Didok Jahowa ma tu si Musa, ‘Nakkok ma ho tu dolok asa husurat patikki di dua batu na lao lehonokku tu ho.’ Nakkok ma si Musa tu dolok jala disi ma ibana saleleng 40 ari 40 borngin. Disuratton Jahowa ma Patik na Sappulu di dua batu, dung i dilehon ma tu si Musa.

Ninna roha ni halak Israel, nungnga ditinggalhon si Musa be nasida. Didok ma tu si Aron, ‘Ikkon adong do sasahalak na mamimpin hami. Bahen ma debata di hami!’ Didok si Aron ma tu nasida, ‘Lehon hamu ma mas na dipakkemuna i tu au.’ Dibahen si Aron ma patung anak ni lombu sian mas. Didok bangso i ma, ‘Patung on ma Debata na mamboan hita kaluar sian Mesir!’ Disomba nasida ma patung i, jala dipestahon ma i. Denggan do na diulahon nasida i? Daong. Alana, nungnga marjanji nasida holan Jahowa do na disomba nasida.

Diida Jahowa do i jala didok ma tu si Musa, ‘Turun ma ho. Dang diulahon nasida be na huparettahon i. Nungnga disomba nasida debata na asing.’ Turun ma si Musa mamboan dua batu na marisi patik.

Dung jonok tu perkemahan i, dibege si Musa ma nasida marendei. Manortori ma nasida huhut manomba patung i. Muruk situtu ma si Musa. Alani murukna, disappatton ma dua batu na marisi patik i tu tano jala gabe puttar ma i. Pittor dihancurhon ibana ma patung i. Disukkun ma tu si Aron, ‘Boasa olo ho disuru nasida mangulahon na sala?’ Dialusi si Aron ma, ‘Unang ma muruk ho. Diboto ho do songon dia nasida. Nasida do na manuru au mambahen debata di nasida. Alani i, hututung ma mas ni nasida jala gabe adong ma patung lombu on.’ Sasittongna, dang ikkon dioloi si Aron pangidoan ni bangso Israel i. Dung i, nakkok ma muse si Musa tu dolok. Dipangido ma tu Jahowa asa diampuni Ibana bangso i.

Olo do Jahowa mengampuni akka halak na mangoloi Ibana. Boi do diattusi ho saonari boasa ikkon dioloi halak Israel si Musa na gabe pamimpin ni nasida?

Tikki di Dolok Sinai si Musa, disuru Jahowa ma ibana mambahen kemah na digoari tabernakel. Tabernakel, i ma inganan ni bangso Israel lao manomba Jahowa. Boi do diboan marpinda-pinda tabernakel on.

Didok Jahowa ma, ‘Pangido ma tu bangso i asa dilehon nasida akka na porlu lao mambahen tabernakel.’ Dilehon halak Israel ma mas, perak, tombaga, batu na arga, dohot perhiasan. Dilehon ma muse bonang wol, linen, kulit ni binatang, dohot akka na asing. Alani godangna, didok si Musa ma, ‘Unang be lehon hamu. Nungnga sae be i.’

Godang do muse bawa dohot borua na malo dohot mangurupi mambahen tabernakel. Diurupi Jahowa do nasida asa lam malo mangulahon i. Adong na mambahen bonang, abit, dohot manulam. Na asing mamasang batu, mambahen barang sian mas, dohot mamahat hau.

Dibahen nasida do tabernakel i pas songon na dipangido Jahowa. Dibahen ma tirai na bagak lao mambahen batas antara Ruang Kudus (Inganan na Badia) dohot Ruang Maha Kudus (Inganan na Massai Badia). Di Ruang Maha Kudus, adong tabut parjanjian na dibahen sian hau akasia dohot sian mas. Di Ruang Kudus, adong inganan ni lampu na sian mas, meja, dohot mezbah lao manutung dupa. Di halamanna, adong bak na sian tombaga dohot mezbah na balga. Tabut parjanjian i dibahen lao paingotton halak Israel tu janji ni nasida asa unduk tu Jahowa.

Dipillit Jahowa ma si Aron dohot akka anakna gabe malim. Nasida ma na melayani di tabernakel. Ikkon diurus nasida do tabernakel i, jala nasida do na mangalehon persembahan tu Jahowa. Ala si Aron do sintua ni malim, holan ibana ma na boi masuk tu Ruang Maha Kudus. Sahali sataon do ibana masuk tusi. Disi ma ibana mangalehon persembahan asa disesa Jahowa dosana, dosa ni keluargana, dohot dosa ni bangso Israel.

Dung sataon halak Israel kaluar sian Mesir, sae ma tabernakel i dibahen nasida. Gabe adong ma inganan ni nasida manomba Jahowa.

Las do roha ni Jahowa mangida tabernakel i. Dibahen Jahowa ma awan di ginjang ni tabernakel i. Molo adong awan i, toktong ma halak Israel markemah disi. Alai molo nakkok do awan i, pinda ma halak Israel tu inganan na asing. Dibongkar nasida ma tabernakel i jala diihutton nasida ma awan i.