Tarsonggot ma angka borua i mangida kuburan ni Jesus na kosong. Dung i didapothon si Maria Magdalena ma “si Simon Petrus dohot sisean na asing na hinaholongan ni Jesus”, i ma apostel Johannes. (Johannes 20:2) Alai diida angka borua na tading di kuburan i ma sada suru-suruan disi. Jala adong do muse suru-suruan na asing na “mamangke jubah na bontar” di bagasan kuburan i.​—Markus 16:5.

Didok sada sian suru-suruan i ma, “Unang ma mabiar, huboto do Jesus naung diuhum mate di hau i do na niluluanmuna. Ndang dison be ibana, ai nunga dipahehe ibana songon na nidokna i. Ro ma hamu jala ida ma inganan hapeahanna hian. Hatop ma hamu laho jala paboa ma tu angka siseanna, nunga hehe ibana sian na mate. Ai nunga dijoloani ibana hamu tu Galilea.” (Mateus 28:5-7) Dung i marlojong ma angka borua i laho paboahon tu angka apostel. “Hitir-hitir” ma nasida alani biarna.​—Markus 16:8.

Dung pajumpang si Maria tu si Petrus dohot si Johannes, didok ma, “Nunga dibuat halak Tuan sian kuburan i jala ndang huboto hami didia dipeakkon nasida ibana.” (Johannes 20:2) Laho ma si Petrus dohot si Johannes tu kuburan i jala parjolo do sahat si Johannes disi. Ditingkir ibana ma tu bagasan. Holan abit-abit na dipangke mambungkus bangke ni Jesus do disi.

Dung sahat si Petrus, masuk ma ibana tu bagasan kuburan i. Diida ibana ma holan abit linen dohot abit na mambungkus ulu ni Jesus do disi. Dung i masuk ma si Johannes. Gabe porsea ma ibana tu hata ni si Maria. Nang pe nunga dipaboa Jesus na laho hehe ibana, alai ndang diantusi nasida i. (Mateus 16:21) Mulak ma nasida tu jabu jala sungkun-sungkun ma roha ni nasida. Dung mulak muse si Maria tu kuburan i, sai disi ma ibana.

Alai laho ma angka borua na asing tu angka sisean laho paboahon naung hehe Jesus. Tingki mardalan nasida, pajumpang ma nasida dohot Jesus. Didok Jesus ma, “Horas!” Dung i “marsinggang” ma nasida tu patna. Didok Jesus ma muse, “Unang hamu mabiar! Laho ma hamu, paboa ma tu angka haha anggingku asa ro tu Galilea jala idaon ni nasida ma ahu disi.”​—Mateus 28:9, 10.

Tingki masa gempa di kuburan i jala ro angka suru-suruan, “hitir-hitir ma angka panjaga i alani biarna, pola marjogal songon halak na mate”. Dung i laho ma nasida tu kota “paboahon sude na masa i tu angka malim kepala”. Mangkatai ma angka malim dohot pangituai ni halak Jahudi. Dilehon ma hepeng tu angka panjaga i asa didok, “Na ro do angka siseanna manangko bangkena bornginna i tingki modom hami.”​—Mateus 28:4, 11, 13.

Diuhum mate do tentara ni halak Rom molo tarpodom tingki marjaga. Alani i didok angka malim ma tu nasida, “Molo tarboto i tu gubernur, hupatorang hami pe tu ibana boasa masa i, unang pola mabiar hamu.” (Mateus 28:14) Dijalo angka panjaga i ma hepeng i jala diulahon nasida ma na didok angka malim. Gabe porsea ma godangan halak Jahudi na ditangko angka siseanna do bangke ni Jesus.

