Referensi tu Parpunguan Hangoluan dohot Pangkobasion na Laho Diparsiajari
© 2023 Watch Tower Bible and Tract Society of Pennsylvania
1-7 JANUARI
ARTA NA ARGA NA ADONG DI BIBEL JOB 32-33
Tapatogu ma Roha ni Halak na Marsak
it-1-IN 671 ¶1
Si Elihu
Dang hea dibeda-bedahon si Elihu jolma. Dang hea dipanggar ibana manang ise pe. Diakkui ibana do sian tano do sude jolma ditoppa Debata, termasuk ma ibana dohot si Job. Jadi sarupa do sude jolma di jolo ni Debata. Tikki dipasingot si Elihu si Job, denggan do cara ni ibana pasingotton, dang dipabiar-biar si Job. Tarida do muse dongan na burju si Elihu, ala dijou do goar ni si Job tikki makkatai nasida. I ma na so diulahon si Elipas, si Bildad, dohot si Sopar.—Job 32:21, 22; 33:1, 6.
w14-IN 15/6 25 ¶8-10
Tatiru ma Cara ni Jahowa Mangida Akka Donganta
8 Asa boi taattusi perasaan ni akka donganta, ikkon taingot do akka hasusaan na diadopi nasida. Adong do ra sian nasida na tinggal rap dohot keluarga na so Saksi, adong na marsahit, jala na asing gok sipikkiranna. Molo hita gabe nasida, pasti harap do rohatta halak na asing mangattusi perasaanta. Pikkirhon ma jo contoh on. Najolo hea do halak Israel gabe hatoban di Mesir. Susa do ngolu ni nasida disi. Jadi sebelum masuk tu Tano na Dijanjihon, dipaingot Jahowa ma nasida asa ‘unang pajogalhon rohana jala unang holit’ tu akka donganna na pogos jala na susa.—5 Mus. 15:7, 11; 3 Mus. 25:35-38.
9 Molo adong donganta na marsitaonon, unang ma tahakimi ibana manang pittor hatop-hatop talului hasalaanna, alai taurupi ma ibana. (Job 33:6, 7; Mat. 7:1) Sarupa ma i molo adong sasahalak na marlanggar di dalan jala diboan tu rumah sakit. Pasti langsung diobati akka dokter dohot perawat do ibana, dang na jolo disukkuni dokter i jo boasa marlanggar ibana baru pe diobati. Dos songon i ma, molo adong akka dongan na gale taurupi ma nasida. Ai i do na dihaporluhon nasida di tikki i.—Jaha 1 Tessalonik 5:14.
10 Molo tabayakkon songon dia keadaan ni akka dongan, boi ma taattusi songon dia perjuangan ni nasida. Contohna adong do akka donganta na suamina dang Saksi Jahowa jala menentang ibana saleleng martaon-taon. Adong do muse akka donganta borua na ikkon pagodang-godangkon ianakkonna sahalakna, alai torus ro marpungu. Asing ni i muse, adong do akka na poso na torus mampartahatton haporseaonna di sikkola. Pasti holong hian do roha ni nasida tu Jahowa. I ma na mambahen nasida toktong setia tu Jahowa. Jadi molo taingot sude naung diulahon akka donganta lao manomba Jahowa, pasti taanggap do nasida “mora di haporseaon” nang pe hira na gale idaon nasida.—Jak. 2:5.
Andigan do Tikki na Pas lao Makkatai?
17 Baoa na paopatton na majuppangi si Job, i ma si Elihu, keluarga ni si Abraham. Ditangihon ibana do si Job dohot tolu baoa i makkatai. Ala manat do diparrohahon ibana hata ni nasida, gabe boi ma dilehon ibana poda na denggan, jala boi ma dipadenggan ibana cara marpikkir ni si Job. (Job 33:1, 6, 17) Rikkot do di si Elihu pasangappon Jahowa, dang dirina sandiri manang halak na asing. (Job 32:21, 22; 37:23, 24) Sian si Elihu hita marsiajar, adong do tikkina hita hohom jala manangihon. (Jak. 1:19) Jala tikki talehon poda i, tujuanta i ma lao pasangappon Jahowa, dang diritta sandiri.
18 Molo taihutton poda ni Bibel taringot andigan jala songon dia hita makkatai, on patuduhon na taargai do silehon-lehon sian Jahowa. Songon na didok Raja Salomo, “Hata na nidok na hona di tingkina, songon [apel na sian mas] do i na dilongkothon di perak.” (Poda 25:11, Bibel siganup ari.) Lapatanna, molo manat tatangihon aha na didok halak jala jolo tapikkirhon aha na naeng tahatahon, hatatta i boi do gabe songon apel na sian mas na massai uli jala mararga. Jadi, dang soal godang manang otik na tahatahon, boi do hatatta i patoguhon halak na asing jala mambahen las roha ni Jahowa. (Poda 23:15; Eps. 4:29) Jadi molo marbisuk hita makkatai, on patuduhon na taargai do silehon-lehon sian Jahowa.
