesus ma na manunsi pat ni nasida. Sasintongna, boi do ulahonon ni angka apostel i. Alai ndang olo nasida. Olo do ra ala adong dope roha na naeng gabe umsangap di nasida. Alani i, gabe maila ma nasida tingki diulahon Jesus i.

Tingki naeng disunsi Jesus pat ni si Petrus, didok ibana ma, “Ndang loasonku sunsionmu pathu, Tuan.” Didok Jesus ma, “Molo ndang husunsi patmi, ndang boi ho rap dohot ahu.” Dialusi si Petrus ma, “Tuan, unang ma holan pathu sunsi dohot ma tanganku nang ulungku.” Dung i didok Jesus ma, “Manang ise naung maridi nunga ias be dagingna, alani i holan patna nama na porlu disunsi. Ai ias do hamu, alai ndang sude hamu ias.” Gabe tarsonggot ma si Petrus mambege i.—Johannes 13:8-10.

Disunsi Jesus do pat ni sude angka apostelna, dohot ma i si Judas Iskariot. Dung sae, dipangke Jesus ma abit luarna jala hundul ma ibana. Dung i didok ma, “Diantusi hamu do na hubahen i tu hamu? Dijou hamu do ahu ‘Guru’ dohot ‘Tuan’ jala tingkos do na nidokmuna i. Nang pe ahu Tuan jala Guru, husunsi do patmuna. Alani i, hamu sama hamu pe patut do manunsi pat ni donganmuna. Nunga hupatuduhon sitiruon tu hamu, asa ulahononmuna songon na hubahen i tu hamu. Tutu do na hudok on tu hamu, ndang umbalga hatoban sian tuanna. Jala ndang umbalga halak na disuru sian na marsuru ibana. Saonari nunga diboto hamu angka i, alai marlas ni roha ma hamu molo diulahon hamu i.”—Johannes 13:12-17.

Parsiajaran na denggan do on taringot toruk ni roha. Unang ma dirimpu angka siihuthon Jesus na umsangap nasida sian na asing jala ingkon sai dioloi. Ingkon tiruon ni nasida do Jesus. Ndang na ingkon sunsion ni nasida pat ni donganna. Alai, ingkon toruk do roha ni nasida jala ndang mamilliti angka halak.

Baru dope disunsi Jesus pat ni angka apostelna laho patuduhon ringkot ni toruk ni roha. Dung sae nasida mangan Paska, dipaboa Jesus ma surirang ni si Daud na mandok, “Alealengku, apala na huhaposi, na rap mangan dohot ahu, nunga gabe alongku.” Dung i didok ma muse, “Adong do sahalak sian hamu na laho manjehehon ahu.”—Psalmen 41:10, Bibel siganup ari; John 13:18, 21.

Masiberengan ma angka apostel i huhut mandok, “Ahu do na nidokmu Tuan?” Dohot do si Judas Iskariot mandok i. Ala di lambung ni Jesus hundul si Johannes, dipangido si Petrus ma asa disungkun ibana ise na didok Jesus. Disungkun si Johannes ma, “Tuan, ise do na nidokmi?”—Mateus 26:22; Johannes 13:25.

Didok Jesus ma, “Manang tu ise hulehon roti na husornophon on, i ma ibana.” Dung disornophon Jesus roti i, dilehon ma tu si Judas. Ninna ma, “Laho mate do nian Anak ni jolma i songon na tarsurat taringot tu ibana. Alai, marjea ma halak na manjehehon Anak ni jolma i! Sasintongna, dumenggan do molo ndang tubu ibana.” (Johannes 13:26; Mateus 26:24) Nunga dirajai Sibolis roha ni si Judas. Ala jahat ibana, gabe diulahon ma lomo ni roha ni Sibolis jala gabe “halak na ingkon mago” ma ibana.—Johannes 6:64, 70; 12:4; 17:12.

Dung i didok Jesus ma tu si Judas, “Hatop ma ulahon na laho sibahenonmi.” Ala sitiop kotak ni hepeng si Judas, dirimpu nasida do na disuru Jesus ibana “manuhor na porlu tu perayaan i manang mangalehon hepeng tu na pogos”. (Johannes 13:27-30) Hape na laho manghianati Jesus do ibana.

Laos di tingki i, dipaboa Jesus ma perayaan na baru. Dibuat ma roti, ditangiangkon, diponggoli ma roti i jala dilehon ma tu angka apostel. Didok ma, “On manggombarhon dagingku, na nilehon humongkop hamu. Tongtong ma ulahon on bahen parningotan di ahu.” (Lukas 22:19) Dung i, diallang angka apostel i ma roti i.

Dibuat Jesus ma muse panginuman na marisi anggur. Ditangiangkon ma i jala dilehon tu angka apostel. Sude ma nasida manginum sian i. Didok Jesus ma, “Panginuman on, i ma parjanjian na imbaru na hot marhite mudarhu na durus humongkop hamu.”—Lukas 22:20.

Alani i, disuru Jesus do angka na mangihuthon ibana asa mangulahon parningotan ari hamateanna ganup taon di tanggal 14 Nisan. Marhite ulaon on, diingot nasida ma na diulahon Jesus dohot Amana laho paluahon angka na porsea sian dosa dohot hamatean saleleng ni lelengna. Alani i, rumingkot do on sian Paska ni halak Jahudi.

Didok Jesus do mudarna, “laho diusehon manesa dosa ni torop halak”. Disesa do dosa ni angka apostel dohot dosa ni angka na porsea na songon nasida. Laho rap mamarenta ma nasida dohot Jesus di Harajaon ni Amana.—Mateus 26:28, 29.

Tingki marpungu Jesus na parpudi sahali dohot angka apostelna, disunsi ibana do pat ni nasida laho patuduhon sitiruon asa martoruk ni roha. Boasa diulahon Jesus i? Nang pe diulahon angka apostel lomo ni roha ni Debata, sai marsoal dope nasida taringot ise na umsangap. (Markus 9:33, 34; 10:35-37) Jala marsoal do muse nasida di borngin i.

Ai “tubu ma parsoalan di tonga-tonga ni nasida taringot tu manang ise na umsangap”. (Lukas 22:24) Gabe lungun ma roha ni Jesus mangida i. Aha ma na diulahon ibana?

Ndang dimuruki Jesus angka apostel i. Alai lambok do didok Jesus tu nasida, “Raja ni angka bangso mamarenta do tu rayatna jala manang ise na mangarajai, ditanda do nasida sibahen na denggan tu na asing. Alai unang ma songon i anggo hamu. . . . Dia do na umbalga, halak na mangan do manang na marhobas?” Dung i didok Jesus ma muse, “Alai songon sahalak parhobas do ahu di tonga-tongamuna.”—Lukas 22:25-27.

