Tikki lao mata-mata ni bangso Israel tu kota Jeriko, di jabu ni si Rahab do nasida marborngin. Diboto raja ni Jeriko ma i jala disuru ma tentarana tu jabu ni si Rahab. Alai, nungnga ditabunihon si Rahab dua mata-mata i di atap ni jabuna. Disuru ibana ma tentara i asa mangalului tu inganan na asing. Dung lao akka tentara i, didok si Rahab ma tu mata-mata i, ‘Huboto do na didongani Jahowa hamu. Alani i do huurupi hamu. Jala huboto do na lao lehononna tano on tu hamu. Marjanji ma hamu tu au na lao diselamatton hamu do keluargakku.’

Didok mata-mata i ma tu si Rahab, ‘Marjanji do hami, selamat do sude halak na adong di jabu on.’ Didok nasida ma muse, ‘Asa selamat keluargam, ikkat ma tali na merah on di jandela ni jabumon.’

Disuru si Rahab ma mata-mata i turun sian jandela mamakke tali i. Lao ma nasida martabuni tu dolok-dolok. Disi ma nasida saleleng tolu ari. Dung i mulak ma muse nasida tu si Josua. Dilewati nasida ma Sunge Jordan jala siap-siap ma nasida lao mambuat tano i. Kota Jeriko ma na parjolo ditaluhon nasida. Didok Jahowa ma tu nasida asa marbaris makkalilingi kota i. Dikalilingi nasida ma i sahali sadari saleleng onom ari. Di ari na papituhon, pitu hali ma nasida makkalilingi kota i. Dung i, martarompet ma akka malim jala gogo ma akka tentara i marsurak. Gabe hancur ma tembok ni kota i! Alai, dang hancur jabu ni si Rahab, hape di tembok i do jabuna. Selamat do si Rahab dohot keluargana ala porsea tu Jahowa.

Nungnga tarbarita taringot na masa di Jeriko tu akka bangso na asing di Kanaan. Marsada ma nasida lao mangalo halak Israel. Alai asing do molo rencana ni halak Gibeon. Dijuppangi nasida ma si Josua jala dipakke ma baju na maribak-ribak. Didok nasida ma tu si Josua, ‘Sian huta na dao do hami. Nungnga dibege hami taringot Jahowa dohot akka na dibahen Ibana tu halak Mesir dohot tu halak Moab. Marjanji ma hamu asa unang pamatehon hami, olo do hami gabe budakmuna.’

Porsea do si Josua tu nasida jala marjanji ma ibana. Alai tolu ari dukkon i, diboto ibana ma jonok do hape huta ni nasida. Sian tano Kanaan do nasida. Disukkun ibana ma halak Gibeon, ‘Boasa margabus hamu?’ Dialusi nasida ma, ‘Na mabiar do hami! Diboto hami do na diurupi Jahowa hamu. Unang ma pamate hami.’ Diingot si Josua do janjina jala dang dipamate nasida.

Dang sadia leleng, ro ma lima raja ni Kanaan mangancam halak Gibeon. Dung i mardalan ma si Josua dohot akka tentarana saleleng saborngin lao menyelamatton halak Gibeon. Manogotna i, marporang ma nasida mangalo halak Kanaan. Lari ma halak Kanaan, alai dibahen Jahowa ma udan batu es na balga tu nasida. Dung i, dipangido si Josua ma tu Jahowa asa unang bonom jo mataniari. Boasa boi pos rohana na boi so mataniari, hape dang hea dope masa na songon i? Ala porsea do si Josua tu Jahowa. Tutu ma, dang bonom mataniari di tikki i sahat tu na talu akka raja ni Kanaan i.