Si Josep ma anak ni si Jakkob na pasappulu sadahon. Massai holong do roha ni si Jakkob tu ibana. Menurutmu, songon dia do perasaan ni akka abangna mangida si Josep? Cemburu jala sogo do roha ni nasida tu ibana. Hea ma marnipi si Josep jala dipaboa ma i tu akka abangna. Di nipina i, na lao marsomba do akka abangna i tu ibana. Alani i, gabe lam sogo ma roha ni nasida mangida si Josep!

Di sada tikki, marmahan domba ma akka abangna di jonok ni kota Sikem. Disuru si Jakkob ma si Josep asa lao mangida nasida. Sian na dao dope nungnga diida nasida si Josep jala didok ma, ‘Nga ro be siparnipi i. Tapamate ma ibana!’ Diikkat nasida ma si Josep jala didabuhon tu sumur na bagas. Alai didok abangna na margoar si Juda ma, ‘Unang ma tapamate ibana! Tumagon ma tajual ibana gabe hatoban.’ Alani i, dijual nasida ma si Josep 20 logam perak tu halak Midian na naeng marjualan tu Mesir.

Dung i, dibahen akka abangna ma mudar ni hambing tu baju ni si Josep jala diboan ma i tu bapakna. Didok nasida ma, ‘Dang baju ni anakmu on?’ Gabe dirippu si Jakkob ma naung mate si Josep diallang binatang buas. Marsak situtu ma ibana, jala dang adong manang ise pe na boi menghibur ibana.

Di Mesir, dibahen ma si Josep gabe hatoban manang budak ni pejabat na margoar si Potipar. Alai sai didongani Jahowa do si Josep. Rajin do si Josep karejo jala jujur do ibana. Diparrohahon si Potipar do i. Alani i, dibahen si Potipar ma si Josep gabe pengawas ni sude artana.

Lomo do roha ni istri ni si Potipar mangida si Josep ala ganteng jala gogo ibana. Alani i, torus ma diajak istri ni si Potipar ibana asa rap modom. Alai, aha do na diulahon si Josep? Dang olo ibana, jala didok ma, ‘Dang olo au! Sala do i. Porsea do tuanku tu au, jala istrina do ho. Molo rap modom au dohot ho, mardosa ma au tu Debata!’

Di sada tikki, dipaksa istri ni si Potipar ma si Josep asa rap modom dohot ibana. Ditarik ma bajuna, alai lari do si Josep. Tikki mulak si Potipar tu jabu, didok istrina ma na dipaksa si Josep ibana asa rap modom. Hape gabus do i. Gabe muruk ma si Potipar, jala dipenjarahon ma si Josep. Alai, dang ditinggalhon Jahowa si Josep.

Tikki dipenjara si Josep, marnipi ma si Firaun raja ni Mesir. Dang adong na boi patorakkon arti nipina i. Adong ma pelayan ni si Firaun na mandok tu ibana, molo si Josep boi paboahon arti ni nipina i. Pittor didok si Firaun ma asa dijou si Josep.

Disukkun si Firaun ma si Josep, ‘Boi do paboaonmu arti ni nipikki?’ Dipaboa si Josep ma tu si Firaun, ‘Gok do sipanganon di Mesir saleleng pitu taon, alai dukkon i masa ma kelaparan pitu taon nai. Pillit ma sahalak na marbisuk lao manippan sipanganon asa unang kelaparan bangsomon.’ Didok si Firaun ma, ‘Ho ma hupillit! Ho ma halak na paduahon na marhuaso di Mesir!’ Boasa boi diboto si Josep arti nipi ni si Firaun? Ala diurupi Jahowa si Josep.

Saleleng pitu taon, disippan si Josep ma hasil panen. Dung i, masa ma kelaparan di sude liat portibi on songon na dipaboa si Josep. Marroan ma akka halak manuhor sipanganon tu si Josep. Ala diboto si Jakkob adong sipanganon di Mesir, gabe disuru ibana ma sappulu anakna lao manuhor sipanganon tusi.

Ro ma akka anak ni si Jakkob manjuppangi si Josep. Pittor ditanda si Josep do nasida. Alai, dang ditanda akka abangna i ibana. Marsomba ma nasida tu si Josep, pas songon di nipi ni si Josep tikki poso. Lao mamboto atik naung muba do nasida manang na dang, didok si Josep ma, ‘Mata-mata do hamu kan? Naeng mangalului kelemahan ni negara on do hamu kan?’ Didok nasida ma, ‘Daong! Sian Kanaan do hami. Abang adek do hami sude. Sebenarna, 12 do hami anak ni bapak, alai nga mate sada jala na sada nai tinggal dohot bapaknami.’ Dung i didok si Josep ma muse, ‘Attong boan ma adekmuna i tuson, asa porsea au tu hamu.’ Alani i mulak ma nasida tu bapakna.

Tikki habis sipanganon ni nasida, disuru si Jakkob ma muse akka anakna tu Mesir lao manuhor sipanganon. Alai sahali on diboan nasida do si Benjamin, siappudan ni si Jakkob. Lao manguji akka abangna, dipamasuk si Josep ma cakkirna na sian perak tu goni na diboan si Benjamin. Dung i ditudu ma nasida panakko. Tikki dapot pelayan ni si Josep cakkir i di goni ni si Benjamin, tarsonggot ma akka abangna. Dipangido nasida ma tu si Josep asa unang dihukum si Benjamin, alai nasida ma na dihukum.

Diboto si Josep ma naung muba akka abangna i. Dang tartahan ni si Josep be perasaanna. Tangis ma ibana jala didok ma, ‘Si Josep do au. Mangolu dope bapa?’ Songgot ma roha ni akka abangna. Didok ma tu nasida, ‘Unang be ingot akka na diulahon hamu tu au. Debata do na manuru au tuson asa selamat hamu. Hatop, boan hamu ma bapa tuson.’

Mulak ma nasida lao paboahon hata ni si Josep i tu bapakna jala diboan ma bapakna tu Mesir. Ujungna, pajuppang ma muse si Josep dohot bapakna jala rap ma nasida.