Pinda ma halak Israel sian Dolok Sinai. Dilewati nasida do Gurun Elaparan lao tu Kades. Tikki di Kades, didok Jahowa ma tu si Musa, ‘Suru ma 12 bawa sian ganup marga gabe mata-mata tu tano Kanaan, i ma tano na lao hulehon tu bangso Israel.’ Dipillit si Musa ma 12 bawa. Didok ma tu nasida, ‘Lao ma hamu tu Kanaan, ida hamu ma subur do tano disi manang na dang. Ida hamu ma gogo do jolma disi manang na dang. Ida ma muse di kemah-kemah do nasida tinggal manang di kota.’ Dung i, lao ma 12 mata-mata i, termasuk ma si Josua dohot si Kaleb tu Kanaan.

Dukkon 40 ari, mulak ma nasida sian Kanaan. Diboan nasida ma buah ara, delima, dohot anggur. Didok mata-mata i ma, ‘Subur do tano disi jala gogo do halak disi. Tinggal di kota do nasida jala timbo tembokna.’ Alai didok si Kaleb ma, ‘Boi do tataluhon nasida. Beta ma hita tusi!’ Boasa barani si Kaleb mandok songon i? Ala porsea do ibana dohot si Josua tu Jahowa. Alai sappulu mata-mata na asing mandok, ‘Unang lao hita tusi! Balga-balga do halak i songon raksasa! Hira belalang do hita di nasida.’

Gabe mabiar ma halak Israel jala marungut-ungut ma nasida. Didok ma, ‘Tapillit ma pamimpin baru, asa mulak hita tu Mesir. Mate do hita molo dison!’ Didok si Josua dohot si Kaleb ma, ‘Ikkon unduk do hita tu Jahowa, unang mabiar. Pasti urupanna do hita.’ Alai dang olo halak Israel manangihon. Gariada, naeng dipamate nasida do si Josua dohot si Kaleb!

Aha ma na diulahon Jahowa? Didok ma tu si Musa, ‘Nungnga godang na hubahen tu bangso on, alai tong dope nasida dang unduk tu Au. Alani i, di padang belantara ma nasida saleleng 40 taon. Mate dison nama nasida. Holan gelleng ni nasida, si Kaleb, dohot si Josua do na boi masuk tu tano na hujanjihon i.’

Tikki di padang belantara dope halak Israel, mangalo do si Kora, si Datan, si Abiram, dohot 250 halak na asing tu si Musa. Didok nasida ma tu si Musa, ‘Dang tahan be hami mangida hamu! Boasa ikkon ho na mamimpin hami jala boasa si Aron na gabe sintua ni malim? Dang holan hamu na didongani Jahowa, hami pe didongani do.’ Dang lomo roha ni Jahowa dibahen nasida songon i. Sarupa na mangalo tu Jahowa do nasida disi!

Didok si Musa ma tu si Kora dohot tu akka pendukung ni si Kora, ‘Marsogot, ro ma hamu tu tabernakel. Boan ma dupa asa dipatudu Jahowa ise na dipillit Ibana.’

Marsogotna i, ro ma si Kora dohot 250 halak manjuppangi si Musa di tabernakel. Ditutung nasida ma dupa songon na dibahen akka malim. Didok Jahowa ma tu si Musa dohot tu si Aron, ‘Mandao ma hamu sian si Kora dohot akka donganna i.’

Ro ma si Kora tu tabernakel. Alai, dang olo si Datan, si Abiram, dohot keluarga ni nasida ro tusi. Disuru Jahowa ma halak Israel asa mandao sian kemah ni si Kora, si Datan, dohot si Abiram. Alani i, mandao ma nasida. Di tikki i, jongjong do si Datan, si Abiram, dohot keluarga ni nasida di luar ni kemah i. Toppu ma bola dua tano i jala diboddut ma nasida! Ro ma muse api tu tabernakel. Ditutung habis ma si Kora dohot na 250 halak i.

Dung i didok Jahowa ma tu si Musa, ‘Buat ma tukkot ni ganup pamimpin ni marga i. Suratton ma goar ni nasida disi. Alai di tukkot ni marga Lepi, surat ma goar ni si Aron. Peakkon ma sude tukkot i di tabernakel. Tukkot ni ise na marbunga, ibana ma na hupillit.’

Marsogotna i, dipakaluar si Musa ma sude tukkot i. Dipatudu ma i tu sude pamimpin. Alai, holan tukkot ni si Aron do na marbunga jala adong buah almond di tukkotna i. On patuduhon na dipillit Jahowa do si Aron gabe sintua ni malim.