Di jonok ni kota Babel, adong ma sada kota na margoar Ur. Akka patung do na disomba akka halak na di kota i, dang Jahowa. Alai adong do sahalak bawa di kota i na manomba Jahowa. Goarna si Abraham.

Didok Jahowa ma tu si Abraham, ‘Tinggalhon ma huta on dohot tondongmu. Borhat ma ho tu tano na naeng hupatudu tu ho.’ Dung i marjanji ma Jahowa tu ibana, ‘Gabe bangso na balga ma ho. Pasu-pasuokku ma sude bangso di tano on alani ho.’

Dang diboto si Abraham dope naeng tudia ibana lao. Nang pe songon i, porsea do ibana tu Jahowa. Borhat ma nasida, diboan si Abraham ma si Sara istrina, si Tera bapakna, dohot si Lot anak ni abangna.

Nungnga 75 taon umur ni si Abraham tikki sahat nasida di tano na dijanjihon Jahowa, i ma tano Kanaan. Disi ma marjanji Debata tu si Abraham. Didok ma, ‘Ida ma tu sakalilingmu, sude tano on lao lehonokku ma tu ianakkonmu.’ Nungnga matua si Abraham dohot si Sara, alai dang adong dope gelleng ni nasida. Attong, songon dia ma cara ni Jahowa pasautton janjina i?

Nungnga marpulu taon si Abraham menikah dohot si Sara. Ditinggalhon nasida do jabu ni nasida di kota Ur, jala tinggal di kemah. Nang pe songon i, dang mengeluh si Sara, alana porsea do ibana tu Jahowa.

Sada tikki didok si Sara ma tu si Abraham, ‘Molo adong tubu anakmu sian si Hagar, dos do i songon anakku.’ Dang sadia leleng, tubu ma anak ni si Hagar, dibahen ma goarna si Ismael.

Tikki marumur 99 taon si Abraham jala si Sara 89 taon, adong ma tolu halak ro manjuppangi nasida. Ditogihon si Abraham ma nasida mangan di toru ni sada pohon. Diboto ho do ise na tolu halak i? Malaikat do nasida! Didok malaikat i ma tu si Abraham, ‘Taon na ro di tikki sisongon on, tubu ma anakmu.’ Dibege si Sara do i sian bagasan kemahna. Mekkel ma ibana di bagasan rohana, jala didok ma, ‘Ai boi dope au manubuhon anak? Nga matua au.’

Di taon na mangihut pas songon na didok ni malaikat ni Jahowa i, ditubuhon si Sara ma sada anak. Dibahen si Abraham ma goar ni anakna i si Isak, artina “Mekkel”.

Tikki marumur lima taon si Isak, diida si Sara ma sering si Ismael mangejek anakna i. Alani i, lao melindungi si Isak, didok si Sara ma tu si Abraham asa diusir si Hagar dohot si Ismael. Mulana, dang olo si Abraham. Alai didok Jahowa ma tu ibana, ‘Tangihon ma hata ni si Sara i. Hujaga pe si Ismael. Ai sian si Isak do saut janji na hudok i.’