Nang pe adong hagaleon ni nasida, sai diihuthon angka apostel i do Jesus tingki adong paraloan. Alani i didok Jesus ma, “Bahenonku ma parjanjian rap dohot hamu taringot tu harajaon songon parjanjian na binahen ni Damang tu ahu.” (Lukas 22:29) Marhite parjanjian i, dipapos Jesus ma roha ni nasida, na laho mamarenta do nasida rap dohot ibana di Harajaon ni Debata.

Nang pe na laho mamarenta angka apostel rap dohot Jesus, mardosa dope nasida jala adong hagaleonna. Didok Jesus ma tu nasida, “Dipangido Sibolis i do asa dipiari hamu songon gandum.” Marserakan do gandum molo dipiari. (Lukas 22:31) Dung i didok Jesus ma muse, “Sude do hamu manadingkon ahu di borngin on, ai tarsurat do, ‘Antukonku ma parmahan i gabe marserak ma angka biru-biru i.’”—Mateus 26:31; Sakaria 13:7.

Alai didok si Petrus ma, “Nang pe sude nasida manadingkon ho, alai ndang tadingkononku ho!” (Mateus 26:33) Dipaboa Jesus ma na laho dohonon ni si Petrus na so ditanda ibana Jesus andorang so martahuak manuk 2 hali. Didok Jesus do muse, “Nunga hubahen pangidoanku tu Debata taringot tu ho asa unang mago haporseaonmu. Dung mulak ho, patogu ma angka haha anggim.” (Lukas 22:32) Alai didok si Petrus do muse, “Nang pe mate ahu rap dohot ho, ndang soadahononku ho.” (Mateus 26:35) Jala sude ma angka sisean i mandok songon i.

Dung i didok Jesus ma tu nasida, “Ndang leleng be ahu rap dohot hamu. Luluanmuna ma ahu, alai songon na hudok tu halak Jahudi, dohononku ma i muse tu hamu saonari, ‘Ndang boi hamu ro tu inganan sitopotonki.’” Didok ma muse, “Hulehon ma tu hamu parenta na imbaru, masihaholongan ma hamu. Songon ahu na mangkaholongi hamu, hamu pe ingkon masihaholongan ma. Molo masihaholongan hamu, botoon ni sude jolma ma na siseanku hamu.”—Johannes 13:33-35.

Tingki didok ndang leleng nai be ibana rap dohot nasida, disungkun si Petrus ma, “Tuan, naeng tudia do ho laho?” Dialusi Jesus ma, “Ndang boi dope ihuthononmu ahu saonari tu inganan sitopotonki. Alai ihuthononmu ma ahu haduan.” Gabe sungkun-sungkun ma roha ni si Petrus jala didok ma, “Boasa ndang boi ihuthononku ho saonari Tuan? Rade do ahu mate humongkop ho.”—Johannes 13:36, 37.

Dung i dipaingot Jesus ma nasida taringot na hea disuru ibana nasida marbarita tu Galilea. Didok do nasida asa unang mamboan hepeng dohot sipanganon. (Mateus 10:5, 9, 10) Dung i disungkun Jesus ma, “Hurangan do hamu?” Dialusi nasida ma, “Ndang!” Alai aha ma na ingkon ulahonon ni nasida di ari na naeng ro? Didok Jesus ma, “Alai saonari, manang ise nampuna inganan ni hepeng manang inganan ni sipanganon, diboan ma. Manang ise na so adong podangna, digadis ma baju luarna laho manuhor podang.”—Lukas 22:35-37.

Maksud ni Jesus, na laho dipakkuhon do ibana tu hau rap dohot angka parjahat. Dung i masa ma paraloan tu angka na mangihuthon ibana. Dirimpu angka apostel i do naung rade nasida. Ninna ma, “Tuan, adong do dison dua podang.” Didok Jesus ma, “Antong nunga sae be i.” (Lukas 22:38) Ndang leleng nai, paboaon ni Jesus ma parsiajaran na ringkot tingki adong sahalak apostel na mamangke podang i.

Di kamar parginjang dope Jesus dohot angka apostelna dung mangulahon parningotan tu hamamatena. Didok ibana ma tu nasida, “Unang ma susa rohamuna. Porsea ma hamu tu Debata jala porsea ma hamu tu ahu.”​—Johannes 13:36; 14:1.

Dung i dipaboa Jesus ma boasa didok ibana songon i, “Godang do inganan di jabu ni Damang. Molo ndang tutu i, ndang dohononku songon i tu hamu. Ai na laho ma ahu paradehon inganan di hamu.” Alai ndang diantusi angka apostel na laho tu surgo do maksudna. Disungkun si Tomas ma, “Ndang huboto hami manang naeng tudia ho laho Tuan. Songon dia ma boi botoonnami dalan tusi?”​—Johannes 14:2-5.

Didok Jesus ma, “Ahu do dalan dohot hasintongan dohot hangoluan.” Asa boi masuk tu surgo, ingkon porsea do tu ibana, tu ajaranna, jala maniru ibana. Didok Jesus ma muse, “Ndang adong na boi ro tu Ama i molo so marhite ahu.”​—Johannes 14:6.

Mambege i didok si Pilippus ma, “Tuan, patuduhon ma Ama i tu hami, asa sombu rohanami.” Dipangido si Pilippus do parnidaan songon parnidaan na tu si Musa, si Elia, dohot si Jesaya. Alai ala rap nasida dohot Jesus, ummarga do i martimbangkon parnidaan. Didok Jesus ma, “Nunga pola leleng ahu rap dohot hamu, hape laos so ditanda ho dope ahu Pilippus? Manang ise na mangida ahu, nunga diida ibana Ama i.” Denggan do ditiru Jesus parange ni Amana. Alani i, songon na mangida Ama i do nasida tingki rap mangolu dohot Jesus. Tontu umbalga do Ama i sian Anak i. Ai didok Jesus do, “Ndang sian diringku sandiri sude na hudok i.” (Johannes 14:8-10) Boi do diida angka apostel na diangkui Jesus do ajaranna sian Amana.

