Di Midian do si Musa tinggal saleleng 40 taon. Disi ma ibana menikah jala marianakkon. Di sada tikki, lao ma ibana marmahan di jonok ni Dolok Sinai. Diida ibana ramba na marapi, alai dang matutung ramba i! Tikki manjonok ibana, adong ma soara sian ramba i. Didok ma, ‘Unang pajonok tuson Musa! Bukka ma solopmi, ai tano na badia do on.’ Jahowa do na mandok i marhite malaikat.

Ala mabiar si Musa, ditutup ibana ma bohina. Dung i didok Jahowa ma, ‘Nungnga huida be hasusaan ni bangso Israel. Selamattonokku nama nasida sian Mesir. Boanokku ma nasida tu inganan na massai denggan. Ho do na hupillit mamboan bangsokki kaluar sian Mesir.’ Pasti tarsonggot do si Musa mambege i.

Disukkun si Musa ma, ‘Molo disukkun nasida ise na manuru au, aha ma alussu?’ Dialusi Jahowa ma, ‘Paboa ma tu nasida, Jahowa Debata ni si Abraham, Debata ni si Isak, dohot Debata ni si Jakkob do na manuru ho.’ Dung i didok si Musa ma muse, ‘Boha ma molo dang ditangihon nasida au?’ Dibahen Jahowa ma tanda tu si Musa na patuduhon lao diurupi Jahowa do ibana. Disuru ma si Musa mangalempar tukkotna tu tano. Gabe ulok ma tukkotna i! Tikki ditiop si Musa ekor ni ulok i, mulak ma i muse gabe tukkot. Didok Jahowa ma, ‘On ma tanda na patuduhon Au do na manuru ho.’

Alai didok si Musa ma muse, ‘Dang malo au makkatai.’ Marjanji ma Jahowa tu ibana, ‘Hupaboa pe aha na lao sidokkononmu, jala husuru pe si Aron mangurupi ho.’ Ala pos roha ni si Musa na didongani Jahowa do ibana, diboan ma keluargana mulak muse tu Mesir.

Gabe budak do halak Israel di Mesir. Disuru Jahowa ma si Musa dohot si Aron lao mandok tu si Firaun, ‘Palua ma bangsokki, asa boi nasida manomba Au di padang gurun.’ Alai, ginjang do roha ni si Firaun. Didok ma, ‘Dang parduli au tu hata ni Jahowa, jala dang olo au paluahon halak Israel.’ Lam borat ma karejo ni halak Israel dibahen si Firaun. Diboto ho do aha na dibahen Jahowa? Dibahen ma Sappulu Tulah tu Mesir. Didok ma tu si Musa, ‘Dang ditangihon si Firaun hatakku. Marsogot, tu Sunge Nil do ibana. Juppangi ma ibana disi. Dokkon ma, ala dang dipaloas ho bangsokki lao, bahenokku ma Sunge Nil gabe mudar.’ Lao ma si Musa manjuppangi si Firaun. Diida si Firaun ma diattukkon si Aron tukkotna tu sunge i. Gabe mudar ma aek i, mate ma akka dekke, jala gabe bau ma sunge i. Dang boi be inumon aek i. Alai, tong do dang dipaloas si Firaun lao halak Israel.

Pitu ari dukkon i, disuru Jahowa ma muse si Musa lao mandok tu si Firaun, ‘Molo dang dipaloas ho bangsokki lao, bahenokku ma gok katak tu Mesir.’ Alai dang ditangihon si Firaun hata i. Diangkat si Aron ma tukkotna, dung i gabe godang ma katak di sude inganan di Mesir! Masuk ma katak i tu jabu ni nasida, tu podomanna, dohot tu piring ni nasida. Dipangido si Firaun tu si Musa asa dipaso Jahowa tulah i. Jala marjanji ma si Firaun paluaonna do halak Israel. Dipaso Jahowa ma tulah i, jala dipapungu halak Mesir ma katak na mate i. Gabe bau hian ma sude luat i. Alai, tong do dang dipaloas si Firaun halak Israel lao.

Dung i didok Jahowa ma tu si Musa, ‘Suru ma si Aron mamukkul tukkotna tu tano asa gabe rongit abu ni tano i.’ Gabe gok ma rongit di Mesir. Didok akka pelayanna ma tu si Firaun, ‘Tulah sian Debata do on.’ Alai, tong do dang dipaloas si Firaun halak Israel lao.