Borhat ma Jesus ari Senin botari. Mulak ma ibana muse tu Betania na di timur ni Dolok Jetun. Olo do ra marborngin ibana di jabu ni si Lasarus, si Maria, dohot si Marta.

Dung torang ari tanggal 11 Nisan, laho ma muse Jesus dohot angka siseanna tu Jerusalem. Laho mangajari do ibana di bagas joro. On ma na parpudi sahali Jesus mangajari halak. Dung i, mangarayahon Paska ma ibana, mambahen parningotan tu hamateanna, diadili jala diuhum mate.

Tingki lewat nasida sian Dolok Jetun tu Jerusalem, diida si Petrus ma hau ara naung malos dibahen Jesus. Didok ma, “Guru, ida ma! Nunga masak hau ara na binuraanmi.”—Markus 11:21.

Boasa dibahen Jesus songon i tu hau ara i? Didok Jesus ma, “Tutu do na hudok on tu hamu, molo porsea do hamu jala ndang ganggu rohamuna, ndang holan na hubahen tu hau ara i na boi bahenonmu. Gariada, molo didok hamu tu dolok on, ‘Hinsat ma ho jala dabu ma ho tu laut,’ sai na saut do i. Molo porsea hamu, jaloonmuna do sude na pinangidomuna di bagasan tangiang.” (Mateus 21:21, 22) Nunga hea didok Jesus na boi do papindaon dolok molo adong haporseaon.—Mateus 17:20.

Dibahen Jesus do malos hau ara i laho patuduhon ringkot ni porsea tu Debata. Didok Jesus ma, “Jaloonmuna ma sude na tinangiangkon dohot na pinangidomuna, molo porsea hamu na jaloonmuna i.” (Markus 11:24) Parsiajaran na ringkot do on tu sude na mangihuthon Jesus. Tarlumobi ala naeng diadopi angka apostel nama paraloan. Asing ni i, adong dope parsiajaran taringot tu haporseaon sian hau ara na malos i.

Songon hau ara na denggan idaon do bangso Israel. Nunga mambahen parjanjian bangso on tu Debata. Jala hira na dioloi nasida do Debata. Alai sasintongna, ndang adong haporseaon ni bangso on jala ndang diulahon nasida na denggan. Gariada ndang olo nasida manjalo Anak ni Debata. Malos do dibahen Jesus hau ara na so marparbue i, on patuduhon na laho masa tu bangso Israel na so porsea i.

Dung i sahat ma Jesus dohot angka siseanna di Jerusalem. Songon na somal, masuk ma Jesus tu bagas joro jala mangajari. Olo do ra ala dipalao Jesus angka situngkari hepeng nantoarina i, gabe disungkun angka malim kepala dohot pangituai ni bangso i ma Jesus, “Huaso ni ise do dipangke ho mangulahon on? Ise do na marsuru ho mangulahon i?”—Markus 11:28.

Gabe disungkun Jesus ma nasida, “Ahu pe adong do sada sisungkunonku tu hamu. Alusi hamu ma ahu, dung i paboaonku ma tu hamu marhite huaso ni ise ahu mangulahon i sude. Pandidion ni si Johannes i, sian banua ginjang do manang sian jolma? Alusi ma ahu.” Didok angka malim dohot angka pangituai i ma sama nasida, “Molo tadok sian banua ginjang, dohononna ma, ‘Antong boasa ndang porsea hamu tu ibana?’ Manang, dohononta do i sian jolma?” Mabiar do nasida mandok songon i, “ai sude do porsea si Johannes i sahalak panurirang”.—Markus 11:29-32.

Ndang boi dialusi nasida Jesus. Didok nasida ma, “Ndang huboto hami.” Didok Jesus ma tu nasida, “Ahu pe, ndang paboaonku tu hamu marhite huaso ni ise ahu mangulahon i sude.”—Markus 11:33.

Tingki di bagas joro, disungkun angka malim kepala dohot angka pangituai ma tu Jesus taringot tu huasona. Dialusi Jesus ma nasida marhite sungkun-sungkun na so taralusi nasida. Dung i dipaboa Jesus ma sada tudosan na patuduhon na so denggan roha ni nasida.

Didok Jesus ma, “Adong ma sahalak baoa nampuna dua anak. Didapothon ma anakna siangkangan, ninna ma, ‘Laho ma jolo ho amang mangula sadari on tu porlak anggur.’ Dialusi anakna i ma ibana, ‘Ndang olo ahu,’ alai manolsoli ma rohana jala laho ma ibana. Dung i didapothon ibana ma anakna na paduahon, laos didok do muse songon i. Dialusi anakna i ma, ‘Olo Bapa,’ alai ndang laho ibana. Ise do sian na dua i na mangulahon na pinangido ni amana?” (Mateus 21:28-31) Anak siangkangan i do ujungna na mangulahon na nidok ni bapakna.

Didok Jesus ma tu nasida, “Tutu do na hudok on tu hamu, parjolo do sijalo pajak dohot boru-boru na so hasea masuk tu Harajaon ni Debata unang apala hamu.” Mulana, ndang olo angka sijalo pajak dohot boru-boru na so hasea manomba Debata. Alai ujungna muba do nasida songon anak siangkangan i. Ndang songon angka pamimpin agama nasida na dos songon anak paduahon i. Ai ndang tutu nasida manomba Debata. Didok Jesus ma muse, “Ro do si Johannes tu hamu di dalan sintong, alai ndang dihaporseai hamu ibana. Hape sijalo pajak dohot boru-boru na so hasea, dihaporseai do ibana. Diida hamu do i nian, alai ndang manolsoli rohamuna jala porsea tu ibana.”—Mateus 21:31, 32.

Dung i dipaboa Jesus ma tudosan na asing. Di tudosan i, dipatudu Jesus ma na so tutu angka pamimpin agama manomba Debata. Jala na jahat situtu do nasida. Didok ma, “Adong ma sahalak na mamungka porlak anggur, dihandangi ma humaliang ni porlak i, dibahen ma pamoroan ni anggur jala dipajongjong ma sada manara. Dipasewahon ma i tu angka pangula, dung i laho ma ibana tu luat na dao. Dung jumpang tingki panen, disuru ibana ma sahalak hatobanna manjalo deba parbue ni anggur i sian pangula i. Disuru nampunasa i ma muse hatoban na asing tu pangula i. Alai dipungkuli nasida do ulu ni hatoban i jala dipaila ibana. Dung i disuru ma hatoban na asing, alai dibunu pangula i do hatoban i. Godang dope angka na asing disuru, deba dipungkuli jala deba nai dibunu nasida.”—Markus 12:1-5.