Nunga diida angka apostel Jesus mambahen tanda halongangan manang mukjizat dohot paboahon barita na uli taringot tu Harajaon ni Debata. Saonari didok Jesus ma tu nasida, “Manang ise na porsea tu ahu ulahononna do angka ulaon na huulahon i. Jala ulahononna dope angka ulaon na umbalga sian i.” (Johannes 14:12) Ndang didok Jesus umgodang tanda halongangan na laho bahenon ni nasida. Alai na laho umleleng jala umdao do nasida marbarita. Asing ni i, umgodang do halak na laho manangihon barita ni nasida.

Ndang na laho pasombuon ni Jesus nasida. Ai marjanji do ibana, “Ulahononku do manang aha na pinangidomuna marhite goarhu.” Didok ibana do muse, “Pangidoonku ma tu Ama i asa dilehon tu hamu pangurupi na asing na mandongani hamu salelengna, i ma tondi parbadia na papatarhon hasintongan.” (Johannes 14:14, 16, 17) Marjanji do Jesus laho mangalehon tondi parbadia na laho mangurupi nasida. Masa ma on di ari Pentakosta.

Didok Jesus, “Satongkin nai, ndang idaon ni portibi on be ahu. Alai idaonmuna ma ahu muse. Ai mangolu do ahu jala hamu pe mangolu do.” (Johannes 14:19) Diida nasida do Jesus dung dipahehe. Alai idaon ni angka apostel ma Jesus muse dung dipahehe nasida tu surgo.

Dung i didok Jesus ma hata na mansai ringkot on, “Manang ise na manjalo jala na mangoloi parentangku, ibana ma na mangkaholongi ahu. Manang ise na mangkaholongi ahu, haholongan ni Damang i ma ibana. Haholonganku ma ibana jala tangkas ma patuduhononku diringku tu ibana.” Mambege i disungkun apostel Judas (Tadeus) ma, “Tuan, aha do na masa umbahen na naeng patuduhononmu dirim tu hami, ndang tu portibi on?” Dialusi Jesus ma, “Halak na mangkaholongi ahu, oloanna do hatangku. Haholongan ni Damang ma ibana, . . . Halak na so mangkaholongi ahu, ndang oloanna hatangku.” (Johannes 14:21-24) Alai godangan halak na di portibi on, ndang mangangkui Jesus i do dalan, hasintongan, dohot hangoluan.

Naeng laho nama Jesus. Alani i, songon dia do asa diingot angka apostel sude na diajarhon Jesus tu nasida? Didok Jesus ma, “Pangurupi i, i ma tondi parbadia na nilehon ni Ama i marhite goarhu, i ma na mangajarhon sude tu hamu jala na paingothon hamu di sude naung hupaboa tu hamu.” Nunga hea diida angka apostel i songon dia tondi parbadia mangurupi nasida. Didok Jesus ma muse, “Hutadingkon do hadameon tu hamu. Hulehon do hadameonki tu hamu. . . . Alani i, unang ma marsak jala unang ma mabiar hamu.” (Johannes 14:26, 27) Boi ma pos roha ni angka siseanna na laho diurupi jala dilinggomi Debata do nasida.

Idaon ni nasida ma satongkin nai parlinggoman ni Debata. Jesus mandok, “Na ro ma parhuaso ni portibi on. Alai ndang marhuaso i tu ahu.” (Johannes 14:30) Boi do Sibolis mangarajai si Judas. Alai ndang boi bahenonna Jesus mangalo tu Debata, ai ndang adong hagaleon ni Jesus. Jala ndang boi diambati Sibolis Jesus dipahehe. Ai didok Jesus do, “Huulahon do songon na diparentahon ni Ama i tu ahu.” Pos do rohana na laho paheheon ni Amana ibana.​—Johannes 14:31.

Mangkatai dope Jesus dohot angka siseanna laho patoguhon roha ni nasida. Olo do ra nunga naeng manogot tingki i. Dipaboa Jesus ma muse sada tudosan:

Didok ma, “Ahu do hau anggur na tutu jala Damang do pangula ni ladang i.” (Johannes 15:1) Marratus taon naung salpu, didok do bangso Israel hau anggur ni Jahowa. (Jeremia 2:21; Hosea 10:1, 2) Alai ndang dijalo Jahowa be bangso i. (Mateus 23:37, 38) Alani i dipaboa Jesus ma ibana ma na gabe hau anggur na baru. Gabe hau anggur na diula Amana ma ibana tingki dipillit marhite tondi parbadia taon 29 M. Alai ndang holan ibana na gabe hau anggur ni Debata, didok ma,

“Diponggol [Damang] do ganup rantingku na so marparbue jala dipaias do ranting na marparbue asa lam godang parbuena. . . . Ndang boi ranting i marparbue molo ndang tongtong di bona ni hau anggur i. Songon i ma nang hamu, ndang boi hamu marparbue molo ndang tongtong marsada dohot ahu. Ahu do hau anggur i jala hamu ma angka rantingna.”​—Johannes 15:2-5.

Nunga marjanji Jesus tu angka na mangihuthon ibana laho mangalehon tondi parbadia na gabe pangurupi di nasida. Dung salpu 51 ari, dijalo nasida ma tondi parbadia jala gabe ranting ni hau anggur i ma nasida. Alai ingkon tongtong do sude “ranting” i marsada dohot Jesus. Boasa?

Didok Jesus ma, “Manang ise na marsada dohot ahu jala ahu marsada dohot ibana, godang ma parbuena. Alai molo ndang marsada hamu dohot ahu, ndang boi ulahononmuna manang aha.” Asa boi angka “ranting” i marparbue, ingkon ditiru do parange ni Jesus, ringgas marbarita, jala mangurupi angka halak gabe sisean. Songon dia do molo ndang tongtong nasida marsada dohot Jesus jala ndang marparbue? Jesus mandok, “Manang ise na so tongtong marsada dohot ahu, bolongkonon do ibana.” Alai didok Jesus ma muse, “Molo tongtong hamu marsada dohot ahu jala angka hatangki tongtong di bagasan rohamuna, dapotmuna do manang aha na pinangidomuna.”​—Johannes 15:5-7.

Di borngin i, nunga dua hali dipaboa Jesus ringkot ni mangulahon parentana. (Johannes 14:15, 21) Dipaboa ibana ma aha na patuduhon naung diulahon nasida parentana, “Molo dioloi hamu angka parentangku, tongtong ma hamu di bagasan holongku songon ahu na mangoloi angka parenta ni Ama i jala tongtong di bagasan holongna.” Alai ndang sae holan mangkaholongi Debata Jahowa dohot Jesus Kristus Anakna i. Jesus mandok, “On ma parentangku: Masihaholongan ma hamu, songon ahu naung mangkaholongi hamu. Ndang adong holong na umbalga sian holong ni halak na olo mangalehon ngoluna humongkop angka donganna. Donganku do hamu molo diulahon hamu angka parentangku.”​—Johannes 15:10-14.

