Marumur 40 taon ma si Isak tikki menikah tu si Rebekka. Massai holong do rohana tu si Rebekka. Tubu ma dua anak ni nasida, jala kembar do anakna i.

Na siakkangan goarna si Esau, jala na siappudan goarna si Jakkob. Lomo do roha ni si Esau kaluar lao marburu binatang. Alai molo si Jakkob, unlomo do rohana tinggal di jabu.

Di tikki i, anak siakkangan do na mandapot tano dohot hepeng molo nga mate bapakna. On ma na didok warisan. Alai molo di keluarga ni si Isak, dang holan arta na didok warisan. Janji na dilehon Jahowa tu si Abraham pe didok do warisan. Molo di si Esau, dang penting janji i. Alai molo di si Jakkob massai penting do i.

Di sada tikki, mulak ma si Esau tu jabu. Nungnga loja ibana marburu. Dianggo ibana ma sipanganon na diloppa si Jakkob. Didok si Esau ma, ‘Nungnga male hian au. Dia jo saotik bubur kacang merahmi!’ Alai didok si Jakkob ma, ‘Hulehon pe! Alai marjanji ma jo ho ikkon lehononmu warisanmi tu au.’ Dialusi si Esau ma, ‘Dang porlu di au warisan i! Di ho pe taho i, dia ma jo buburmi nga male au.’ Menurutmu, na marbisuk do si Esau on? Daong. Dijual si Esau do warisanna i holan alani samakkuk bubur.

Nungnga matua be si Isak jala dapot ma tikkina lao mamasu-masu anak siakkanganna. Alai, diurupi si Rebekka do si Jakkob anakna siappudan asa ibana na mandapot pasu-pasu i. Dung diboto si Esau na masa i, muruk hian ma ibana jala naeng dibunu ma adekna i. Alai dijaga si Isak dohot si Rebekka do si Jakkob. Didok nasida ma tu si Jakkob, ‘Lao ma ho tu jabu ni tulangmu si Laban, disi ma ho tinggal sahat tu na malum roha ni abangmi.’ Dioloi si Jakkob do hata ni natua-tuana. Lao ma ibana asa unang mate ibana.

Marjanji do Jahowa na lao jagaonna si Jakkob, songon na diulahon Ibana tu si Abraham dohot tu si Isak. Di Haran do si Jakkob tinggal. Jala disi do ibana menikah, marianakkon, jala gabe mamora.

Di sada tikki didok Jahowa ma tu si Jakkob, ‘Mulak ma ho tu huta hatubuanmu.’ Alani i, borhat ma si Jakkob dohot keluargana, mulak tu hutana. Alai di tonga dalan, didok piga-piga halak ma tu si Jakkob, ‘Di pardalanan do abangmu si Esau saonari lao manjuppangi ho. Adong 400 halak na rap dohot ibana!’ Dirippu si Jakkob do naeng pamateon ni si Esau ibana dohot keluargana. Alani i martangiang ma si Jakkob tu Jahowa, ‘Palua ma au sian abangku.’ Marsogotna i, disuru si Jakkob ma asa dilehon tu si Esau domba, hambing, lombu, unta, dohot keledai.

Di borngin i, tikki sahalak ni si Jakkob, pajuppang ma ibana dohot sada malaikat! Margulat ma ibana dohot malaikat i sahat tu manogot. Nang pe haccitan si Jakkob, dang olo ibana paluahon. Didok malaikat i ma, ‘Palua ma au.’ Alai asa pos roha ni si Jakkob na diurupi Jahowa ibana, didok ma, ‘Daong, dang paluaokku ho molo dang jolo dipasu-pasu ho au.’

Ujungna, dipasu-pasu malaikat i ma si Jakkob. Saonari gabe pos ma rohana, dang loason ni Jahowa pamateon ni si Esau ibana.

Manogotna i, sian na dao diida si Jakkob ma si Esau dohot 400 bawa. Pittor ro ma si Jakkob tu jolo ni si Esau. Dipaunduk ibana ma dirina tu tano sappe pitu hali. Marlojong ma si Esau jala dihaol ma si Jakkob. Tangis ma nasida na dua. Dung i, mardame ma nasida. Menurutmu, songon dia do perasaan ni Jahowa mangida cara ni si Jakkob mangatasi masalah on?

Dung sae i, mulak ma si Esau tu hutana. Si Jakkob pe ditorusson ma pardalananna. Adong 12 anak ni si Jakkob. Goar ni nasida, i ma si Ruben, si Simeon, si Lepi, si Juda, si Dan, si Naptali, si Gad, si Aser, si Isasar, si Zebulon, si Josep, dohot si Benjamin. Dipakke Jahowa do si Josep lao paluahon bangsona. Diboto ho do songon dia carana? Taida ma annon.