Diantusi nasida do tudosan ni Jesus i? Olo do ra diingot nasida hata ni panurirang Jesaya na mandok, “Porlak anggur ni Jahowa Zebaot, i ma pinompar ni Israel dohot angka baoa sian Juda, suansuanan hasudunganna. Sai dipaimaima uhum, hape ida ma pangarupaon do.” (Jesaya 5:7) Dos do on tu tudosan ni Jesus i. Jahowa do nampuna porlak anggur, jala bangso Israel ma porlak anggur i. Songon na dihandangi do nasida marhite Patik ni Debata. Disuru Jahowa do angka panurirangna laho mangurupi nasida asa marparbue.

Alai ditangkup jala dipamate angka pangula i do hatoban na disuru mandapothon nasida. Didok Jesus ma, “Ujungna, disuru nampunasa porlak anggur i ma anak haholonganna manjumpangi angka pangula i, ai ninna rohana do, ‘Habiaran ni nasida do anakki.’ Alai didok angka pangula i ma sama nasida, ‘On do anakna i. Beta tapamate ma ibana asa di hita parbagiananna i.’ Dung i, ditangkup nasida ma ibana, dipamate.”—Markus 12:6-8.

Dung i disungkun Jesus ma, “Aha ma bahenon ni nampuna porlak anggur i?” (Markus 12:9) Dialusi angka pamimpin agama i ma, “Ala jahat do nasida, pamateonna ma nasida jala pasewahononna ma porlak anggur i tu angka pangula na asing na olo mangalehon parbuena tu ibana dung dapot tingkina.”—Mateus 21:41.

Hape panguhuman na laho masa tu nasida do na didok nasida. Ai pangula ni porlak anggur ni Jahowa do nasida. Bangso Israel ma porlak anggur i. Lomo do roha ni Jahowa asa marparbue nasida, i ma porsea tu Anakna. Ditatap Jesus ma tu angka pamimpin agama i jala didok ma, “Na so hea do dijaha hamu? Didok na tarsurat i do, ‘Batu na binolongkon ni angka tukang nunga gabe batu parsuhi-suhi na rumingkot. Sian Jahowa do i jala halongangan do i di hita.’” (Markus 12:10, 11) Dung i didok Jesus ma, “Alani i hudok ma tu hamu, buaton ma Harajaon ni Debata sian hamu, jala lehonon ma i tu sada bangso na mangulahon lomo ni roha ni Debata.”—Mateus 21:43.

Gabe diantusi siboto surat dohot angka malim kepala ma “nasida na nidok ni Jesus di tudosan i”. (Lukas 20:19) Naeng dipamate nasida ma Jesus, anak ni nampuna porlak anggur i. Alai mabiar do nasida tu godang halak. Ai panurirang do Jesus didok roha ni nasida.

Tingki naeng mate Jesus, sai dipangke ibana do angka tudosan laho patuduhon hajahaton ni angka siboto surat dohot malim kepala. Gabe naeng dibunu nasida ma Jesus. (Lukas 20:19) Alai dipaboa Jesus do muse tudosan na asing:

“Tudos do Harajaon banua ginjang i tu sahalak raja na mambahen pesta parbogason ni anakna. Disuru ma angka hatobanna manjou halak naung digokkon tu pesta parbogason i, alai ndang olo nasida ro.” (Mateus 22:2, 3) Di tudosan i, dipaboa Jesus do taringot “Harajaon banua ginjang”. On patuduhon Debata Jahowa do “raja” di tudosan i. Antong ise do anak ni raja i, jala ise do na digokkon tu pesta i? Anak ni raja, i ma Jesus. Angka halak na digokkon tu pesta, i ma angka halak na laho mamarenta dohot Anak i di Harajaon banua ginjang.

Ise do angka halak na parjolo di gokkon tu pesta i? Bangso Jahudi. Ai nasida do na parjolo mambege taringot tu Harajaon i sian Jesus dohot angka apostelna. (Mateus 10:6, 7; 15:24) Dijalo bangso on do parjanjian Patik taon 1513 SM. Alani i, nasida ma na parjolo digokkon asa dohot tu ‘harajaon ni angka malim’. (2 Musa 19:5-8) Antong sadihari do nasida digokkon tu “pesta parbogason” i? Taon 29 M, tingki mulai dibaritahon Jesus taringot tu Harajaon banua ginjang.

Olo do bangso Israel ro tu gokkon i? Jesus mandok, “Ndang olo nasida ro.” Godangan sian pamimpin agama dohot angka halak Jahudi ndang olo manjalo Messias, i ma Raja na dipillit Debata.

Alai songon na nidok ni Jesus, digokkon do muse halak Jahudi sahali nai: “Disuru ma muse angka hatoban na asing, jala ninna ma, ‘Paboa ma tu naung digokkon i, “Nunga huparade sipanganon, nunga huseat lombu dohot pinahan na pinamokmok jala nunga rade be sude. Ro ma hamu tu pesta parbogason i.”’ Alai ndang parduli nasida. Adong na laho tu ladangna, na sada tu partiga-tigaonna, jala na deba manangkup angka hatoban i, dung i dipungkuli jala dipamate.” (Mateus 22:4-6) Masa ma i ndang leleng dung adong huria Kristen. Di tingki i, digokkon dope halak Jahudi asa dohot tu Harajaon i. Alai ndang olo godangan sian nasida. Gariada susa do dibahen nasida ‘angka hatoban ni raja i’.—Ulaon ni Apostel 4:13-18; 7:54, 58.

Aha ma na masa tu bangso i? Jesus mandok, “Muruk situtu ma raja i, disuru ma angka tentarana laho pamatehon angka pambunu i jala manutung kota ni nasida.” (Mateus 22:7) Masa ma on taon 70 M tingki dirumpakhon halak Rom kota Jerusalem.

Antong, adong dope halak na asing na digokkon tu pesta i? Adong. Jesus mandok, “Dung i, didok [raja i] ma tu angka hatobanna, ‘Nunga rade pesta parbogason i, alai ndang tama ro angka halak na digokkon i. Alani i, borhat ma hamu tu dalan siboluson na laho tu luar kota, gokkon ma manang ise na jumpangmuna tu pesta parbogason i.’ Dung i borhat ma angka hatobanna i, dipapungu ma sude na jumpang ni nasida di angka dalan, na burju dohot na jahat, gabe gok ma tamu di parpestaan i.”—Mateus 22:8-10.

Masa do i tingki diurupi si Petrus angka halak na so Jahudi gabe halak Kristen. Taon 36 M dijalo si Kornelius dohot keluargana do tondi parbadia. Gabe dohot ma nasida tu Harajaon banua ginjang. Hape sahalak perwira ni Rom do si Kornelius.—Ulaon ni Apostel 10:1, 34-48.