Na laho mate nama Jesus piga-piga jam nai laho patuduhon holongna tu sude halak na porsea tu ibana. Gabe sitiruon ma i tu angka siihuthon ibana asa masihaholongan. On ma na patuduhon nasida siihuthon Jesus. Songon naung hea didok ibana, “Molo masihaholongan hamu, botoon ni sude jolma ma na siseanku hamu.”​—Johannes 13:35.

Ingkon diingot angka apostel do naung gabe ‘dongan’ ni Jesus nasida. Boasa? Didok Jesus ma, “Dohononku ma hamu donganku, ai nunga hupaboa tu hamu sude naung hubege sian Damang i.” Hasangapon do boi mardongan dohot Jesus jala mamboto na nidok ni Damang i! Alai ingkon “sai marparbue” do nasida, asa boi tongtong marale-ale dohot ibana. Jesus mandok, “Manang aha dipangido hamu tu Ama i di bagasan goarhu, lehononna ma i tu hamu.”​—Johannes 15:15, 16.

Molo masihaholongan angka sisean, boi ma nasida martahan nang pe adong paraloan. Dipaboa Jesus ma na laho sogo roha ni portibi tu nasida. Alai dipapos Jesus do roha ni nasida, didok ma, “Molo sogo roha ni portibi on tu hamu, ingot hamu ma naung parjolo do ahu dihasogohon portibi on sian hamu. Molo sian portibi on hamu, haholongan ni portibi on ma hamu ai ampunana do hamu. Alai ndang sian portibi on hamu, . . . Alani i ma dihasogohon portibi on hamu.”​—Johannes 15:18, 19.

Dung i dipaboa Jesus ma boasa masa i tu nasida, “Bahenon ni nasida ma i sude tu hamu alani goarhu, ai ndang ditanda nasida Ibana na marsuru ahu.” Diida nasida do tanda halongangan manang mukjizat na binahen ni Jesus, alai ndang porsea nasida tu ibana. On ma na patuduhon nasida marsala. Jesus mandok “Molo ndang hea hubahen di tonga-tonga ni nasida tanda halongangan na so hea dibahen halak na asing, ndang mardosa nasida. Alai saonari nunga diida nasida ahu jala sogo do roha ni nasida tu ahu nang tu Damang i.”​—Johannes 15:21, 24, 25; Psalmen 35:19; 69:5.

Marjanji ma muse Jesus mangalehon tondi parbadia laho mangurupi nasida. Sude na mangihuthon Jesus boi do manjalo i jala boi do i mangurupi nasida asa marparbue laho ‘paboahon’ taringot tu ibana.​—Johannes 15:27.

Mangarayahon Paska do Jesus dohot angka apostel di kamar parginjang. Dungkon i, laho ma nasida sian i. Nunga godang dipaboa Jesus poda tu nasida. Didok ibana ma muse, “Hupaboa do angka i tu hamu asa unang tartuktuk hamu.” Boasa didok ibana songon i? Didok Jesus ma, “Palaoon ni halak ma hamu sian sinagoga. Sasintongna, na ro ma tingkina songon na marhobas tu Debata ma didok roha ni manang ise na mambunu hamu.”​—Johannes 16:1, 2.

Olo do ra gabe marsak angka apostel mambege i. Nang pe nunga hea didok Jesus na laho sogo roha ni portibi on tu nasida, alai ndang hea didok ibana na laho dibunu nasida. Ai didok ibana do, “Ndang hupaboa dope i tu hamu sian mulana, ala rap dope ahu dohot hamu.” (Johannes 16:4) Alai saonari, dipaboa ibana ma i asa unang mago haporseaon ni nasida dung laho Jesus.

Didok Jesus ma muse, “Na laho ma ahu tu Ibana na marsuru ahu. Alai ndang adong sahalak pe sian hamu na manungkun tudia ahu laho.” Di borngin i, nunga disungkun nasida naeng tudia Jesus laho. (Johannes 13:36; 14:5; 16:5) Alai gabe marsak do nasida dung dipaboa Jesus taringot paraloan na masa tu nasida. Gabe ndang disungkun nasida be hasangapon na laho jaloon ni Jesus manang pasu-pasu na laho jaloon ni siihuthon ibana. Alani i didok Jesus ma, “Ala hupaboa angka i tu hamu, gabe mansai lungun ma rohamuna.”​—Johannes 16:6.

Dung i didok Jesus ma, “Parohon na denggan do tu hamu molo laho ahu. Ai molo ndang laho ahu, ndang ro pangurupi i tu hamu. Alai molo laho ahu, suruonku ma i tu hamu.” (Johannes 16:7) Ai ingkon mate do Jesus jala nangkok tu surgo, asa boi lehononna tondi parbadia tu angka siseanna manang na didia pe.

Dung ro tondi parbadia, “tangkas ma patuduhononna tu portibi on taringot tu dosa, taringot tu na sintong, dohot taringot tu panguhuman ni Debata”. (Johannes 16:8) Patuduhononna ma na mardosa portibi on ala ndang porsea nasida tu Anak ni Debata. Tingki nangkok Jesus tu surgo, on patuduhon na mangulahon na sintong do ibana. Jala patut do diuhum Sibolis, “parhuaso ni portibi on”.​—Johannes 16:11.

Didok Jesus ma muse, “Godang dope sidohononku tu hamu, alai ndang boi dope diantusi hamu i saonari.” Tingki dilehon Jesus tondi parbadia, on ma na mangurupi nasida mangantusi “hasintongan i” jala mangihuthon i.​—Johannes 16:12, 13.

Sungkun-sungkun ma roha ni angka apostel, ai didok Jesus do muse, “Satongkin nai ndang idaonmuna be ahu, alai satongkin nai idaonmuna ma muse ahu.” Masisungkunan ma nasida aha do lapatan ni i. Diboto Jesus do i. Didok ma, “Tutu do na hudok on tu hamu, na laho tangis ma hamu jala mangandungi, alai marlas ni roha ma portibi on. Susa ma pangkilalaanmuna, alai muba ma hasusaanmuna i gabe las ni roha.” (Johannes 16:16, 20) Dung mate Jesus, gabe lungun do roha ni angka sisean. Alai las do roha ni angka pamimpin agama. Dungkon i, gabe las ma muse roha ni angka sisean dung dipahehe Jesus. Jala dilehon ma tu nasida tondi parbadia.

