Dung kaluar si Adam dohot si Hawa sian Taman Eden, godang do gelleng ni nasida. Na siakkangan, goarna si Kain jala martani do karejona. Na paduahon, si Abel. Marmahan do karejona.

Di sada tikki, dibahen si Kain dohot si Abel ma pelean manang persembahan tu Jahowa. Diboto ho do aha persembahan i? Persembahan, i ma na talehon tu Jahowa. Lomo do roha ni Jahowa tu persembahan ni si Abel. Alai dang lomo rohana tu persembahan ni si Kain. Gabe muruk ma si Kain. Alani i, dipasingot Jahowa ma ibana, molo sai muruk si Kain boi do gabe mangulahon na jahat ibana. Alai, dang ditangihon si Kain hata ni Jahowa.

Didok si Kain ma tu si Abel, “Beta ma hita tu ladang.” Dung sahat nasida di ladang, diattuk si Kain ma si Abel jala dipamate ma adekna i. Alai, diboto Jahowa do na diulahon si Kain i. Gabe dihukum Jahowa ma si Kain, jala diusir dao sian keluargana. Dang boi be ibana mulak.

Aha do parsiajaranna tu hita? Olo do ra muruk hita ala dang saut na di rohatta. Alai molo adong na pasingotton hita, ikkon muba do hita jala unang ma torus muruk.

Dihaholongi si Abel do Jahowa, jala akka na denggan do na diulahon ibana. Alani i, toktong do diingot Jahowa si Abel. Haduan, tikki dibahen Jahowa tano on gabe paradeiso, paheheonna do si Abel.

Lam leleng, lam godang ma jolma di tano on. Alai, unggodang do halak na jahat. Asing ni i, adong do malaikat di surgo na gabe jahat. Ditinggalhon nasida do surgo, jala ro tu tano on. Diboto ho do boasa diulahon nasida i? Asa boi nasida gabe jolma jala menikah tu borua.

Dung menikah nasida tu akka borua i, tubu ma gelleng ni nasida. Dung balga, massai gogo do akka gellengna i jala jahat tu akka donganna jolma. Dang mungkin dipasombu Jahowa torus masa songon i. Alani i, naeng dibahen Jahowa ma Aek na Sumar manang Air Bah lao pamatehon nasida.

Alai adong do sahalak bawa na burju. Goarna si Noak. Holong do rohana tu Jahowa. Adong do sada istrina dohot tolu gellengna. Goar ni anakna, si Sem, si Ham, dohot si Japet. Jala adong do tolu parumaenna. Disuru Jahowa ma si Noak mambahen bahtera, asa boi ibana dohot keluargana selamat sian Air Bah i. Massai balga do bahtera i jala boi mengapung di aek. Disuru Jahowa ma muse si Noak pamasukkon akka binatang tu bahtera i asa toktong mangolu.

Pittor dibahen si Noak do bahtera i. Hira-hira 50 taon ma si Noak dohot keluargana mambahen i. Diulahon nasida do sude na didok Jahowa lao mambahen bahtera i. Jala dipaboa si Noak do tu akka halak na lao ro nama Air Bah. Alai dang adong na olo mambege.

Ujungna dapot ma tikkina, masuk ma nasida tu bahtera i. Aha ma na terjadi dukkon i?