Alai ndang sude na ro tu pesta i tama jaloon ni “raja” i. Jesus mandok, “Tingki masuk raja laho mamereng angka tamu, diida ibana ma sahalak baoa na so marpangkean pesta. Disungkun raja i ma ibana, ‘Dongan, boasa ndang marpangkean pesta ho tuson?’ Alai sip do ibana. Dung i, didok raja i ma tu angka hatobanna, ‘Tali ma tanganna dohot patna jala sampathon ma ibana tu luar, tu na holom. Disi ma ibana mangangguhi jala muruk situtu.’ Ai godang do na dijou, alai otik do na tarpillit.”—Mateus 22:11-14.

Ra tingki dibege angka pamimpin agama i tudosan ni Jesus on, ndang diantusi nasida lapatanna. Alai gabe muruk do nasida mambege i. Naeng dibunu angka pamimpin agama i ma Jesus. Ai nunga dipaila Jesus nasida.

Muruk situtu do angka pamimpin agama i tu Jesus. Ai dipaboa ibana do hajahaton ni nasida marhite tudosan. Alani i, naeng ditangkup nasida ma Jesus. Disuru halak Parise ma angka suruanna manungkun Jesus, asa boi tangkupon ni nasida jala dipasahat tu gubernur Rom.—Lukas 6:7.

Didok nasida ma, “Guru, huboto hami do na sintong na nidokmi dohot na niajarhonmi jala ndang paimbar-imbar jolma ho. Sai sintong do na niajarhonmu taringot tu dalan ni Debata. Mangihuthon patik, boi do gararon pajak tu Kesar manang na ndang?” (Lukas 20:21, 22) Ndang olo Jesus dioto-otoi halak na munafik on. Molo didok Jesus, ‘Ndang boi,’ dohonon ni nasida ma na dialo Jesus pamarentaon ni Rom. Alai molo didok Jesus, ‘Boi do gararon,’ gabe sogo ma annon roha ni halak tu Jesus jala ditangkup ma ibana. Ai adong do sian nasida na marsogo ni roha tu pamarentaon ni Rom. Alani i, aha do alus ni Jesus?

Dialusi Jesus ma, “Hamu halak na munafik, boasa ujionmuna ahu? Patuduhon hamu ma tu ahu hepeng logam laho manggarar pajak i.” Diboan nasida ma tu ibana sada hepeng dinar. Disungkun ibana ma nasida, “Gombar dohot surat ni ise do on?” Dialusi nasida ma, “Kesar.” Dung i ninna Jesus ma tu nasida, “Lehon ma tu Kesar ampuna ni Kesar jala tu Debata ampuna ni Debata.”—Mateus 22:18-21.

Longang ma roha ni nasida mambege alus ni Jesus. Ndang tardok ni nasida be manang aha, gabe laho ma nasida. Dung i ro ma halak Saduse, i ma pamimpin agama sian sekte na asing laho manguji Jesus.

Ndang porsea halak Saduse tu haheheon. Alani i disungkun nasida ma tu Jesus taringot haheheon dohot taringot tu sahalak borua na muli tu pitu na marhaha maranggi. Ninna ma, “Guru, didok si Musa, ‘Molo adong baoa na mate ndang marianakhon, ingkon olion ni anggina do tunggane boruna i asa adong pinompar ni hahana naung mate i.’ Hea do adong pitu na marhaha maranggi dison. Mangoli ma siangkangan, alai mate ma ibana ndang marianakkon. Ditadingkon ma tunggane boruna i tu anggina. Songon i do na masa tu na paduahon dohot tu na patoluhon sahat tu na papituhon. Na parpudi muse, mate ma dohot borua i. Antong, di ari haheheon i, ise do sian na pitu i gabe tunggane doli ni borua i? Ai sude do nasida hea mangoli tu ibana.”—Mateus 22:24-28.

Dialusi Jesus ma nasida marhite hata na disurat si Musa. Ai dihaporseai halak Saduse do i. Didok ma, “Nda i ma na patuduhon sala hamu? Ai ndang diantusi hamu Surat na Badia i dohot huaso ni Debata. Ai molo dung hehe nasida sian na mate, ndang masa be mangoli manang muli, ai songon suru-suruan na di banua ginjang i nama nasida. Na so dijaha hamu do di buku ni si Musa taringot tu ramba na marsuga? Didok Debata do tu si Musa taringot tu haheheon ni halak naung mate tingki didok, ‘Ahu do Debata ni si Abraham, Debata ni si Isak dohot Debata ni si Jakkob.’ Ndang Debata ni na mate Ibana, alai Debata ni na mangolu do. Nunga tung sala hamu.” (Markus 12:24-27; 2 Musa 3:1-6) Gabe longang ma roha ni angka halak na disi mambege alus ni Jesus.

Ndang taralusi halak Saduse dohot halak Parise Jesus. Alani i, gabe marsangkap ma nasida rap manguji Jesus. Disungkun sahalak siboto surat ma, “Guru, dia do parenta na umbalga sian angka Patik i?”—Mateus 22:36.

Dialusi Jesus ma, “On do parenta na rumingkot, ‘Tangihon ma ale Israel, Jahowa Debatanta, Jahowa sasadasa do. Jala, ingkon haholonganmu do Jahowa Debatam sian nasa roham, sian nasa ngolum, sian nasa pingkiranmu, dohot sian nasa gogom.’ Na paduahon, ‘Ingkon haholonganmu do donganmu jolma doshon dirim.’ Ndang adong parenta na asing na umbalga sian angka parenta on.”—Markus 12:29-31.

Didok siboto surat i ma tu Jesus, “Guru, denggan do na nidokmi jala sintong, ‘Holan Ibana do Debata, ndang adong asing ni Ibana.’ Jala ingkon haholongan do Debata sian nasa roha, sian nasa pingkiran, dohot sian nasa gogo. Dung i, ingkon haholongan do dongan jolma doshon diriniba. Rumingkot do i sian saluhut silehon-lehon dohot pelean situtungon.” Dung dibege Jesus denggan do alusna i, ninna ma, “Ndang dao ho sian Harajaon ni Debata.”—Markus 12:32-34.

Mangajari do Jesus di bagas joro saleleng tolu ari (tanggal 9, 10, dohot 11 Nisan). Las do roha ni piga-piga sian nasida mambege Jesus mangajari, dohot ma i angka siboto surat. Alai gabe muruk ma angka pamimpin agama. Nang pe songon i, ndang adong be sian nasida “na barani manungkun manang aha tu Jesus”.

Ndang boi angka pamimpin agama manangkup Jesus laho dipasahat tu halak Rom. (Lukas 20:20) Tanggal 11 Nisan do tingki i, jala di bagas joro dope Jesus. Naeng dipaboa ibana do ise ibana sasintongna. Didok ma tu nasida, “Songon dia do pandapotmuna taringot tu Kristus? Anak ni ise do ibana?” (Mateus 22:42) Diboto nasida do molo Kristus i pinompar ni si Daud. Jala i ma alus ni nasida.—Mateus 9:27; 12:23; Johannes 7:42.