Arta na Adong di Bibel
w13-IN 15/1 19 ¶10
Torus ma Pajonok tu Jahowa
10 Dang sala molo taparrohahon penampilanta. Alai dang pola porlu hita pamarsakku mamikkiri i. Unang ma sappe taulahon perawatan kecantikan na berbahaya holan asa torus bagak idaon. Boasa? Alana dang penampilanta na diida Jahowa. (Jaha 1 Petrus 3:3, 4.) Ai didok do di Bibel, “Dos songon mahkota na uli do uban na adong di halak na mardalan di dalan na sittong.” (Poda 16:31) Tatiru ma cara pandang ni Jahowa i. Taingot ma molo lam tamba umur ni sasahalak, biasana lam marbisuk do ibana ala nungnga godang pengalamanna jala nungnga terbukti kesetiaanna. Asing ni i molo ‘marlas ni roha’ sasahalak manomba Jahowa, i do na mambahen ibana uli dang soal sadia umurna jala songon dia kesehatanna. (Neh. 8:10) Holan di tano na imbaru do hita boi sehat, sempurna, jala mulak poso. (Job 33:25; Jes. 33:24) Huhut paimahon i, torus ma tapatogu haporseaotta tu Jahowa, jala taulahon ma akka parettana. Hasilna, boi ma hita toktong jonok tu Jahowa jala tetap marlas ni roha dang soal songon dia penampilanta saonari.—1 Tim. 4:8.
8-14 JANUARI
ARTA NA ARGA NA ADONG DI BIBEL JOB 34-35
Na Porlu Taingot molo Dang Adil Halak tu Hita
Songon dia do Parange ni Debata?
Sai tigor do sude na diulahon Debata. Didok do di Bibel, “Dao ma sian Debata anggo hajahaton, jala dao sian Nasunhinagogo i uhum hageduhon!” (Job 34:10) Tigor do carana manguhumi, songon na didok di buku Psalmen taringot Jahowa, “Tigor panguhummu di angka bangso.” (Psalmen 67:5) Na di bagasan roha do na diida Jahowa, jadi ndang boi Ibana dioto-otoi. Diboto Ibana do dia na sintong jala sai denggan do keputusan na dibahen. (1 Samuel 16:7) Jala ndang lomo roha ni Jahowa mangida hajahaton na masa di portibi on. I do alana marjanji do Ibana, “Anggo halak parjahat siap sian tano on.”—Poda 2:22.
Aha do na Laho Salpu Tingki Ro Harajaon ni Debata?
5 Aha do na laho ulahonon ni Jahowa? Dilehon Jahowa do tingki tu parjahat asa marhamubaon. (Jes. 55:7) Nang pe laho ripashononNa portibi on, alai ndang pintor diuhumi Jahowa dope nasida. Tingki ro hasusaan bolon, aha do na laho masa tu halak na so olo marhamubaon dohot na satolop tu hajahaton? Marjanji do Jahowa laho mangaripashon parjahat sian tano on. (Jaha Psalmen 37:10.) Saonari, godang do na manabunihon hajahaton na binahenna asa unang diuhum. (Job 21:7, 9) Alai didok di Bibel, “Tongtong do diranapi matana angka dalan ni ganup jolma, jala nasa langkalangkana diida Ibana do. Ndang adong haholomon manang linggoman ni hamatean tau partabunian ni halak siula hajahaton.” (Job 34:21, 22) Ndang adong na buni di adopan ni Jahowa. Diboto Ibana do sude ulaon ni parjahat. Dungkon Armagedon, molo talului parjahat i, ndang adong be nasida di tano on!—Ps. 37:12-15.
Olo do Hamu Torus Mangihutton Jesus?
19 Songon i do na masa saonari? Ido. Godang do halak saonari dang lomo rohana tu Saksi Jahowa ala netral hita di politik. Hape diharappon nasida do asa terlibat hita di pemilihan umum. Alai taboto do molo tapillit jolma gabe pamimpinta, na manolak Jahowa do hita disi. (1 Sam. 8:4-7) Na asing mangharappon tabangun sikkola dohot rumah sakit lao patuduhon na parduli hita tu akka halak. Alai dang tabahen songon i. Fokus do hita marbarita na uli, dang pasaehon masalah. Alani i gabe godang ma na manolak hita.
20 Aha do na ikkon taulahon? (Jaha Mateus 7:21-23.) Ikkon fokus do hita mangulahon tugas na dilehon Jesus tu hita, i ma marbarita na uli. (Mat. 28:19, 20) Unang ma gabe dang fokus hita alani masalah politik manang masalah na asing na adong di portibi on. Memang holong do rohatta tu akka halak jala parduli do hita tu nasida. Alai taboto do, cara na paling denggan mangurupi nasida, i ma mangajarhon Harajaon ni Debata tu nasida jala mangurupi nasida marale-ale tu Jahowa.
Arta na Adong di Bibel
Anggiat ma Girgir ni Rohamu Parohon Sangap tu Jahowa!
3 Sahalak baoa na poso na margoar si Elihu manangihon pangkataion ni si Job dohot tolu baoa i. Dung sae pangkataion i, disungkun si Elihu ma si Job taringot tu Jahowa, “Molo tung pintor ho, aha ulina sian i lehononmu? Manang tung aha ma jaloonna sian tanganmu?” (Job 35:7) Sarupa do hata ni si Elihu tu hata ni baoa na tolu i? Ndang sarupa. Alana, holan baoa na tolu i do na dipasingot Jahowa. Didok si Elihu, nang pe ndang tasomba Jahowa, ndang adong pangkorhon ni i tu Jahowa. Ndang adong na hurang di Jahowa. Ndang adong na boi mambahen Ibana gabe gumogo manang ummora. Sasintongna, sian Debata do angka na denggan na adong di hita, jala diparrohahon do caranta mamangke i.