Sai tangis-tangis dope si Maria Magdalena di kuburan i. Tingki ditingkir ibana tu bagasan, diida ibana ma dua suru-suruan marabit na bontar. Hundul do nasida di inganan ni bangke ni Jesus dipeakkon, sada di inganan ni uluna jala sada nai di patna. Didok nasida ma, “Boasa tumatangis ho inang?” Dialusi si Maria ma, “Nunga dibuat halak Tuanki, jala ndang huboto didia dipeakkon nasida ibana.” Tingki dibereng ibana tu pudi, diida ibana ma halak na asing. Didok halak i ma, “Ise do na niluluanmu?” Dirimpu si Maria do i pangula ni porlak i. Gabe ninna ma, “Amang, molo ho do na mambuat ibana, paboa ma tu ahu didia dipeakhon ho ibana asa hubuat ibana sian i.”​—Johannes 20:13-15.

Hape Jesus naung i dipahehe do dongan ni si Maria mangkatai, alai ndang diboto ibana i. Tingki didok Jesus tu ibana, “Maria!” gabe diboto ibana ma na Jesus do i. Ai songon i do biasana Jesus manjou ibana. Las ma rohana jala didok ma, “Rabboni!” Dirimpu si Maria do na naeng laho Jesus tu surgo tingki i, gabe ditiop ibana ma Jesus. Didok Jesus ma tu ibana, “Unang ma sai tiop ahu, ai ndang laho dope ahu tu Ama i. Alai laho ma ho tu angka haha anggingku jala paboa ma tu nasida, ‘Na laho ma ahu tu Damang i dohot Amamuna jala tu Debatangku dohot Debatamuna.’”​—Johannes 20:16, 17.

Dung i laho ma si Maria tu inganan ni angka apostel dohot sisean na asing marpungu. Didok ma, “Nunga huida Tuan!” Nunga dibege nasida i sian angka borua na asing. (Johannes 20:18) Alai dirimpu nasida do “holan hata-hata” na didok angka borua i.​—Lukas 24:11.

Ari Minggu tanggal 16 Nisan do tingki i. Lungun ma roha ni angka sisean ala kosong kuburan ni Jesus diida nasida. (Mateus 28:9, 10; Lukas 24:11) Di ari i, laho do si Kleopas dohot sisean na asing tu Emmaus. Hira-hira 11 kilometer ma daona sian Jerusalem.

Huhut mardalan dihatai nasida ma na masa. Dung i ro ma sahalak baoa mandapothon nasida. Disungkun ma, “Aha do dihatai hamu?” Dialusi si Kleopas ma, “Ai ndang halak Jerusalem huroha ho, umbahen na so diboto ho na masa na piga ari on?” Didok baoa i ma, “Aha ma i?”​—Lukas 24:17-19.

Didok nasida ma, “Taringot tu na masa tu Jesus halak Nasaret i. . . . Mangkirim do hami asa ibana na paluahon Israel.”​—Lukas 24:19-21.

Dung i dipaboa si Kleopas dohot donganna ma na masa. Dipaboa nasida ma taringot angka borua na laho tu kuburan ni Jesus. Hape kosong do kuburan i diida nasida. Dung i diida nasida ma suru-suruan na mandok naung hehe Jesus. Jala didok si Kleopas dohot donganna i ma, nunga laho dongan ni nasida mamereng tu kuburan, jala tutu do masa songon “na nidok ni angka borua i”.​—Lukas 24:24.

Ndang diantusi sisean na dua i boasa masa sisongon i. Dung i dipatorang baoa i ma tu nasida na ingkon hehe do Jesus. Didok ma, “O ale halak na so marroha, ai lambat ma hamu mangkaporseai sude na nidok ni angka panurirang i! Nda ingkon taonon ni Kristus i do sudena i asa masuk ibana tu hasangaponna i?” (Lukas 24:25, 26) Dung i dipaboa ibana ma angka na tarsurat di Surat na Badia na paboahon taringot tu Kristus.

Ujungna sahat ma nasida di jonok ni Emmaus. Alai, naeng begeon ni sisean na dua i dope baoa i mangkatai. Alani i didok ma, “Rap ma hita, ai nunga botari on, satongkin nai holom nama.” Dioloi baoa i ma i jala rap mangan ma nasida. Martangiang ma ibana, diponggoli ma roti, jala dilehon ma tu nasida. Gabe diboto nasida ma Jesus do ibana. Alai pintor ndang tarida be Jesus. (Lukas 24:29-31) Gabe pos ma roha ni nasida naung hehe Jesus!

