Si Job, i ma sahalak bawa na burju na manomba Jahowa. Tinggal di kota Us do ibana. Mamora do ibana jala godang keluargana. Halak na burju do si Job. Diurupi ibana do na pogos, janda, dohot dakdanak na so adong be natua-tuana. Alai na gabe so adong do masalah na dihadapi si Job?

Di na so pamotoan ni si Job, sai diparrohahon Sibolis do ibana. Didok Jahowa ma tu Sibolis, ‘Diparrohahon ho do naposokku si Job? Dang adong jolma na songon ibana di tano on. Ditangihon ibana do Au jala diulahon do na denggan.’ Alai didok Sibolis ma tu Jahowa, ‘Ala na dipasu-pasu Ho do ibana jala dijaga Ho umbahen na dioloi si Job Ho. Dilehon Ho do tano dohot akka binatang tu ibana. Alai molo dibuat Ho i, pasti dang olo be ibana manomba Ho.’ Didok Jahowa ma, ‘Boi do ujionmu si Job, alai unang pamate ibana.’ Boasa dipaloas Jahowa Sibolis manguji si Job? Ala pos do roha ni Jahowa pasti setia do si Job.

Diuji Sibolis ma si Job. Dibahen ibana do susa si Job marhite piga-piga cara. Na parjolo, dibahen Sibolis ma halak Seba manakko akka lombu dohot keledai ni si Job. Dung i, ro ma api manutung sude domba ni si Job. Ro ma muse halak Kasdim manakko akka untana. Jala godang do parkarejona na dipamate. Dung i, adong ma bencana na massai ngeri. Tikki marpesta akka gelleng ni si Job, maruppak ma inganan i, gabe mate ma sude gellengna i. Massai lungun ma roha ni si Job. Alai, toktong do disomba ibana Jahowa.

Lomo do roha ni Sibolis asa tamba susa si Job. Dibahen ibana ma bisulon sude daging ni si Job. Pasti haccit do i dihilala ibana. Alai dang diboto si Job boasa masa i. Nang pe songon i, toktong do ibana manomba Jahowa. Diparrohahon Jahowa do i, jala las do rohana tu si Job.

Dung i, dipakke Sibolis ma tolu bawa manguji si Job. Didok nasida tu si Job, ‘Pasti na adong do dosa diulahon ho, alai ditabunihon ho i. Gabe dihukum Debata ma ho.’ Didok si Job ma, ‘Dang adong na sala na hubahen.’ Alai alani hata ni si tolu halak i, gabe dirippu ibana ma Jahowa do na mambahen ibana susa, jala didok ibana ma dang adil Jahowa.

Adong ma sahalak na poso na margoar si Elihu. Sai dibege ibana do pakkataion ni nasida. Didok ibana ma tu nasida, ‘Sala do sude hatamuna i. Dao do ussangap Jahowa sian jolma, jala dang hea diulahon Ibana na jahat. Diida Ibana do sude na tabahen jala diurupi do halak na marsitaonon.’

Dung i didok Jahowa ma tu si Job, ‘Didia do ho tikki hutoppa langit dohot tano on? Boasa didok ho dang adil au? Makkatai do ho, alai dang diattusi ho boasa masa on tu ho.’ Mangakku sala ma si Job. Didok ma, ‘Sala ma au. Nungnga hubege taringot Ho, alai saonari lam huboto ma taringot Ho. Dang adong na so tarbahen Ho. Sala ma au.’

Dung salpu sudena i, dibahen Jahowa ma si Job sehat muse. Jala dilehon Jahowa do muse arta unggodang sian na parjolo. Ganjang do umur ni si Job jala marlas ni roha do ibana. Sai ditangihon si Job do Jahowa nang pe susa ngoluna dibahen Sibolis. Alani i, dipasu-pasu Jahowa ma si Job. Olo do ho maniru si Job?

Di Mesir, digoari do keturunan ni si Jakkob halak Israel. Dung mate si Jakkob dohot si Josep, mamaretta ma raja na baru. Dang lomo roha ni raja on molo umgogo halak Israel sian halak Mesir. Alani i, disuru ma bangso Israel kerja paksa. Dipaksa do nasida karejo di ladang dohot mambahen batu bata. Alai nang pe songon i, lam godang do halak Israel. Alani i, disuru si Firaun ma asa dibunu sude anak ni halak Israel na baru tubu. Boi do dibayakkon ho songon dia perasaan ni halak Israel?

Adong ma sahalak borua halak Israel na margoar si Jokhebed manubuhon sada anak jala massai uli do rupa ni anakna i. Asa unang dibunu anakna i, dipamasuk si Jokhebed ma anakna i tu karanjang jala ditabunihon ma i di Sunge Nil. Adong do kakak ni poso-poso i na margoar si Miryam. Ibana ma na manjaga adekna i sian na dao.

Ro ma boru ni si Firaun lao maridi tu sunge i. Diida ibana ma karanjang i, jala adong poso-poso na tangis disi. Gabe asi ma rohana. Ro ma si Miryam mandapotton ibana. Didok ma, ‘Olo do ho molo hujou sahalak ina na boi manusui dakdanak on?’ Olo do boru ni si Firaun i. Diboan si Miryam ma omakna, i ma si Jokhebed. Didok boru ni si Firaun i ma tu si Jokhebed, ‘Boan ma dakdanak on, jala urus ma ibana. Hugaji pe ho.’

Dung balga dakdanak i, dilehon si Jokhebed ma ibana tu boru ni si Firaun. Dibahen ma goarna si Musa. Ala nungnga gabe anak ni boru ni si Firaun si Musa, boi do dipangido si Musa manang aha pe. Alai dang hea lupa si Musa tu Jahowa. Diboto  ibana do na halak Israel ibana, dang halak Mesir. Jadi dipillit si Musa do lao manomba Jahowa.

Tikki marumur 40 taon, diurupi si Musa do halak Israel. Tikki diida ibana adong halak Mesir na mamukkuli halak Israel, dipukkul ibana ma halak Mesir i sappe mate. Ditabunihon ma bakkena tu bagas pasir. Dung diboto si Firaun i, naeng dibunu ma si Musa. Alai lari do si Musa tu tano Midian. Sai dijaga Jahowa do ibana disi.