15-21 JANUARI
ARTA NA ARGA NA ADONG DI BIBEL JOB 36-37
Toho do Boi Hita Mangolu Saleleng ni Lelengna?
Boi do Hita Mangolu Saleleng ni Lelengna
3 Boi do pos rohatta tu janji ni Jahowa taringot hangoluan salelengna ala sian Ibana do ro hangoluan jala Ibana pe mangolu salelengna. (Ps. 36:9) Taparrohahon ma jo piga-piga ayat ni Bibel na mambuktihon i. Contohna, Psalmen 90:2 mandok ‘Debata na so marmula do Jahowa i jala na so marujung’. Songon i do tong na dipaboa di Psalmen 102. (Jaha Psalmen 102:12, 24, 27.) Jala didok Panurirang Habakuk do taringot Jahowa, “Ale Jahowa, toktong do Ho adong sian saleleng ni lelengna ro di saleleng ni lelengna, Ho do Debatakku Nabadia jala dang na lao mate Ho.”—Hab. 1:12.
4 “Debata na toktong adong sahat tu saleleng ni lelengna do Jahowa.” (Jes. 40:28) Maol do ra diattusi hamu lapatan ni hata on. Memang godang do dang mangattusi on. I do alana didok si Elihu, “Dang taretong ganjang ni umurna.” (Job 36:26) Alai taingot ma nang pe dang taattusi taringot sada hal, dang na berarti dang tutu i adong. Misalna dang boi takkas taattusi sude taringot cahaya. Alai dang na berarti dang adong cahaya. Sarupa songon i ma, dang boi jolma botul-botul mangattusi na toktong adong saleleng ni lelengna do Jahowa i. Alai nang pe songon i faktana toktong do Jahowa i adong saleleng ni lelengna. (Rom 11:33-36) Nungnga adong Jahowa sebelum adong mataniari, sumber ni cahaya. Pos do rohatta Jahowa do “na manoppa tano on marhite huasona” jala “Ibana do na pahembangkon langit marhite habisukonna”. (Jer. 51:15; Ul. 17:24) Aha dope alasan na asing na mambahen pos rohatta boi do hita mangolu salelengna?
Diargai Hamu do Akka Silehon-lehon sian Debata?
6 Boi do adong aek di tano on, ala pas do jarak ni tano on tu mataniari. Molo otik pe unjonok tano on sian mataniari, boi do gabe gurgur sude aek, jala gabe lam mohop ma tano on. Jala molo otik pe undao sian mataniari, gabe beku ma sude aek, jala gabe es ma sude isi ni tano on. Alai, ala pas do parpeak ni tano on dibahen Jahowa, gabe adong ma sistem daur ulang aek jala boi ma hita mangolu di tano on. Mohop ni mataniari i ma na mambahen aek na di laut dohot di permukaan ni tano on menguap, jala gabe awan di langit. Ganup taon, adong martriliun liter aek na menguap gabe awan di langit. Toktong do aek i di langit hira-hira saleleng sappulu ari. Dung i, madabu ma i tu tano gabe udan manang salju. Mulak ma muse aek i tu laut, tu tao, manang tu sunge. Songon i ma na masa marulak-ulak. Sian sistem daur ulang aek on, tarida do na marbisuk Jahowa jala balga situtu do huasona.—Job 36:27, 28; Pjm. 1:7.
Torus ma Jaga Harapanmuna Toktong Togu
16 Hadiah na massai arga do harapan lao mangolu saleleng ni lelengna. Tarpaima do hita asa masa i di ari na naeng ro, jala pasti saut do i. Harapan i sarupa songon jangkar, na mambahen hita tenang tikki susa hita, tikki dianiaya, manang tikki tarancam ngolutta. Harapan i pe sarupa do songon takkuluk bosi na boi melindungi pikkiranta, asa sanggup hita mambolokkon akka pikkiran na sala jala mangulahon na sittong. Asing ni i, harapan on mangurupi hita lam jonok tu Debata jala mangurupi hita makkilala holong ni Jahowa na massai balga tu hita. Jadi godang do manfaatna molo toktong togu harapanta.
Arta na Adong di Bibel
it-1-IN 1292 ¶6
Komunikasi
Marragam do cara ni halak najolo mamboto sada barita. Biasana akka barita i langsung do dihatahon, dang disurat. (2Sam 3:17, 19; Job 37:20) Jotjot do akka halak mamboto sada barita tikki lao nasida tu pasar. Asing ni i molo adong akka halak na lao tu sada luat, biasana maradi do nasida di sada tempat mangalului sipanganon, aek, dohot na asing. Setiap maradi nasida, dipasahat nasida ma barita tu akka halak na adong di tempat i. Songon i ma cara ni halak najolo mamboto sada barita. Khususna akka halak na tinggal di Palestina, mura do nasida mamboto sada barita sian luar negeri. Alana sering do negeri Palestina dilewati akka halak na naeng lao tu Asia, Afrika, dohot Eropa.
22-28 JANUARI
ARTA NA ARGA NA ADONG DI BIBEL JOB 38-39
Lomo do Rohamuna Mamparrohahon Akka Toppaan?