Gabe didok sisean na dua i ma, “Patut ma hona tu rohanta tingki na mangkatai i ibana di dalan jala tingki tangkas dipatorang ibana Surat na Badia i tu hita.” (Lukas 24:32) Pintor mulak ma muse nasida tu Jerusalem manjumpangi angka apostel dohot sisean na asing. Ndang dope dipaboa nasida na masa, didok angka sisean na asing ma tu nasida, “Tutu do, nunga hehe Tuan i jala dipatuduhon do dirina tu si Simon!” (Lukas 24:34) Dung i dipaboa si Kleopas dohot donganna ma naung pajumpang nasida dohot Jesus.

Tingki na mangkatai i nasida, tompu ma ro Jesus. Tarsonggot ma nasida, ai dikunci nasida do sude pintu ala mabiar tu halak Jahudi. Jongjong ma Jesus di tonga-tonga ni nasida, didok ma, “Dame ma di hamu.” Alai mabiar do nasida. Ai dirimpu nasida do na “mandapot parnidaan nasida”.​—Lukas 24:36, 37; Mateus 14:25-27.

Asa porsea angka sisean i na tutu do i Jesus, dipatudu ibana ma tangan dohot patna. Didok ma, “Boasa tarsonggot hamu? Boasa ganggu rohamuna? Ahu do on! Ida hamu ma tangan dohot pathon. Jama hamu ma asa diboto hamu. Ndang parnidaan on, alani i ma boasa marsibuk ahu jala marholi-holi songon na niidamuna.” (Lukas 24:36-39) Las ma roha ni nasida, alai ndang haru porsea dope nasida.

Asa lam porsea angka sisean i, didok Jesus ma, “Adong do sipanganon di hamu?” Dilehon nasida ma tu ibana dengke na dipanggang jala diallang ma i. Dung i didok Jesus ma muse, “Angka on ma na huhatahon tu hamu tingki rap dope ahu dohot hamu, ingkon saut do sude na tarsurat taringot tu ahu di Patik ni si Musa, na Sinurat ni Angka Panurirang dohot na di angka Psalmen.”​—Lukas 24:41-44.

Dung i, dipatorang Jesus ma tu angka sisean i songon na dipaboa ibana tu si Kleopas dohot tu donganna. Didok ma, “Songon on do na tarsurat i, ingkon marsitaonon do Kristus i jala hehe sian na mate di ari patoluhon. Di bagasan goarna, dibaritahon ma tu sude bangso barita taringot tu ringkot ni marhamubaon asa boi mandapot hasesaan ni dosa. Dimulai ma i sian Jerusalem. Jala hamu ma na paboahon taringot tu angka i.”​—Lukas 24:46-48.

Tingki i, ndang disi apostel Tomas. Marsogotna i, didok angka sisean i ma tu ibana, “Nunga huida hami Tuan!” Alai didok si Tomas ma tu nasida, “Saleleng so huida tanganna na hona paku i jala hupamasuk jari-jaringku tusi dohot tu rusukna, ndang porsea ahu.”​—Johannes 20:25.

Dung ualu ari, marpungu ma muse angka sisean i. Dohot do si Tomas disi. Jala dikunci nasida do sude pintu ni inganan i. Tompu ma jongjong Jesus di tonga-tonga ni nasida. Didok ma, “Dame ma di hamu.” Didok Jesus ma tu si Tomas, “Ida ma tangankon, pamasuk ma jari-jarim tusi dohot tu rusukkon. Unang be ganggu roham alai porsea ma ho.” Gabe didok si Tomas ma, “Tuanku jala Debatangku!” (Johannes 20:26-28) Pos ma roha ni si Tomas naung hehe do Jesus.

Didok Jesus ma, “Ala naung diida ho do ahu umbahen na porsea ho? Marlas ni roha ma angka na porsea nang pe ndang diida ahu.”​—Johannes 20:29.