Disungkun Jesus ma muse, “Antong, marhite panogu-noguon ni tondi parbadia, boasa dijou si Daud ibana Tuan tingki mandok, ‘Didok Jahowa do tu Tuanku, “Hundul ma ho di siamunku paima hubahen angka musum sidege-degean ni patmu”’? Molo didok si Daud do ibana Tuan, songon dia ma ibana gabe anak ni si Daud?”—Mateus 22:43-45.

Ndang boi dialusi halak Parise sungkun-sungkun ni Jesus. Ai hirim do roha ni nasida paluaon ni pinompar ni si Daud nasida di tingki i sian halak Rom. Alai tingki dipaboa Jesus hata ni si Daud di Psalmen 110:1, 2, dipatangkas Jesus ma, ndang songon angka pamarenta na di tano on Messias. Ai Tuan ni si Daud do ibana, jala mamarenta do ibana dung hundul di siamun ni Debata.

Dibege angka siseanna dohot angka na asing do na nidokna i. Dung i dipaboa Jesus ma muse taringot tu siboto surat dohot halak Parise. Didok ma, ‘Dihunduli nasida do hundulan ni si Musa’ laho mangajarhon Patik ni Debata. Dung i didok Jesus ma, “Ulahon ma sude na nidok ni nasida, alai unang tiru pambahenanna. Ai holan mandok do nasida alai ndang diulahon.”—Mateus 23:2, 3.

Dung i dipaboa Jesus ma na diulahon siboto surat dohot halak Parise, “Dipabalga nasida do kotak na gelleng na di pardompahan dohot na di tangan ni nasida.” Adong do halak Jahudi na mambahen kotak na gelleng na marisi Patik ni Debata di tangan manang di pardompahan ni nasida. Alai dipabalga halak Parise do kotak i laho patudu-tuduhon na tutu diulahon nasida Patik i. Asing ni i, adong do rambu do pangkean ni halak Israel. Alai dipaganjang halak Parise do “rambu ni pangkean ni nasida”. (4 Musa 15:38-40) Sude na diulahon nasida “diulahon asa diida halak”.—Mateus 23:5.

Boi do gabe bali pangalaho ni nasida tu angka sisean ni Jesus. Alani i didok Jesus ma, “Unang ma dijou hamu guru, ala sada do Gurumuna jala na marhaha maranggi do hamu sude. Jala, unang ma jou ama tu manang ise di tano on, ai sada do Amamuna, i ma na di banua ginjang i. Unang ma olo hamu dijou pamimpin, ai holan sada do Pamimpinmuna, i ma Kristus i.” Aha ma na ingkon diulahon angka sisean i? Didok Jesus ma, “Halak na umbalga sian hamu, ingkon gabe parhobasmuna. Ai patutoruon do manang ise na patimbo dirina, jala patimboon do manang ise na patutoru dirina.”—Mateus 23:8-12.

Dung i didok Jesus ma tu siboto surat dohot tu halak Parise, “Marjea ma hamu siboto surat dohot halak Parise, halak na munafik! Ai ditutup hamu do dalan tu Harajaon banua ginjang i sian jolo ni jolma, hape hamu sandiri pe ndang masuk tusi. Jala diambati hamu do halak na mardalan tusi.”—Mateus 23:13.

Muruk do Jesus tu halak Parise ala ndang dipingkiri nasida pangkilalaan ni Jahowa. Dibahen nasida do aturan na so porlu. Umpamana didok nasida do, “Molo marsumpa sasahalak marhite bagas joro, ndang adong guna ni i, alai molo marsumpa sasahalak marhite mas na adong di bagas joro, ingkon pasautonna do sumpana i.” Ummarga do di nasida mas sian bagas joro inganan manomba Jahowa. On patuduhon na so marale-ale nasida tu Debata. Jala ‘ditadingkon nasida do na rumingkot sian Patik, i ma hatigoran, asi ni roha dohot roha na marsihohot’.—Mateus 23:16, 23; Lukas 11:42.

Didok Jesus ma halak Parise ‘panogu-nogu na mapitung, dipasisi nasida do agas alai dibondut nasida do unta!’ (Mateus 23:24) Dibolongkon halak Parise do agas na masuk tu anggur ala binatang na ramun do agas. Alai ndang diulahon nasida na rumingkot sian Patik i. Dos ma nasida songon na mambondut unta. Hape binatang na ramun do unta.—3 Musa 11:4, 21-24.

Tingki di bagas joro Jesus na parpudi sahali, tangkas do dipatuduhon ibana na munafik halak Parise dohot siboto surat. Didok ibana do tu nasida, “Marjea ma hamu siboto surat dohot halak Parise, halak na munafik! Ai dipaias hamu do mangkuk dohot piringmuna sian luar, alai kotor do di bagasan alani angka na binuatmuna marhite mangarampok dohot hahisapon. Hamu halak Parise na mapitung, parjolo ma paias mangkuk dohot piringmuna sian bagasan asa ias dohot na di luar.” (Mateus 23:25, 26) Denggan do diulahon halak Parise ulaon paiashon diri jala songon na ias do nasida idaon. Alai ndang ias roha dohot pingkiran ni nasida.

Dipajongjong nasida do kuburan ni angka panurirang. Hape didok Jesus do nasida “anak ni sibunu angka panurirang”. (Mateus 23:31) Jala di tingki i, naeng dibunu nasida do Jesus.—Johannes 5:18; 7:1, 25.

Dung i dipaboa Jesus ma na laho masa tu angka pamimpin agama molo ndang muba nasida, “Hamu angka ulok, pinompar ni ulok na marbisa, songon dia ma hamu boi malua sian Gehena?” (Mateus 23:33) Hata Gehena di ayat on patuduhon rura Hinom, inganan panutungan ni sampah. On manggombarhon panguhuman na laho masa tu halak Parise dohot siboto surat.

Laho gabe “angka panurirang, halak na marbisuk dohot angka guru” do sisean ni Jesus. Dung i didok Jesus ma tu angka pamimpin agama i, “Bunuon jala uhumonmuna ma deba sian [angka siseanku] di hau, linsinganmuna di angka sinagogamuna jala leleanmuna ma nasida sian kota tu kota. Alani i, mangonai ma tu hamu mudar ni sude halak na mangulahon lomo ni roha ni Debata na use di tano on. Mulai sian mudar ni si Abel sahat tu mudar ni si Sakaria . . . na pinamatemuna.” Didok ma muse, “Tutu do na hudok on tu hamu, mangonai do sudena i tu sundut on.” (Mateus 23:34-36) Masa ma on taon 70 M tingki dirumpakhon angka tentara Rom Jerusalem, jala godang ma halak Jahudi na mate.