Sabar do Hamu Paimahon Jahowa?
7 Bibel mandok, adong do prosesna tikki ditoppa Jahowa tano on. Na parjolo ditottuhon ma jo “ukkuranna”, dibahen ma “tiang panukkol ni tano on”, dungi i dibahen ma “batu parsuhi-suhina”. (Job 38:5, 6) Jala dung sae dibahen Jahowa sude toppaanna i, diparade Jahowa dope tikkina lao mamareso sude karejona i. (1 Mus. 1:10, 12) Boi do dibayakkon hamu songon dia perasaan ni akka suru-suruan tikki dibereng nasida dibahen Jahowa akka toppaanna i? Pasti las hian do roha ni nasida. Bibel mandok, sappe “marsurak marlas ni roha” do akka suru-suruan i. (Job 38:7) Aha do na boi taparsiajari sian i? Memang porlu do tikki marribu taon asa sae ditoppa Jahowa saluhutna. Alai dung dipareso Jahowa sude na ditoppana i, didok Ibana “massai denggan do i sude”.—1 Mus. 1:31.
Haheheon Patuduhon Holong, Bisuk, dohot Hasabaron ni Jahowa
2 Na parjolo, ditoppa Jahowa ma Anakna, i ma Jesus. Dung i, marhite Jesus ‘ditompa Jahowa ma saluhutna’, termasuk ma marjuta suru-suruan. (Kol. 1:16) Massai las do roha ni Jesus boi rap saulaon dohot Bapakna. (Poda 8:30) Akka suru-suruan pe, tong do marlas ni roha ala diida nasida songon dia Jahowa dohot Jesus manoppa surgo dohot tano on. Aha do buktina? Tikki ditoppa Jahowa tano on, “marolopolop” do nasida. Jala toktong do dipuji nasida Jahowa tikki ditoppa Ibana akka toppaan na asing, tarlumobi ma tikki ditompa jolma. (Job 38:7; Poda 8:31) Sian sude toppaan i, boi ma tarida bisuk dohot holong ni Jahowa.—Ps. 104:24; Rom 1:20.
Parsiajari ma Akka Sifat ni Jahowa Sian Akka Toppaanna
8 Boi do Jahowa tahaporseai. Diurupi Jahowa do si Job asa lam porsea tu Ibana. (Job 32:2; 40:6-8) Tikki makkatai Jahowa tu si Job dipaboa Ibana do taringot toppaanna songon bintang, ombun, dohot ronggur. Dipaboa Jahowa do muse taringot akka binatang songon banteng dohot hoda. (Job 38:32-35; 39:9, 19, 20) Akka toppaan i dang holan patuduhon huaso ni Jahowa na massai balga. Alai tong do patuduhon holong dohot bisukna. Hasilna gabe lam porsea ma si Job tu Jahowa. (Job 42:1-6) Dos songon i ma tikki taparsiajari taringot akka toppaan, dipaingot do hita na umbisuk do Jahowa jala umbalga do huasona sian hita. Jadi pasti sanggup do Ibana jala lomo rohana manalpuhon sude sitaononta. Gabe lam togu do haporseaotta tu Jahowa mamboto on.
Arta na Adong di Bibel
it-2-IN 344 ¶5-6
Silehon Patik
Jahowa do Silehon Patik. Jahowa do na mangalehon patik manang hukum na adong di alam semesta on. Dibahen Ibana do hukum fisika asa taratur sude toppaanna. (Job 38:4-38; Ps 104:5-19) Marguna do i muse tu akka binatang. (Job 39:1-30) Jala akka jolma pe, ikkon diihutton do hukum fisika na dibahen Jahowa i. Alai dang holan i, ikkon diihutton nasida do tong hukum moral na dibahen Ibana. Alana dilehon Jahowa do pikkiran tu jolma, boi do nasida mamboto dia na sittong dohot na sala, jala boi do nasida marale-ale tu Jahowa. (Rom 12:1; 1Kor 2:14-16) Asing ni i, dibahen Jahowa do muse hukum na mangatur akka suru-suruan.—Ps 103:20; 2Ptr 2:4, 11.
Dang boi diuba jala dang boi dialo hukum fisika na dibahen Jahowa. (Jer 33:20, 21) Taratur do sude hukum na dibahen Jahowa di alam semesta on. Jala i ma na gabe patokan ni akka ilmuwan lao mangetong pergerakan bulan, akka planet, dohot akka benda luar angkasa na asing. Hasilna, gabe akurat ma perhitungan ni nasida. Molo adong na mangalo hukum fisika na dibahen Debata, pasti adong do akibat na dirasahon nasida. Songon i ma tong hukum moral na dibahen Debata. Ikkon diihutton do i, dos songon hukum fisika i. Molo adong na mangalo i, pasti adong do akibatna, nang pe dang selalu langsung dirasahon akibatna i. Ai didok do di Bibel, “Dang boi gabusan Debata. Manang aha na disuan sasahalak, i do panenonna.” (Gal 6:7; 1Tim 5:24) Jadi dang boi diuba hukum moral na dibahen Debata, jala dang boi dialo.
29 JANUARI–4 FEBRUARI
ARTA NA ARGA NA ADONG DI BIBEL JOB 40-42
Marsiajar sian Parngoluon ni si Job
w10-IN 15/10 3-4 ¶4-6
“Ise ma na Boi Mamboto Pikkiran ni Jahowa?”