Dipatudos Jesus do angka apostel tu borua na laho partus. Didok ma, “Susa do pangkilalaan ni sahalak ina molo dung jumpang tingkina naeng tubu-tubuan. Alai dung tubu-tubuan ibana, ndang diingot be hasusaanna i. Ai nunga las rohana ala naung tubu sahalak jolma tu portibi on.” Dipapos Jesus ma roha ni nasida, “Songon i ma nang hamu, susa do pangkilalaanmuna saonari, alai idaonku ma hamu muse jala las ma rohamuna. Jala ndang adong na boi mambuat las ni rohamuna i.”​—Johannes 16:21, 22.

Ndang hea dope angka apostel martangiang di bagasan goar ni Jesus. Alai didok Jesus ma, “Di tingki i, pangidoonmuna ma tu Ama i di bagasan goarhu.” Na so ditangihon Debata do tangiang ni nasida saleleng on? Didok Jesus ma, “Holong do roha ni Ama i tu hamu, ala holong do rohamuna tu ahu . . . na sinuru ni Debata.​—Johannes 16:26, 27.

Gabe pos ma roha ni angka apostel mambege i. Didok nasida ma, “Alani i ma hami porsea na ro sian Debata do ho.” Laho diuji ma satongkin nai haporseaon ni nasida. Didok Jesus ma, “Na ro ma tingkina jala nunga ro i, marserak ma hamu jala mulak tu jabumuna be. Tadingkononmuna ma sasada ahu.” Alai dipapos Jesus ma roha ni nasida, “Hupaboa do angka on tu hamu asa dapotmuna hadameon marhite ahu. Susa do hamu bahenon ni portibi on, alai unang ma mabiar hamu! Ai nunga hutaluhon portibi on.” (Johannes 16:30-33) Ndang pasombuon ni Jesus nasida. Pos do rohana na boi nasida manaluhon portibi on songon ibana. Tongtong do nasida mangulahon lomo ni roha ni Debata, nang pe marsitutu Sibolis dohot portibi on naeng manegai haporseaon ni nasida.

Ala holong roha ni Jesus tu angka apostelna, dipatogu ma roha ni nasida andorang so mate ibana. Ditatap ma tu ginjang, jala didok ma, “Ale Amang, nunga jumpang tingkina. Pasangap ma anakmi asa dipasangap anakmi Ho. Dilehon Ho do tu ibana huaso mangarajai sude jolma, asa boi lehononna hangoluan na saleleng ni lelengna tu sude jolma na nilehonmu tu ibana.”​—Johannes 17:1, 2.

Pasangaphon Debata do na rumingkot di Jesus. Dipaboa ibana do muse pangkirimon laho mangolu saleleng ni lelengna. Dung dijalo ibana “huaso mangarajai sude jolma”, gabe marlaba ma tobusanna tu sude jolma. Alai ndang sude jolma boi mandapot i. Ai didok Jesus do, “On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum.” Holan angka halak na mangulahon na didok Jesus i do na boi mangolu saleleng ni lelengna.​—Johannes 17:3.

Ingkon tatanda do Debata dohot Anakna, jala marale-ale tu nasida. Tatiru ma nasida. Tabahen ma tu donganta songon na binahen ni Debata tu jolma. Jala ingkon rumingkot do di hita pasangaphon Debata sian mangolu saleleng ni lelengna. Dung i didok Jesus ma:

“Nunga hupasangap Ho di tano on jala nunga hupasae ulaon na pinasahatmi ulahononku. Saonari pe ale Amang, lehon ma tu ahu hasangapon di lambungmi, songon hasangaponku tingki rap ahu dohot Ho andorang so adong dope portibi on.” (Johannes 17:4, 5) Dipangido Jesus do asa dipasangap Debata ibana muse di surgo dung dipahehe.

Ndang lupa Jesus tu na diulahon ibana saleleng di tano on. Didok ma, “Nunga hupaboa goarmi tu angka jolma na nilehonmu tu ahu na sian portibi on. Ho do nampuna nasida jala nunga dipasahat Ho nasida tu ahu, jala nunga dioloi nasida hatam.” (Johannes 17:6) Ndang holan paboahon goar ni Debata ibana tingki marbarita. Alai diurupi ibana do angka apostelna mananda Jahowa, parangena, holongna, dohot asi ni rohana tu jolma.

Nunga ditanda angka apostel Jahowa. Nunga diboto nasida na diulahon dohot na diajarhon Jesus. Ai didok Jesus do, “Nunga hupasahat tu nasida sude hata na nilehonmu tu ahu, jala nunga dijalo nasida i. Nunga tangkas diboto nasida na ro sian Ho do ahu jala nunga dihaporseai nasida na Ho do na marsuru ahu.”​—Johannes 17:8.

Dung i dipaboa Jesus ma na so sarupa angka siihuthon ibana tu godangan jolma di portibi on. Didok ma, “Hutangiangkon do nasida. Ndang portibi on hutangiangkon, alai angka na pinasahatmi do, ai Ho do nampuna nasida. . . . Ale Amang na badia, jaga ma nasida alani goarmu na nilehonmi tu ahu, asa gabe sada nasida, songon Ho na sada dohot ahu. . . . Hujaga do nasida jala ndang adong na mago sian nasida, ia so holan halak na ingkon mago i hian”, i ma si Judas Iskariot na manghianati Jesus.​—Johannes 17:9-12.

Didok Jesus ma muse di tangiangna, “Dihasogohon portibi on do nasida. . . . Ndang hupangido asa buatonmu nasida sian portibi on. Alai asa jagaonmu do nasida sian Sibolis. Ndang sian portibi on nasida, songon ahu na so sian portibi on.” (Johannes 17:14-16) Di portibi na dirajai Sibolis dope angka apostel dohot angka sisean na asing tading. Alani i, songon dia ma asa unang diihuthon nasida portibi on dohot ulaon na jahat?

Molo diulahon sisean ni Jesus na tarsurat di Angka Buku Heber dohot na diajarhon Jesus, ias ma pangalaho ni nasida jala boi ma denggan nasida marhobas tu Debata. Didok Jesus ma, “Pabadia ma nasida marhite hasintongan. Hatami do hasintongan.” (Johannes 17:17) Di pudian ni ari, adong ma deba angka apostel na manurathon angka buku na gabe “hasintongan”. Boi ma i mangurupi angka halak asa ias pangalaho ni nasida.