Lungun jala marsak do roha ni Jesus mamingkirhon na laho masa tu nasida. Didok ma, “Jerusalem, Jerusalem, dibunu ho do angka panurirang jala didangguri ho do halak na sinuru manopot ho. Nunga piga hali naeng hupapungu angka anakmu songon induk ni manuk na papunguhon angka anakna tu toru ni habongna, alai ndang olo hamu. Alani i, tadingkonon nama jabumuna.” (Mateus 23:37, 38) Sungkun-sungkun do ra roha ni na manangihon i aha do lapatan ni ‘jabu’ na nidok ni Jesus. Mandok bagas joro na di Jerusalem do on?

Didok Jesus ma muse, “Hudok ma tu hamu, ndang idaonmuna be ahu sian saonari sahat tu na dohononmuna, ‘Dipasu-pasu ma ibana na ro marhite goar ni Jahowa!’” (Mateus 23:39) Surirang na tarsurat di Psalmen 118:26 do na dipaboa Jesus, na mandok, “Pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa.” Tontu ndang tu bagas joro naung dirumpakhon i ro angka halak manomba Debata.

Dung i hundul ma Jesus di jolo ni poti inganan ni pelean huhut mangida tusi. Adong do lubang ni poti i di ginjang, jala sian i ma angka halak mandabuhon hepeng. Godang do diida Jesus halak Jahudi na mora na “mandabuhon godang hepeng logam” tusi. Alai diida Jesus ma sahalak ina na mabalu na pogos mandabuhon “dua hepeng logam na otik argana”. (Markus 12:41, 42) Diboto Jesus do na las roha ni Debata mangida silehon-lehon ni ina na mabalu i.

Dijou Jesus ma angka siseanna jala didok ma, “Tutu do na hudok on tu hamu, gumodang do didabuhon ina na mabalu na pogos on, sian sude na nidabuhon ni halak tu poti inganan ni pelean on.” Boasa? Didok Jesus ma muse, “Sude do nasida mandabuhon sian lobi-lobi ni nasida. Alai ina na mabalu on nang pe pogos, dilehon ibana do sude na porlu di ngoluna.” (Markus 12:43, 44) Ndang songon angka pamimpin agama ina na mabalu i!

Dung i laho ma Jesus sian bagas joro. Tanggal 11 Nisan dope tingki i. Adong ma sahalak sisean ni Jesus na mandok, “Guru, ida ma uli ni angka batu dohot bangunan i!” (Markus 13:1) Ala mansai balga do deba batu ni tembok ni bagas joro, gabe togu ma jala ndang tarhutur bagas joro i. Alani i, gabe tarsonggot ma nasida mambege Jesus mandok, “Diida ho do bangunan na balga i? Ndang na laho adong nanggo sada batu na martindi muse dison na so dirumpakkon.”—Markus 13:2.

Dung i laho ma Jesus dohot angka apostelna tu bariba ni Rura Kidron, jala nangkok ma nasida tu Dolok Jetun. Ro ma si Petrus, si Andreas, si Jakobus, dohot si Johannes mandapothon Jesus. Sian i, boi do diida nasida bagas joro na mansai balga i.

Ari Selasa botari tanggal 11 Nisan do tingki i, jala piga-piga ari nai nama Jesus di tano on. Hundul ma ibana di Dolok Jetun rap dohot opat Apostelna, si Petrus, si Andreas, si Jakobus, dohot si Johannes. Na piga-piga ari on, sai mangajari angka halak do ibana di bagas joro tingki arian. Jala marborngin do ibana di luar kota. “Manogot dope, nunga ro sude halak mandapothon Jesus laho manangihon ibana di bagas joro”. (Lukas 21:37, 38) Alai ndang ro be Jesus tusi.

Pulik do didapothon siseanna na opat i Jesus. Hea do didok Jesus tu nasida, “Sai mangarade ma hamu, ai di tingki na so panagamonmuna do ro Anak ni jolma i.” (Lukas 12:40) Jala hea do dipaboa ibana taringot “tingki dipapatar Anak ni jolma i”. (Lukas 17:30) Dung i dipaboa Jesus ma muse, ndang na laho adong be nanggo sada batu ni bagas joro na so dirumpakhon. Dirimpu angka apostel ma na sarupa hata ni Jesus i tu surirangna taringot tu bagas joro. Gabe didok nasida ma, “Paboa ma tu hami, andigan ma masa angka i jala dia ma tanda ni harorom dohot tanda ni panutup ni jaman on?”—Mateus 24:3.

Huhut manatap bagas joro, disungkun nasida ma taringot tu bagas joro na laho dirumpakhon i. Jala disungkun nasida muse taringot tu haroro ni Anak ni jolma i. Olo do ra diingot nasida tudosan ni Jesus taringot tu “sahalak anak ni raja na borhat tu huta na dao laho manjalo huaso harajaon, dung pe i asa mulak ibana”. (Lukas 19:11, 12) Dung i disungkun nasida ma taringot “tanda ni panutup ni jaman on”.

Tangkas do dialusi Jesus sungkun-sungkun i. Dipaboa Jesus do tanda na patuduhon andigan Jerusalem dohot bagas joro i dirumpakkon. Alai gabe tanda do i tu halak Kristen na mangolu saleleng “haroro” ni Kristus laho mamboto sadia leleng nai panutup ni jaman on.

Dung piga-piga taon, diida angka apostel ma saut na nidok ni Jesus. Godang do na nidok ni Jesus na saut tingki mangolu dope nasida. Alani i, 37 taon dung didok Jesus hatana i, ndang tarsonggot be angka na mangihuthon Kristus mangida huta Jerusalem dohot bagas joro dirumpakkon taon 70 M. Alai ndang sude dope saut na didok Jesus. Adong do na laho saut saleleng haroro ni Kristus. Na dia ma i?

Jesus mandok na laho “marporang ma bangso tu bangso jala harajaon tu harajaon” jala tarbege ma “barita taringot tu angka parporangan”. (Mateus 24:6, 7) Didok ibana muse, “Masa ma gempa na mansai gogo jala masa ma haraparon dohot sahit di godang inganan.” (Lukas 21:11) Didok Jesus ma tu angka siseanna, “Tangkupon ni angka halak ma hamu. Bahenon ni nasida ma na hansit.” (Lukas 21:12) Marroan ma angka panurirang na mandok hata na so tutu jala godang ma na dililuhon. Lam godang ma hajahaton jala lam ngali ma holong ni godangan halak. Asing ni i, “baritahononhon ma barita na uli taringot tu Harajaon i di liat portibi on, asa saluhut bangso mambege barita i, dung pe i asa ro ujungna”.—Mateus 24:14.

Masa do na didok Jesus i andorang so dirumpakkon halak Rom huta Jerusalem dohot saleleng dirumpakhon i. Alai masa dope na didok Jesus i? Taida do i masa saonari?