4 Di Psalmen 50:21 didok Jahowa do, “Gabe dirippu ho ma na sarupa Au songon ho.” Ayat on patuduhon jotjot do jolma menilai tindakan ni Debata mangihutton pikkiran ni nasida sandiri. Lobi sian 175 taon naung salpu, adong do tong sahalak pakar ni Bibel na mandok, “Jotjot do jolma menghakimi Debata mangihutton standar ni nasida sandiri. Jala didok nasida ikkon Debata ma nian na mangihutton lomo ni roha ni jolma.” Ikkon manat do hita asa unang songon i cara marpikkirta.
5 Unang ma tapaksahon ikkon songon na di rohatta aha na diulahon Jahowa. Sipata tikki tajaha Bibel, olo do ra didok rohatta hira na so adil manang hira na so sittong tindakan ni Jahowa. Hape na so taboto do sude faktana, jala dang sempurna hita. I ma na masa tu halak Israel najolo. Didok nasida dang adil tindakan ni Jahowa. Alani i ma didok Jahowa tu nasida, “Alai dohononmuna ma, ‘Dang sittong na binahen ni Jahowa i.’ Ale halak Israel tangihon ma! Tutu do dang sittong na hubahen i? Manang ulaonmuna i do na so sittong?”—Hes. 18:25.
6 Jadi asa unang songon i cara marpikkirta, ikkon taakkui do dang boi taattusi sude pikkiran ni Jahowa jala jotjot do sala kesimpulan na tabahen. I ma na masa tu si Job. Tikki marsitaonon ibana, sanga do ibana mandele. Jala gabe holan dirina sandiri do na dipikkirhon ibana, dang diingot ibana be Jahowa. Alai diurupi Jahowa do si Job padenggatton cara marpikkirna, asa diboto ibana terbatas do sudut pandang ni jolma. Dibahen Jahowa ma 70 sukkun-sukkun tu si Job. Alai dang adong nanggo sada pe sukkun-sukkun i na boi dialusi ibana. Gabe sadar ma si Job, nga sala hape ibana jala olo do ibana manguba cara marpikkirna.—Jaha Job 42:1-6.
Tongtong ma Taingot Parsoalan na Rumingkot
12 Na so pardenggan basa do Jahowa tingki mangkatai tu si Job di sitaononna? Ndang songon i. Diantusi jala diargai si Job do poda ni Jahowa. Didok si Job, “Jora ma ahu jala husolsoli dagingku hundul di bagasan orbuk dohot sirabun.” (Job 42:1-6) Dung i, adong ma sahalak baoa na margoar si Elihu na mangurupi si Job paubahon pangantusionna. (Job 32:5-10) Dung ditangihon si Job poda na sian Jahowa jala dipauba pangantusionna, dipaloas Jahowa do na asing mamboto na las rohaNa mangida si Job.—Job 42:7, 8.
Torus ma ‘Paima Janji ni Debata’
17 Dang holan si Job naposo ni Jahowa na toktong barani jala togu tikki masa hasusaan. Dipaboa Apostel Paulus do di bukku Heber, godang dope na asing na setia songon si Job. Dos ‘songon ombun do godang ni nasida’. (Heb. 12:1) Nang pe masa hasusaan, alai torus do nasida setia tu Jahowa saleleng mangolu nasida. (Heb. 11:36-40) Memang dang diida nasida dope saut sude janji ni Jahowa i, alai torus do nasida paimahon janji i. Sia-sia do kerja keras dohot ketekunanna i? Daong. Ala nungnga berupaya nasida mambahen las roha ni Jahowa, pasti idaon ni nasida do annon saut sude janjina i. (Heb. 11:4, 5) Jala gabe teladan do nasida di hita asa toktong marpos ni roha tu janji ni Jahowa.
18 Saonari, lam tu jahatna do portibi on. (2 Tim. 3:13) Dang menyerah dope Sibolis mambahen susa naposo ni Debata. Nang pe songon i bertekad ma hita torus melayani Jahowa. Jala torus ma ‘tapaima-ima janji ni Debata na mangolu i’. (1 Tim. 4:10) Taingot ma, pasu-pasu na dilehon Jahowa tu si Job mambuktihon, na parholong do Jahowa i jala parasi roha. (Jak. 5:11) Jadi songon si Job, toktong ma hita setia tu Jahowa. Jala pos ma rohatta pasu-pasuon ni Debata do “halak na marsitutu mangalului Ibana”.—Jaha Heber 11:6.
