Rap do si Lot tinggal dohot bapa udana si Abraham di tano Kanaan. Alai, lam leleng lam godang ma binatang na dipelihara si Abraham dohot si Lot. Alani godangna, dang siat be inganan i tu nasida. Didok si Abraham ma tu si Lot, ‘Dang boi be hita rap tinggal di sada inganan. Pillit ma tudia lomo ni roham, hupillit pe inganan na asing.’ Sian hatana i, tarida do dang halak na egois si Abraham.

Diida si Lot ma sada inganan na bagak jonok ni kota Sodom. Godang do aek dohot rumput disi. Alani i, pinda ma ibana dohot keluargana tusi.

Massai jahat do halak Sodom dohot halak Gumora. Alani jahatna, naeng dihancurhon Jahowa ma kota i. Alai lomo do roha ni Jahowa asa selamat si Lot dohot keluargana. Alani i, disuru Jahowa ma dua malaikat pasingotton si Lot. Didok malaikat i ma tu si Lot, ‘Hatop! Kaluar ma hamu sian kota on! Lao dihancurhon Jahowa nama kota on.’

Alai dang pittor lao si Lot, sai dipaleleng-leleng ibana do. Alani i, ditiop malaikat i ma tangan ni si Lot, tangan ni istrina, dohot tangan ni dua boruna. Diboan ma nasida kaluar sian kota i. Didok ma, ‘Lari ma hamu, asa selamat hamu! Unang ida tu pudi. Molo diida hamu tu pudi, mate ma hamu!’

Dung sahat nasida tu kota Zoar, dibahen Jahowa ma udan api dohot belerang di kota Sodom dohot Gumora. Gabe hancur ma kota Sodom dohot Gumora. Alai dang dioloi istri ni si Lot Jahowa, diida ibana do tu pudi. Ujungna, gabe batu sira ma ibana! Alai selamat do si Lot dohot dua boruna ala dioloi nasida Jahowa. Pasti lungun hian do roha ni nasida ala dang dioloi istri ni si Lot Jahowa. Sian on taboto ma, ikkon taoloi do paretta ni Jahowa.

Diajari si Abraham do si Isak asa makkaholongi Jahowa jala porsea tu janji ni Jahowa. Alai tikki marumur 25 taon si Isak, dipangido Jahowa ma si Abraham asa mangulahon ulaon na maol. Aha ma i?

Didok Debata ma tu si Abraham, ‘Boan ma anakmi jala bahen ma ibana gabe persembahan di Dolok Moria.’ Nang pe dang diboto si Abraham boasa dipangido Jahowa songon i, dioloi ibana do Jahowa.

Manogotna i, diboan si Abraham ma si Isak dohot dua pelayanna tu Dolok Moria. Dung tolu ari nasida mardalan, boi ma diida nasida dolok i sian na dao. Didok si Abraham ma tu pelayanna asa paimahon nasida di inganan i. Dung i, mardalan ma ibana muse dohot si Isak lao mangalehon persembahan. Disuru si Abraham ma si Isak mamboan soban jala si Abraham mamboan piso. Disukkun si Isak ma bapakna, ‘Didia do binatang na lao tapersembahon i bapa?’ Dialusi si Abraham ma, ‘Diparade Jahowa do i annon anakku.’

Dung sahat nasida di dolok i, dibahen nasida ma mezbah. Dung i, diikkat si Abraham ma tangan dohot pat ni si Isak, jala dipeakkon ma ibana di mezbah i.

Alai tikki naeng diseat si Abraham si Isak, dijou malaikat ni Jahowa ma ibana, ‘Abraham! Unang seat anakmi! Saonari nungnga huboto be porsea do ho tu Debata. Alana, olo do ho mangalehon anakmi gabe persembahan.’ Dung i, diida si Abraham ma sada domba jantan na sakkot tandukna di ramba-ramba. Hatop ma dibukka ibana tali na mangikkat si Isak i, jala dipersembahon ma domba i.

Mulai sian i, didok Jahowa ma si Abraham sahabatna. Diboto ho do boasa didok songon i? Ala diulahon si Abraham do sude paretta ni Jahowa, nang pe dang diattusi ibana boasa disuru Jahowa ibana mangulahon i.

Diulangi Jahowa ma muse janjina tu si Abraham, ‘Pasu-pasuokku ma ho, jala godang ma ianakkonmu, manang keturunanmu.’ Sian hatana i marjanji do Jahowa, na lao pasu-pasuonna do sude halak na burju di liat portibi on marhite keturunan ni si Abraham.