Sada tanda na dipaboa Jesus, i ma molo diida nasida “na ramun jala na parohon hasesega”. (Mateus 24:15) Masa ma i taon 66 M tingki “dihaliangi tentara” Rom huta Jerusalem jala dirumpakkon nasida deba tembok ni Jerusalem. Diboan nasida do gana-ganaan, i ma angka bendera ni nasida. (Lukas 21:20) Alani i, gabe jongjong ma “na ramun” di “inganan na badia” ni halak Jahudi.

Didok Jesus ma muse, “Masa ma di tingki i hasusaan bolon na so hea dope masa sian mulai adong portibi on sahat tu saonari, jala ndang na laho masa be i muse.” Taon 70 M dirumpakkon halak Rom ma Jerusalem dohot bagas joro. Masa ma hasusaan bolon tu halak Jahudi jala godang ma na mate. (Mateus 4:5; 24:21) Ndang hea dope songon i segana huta Jerusalem. Gabe ndang boi be nasida manomba Debata di bagas joro i naung adong saleleng marratus taon. Alani i, umbalga ma hasusaan bolon na laho masa di ari na naeng ro.

MARPOS NI ROHA SALELENG ARI PARPUDI

Ndang sae dope dipaboa Jesus tu angka apostelna taringot tu harorona dohot taringot tu panutup ni jaman on. Dung i dipaboa ibana ma tu nasida taringot tu “Kristus palsu dohot panurirang na mangkatahon na so tutu” na laho “mangaliluhon angka na tarpillit i”. (Mateus 24:24) Alai ndang lilu angka na tarpillit i. Ai diboto nasida do na so boi diida haroro ni Kristus i. Hape boi do diida nasida angka Kristus palsu i.

Dung i dipaboa Jesus ma muse hasusaan na umbalga na laho masa di panutup ni jaman on. Didok ma, “Mangkolom ma mata ni ari jala ndang marsinondang be bulan. Mardabuan ma angka bintang sian langit jala humutur ma angka huaso ni langit.” (Mateus 24:29) Ndang diboto angka apostel songon dia masa na nidok ni Jesus i. Alai longang do roha molo masa i.

Aha ma na masa molo saut i? Didok Jesus ma, “Pingsan ma angka halak alani biarna dohot alani paimaimahon na laho masa tu saluhut tano on, ai humutur ma angka huaso ni langit.” (Lukas 21:26) Tangkas ma, on ma hasusaan na umbalga na hea masa.

Dipaboa Jesus do ndang sude halak mangangguhi tingki ro ‘Anak ni jolma i, mardongan huaso dohot hasangapon na mansai balga’. (Mateus 24:30) Dipaboa ibana do muse na laho paluaon ni Debata “angka na tarpillit i”. (Mateus 24:22) Alani i, aha do na ingkon ulahonon ni angka na mangihuthon Jesus tingki masa i? Didok Jesus ma tu angka na mangihuthon ibana, “Molo masa angka i, pos ma rohamuna jala togu ma hamu, ai nunga jonok haluaonmuna.”—Lukas 21:28.

Alai songon dia ma diboto angka sisean ni Jesus naung jonok ujung i? Dipaboa Jesus ma tudosan taringot tu hau ara, “Molo tubu dangka na baru jala marbulung, botoonmuna ma naung jonok ari logo. Songon i ma, molo diida hamu sudena i, botoonmuna ma nunga naeng sahat Anak ni jolma i. Tutu do na hudok on tu hamu, ndang na laho salpu sundut on so jolo masa i sude.”—Mateus 24:32-34.

Alani i, boi ma diboto angka sisean naung ro ujung i tingki diida nasida masa angka tanda na didok Jesus. Dung i dipaboa Jesus ma poda tu angka sisean na mangolu saleleng panutup ni jaman on:

“Taringot tu ari dohot jamna ndang adong na mamboto i, nang angka suru-suruan na di banua ginjang, nang anak i, holan Ama i do. Ai songon na masa di tingki ni si Noak, songon i ma haroro ni Anak ni jolma i. Andorang so ro aek na sumar i, mangan minum do nasida, mangoli dohot marhamulian sahat tu na masuk si Noak tu bagasan parau i. Ndang diparrohahon nasida na masa sahat tu na ro aek na sumar i mangaup nasida saluhutna, jala songon i ma haroro ni Anak ni jolma i.” (Mateus 24:36-39) Dipaboa Jesus do taringot aek na sumar na masa di tingki ni si Noak na mangaup godangan jolma di tingki i.

Gabe diboto apostel na opat i ma na ingkon tongtong nasida jaga. Didok Jesus ma, “Parrohahon hamu ma dirimuna, asa unang dirajai sipanganon dohot siinumon na marlobi-lobi rohamuna. Jala unang paholsohu tu parngoluon, ai tompu ma ro ari i tu hamu songon jorat. Jala ingkon ro do ari i tu atas ni sude jolma na maringanan di tano on. Alani i, sai jaga ma hamu, tongtong ma pangido asa malua hamu sian sude na laho masa i jala asa boi hamu jongjong di adopan ni Anak ni jolma i.”—Lukas 21:34-36.

Maksud ni Jesus ndang holan na laho masa tu huta Jerusalem manang tu bangso Israel. Alai na laho masa tu liat portibi on do na pinaboana. Ai didok ibana do na “ingkon ro do ari i tu atas ni sude jolma na maringanan di tano on”.

Didok Jesus do asa tongtong jaga angka siseanna jala mangarade. Dipaboa ibana ma tudosan na asing. Didok ma, “Pingkirhon ma on: Molo diboto parjabu do jam piga ro panangko, tontu dungo do ibana jala ndang pasombuonna jabuna dibongkar. Alani i, ingkon rade do hamu, ai sian na so pamotoanmuna do ro Anak ni jolma i.”—Mateus 24:43, 44.

Dung i didok Jesus ma asa unang mabiar angka siseanna. Dipaboa ibana do tu nasida na laho adong “naposo” na sai jaga jala mangarade. Dipaboa ibana ma tudosan taringot on, didok ma, “Ise do sasintongna naposo haposan jala na marbisuk, na pinillit ni tuanna laho mangaradoti angka naposona na asing, na mangalehon nasida mangan di tingkina? Marlas ni roha ma naposo na mangulahon songon i didapot tuanna di harorona i! Tutu do na hudok on tu hamu, pilliton ni tuanna ma ibana mangaradoti sude artana.” Alai molo gabe jahat do “naposo” i jala dipungkuli naposo na asing, “borat ma uhumon ni tuanna ibana”.—Mateus 24:45-51; bandingkon tu Lukas 12:45, 46.

Alai Jesus ndang na mandok na laho gabe jahat angka siihuthon ibana. Antong aha do maksud ni Jesus? Lomo do rohana asa sai jaga jala mangarade nasida. Dipaboa Jesus ma taringot on di tudosan na asing.

Nunga dipaboa Jesus tu angka apostelna tanda ni harorona dohot tanda ni panutup ni jaman on. Saonari dipaingot Jesus ma muse nasida marhite tudosan na asing. Boi ma angka halak na mangolu saleleng haroro ni Jesus mangida masa na nidokna i.