Arta na Adong di Bibel
it-1-IN 642 ¶3
Mangarehei
Toktong do si Job setia tu Jahowa nang pe direhei akka donganna ibana. Alai sanga do sala cara marpikkir ni si Job. Tikki na direhei akka donganna i ibana, berfokus do ibana tu dirina sandiri. Dang be dipikkirhon ibana Debata. Bahkan didok rohana, ussittong do ibana sian Debata. (Job 35:2; 36:24) Dirippu si Job do ibana na dileai akka donganna i. Ala torus ibana berfokus tu rehe-rehe ni nasida, gabe disarupahon ma ibana songon na manginum aek. Alani i ma didok si Elihu, “Ise ma na songon si Job? Ditangihon ibana do rehe-rehe ni halak songon na manginum aek.” (Job 34:7) Alai di pudian ni ari dipaboa Jahowa ma tu si Job, sabotulna Debata do na dileai akka donganna i, dang ibana. (Job 42:7) Hea do tong didok Jahowa songon i tu si Samuel. Tikki dipangido halak Israel sahalak raja, didok Jahowa do tu si Samuel, “Dang ho na ditolak nasida, alai Au do. Ditolak nasida do Au gabe raja ni nasida.” (1Sam 8:7) Jala molo adong pe na mangarehei akka sisean ni Jesus, nungnga didok Jesus hian, “Sogo ma roha ni sude jolma mangida hamu alani goarhu.” (Mat 24:9) Jadi taingot ma molo dianiaya manang direhei pe hita, dang hita sabotulna na dileai nasida alai Debata do. Molo taingot on, gabe boi ma hita toktong sabar, setia tu Jahowa, jala ujungna tadapot ma upa sian Ibana.—Luk 6:22, 23.
5-11 FEBRUARI
ARTA NA ARGA NA ADONG DI BIBEL PSALMEN 1-4
Marpihak ma tu Harajaon ni Debata
“Huturokku ma Akka Bangso”
8 Songon dia do reaksi ni akka halak mambege barita na uli taringot tu Harajaon i? Godang do halak na menolak. (Jaha Psalmen 2:1-3.) Gabe gaor do akka bangso. Ditolak nasida do Pamimpin naung dipillit Jahowa. Dang dianggap nasida barita taringot tu Harajaon i, “barita na uli”. Buktina, adong do piga-piga pamaretta na mangorai ulaonta marbarita. Nang pe nasida mangakku manomba Debata, alai dang diakkui nasida pamarettaon ni Debata. Sarupa do nasida songon akka pamimpin di jaman ni Jesus. Dianiaya nasida do akka sisean ni Jesus di tikki i, alai sasittongna na mangalo Jesus do nasida disi, i ma Pamimpin na Dipillit Jahowa.—Ul. 4:25-28.
Tongtong ma Netral di Portibi on
11 Holongan di hepeng. Molo hepeng manang arta na rumingkot di hita, boi do on mambahen hita maol netral. Dung taon 1970, godang Sitindangi Ni Jahowa di Malawi habis artana ala ndang olo nasida parsidohot tu politik. Alai, adong do na so tahan manaon hasusaan i. Sahalak donganta na margoar si Rut mandok, “Rap do hami tingki i di pengungsian, alai deba ndang tahan di kamp pengungsian i, ujungna mulak tu jabu jala margabung tu partai politik.” Alai, ndang sude naposo ni Debata songon i. Godang do na tongtong netral nang pe mago sude artanasida.—Heb. 10:34.
Arta na Adong di Bibel
it-2-IN 759 ¶1-3
Kulit ni Eme
Dung panen, ikkon diduda do eme asa boi bukka manang lepas kulit ni eme sian borasna. Jadi dang adong be guna ni kulit ni eme i, sibolokkonon nama i. Di Bibel dipakke do istilah kulit ni eme lao manggombarhon akka na so marguna, na so dihalomohon, jala sibolokkonon.
Dung lepas kulit ni eme sian borasna, dipiari ma i muse asa habang kulit ni eme i jala tinggal holan borasna. (Ida it-2-IN 964, TAMPI, MENAMPI.) Dipakke do istilah on lao manggombarhon songon dia Jahowa papulikkon halak na murtad dohot na mangalo Ibana sian akka naposona. (Job 21:18; Ps 1:4; 35:5; Jes 17:13; 29:5; 41:15; Hos 13:3) Didok do tong di Bibel, ropukkonon ni Harajaon ni Debata nama akka musu ni Debata gabe songon kulit ni eme na dihabangkon alogo.—Dan 2:35.
Dukkon i biasana dipapungu do kulit ni eme jala ditutung asa unang marhabangan be i tu boras naung ias i. Songon kulit ni eme na ditutung i, songon i ma na lao masa haduan tu akka halak na mangihutton ibadat na so sittong. Disurirangkon si Johannes do taringot nasida, ‘Tutungon ni Jesus ma kulit ni eme tu api na so ra mittop.’—Mat 3:7-12; Luk 3:17; ida it-1-IN 1053, IRIK, MENGIRIK.
12-18 FEBRUARI
ARTA NA ARGA NA ADONG DI BIBEL PSALMEN 5-7
Toktong Setia tu Jahowa Dang Soal Songon dia Pambahenan ni Halak
Taparsiajari ma Bibel Asa Sabar jala Margogo Hita
7 Hea do dihianati dongan manang keluargamuna hamu? Molo hea, marsiajar ma sian pengalaman ni Raja Daud. Hea do ibana dihianati anakna si Absalom. Berupaya do si Absalom gabe raja manggattihon bapakna.—2 Sam. 15:5-14, 31; 18:6-14.
8 (1) Martangiang. Sebelum mamparsiajari pengalaman on, paboa ma tu Jahowa songon dia haccit ni rohamuna ala dihianati hamu. (Ps. 6:6-9) Takkas ma paboa tu Jahowa songon dia pakkilalaanmuna. Dung i, pangido ma tu Jahowa asa dipatudu prinsip ni Bibel na boi mangurupi hamu martahan manaon i.