Alai ndang holan angka apostel na laho mangantusi hasintongan. Ai didok Jesus do, “Ndang holan nasida hutangiangkon, alai dohot do angka na porsea tu ahu alani hata ni nasida.” Boasa ditangiangkon Jesus nasida? Didok ma, “Asa sada nasida sude, songon Ho Amang na marsada dohot ahu jala ahu marsada dohot Ho. Dung i, gabe marsada ma nasida dohot hita.” (John 17:20, 21) Ndang sarupa Jesus dohot Amana, alai sapandapot do nasida di saluhutna. Jala ditangiangkon Jesus do asa songon i nang angka na mangihuthon ibana.

Nunga dipaboa Jesus tu angka apostel na naeng laho nama ibana paradehon inganan tu nasida di surgo. (Johannes 14:2, 3) Ditangiangkon Jesus ma i, didok ma, “Ale Amang, dipangido rohangku do asa rap ahu dohot nasida na nilehonmu tu ahu manang didia pe ahu maringanan. Asa idaon ni nasida hasangapon na nilehonmu tu ahu, ai dihaholongi Ho do ahu andorang so adong dope portibi on.” (Johannes 17:24) Dipatudu Jesus do na holong roha ni Debata tu ibana sian najolo, sian mulai so adong dope si Adam dohot si Hawa.

Di ujung ni tangiangna, didok Jesus do muse taringot goar ni Amana dohot holong ni Debata tu angka apostel dohot tu angka na laho manjalo “hasintongan” i. Didok ma, “Nunga hupaboa goarmu tu nasida jala tongtong dope paboaonku i. Alani i, adong ma holong ni roha di nasida songon holong ni rohami tu ahu asa marsada ahu dohot nasida.”​—Johannes 17:26.

Nunga sae Jesus martangiang dohot angka apostelna. Dung sae nasida ‘mangendehon puji-pujian, nangkok ma nasida tu Dolok Jetun’. (Markus 14:26) Dung i, laho ma nasida tu Taman Getsemane. Jotjot do Jesus laho tusi.

Dung i, sahat ma nasida di sada inganan di humaliang ni hau jetun. On do ra dalan laho masuk tu taman i. Disuru Jesus ma tinggal disi ualu apostelna. Ai didok Jesus do tu nasida, “Hundul ma hamu dison, asa martangiang jolo ahu tusan.” Dung i ditogihon Jesus ma tolu apostelna mangihuthon ibana, i ma si Petrus, si Jakobus, dohot si Johannes. Didok Jesus ma tu nasida, “Marsak situtu do rohangku, naeng mate huhilala. Dison ma hamu jala dungo ma hamu rap dohot ahu.”​—Mateus 26:36-38.

Mandao ma Jesus sian nasida. Marsinggang ma ibana jala martangiang. Aha do na ditangiangkon Jesus? Didok ibana ma, “Amang, sude do tarbahen ho. Salpuhon ma panginuman on sian ahu. Alai unang ma lomo ni rohangku, lomo ni roham ma.” (Markus 14:35, 36) Aha do maksud ni Jesus? Na so olo do ibana mangalehon ngoluna asa gabe tobusan? Ndang!

Tingki di surgo Jesus, nunga hea diida ibana hansit ni panguhuman na dihilala sasahalak dibahen halak Rom. Jala i ma na mambahen ibana marsak, ai hilalaonna do i satongkin nai. Borat do on di Jesus, ai laho uhumonna ma ibana songon sahalak parjahat. On boi mambahen lea goar ni Amana. Piga-piga jom nai dipakkuhon nama Jesus tu hau ala didok angka halak ibana mangaleai Debata.

Dung sae Jesus martangiang, didapothon ma apostelna na tolu i. Tarpodom do nasida diida ibana. Gabe didok ma tu si Petrus, “Na so boi do hamu dungo rap dohot ahu nanggo apala sajom? Tongtong ma hamu dungo jala sai martangiang, asa unang tarelaela hamu mangulahon dosa.” Diboto Jesus do na marsak angka apostelna jala nunga naeng manogot tingki i. Didok ibana ma, “Rade do nian roha i, alai gale do ia daging.”​—Mateus 26:40, 41.

Laho ma Jesus martangiang paduahalihon. Dipangido ma tu Debata asa ‘disalpuhon panginuman i’ sian ibana. Dung i didapothon ma apostelna na tolu i jala tarpodom do nasida. Ingkon martangiang do nian nasida asa unang tarela-ela. Tingki dipasingot Jesus nasida, “ndang diboto nasida be sidohononna tu ibana”. (Markus 14:40) Laho ma muse Jesus patoluhalihon, marsinggang ma ibana laho martangiang.

Olo do gabe lea goar ni Amana molo diuhum mate ibana songon sahalak parjahat. Gabe marsak ma ibana mamingkiri i. Dibege Jahowa do tangiang ni Anakna i. Alani i, disuru ma sada suru-suruan patoguhon roha ni Jesus. Nang pe songon i, tongtong do ibana martangiang tu Amana. Gariada, “lam gomos ma ibana martangiang”. Balga situtu do tanggung jawab ni Jesus. Molo ndang tongtong dioloi Jesus Debata, ndang boi ibana dohot sude na porsea tu ibana mangolu saleleng ni lelengna. Alani marsakna, “pola songon mudar hodokna manetek tu tano”.​—Lukas 22:44.

Didapothon Jesus ma muse apostelna na tolu i. Hape tarpodom do nasida. Didok Jesus ma, “Modom dope hamu jala maradi di tingki sisongon on! Nunga jonok be tingkina pasahatonna ma Anak ni jolma i tu tangan ni angka pardosa. Hehe ma hamu, laho ma hita. Ida ma! Nunga ro na manjehehon ahu.”​—Mateus 26:45, 46.

Nunga naeng manogot tingki i. Olo do angka malim mangalehon 30 hepeng logam tu si Judas Iskariot laho manghianati Jesus. Alani i, ditogihon si Judas ma angka malim kepala dohot angka halak Parise laho mangalului Jesus. Ditogihon do nang sapunguan tentara ni halak Rom dohot sahalak komandan militer.

Dung sae mangarayahon Paska, pintor laho do si Judas tu angka malim kepala tingki disuru Jesus ibana laho. (Johannes 13:27) Dipapungu nasida ma angka petugas dohot angka tentara. Ra tu inganan ni Jesus dohot angka apostelna mangarayahon Paskah do nasida parjolo laho. Saonari laho ma nasida tu Taman Getsemane na di bariba ni Rura Kidron. Diboan nasida do angka sinjata, lampu, dohot obor laho mangalului Jesus.