Didok ibana ma, “Tudos do Harajaon banua ginjang i tu sampulu namarbaju na mamboan lampu laho manomu-nomu pangoli. Adong lima na oto jala na lima nai marbisuk.”—Mateus 25:1, 2.

Jesus ndang na mandok satonga sian na manjalo Harajaon i na oto jala satonga nai na marbisuk. Alai laho patuduhon na boi do ganup siseanna mamillit naeng tongtong jaga manang na ndang. Pos do roha ni Jesus na boi angka naposona tongtong mangoloi Debata jala manjalo pasu-pasu sian Amana.

Di tudosan i, laho manomu-nomu pangoli do sampulu namarbaju i jala naeng dohot tu pesta parbogason. Molo dung sahat pangoli i, boanon ni nasida ma lampu asa tiur dalan. Mardalan ma nasida mandongani pangoli i rap dohot na niolina tu jabu naung diparade. Alai aha ma na masa?

Didok Jesus ma, “Diboan na oto i do lampu nasida alai ndang diboan nasida miakna. Alai anggo na marbisuk i, diboan nasida do miak di botol rap dohot lampu ni nasida. Ala leleng ro pangoli i, gabe mondok-ondok ma nasida sude jala tarpodom.” (Mateus 25:3-5) Saleleng tarpodom angka namarbaju i ndang ro dope pangoli i. Olo do ra diingot angka apostel na pinaboa ni Jesus taringot anak ni raja na laho tu huta na dao, jala mulak “dung dapotna huaso harajaon i”.—Lukas 19:11-15.

Dung i dipaboa Jesus ma aha na masa dung ro pangoli i. Didok ma, “Di tonga borngin, adong ma na manggorahon, ‘Nunga ro be pangoli i! Tomu hamu ma ibana.’” (Mateus 25:6) Rade do angka namarbaju i?

Didok Jesus ma, “Dungo ma sude namarbaju i jala dibuat be ma lampu ni nasida. Didok angka na oto i ma tu na marbisuk i, ‘Lehon ma di hami deba miakmuna i, ai nunga naeng mintop lampunami.’ Dialusi na marbisuk i ma, ‘Ra, ndang sae be on di hita. Tumagon ma hamu laho tu panggadis miak jala tuhor ma di hamu.’”—Mateus 25:7-9.

Ndang rade lima namarbaju na oto i tu haroro ni pangoli i. Hurang do miak ni lampu ni nasida. Alani i, laho ma nasida manuhor miak. Dung i didok Jesus ma muse, “Tingki laho nasida manuhor miak, ro ma pangoli i. Masuk ma angka namarbaju naung mangarade i rap dohot pangoli i tu pesta parbogason, jala ditutup ma pintu. Dung i, ro ma namarbaju na lima nai, ninna nasida ma, ‘Tuan, Tuan, bungka jo!’” Dialusi pangoli i ma, “Ndang hutanda hamu.” (Mateus 25:10-12) Ala ndang rade nasida, gabe ndang boi masuk!

Diboto angka apostel do Jesus pangoli na di tudosan i. Ai hea do dipatudos Jesus dirina tu sahalak pangoli. (Lukas 5:34, 35) Ise ma namarbaju na marbisuk i? Tingki dipaboa Jesus taringot tu “punguan na metmet” na laho mamarenta di Harajaon i, didok Jesus do, “Pangke ma pangkean ni parhobas jala mangarade ma hamu, tongtong ma galak palitomuna.” (Lukas 12:32, 35) Alani i diboto angka apostel ma, angka sisean na laho rap mamarenta dohot Jesus do namarbaju na marbisuk di tudosan i. Alai aha do parsiajaran na laho paboaon ni Jesus sian tudosan on?

Tangkas ma didok Jesus, “Alani i, jaga ma hamu, ai ndang diboto hamu ari manang jamna.”—Mateus 25:13.

Didok Jesus do asa “jaga” angka na mangihuthon ibana saleleng harorona. Na laho ro do ibana. Alani i, ingkon rade jala sai jaga do nasida songon lima namarbaju na marbisuk i. Ingkon diingot nasida do pangkirimon i asa dapot ni nasida pasu-pasu.

Piga-piga ari naung salpu tingki di Jeriko, dipaboa Jesus do tudosan taringot tu hepeng mina. On patuduhon, di ari na naeng ro do mamarenta Harajaon ni Debata. Saonari, di Dolok Jetun dope ibana rap dohot opat apostelna. Dipaboa ibana ma tudosan na asing na sarupa parsiajaranna. Dohot do tudosan i mangalusi sungkun-sungkun ni siseanna taringot tu harorona dohot panutup ni jaman on. Tudosan on patuduhon, ingkon ringgas do nasida mangulahon ulaon na dipasahat Jesus.

Didok Jesus ma, “Tudos do muse Harajaon banua ginjang i tu sahalak baoa na naeng mardalani tu na dao. Dijou ma angka hatobanna jala disuru ma nasida mangaradoti angka artana.” (Mateus 25:14) Hea do didok Jesus sarupa ibana tu sahalak baoa na laho tu luat na dao “manjalo huaso harajaon”. Alani i, diboto angka sisean i ma, Jesus do “baoa” na di tudosan i.—Lukas 19:12.

Tingki so laho baoa i, dipasahat ma artana tu angka hatobanna. Tingki di tano on, dipaboa Jesus do taringot tu Harajaon ni Debata saleleng tolu satonga taon. Jala diajari ibana do angka siseanna marbarita. Ndang sadia leleng nai, tadingkononna ma angka siseanna. Alai pos do rohana na tongtong nasida marbarita.—Mateus 10:7; Lukas 10:1, 8, 9; bandingkon tu Johannes 4:38; 14:12.

Di tudosan i, songon dia do cara ni baoa i mambagi artana? Jesus mandok, “Dilehon ma tu na sada lima talenta, tu na asing dua talenta, tu na sada nai sada talenta, hombar tu na tolap ni nasida. Dung i, borhat ma ibana tu na dao.” (Mateus 25:15) Dung dapot nasida arta i, aha do na diulahon angka hatoban i? Lam godang do dibahen nasida arta i songon lomo ni roha ni tuanna? Didok Jesus ma muse:

“Pintor laho ma na manjalo lima talenta i jala dipangke ma i martiga-tiga, gabe maruntung ma ibana lima talenta nai. Songon i ma muse na manjalo dua talenta, maruntung ma ibana dua talenta nai. Alai na manjalo sada talenta i, dihali ma tano jala ditabunihon ma tusi hepeng ni tuanna i.” (Mateus 25:16-18) Aha do na masa dung mulak baoa i?

