MANJUPPANGI MUSE
PARSIAJARAN 8
Sabar ma Hamu
Prinsipna: “Halak na marholong ni roha i sabar.”—1 Kor. 13:4.
Aha do na Diulahon Jesus?
1. Tonton ma VIDEO, manang jaha ma Johannes 7:3-5 dohot 1 Korint 15:3, 4, 7. Dung i pikkirhon ma sukkun-sukkun on:
Di mulana, songon dia do tanggapan ni akka anggina tu barita na dipasahat Jesus?
Aha do na patuduhon na sabar Jesus mangurupi anggina si Jakobus?
Aha do Parsiajaranna?
2. Porlu do hita sabar, alana di piga-piga halak porlu do godang tikki asa olo manjalo barita na uli.
Tiru ma Jesus
3. Pakke ma cara na berbeda. Molo dang pittor olo sasahalak marsiajar Bibel, unang ma paksa ibana. Molo cocok, pakke ma akka video manang akka artikel lao mangurupi ibana mangattusi songon dia do parsiajaran Bibel i jala aha do manfaatna tu ibana.
4. Unang ma banding-bandingkon. Marasing-asing do ganup halak. Sipata adong do anggota keluarga manang halak na tajuppangi muse ragu marsiajar Bibel manang maol manjalo ajaran ni Bibel. Pikkirhon ma aha do na mambahen ibana songon i. Na maol do ibana maninggalhon ajaran ni agamana? Na ditekan keluarga manang tetangga do ibana? Lehon ma tikki tu ibana mamikkirhon akka na tapaboa jala mangargai aha do na diajarhon Bibel.
5. Martangiang ma. Pangido ma tu Jahowa asa diurupi hamu toktong marpikkiran positif jala marbisuk. Pangido ma muse bisuk lao mamboto berminat dope sasahalak manang na daong jala porlu dope ibana dijuppangi manang na daong.—1 Kor. 9:26.