Dipaboa si Musa dohot si Aron ma hata ni Jahowa tu si Firaun, ‘Molo dang dipalua ho bangsokki, bahenokku ma godang lanok tu Mesir.’ Dung i, gok ma lanok masuk tu akka jabu ni halak Mesir. Alai dang adong lanok di kota Gosen inganan ni bangso Israel. Holan tu halak Mesir do terjadi tulah na paopatton sahat tu na parpudi. Dung i didok si Firaun ma, ‘Dok ma tu Jahowa asa dipamago akka lanok on, huloas pe bangso Israel lao.’ Alai, tikki dipamago Jahowa akka lanok i, dang diloas si Firaun halak Israel lao. Dang jora dope si Firaun.

Didok Jahowa ma, ‘Molo dang dipaloas si Firaun bangsokki lao, bahenokku ma marsahit akka pinahan ni halak Mesir jala mate.’ Tutu do terjadi songon i marsogotna i. Alai molo pinahan ni bangso Israel dang adong na mate. Nang pe songon i, tong do jugul si Firaun.

Dung i, disuru Jahowa ma muse si Musa manjuppangi si Firaun. Dibuat ma abu laos disappatton tu ginjang. Habang ma abu i tu sude daerah na di Mesir. Gabe bisulon ma halak Mesir dohot akka pinahan ni nasida. Alai nang pe songon i, tong do dang dipaloas si Firaun bangso Israel lao.

Disuru Jahowa ma muse si Musa manjuppangi si Firaun. Dipaboa ma hata ni Jahowa na mandok, ‘Toktong dope dang dipaloas ho bangsokki lao? Marsogot, hubahen nama udan es tu luat on.’ Marsogotna i, ro ma udan es, ronggur, dohot api. Dang hea dope diida halak Mesir na songon i. Sega ma sude suan-suanan ni nasida. Alai dang terjadi on di Gosen. Didok si Firaun ma, ‘Dok ma tu Jahowa asa dipaso udan es on! Dung i lao ma hamu.’ Hape dung so udan es i, tong do dang dipaloas si Firaun bangso Israel lao.

Didok si Musa ma, ‘Ro nama belalang mangallang suan-suanan na so sega dibahen udan es.’ Ro ma marjuta belalang mangallang sude suan-suanan dohot buah-buahan di ladang. Didok si Firaun ma muse, ‘Dok ma tu Jahowa asa dipalao belalang on.’ Alai dung dipalao Jahowa belalang i, tong do jugul si Firaun.

Didok Jahowa ma tu si Musa, ‘Angkat ma tukkotmi arah tu langit.’ Toppu ma golap sude luat na di Mesir. Saleleng tolu ari, golap ma sude inganan ni halak Mesir, alai tiur do inganan ni halak Israel.

Dung i didok si Firaun ma tu si Musa, ‘Lao ma hamu, alai tinggalhon ma pinahanmuna dison.’ Alai didok si Musa ma, ‘Ikkon boanonnami do pinahan i, asa adong persembahannami tu Debata.’ Muruk ma si Firaun. Gogo ma soarana mandok, ‘Lao ho sian on! Molo ro muse ho, pamateonku ma ho.’

Nungnga didok si Musa tu si Firaun dang na lao ro be ibana manjuppangi si Firaun. Alai sebelum lao si Musa, didok ibana ma tu si Firaun, ‘Annon tonga borngin, mate ma sude anak siakkangan ni halak Mesir.’

Disuru Jahowa ma bangso Israel asa dibahen sipanganon na berbeda sian na biasa diallang nasida. Didok Jahowa ma, ‘Seat ma sada domba manang sada hambing jantan na marumur sataon. Dung i, daisson ma mudarna tu pintu ni jabumuna. Panggang ma jagalna jala allang hamu ma i dohot roti na so marragi. Pakke ma solopmuna, jala siap-siap ma hamu. Borngin on, selamattonokku ma hamu.’ Bayakkon ma songon dia las ni roha ni bangso Israel!

Di tonga borngin, ro ma malaikat ni Jahowa tu sude jabu ni halak Mesir. Molo dang adong mudar di pintu ni sada jabu, dibunu malaikat i ma anak siakkangan ni parjabu i. Alai molo adong mudar di pintu i, dilewati malaikat i ma jabu i. Sude do mate anak siakkangan ni halak Mesir, dang soal na mora manang na pogos. Alai molo anak ni halak Israel dang adong na mate.

Mate do anak siakkangan ni si Firaun. Ala dang tartaonna be, didok ma tu si Musa dohot tu si Aron, ‘Lao ma hamu. Somba hamu ma Debatamuna i. Jala boan hamu ma akka pinahanmuna i!’

Kaluar ma bangso Israel sian Mesir, jala bulan purnama do di tikki i. Mardalan ma nasida rap dohot keluarga manang dongan samargana be. Adong ma 600.000 bawa ni halak Israel, jala godang do borua dohot gelleng ni nasida. Adong do halak sian bangso na asing na rap dohot nasida manomba Jahowa. Ujungna, selamat ma bangso Israel!

Ganup taon, sai diallang nasida do sipanganon songon na diallang nasida di ari i. On gabe parningotan di nasida naung diselamatton Jahowa nasida. Digoari ma on, ari Paska.