Saleleng saminggu i, jotjot do Jesus maradi di Taman Getsemane tingki borhat sian Betania tu Jerusalem. Alani i, pos do roha ni si Judas na disi do Jesus. Alai golap do ari tingki i, jala ndang tarida bohi ni Jesus dibahen angka hau jetun i. Asing ni i, ndang ditanda angka tentara i Jesus. Alani i songon dia ma bahenon ni nasida manangkup ibana? Dilehon si Judas do tanda tu nasida. Didok ma, “Manang ise na huumma, ibana ma i. Tangkup ma ibana, manat ma jaga hamu asa unang malua.”​—Markus 14:44.

Dung masuk si Judas dohot angka halak i tu Taman Getsemane, diida si Judas ma Jesus dohot angka apostel. Didapothon ma nasida, jala didok ma, “Horas Guru!” Laos diumma ibana ma Jesus. Didok Jesus ma, “Marhua ho tuson dongan?” (Mateus 26:49, 50) Didok Jesus ma muse, “Umma-umma do hape dibahen ho manjehehon Anak ni jolma i Judas?” (Lukas 22:48) Alai ndang dipaima Jesus be alus ni si Judas.

Didapothon Jesus ma angka halak i. Gabe tarida ma bohina alani lampu dohot obor i. Disungkun Jesus ma, “Ise do na niluluanmuna?” Didok nasida ma, “Jesus halak Nasaret i.” Ndang mabiar Jesus mandok, “Ahu do i.” (Johannes 18:4, 5) Ala tarsonggot, gabe martinggangan ma angka halak i.

Ndang lari Jesus di borngin i. Gariada disungkun ibana do muse ise na dilului nasida. Didok nasida ma, “Jesus halak Nasaret i.” Tangkas ma didok Jesus, “Nunga hupaboa tu hamu ahu do i. Molo ahu do na niluluanmuna, loas hamu ma laho halak on.” Nang pe naeng ditangkup Jesus, alai diingot ibana do naung hea didok ibana. Ndang diloas ibana mago nanggo sahalak pe sian angka apostelna. (Johannes 6:39; 17:12) Sai dijaga ibana do nasida asing ni “halak na ingkon mago i hian”, i ma si Judas. (Johannes 18:7-9) Dung i, dipangido ibana ma asa diloas laho angka apostelna.

Tingki diida angka apostel na laho ditangkup Jesus, disungkun nasida ma, “Tuan, hualo hami ma nasida dohot podang on?” (Lukas 22:49) Ndang dope dialusi Jesus, nunga pintor dibuat si Petrus podang sian tangan ni apostel na asing. Ditallik ibana ma pinggol siamun ni si Malkus, hatoban ni sintua ni malim.

Dijama Jesus ma pinggol ni si Malkus jala dipamalum ma. Dung i dipaboa ibana ma parsiajaran na ringkot tu si Petrus, “Pasarung ma podangmi, ai manang ise manintak podang, mate do bahenon ni podang.” Ndang mangalo Jesus tingki ditangkup. Ai didok ibana do, “Songon dia ma boi saut na nidok ni Surat na Badia i, na paboahon na ingkon masa i?” (Mateus 26:52, 54) Didok ibana ma muse, “Nda ingkon minum do ahu sian mangkuk na nilehon ni Ama i tu ahu?” (Johannes 18:11) Rade do Jesus mangulahon lomo ni roha ni Debata nang pe ingkon mate ibana.

Didok Jesus ma tu nasida, “Na dirimpu hamu do ahu pangarampok, umbahen diboan hamu podang dohot antuk-antuk laho manangkup ahu? Hape, ganup ari hundul do ahu di bagas joro mangajari, alai ndang ditangkup hamu ahu. Masa pe sudena i asa saut do na sinurat ni angka panurirang i.”​—Mateus 26:55, 56.

Ditangkup angka tentara, komandan militer, dohot angka petugas ni halak Jahudi ma Jesus jala ditali ma ibana. Dung diida angka apostel na masa i, lari ma nasida. Alai adong ma sahalak doli-doli na sai mangihuthon angka halak i mamboan Jesus. Olo do ra sisean ni Jesus i, na margoar si Markus. (Markus 14:51) Alai ditanda nasida do ibana, jala naeng ditangkup ma. Dung i lari ma ibana ndang marpangkean.

Ditali do tangan ni Jesus songon sahalak parjahat, jala diboan tu si Hannas. Ibana do sintua ni malim tingki dakdanak dope Jesus. Tingki i, longang do angka guru di bagas joro dibahen Jesus. (Lukas 2:42, 47) Dung si Hannas, angka anakna ma na manggantihon ibana gabe sintua ni malim. Jala saonari helana ma na gabe sintua ni malim, i ma si Kayapas.

Tingki disukkuni si Hannas Jesus, dipapungu si Kayapas ma anggota ni Sanhedrin. Adong 71 halak anggota ni Sanhedrin, dohot ma i sintua ni malim dohot angka malim kepala.

Disungkun si Hannas ma Jesus “taringot tu angka siseanna dohot na niajarhonna”. Didok Jesus ma, “Patar do ahu mangkatai di jolo ni natorop. Tongtong do ahu mangajari di sinagoga dohot di bagas joro, inganan parpunguan ni sude halak Jahudi. Ndang hea martabuni-tabuni ahu mangkatai. Boasa pola sungkunonmuna ahu? Sungkun hamu ma halak na hea mambege na huhatahon i.”​—Johannes 18:19-21.

Gabe dipastap sahalak petugas ma bohi ni Jesus jala didok ma, “Songon i do dohononmu mangalusi malim kepala?” Diboto Jesus do ndang sala ibana. Didok ma, “Molo adong na sala na hudok i, paboa ma dia na sala. Alai molo sintong do na hudok i, boasa pastaponmu ahu?” (Johannes 18:22, 23) Dung i disuru si Hannas ma asa diboan Jesus tu helana si Kayapas.

Dung i marpungu ma sude anggota ni Sanhedrin di jabu ni si Kayapas. Adong ma disi sintua ni malim, pangituai ni bangso i, dohot angka siboto surat. Sasintongna ndang boi sasahalak diadili tingki ari Paska. Alai ndang parduli nasida. Diulahon nasida do sangkapna na jahat i.

Jut situtu do roha ni nasida tu Jesus. Dung dipahehe Jesus si Lasarus, marsangkap do Sanhedrin laho mambunu ibana. (Johannes 11:47-53) Jala piga-piga ari naung salpu, marsangkap do angka pamimpin agama laho manangkup jala mambunu Jesus. (Mateus 26:3, 4) Andorang so diadili dope Jesus, nunga ditontuhon asa dibunu ibana.