Pos ma Rohamuna, Hasittongan do On
3 Dang boi togu haporseaotta molo holan alani holong na dipatudu akka donganta. Boasa? Alana nasida pe boi do mangulahon dosa, termasuk ma i akka sintua dohot perintis. Manang olo do ra adong dongan na mambahen haccit rohamuna. Manang adong do muse na ujungna gabe murtad. Didok nasida, na taparsiajari saleleng on dang tutu i hasittongan. Molo i do na masa, gabe tartuktuk do hamu, jala dang olo be hamu manomba Jahowa? Pikkirhon ma, molo porsea hamu tu Debata holan alani parange ni halak, dang alani parale-aleonmuna tu Debata, dang boi togu haporseaonmuna i. Memang, molo tahaholongi Jahowa dohot akka donganta, boi do gabe lam togu haporseaotta. Alai dang cukup holan i. Ikkon takkas do taparsiajari Bibel, taattusi aha na taparsiajari i, jala tabahen ma riset asa lam pos rohatta tu hasittongan taringot Jahowa. Ikkon hita sandiri do na mambuktihon memang tutu do Bibel i marisi hasittongan taringot Jahowa.—Rom 12:2.
4 Didok Jesus adong do piga-piga halak na manjalo hasittongan “di bagasan las ni roha”, alai ujungna gabe gale do haporseaonna tikki adong sitaonon. (Jaha Mateus 13:3-6, 20, 21.) Dang diattusi nasida ra molo halak na mangihutton Jesus ikkon mangadopi sitaonon dohot hasusaan. (Mat. 16:24) Manang dirippu nasida dang adong be sitaonon molo nungnga gabe halak Kristen, ala sai dipasiding Debata do sude sitaonon ni nasida. Alai saleleng di portibi on dope hita, sai adong do sitaonon. Boi do margatti-gatti sitaonon di parngoluotta, jala boi do i mambahen gabe dang marlas ni roha be hita.—Ps. 6:7; Pjm. 9:11.
Arta na Adong di Bibel
it-1-IN 1351 ¶2
Kuburan
Di Rom 3:13, dikutip Apostel Paulus do Psalmen 5:9. Didok di ayat i, dos do pamangan ni halak na jahat dohot panipu songon “kuburan na bukka”. Boasa didok songon i? Songon kuburan na marisi bakke ni naung mate, na lam leleng gabe busuk, dos songon i ma pamangan ni halak na jahat. Akka hata na so marlapatan dohot na pamatehon semangat do na adong di pamangan ni halak na jahat.—Bandingkon tu Mat 15:18-20.
19-25 FEBRUARI
ARTA NA ARGA NA ADONG DI BIBEL PSALMEN 8-10
“Ale Jahowa, Pujiokku ma Ho sian Nasa Rohakku”!
Taargai ma Kesempatan Gabe Keluarga ni Jahowa
6 Dilean Jahowa do tano na massai uli gabe inganatta tinggal. Sebelum ditoppa Jahowa jolma, jolo diparade Ibana do tano on lao inganan ni jolma tinggal. (Job 38:4-6; Jer. 10:12) Alani burju ni Jahowa, diparade Ibana do sude akka na denggan dohot na mambahen las rohatta. (Ps. 104:14, 15, 24) Dung sae dibahen Jahowa i, diida Ibana ma massai “denggan do i sude”. (1 Mus. 1:10, 12, 31) Dilean Jahowa do hasangapon tu jolma boi “marhuaso” tu akka toppaanna na di tano on. (Ps. 8:6) Lomo do roha ni Jahowa akka jolma i boi marlas ni roha menikmati akka toppaanna i salelengna. Pasti mandok mauliate do hita di sude na dibahen Jahowa i.
Diargai Hamu do Akka Silehon-lehon sian Debata?
10 Ala boi hita makkatai, songon dia carana patuduhon pangargaionta tu Debata? Sada cara, i ma paboahon haporseaonta taringot Debata tu akka halak na porsea tu evolusi. (Ps. 9:2; 1 Ptr. 3:15) Porsea do nasida molo tano on dohot sude isina adong alani kebetulan do, dang ala na ditoppa. Tapakke ma Bibel dohot akka hatorangan naung taulas di parsiajaran on lao paboahon taringot Debata. Molo olo do nasida manangihon, boi ma tapatorang boasa pos rohatta Jahowa do na manoppa langit dohot tano on.—Ps. 102:26; Jes. 40:25, 26.
Gabe ‘Sitiruon do Hamu di Pakkataion’?
13 Marende ma sian roha. Tikki marende hita di parpunguan, tujuanta i ma lao mamuji Jahowa. Donganta si Sara mandok dang bagak suarana. Alai lomo do rohana marende mamuji Jahowa. Jadi tikki dipersiappon ibana bahan parpunguan di jabu, dipersiappon ibana do tong lagu na lao diendehon. Jotjot do ibana marlatik marende di jabu, jala dipikkiri ibana do aha kaitan ni lagu i tu bahan na lao dibahas di parpunguan. Didok ibana, “Ala hubahen songon i gabe fokus ma au tu makna ni lagu i, dang tu suarakku be.”