Didok Jesus ma muse, “Dung leleng, mulak ma tuan ni angka hatoban i jala maretong ma ibana tu nasida.” (Mateus 25:19) Marsitutu do dua hatobanna i manggandahon arta ni tuanna “hombar tu na tolap ni nasida”. Ringgas do nasida karejo. Alani i, gabe tamba ma talenta na dilehon tuanna dua hali lompit. (Tingki i, sada talenta dos tu upa ni parkarejo saleleng 19 taon.) Dipuji tuanna ma nasida, ninna ma, “Denggan ma i hatoban na burju jala haposan! Haposan do ho di na otik. Lehononku ma tu ho gumodang muse siradotanmu. Marlas ni roha ma ho rap dohot tuanmu.”—Mateus 25:21.

Alai malas do hatoban na manjalo sada talenta i. Didok ibana ma, “Tuan, nunga huboto hian maol do pasonangkon roham, marpanen do ho nang pe ndang manabur jala papunguhon do ho nang pe ndang karejo. Alani i, mansai mabiar ma ahu gabe hutabunihon ma talentami tu bagasan tano. On ma, hupaulak ma hepengmi.” (Mateus 25:24, 25) Ndang disimpan ibana hepeng i tu bank asa marbunga hepeng ni tuanna i. Gabe rugi do tuanna i.

Alani i didok tuanna ma, “Hatoban na jahat jala na malas do ho.” Dibuat ma talenta na di ibana jala dilehon ma i tu hatoban na ringgas. Didok tuanna i ma muse, “Ganup halak na adong di ibana, lehonon do gumodang, asa ganda di ibana. Alai sian halak na so adong di ibana, buaton ma sian ibana molo tung adong.”—Mateus 25:26, 29.

Ingkon diparrohahon angka sisean do tudosan ni Jesus i. Songon na dibahen Tuanna tu hatoban i, dipasahat Jesus do ulaon na ringkot tu nasida, i ma marbarita. Ndang dipangido Jesus ingkon sarupa dapot ni nasida. Alai ndang lomo rohana molo “malas” nasida jala ndang marbarita sian nasa gogo ni nasida. Ingkon ringgas do nasida “hombar tu na tolap ni nasida”.

Molo ringgas nasida, didok Jesus ma, “Ganup halak na adong di ibana, lehonon do gumodang.” Jala on ma na mambahen nasida marlas ni roha.

Tingki di Dolok Jetun, dipaboa Jesus do tudosan taringot sampulu namarbaju dohot talenta. Saonari, dipaboa ibana ma tudosan na parpudi taringot biru-biru dohot hambing. Sude tudosan i, mangalusi sungkun-sungkun ni angka apostel taringot tanda ni harorona dohot tanda panutup ni jaman on.

Didok Jesus ma tu nasida, “Molo ro Anak ni jolma di bagasan hasangaponna jala sude suru-suruan rap dohot ibana, hundul ma ibana di habangsana na sangap i.” (Mateus 25:31) Nunga jotjot didok Jesus, ibana do “Anak ni jolma” i. Alani i, ibana do muse “Anak ni jolma” na di tudosan i.—Mateus 8:20; 9:6; 20:18, 28.

Andigan do tudosan i saut? Tingki ro Jesus rap dohot angka suru-suruan “di bagasan hasangaponna” jala “hundul ma ibana di habangsana na sangap”. Nunga hea didok ibana, “Anak ni jolma i ro di atas ni ombun di langit, mardongan huaso dohot hasangapon na mansai balga” rap dohot angka suru-suruan. Andigan do Jesus ro? “Dung salpu hasusaan i.” (Mateus 24:29-31; Markus 13:26, 27; Lukas 21:27) Saut ma tudosan on di ari na naeng ro. Aha ma na laho ulahononna?

Didok Jesus ma muse, “Molo ro Anak ni jolma i. . . . Papunguonna ma sude bangso tu jolona jala sirangonna ma angka jolma, na sada tu na asing, songon parmahan na manirang biru-biru sian hambing. Bahenonna ma biru-biru i di siamunna, alai hambing i di hambirangna.”—Mateus 25:31-33.

Aha do na masa tu angka biru-biru i? Didok Jesus ma, “Dung i dohonon ni raja i ma tu angka na di siamunna i, ‘Ro ma hamu angka na mandapot pasu-pasu sian Damang, jalo hamu ma Harajaon naung pinarade tu hamu, sian mulai ditompa portibi on.’” (Mateus 25:34) Aha do na diulahon angka biru-biru i na mambahen las roha ni Raja i?

Didok raja i ma, “Tingki male ahu, dilehon hamu do ahu mangan. Tingki mauas ahu, dilehon hamu do ahu minum. Nang pe ndang ditanda hamu, dijalo hamu do ahu. Tingki ndang marpangkean ahu, dilehon hamu do pangkeanku. Tingki marsahit ahu, diparrohahon hamu do ahu. Tingki dipenjara ahu, diida hamu do ahu.” Jala “angka halak na mangulahon na sintong” do na dos songon biru-biru. Tingki disungkun nasida nandigan diulahon nasida i, dialusi raja i ma, “Sude na binahenmuna tu sahalak sian haha anggingku na metmet on, na tu ahu do na binahenmuna i.” (Mateus 25:35, 36, 40, 46) Ndang di surgo diulahon nasida i, ai ndang adong na marsahit dohot na male disi. Alai, diulahon nasida do i saleleng di tano on haha anggi ni Jesus.

Aha ma na masa tu angka hambing? Jesus mandok, ‘Dung i dohonon ni [Raja i] ma tu angka na di hambirangna, “Laho ma hamu angka na diuhum tu api sisaleleng-lelengna naung diparade tu Sibolis dohot tu angka suru-suruanna. Ai di tingki male ahu, ndang dilehon hamu ahu mangan. Tingki mauas ahu, ndang dilehon hamu ahu minum. Tingki ro ahu songon halak na so tinanda, ndang dijalo hamu ahu. Tingki so marpahean ahu, ndang dilehon hamu pangkeanku. Tingki marsahit jala dipenjarahon ahu, ndang ditingkir hamu ahu.”’ (Mateus 25:41-43) Patut do nasida diuhum, ai ndang burju nasida tu angka haha anggi ni Jesus.

Didok Jesus ma muse, ‘Alusan ni [Raja i] ma nasida, “Tutu do na hudok on tu hamu, sude na so binahenmu tu sahalak sian haha anggingku na metmet on, na so dibahen hamu do i tu ahu.’ Tu hamatean saleleng ni lelengna ma halak sisongon i, alai ianggo angka halak na mangulahon na sintong tu hangoluan saleleng ni lelengna.” Alani i diantusi angka sisean i ma, di ari panguhumon i ma ditontuhon laho mate manang mangolu saleleng ni lelengna sasahalak.—Mateus 25:45, 46.

Marlaba do alus ni Jesus i tu sude na mangihuthon ibana. Gabe boi ma nasida mamareso pangalaho dohot parniulaon ni nasida.