Dung i, dilului angka malim kepala dohot anggota ni Sanhedrin ma halak laho mandok hatorangan na so tutu mangalo Jesus. Godang do halak na olo, alai ndang dos na nidok ni nasida. Dung i ro ma dua halak na mandok, “Hubege hami do didok ibana, ‘Rumpakkononku ma bagas joro na pinajongjong ni tangan ni jolma on, jala di bagasan tolu ari pajongjongonku ma muse bagas joro na asing na so pinajongjong ni tangan ni jolma.’” (Markus 14:58) Alai ndang dos na didok nasida.

Disungkun si Kayapas ma Jesus, “Na so dibege ho do na nidok ni nasida laho mangalo ho?” (Markus 14:60) Alai ndang olo Jesus mangalusi hata ni dua halak i. Alani i, dilului Sintua ni Malim Kayapas ma cara na asing laho patuduhon na marsala Jesus.

Diboto si Kayapas do na so lomo roha ni halak Jahudi molo adong halak na mandok dirina Anak ni Debata. Hea do didok Jesus Amana do Debata. Alani i, naeng dipamate halak Jahudi ma ibana ala didok nasida “dipados ibana do dirina tu Debata”. (Johannes 5:17, 18; 10:31-39) Diboto si Kayapas do i. Alani i, didok ibana ma tu Jesus, “Marsumpa ma ho di bagasan goar ni Debata na mangolu i, paboa ma tu hami, tutu do ho Kristus anak ni Debata?” (Mateus 26:63) Nunga jotjot dipaboa Jesus na Anak ni Debata ibana. (Johannes 3:18; 5:25; 11:4) Molo ndang dialusi ibana i, hira na so tutu ma ibana Anak ni Debata. Alani i didok Jesus ma, “Ahu do i, jala idaonmuna ma Anak ni jolma i hundul di siamun ni Debata na marhuaso i jala ro ma ibana di atas ni ombun di langit.”​—Markus 14:62.

Antar diribak si Kayapas ma abit luarna jala didok ma, “Na mangaleai Debata do ibana! Tu aha be luluan saksi? Nunga dibege hamu ibana mangaleai. Boha do didok rohamuna?” Dung i didok sude anggota ni Sanhedrin i ma, “Pamateon do ibana!”​—Mateus 26:65, 66.

Dung i dileai nasida ma Jesus jala ditumbuki. Adong ma na mamastap bohina jala na manijuri ibana. Dung ditutup nasida bohi ni Jesus, dipastap ma ibana jala didok ma, “Molo panurirang do ho, paboa ma tu hami ise na mamungkul ho!” (Lukas 22:64) Lea do dibahen nasida tu Anak ni Debata jala ndang sintong nasida manguhumi ibana!

Dung ditangkup di Taman Getsemane, ditadingkon angka apostelna do Jesus ala mabiar. Alai adong ma dua apostel i na mulak mangihuthon angka halak na mamboan Jesus, i ma si Simon Petrus “dohot sahalak sisean na asing”. Olo do ra apostel Johannes i. (Johannes 18:15; 19:35; 21:24) Diihuthon nasida ma Jesus na diboan tu si Hannas. Tingki disuru si Hannas asa diboan Jesus tu jabu ni Sintua Malim Kayapas, diihuthon apostel na dua i do sian na dao. Ai mabiar do nasida dipamate. Alai holong do roha ni nasida tu Tuanna.

Ditanda sintua ni malim do si Johannes. Alani i, diloas ma ibana masuk tu jabu ni si Kayapas. Alai di luar do si Petrus paimahon si Johannes mangkatai tu sahalak hatoban borua na manjaga pintu, dung i gabe diloas ma si Petrus masuk.

Godang do halak jongjong di halaman jabu ni si Kayapas. Ala ngali, dipagalak nasida ma api. Rap hundul ma si Petrus dohot nasida laho mansisulu huhut “mangida na laho masa” tu Jesus. (Mateus 26:58) Ala gabe tiur halaman i, boi ma tangkas diida hatoban borua i bohi ni si Petrus. Didok ma, “Nda dohot do ho sisean ni baoa i?” (Johannes 18:17) Dohot ma na asing mandok songon i tu si Petrus.​—Mateus 26:69, 71-73; Markus 14:70.

Gabe mabiar ma si Petrus mambege i didok ma, “Ndang hutanda i, jala ndang huantusi manang aha na nidokmi.” (Markus 14:67, 68) Dung i marsumpa ma ibana muse mandok, “Hona bura ma ahu molo margabus.” Dung dua hali didok ibana na so ditanda ibana Jesus, laho ma ibana sian i.​—Mateus 26:74.

Diadili dope Jesus tingki i. Di tingkat dua jabu ni si Kayapas do Jesus diadili. Alani i gabe boi ma diida si Petrus dohot na asing, angka ise saksi na masuk manang na kaluar sian i.

Tarida do sian logat ni si Petrus na halak Galilea ibana. Asing ni i, adong do disi keluarga ni si Malkus, na ditallik si Petrus pinggolna. Didok ibana ma tu si Petrus, “Nda huida do ho rap dohot ibana di porlak i?” Alai ndang diakkui ibana i, jala on ma na patoluhalihon disoadahon ibana Jesus. Dung i pintor martahuak ma manuk.​—Johannes 13:38; 18:26, 27.

Tingki i, olo do ra di teras jabu ni si Kayapas na di ginjang i Jesus jongjong. Gabe lungun ma roha ni si Petrus tingki diida Jesus ibana. Diingot si Petrus ma na didok Jesus tingki di kamar parginjang i. Lungun situtu ma rohana alani i. Dung i laho ma ibana tu luar jala tangis-tangis.​—Lukas 22:61, 62.

Togu do haporseaon ni si Petrus jala sai dioloi ibana do Debata. Alai boasa ma ndang diakkui ibana Tuanna? Hape ndang marsala Jesus jala ndang patut ibana didok parjahat. Ingkon paboaonna ma nian na so marsala Jesus. Alai ditadingkon ibana do Anak ni Debata na mangalehon “hata hangoluan na saleleng ni lelengna”.​—Johannes 6:68.

Parsiajaran na denggan do on tu sude naposo ni Debata. Nang pe togu haporseaonta, ingkon manat do hita. Ai boi do gabe mangulahon na sala sasahalak molo ndang mangarade tingki masa paraloan dohot pangunjunan.