Arta na Adong di Bibel
it-1-IN 1091 ¶9
Jari-Jari ni Tangan
Adong do piga-piga hali istilah “jari-jari” ni Debata muncul di Bibel. Misalna tikki disurat Debata Sappulu Patikna di dua batu panuratan (2Mus 31:18; 5Mus 9:10), tikki dibahen Ibana mukjizat di Mesir (2Mus 8:18, 19), jala tikki ditoppa Ibana langit (Ps 8:3). “Jari-jari” ni Debata lapatanna tondi parbadia manang gogo ni Debata. Taboto ma on sian ayat di 1 Musa. Didok di ayat i, mangullus do gogo ni Debata manang tondi parbadia ni Debata (bahasa Heberna ruakh) tusan tuson di atas ni aek i. (1Mus 1:2) Asing ni i, dipatorang do tong taringot jari-jari ni Debata di Akka Bukku Junani Kristen. Misalna di bukku Mateus didok marhite “tondi parbadia” do Jesus palaohon suru-suruan na jahat. Alai di bukku Lukas lao paboahon kisah na sarupa, didok do marhite “jari-jari ni Debata” do Jesus palaohon suru-suruan na jahat i. Jadi on patuduhon jari-jari ni Debata lapatanna, i ma tondi parbadia.—Mat 12:28; Luk 11:20, surat na di toru.
26 FEBRUARI–3 MARET
ARTA NA ARGA NA ADONG DI BIBEL PSALMEN 11-15
Bayakkon ma Ngolumuna di Tano na Imbaru na Gok Hadameon
w06-IN 15/5 18 ¶3
Akka na Denggan sian Bukku Psalmen
11:3—Aha do lapatan ni ayat on? Asa dame ngolu ni jolma, ikkon diihutton nasida do patik dohot aturan na dibahen Debata. Molo dang, gabe lomo-lomo ni jolma ma mangulahon manang aha pe, dang adong be keadilan, jala lam godang ma hajahaton. Molo nga songon i situasina, na boi diulahon akka “halak na tigor marroha” holan marhaposan tu Debata nama.—Psalmen 11:4-7.
Boi do Salpu Hajahaton sian Portibi on?
Bibel mandok, salpuhonon ni Debata ma parjahat sian tano on. Nunga lam jonok “ari paruhuman dohot hasusuda ni angka halak parjahat”. (2 Petrus 3:5-7, Bibel siganup ari) Ndang adong be hajahaton na mambahen susa angka jolma. Sian dia taboto na laho salpuhonon ni Debata hajahaton?
Bibel mandok, “Dihosom rohana do parjahat i dohot na mangkaholongi hajahaton.” (Psalmen 11:5) Dihalomohon Debata do hadameon dohot hatigoran. (Psalmen 33:5; 37:28) I do alana, ndang pasombuon ni Debata hajahaton salelenglelengna.
Sabar do Hamu Paimahon Pangkirimon I?
15 Boasa si Daud rade jala sabar paimahon? Dipaboa ibana do alusna tu hita tingki disurat ibana opat hali sungkunsungkun, “Sadia leleng?” Ibana mandok, “Alai anggo ahu, marhaposan tu asi ni roham do ahu, ingkon marolopolop rohangku mida pangurupim. Marende ma ahu tu Jahowa, ai denggan do uhumna tu ahu.” (Ps. 13:6) Pos do roha ni si Daud na holong do Jahowa tu ibana jala sai na urupan ni Debata do ibana. Diingot ibana do songon dia Jahowa mangurupi ibana di tingki naung salpu, jala dipaima ibana do Jahowa manalpuhon sitaononna. Diboto si Daud do na parohon pasupasu do molo sabar paimahon Jahowa.
Harajaon I Pasauthon Sangkap ni Debata di Tano On
16 Dame. Ujungna, digohi ma sude na digombarhon di Jesaya 11:6-9. Mangkilala hadameon ma angka baoa, borua, dohot angka ianakhon di portibi on. Ndang adong be na manusai jolma manang binatang. Pingkirhon ma, sude liat portibi on inganan na dame, boi hita marlange di sunge, di tao, di laut; mardalani tu dolok, tombak longolongo jala ndang adong sihabiaran. Borngin ndang adong panangko. Digohi ma Hesekiel 34:25 na mandok, “Dung i bahenonku ma tu nasida padan pardamean, jala pasadionku binatang na rahat sian tano i, asa halongonan, jala modom di angka tombak longolongo.”
Arta na Adong di Bibel
w13-IN 15/9 19 ¶12
Nga Muba Be Hamu?
12 Godang do halak saonari na songon i cara marpikkirna. Menurut nasida, nga ketinggalan jaman be prinsip na adong di Bibel jala halak na fanatik do na mangihutton aturan ni Bibel. Godang do muse akka guru dohot natua-tua hira na mangajarhon tu akka na poso, boi do nasida bebas mangulahon lomo ni rohana. Ninna roha ni nasida dang boi pakakuhu hita na mangolu on. Bahkan akka halak na maragama pe, bebas do mangulahon na sittong di rohana. Jala didok nasida dang pola ikkon sude diulahon paretta ni Debata. (Ps. 14:1) Ikkon manat do halak Kristen tu cara marpikkir sisongon i, alana boi do terpengaruh hita. Misalna, olo do ra gabe dang olo be hita mangihutton pengaturan na dibahen di huria, jala takritik aha na so cocok di rohatta. Asing ni i, olo do ra gabe dang pola setuju hita tu nasehat ni Bibel taringot hiburan, internet, dohot pendidikan tinggi.