Sukkun-Sukkun Sian na Manjaha

Holan pamarettaon ni jolma do na dimaksud di Parjamita 5:8, manang dohot do Jahowa?

Di ayat i didok, “Unang ma longang roham molo diida ho parhuaso manindas na pogos jala ditabunihon keadilan tu nasida, jala diagohon haknasida. Ganup pegawai [diawasi, NW] kapalana do, jala angka nasida [diawasi, NW] kapala na tumimbo.”​—Pjm. 5:8, Bibel siganup ari.

Memang sian sudut pandang ni jolma, na dipaboa di ayat i holan taringot tu akka halak na marhuaso di sada pamarettaon. Alai sasittongna dipaboa do muse di ayat i, hasittongan taringot Jahowa na boi mangapuli jala paposson rohatta.

Di Parjamita 5:8 dipaboa do taringot sahalak parhuaso na manindas halak na pogos jala dang adil tu nasida. Ikkon diingot parhuaso i do, adong do halak na mangawasi ibana, na untimbo jabatanna sian ibana. Alai adong dope na untimbo jabatanna sian na mangawasi i. Sude do parhuaso on dang adil tu jolma. Gabe susa do akka halak ala ketidakadilan na dibahen nasida.

Alai nang pe songon i situasina, tarapul do rohatta ala taboto diawasi Jahowa do sude parhuaso, tarmasuk parhuaso na untimbo jabatanna di pamarettaon ni jolma. Alani i, tapangido ma tu Debata asa diurupi hita jala tapasahat ma holso ni rohatta tu Ibana. (Ps. 55:23; Plp. 4:6, 7) Pos ma rohatta “tongtong do ditatap Jahowa sude portibi on, asa lehononNa pangurupion tu angka na marhaposan tu Ibana”.​—2 Kron. 16:9, Bibel siganup ari.

Jadi sian Parjamita 5:8 taboto ma, di pamarettaon ni jolma sai adong dope halak na untimbo jabatanna sian halak na asing. Alai na uppetting sian ayat on, Jahowa do parhuaso na paling timbo sian sasudena. Nungnga mamaretta Ibana saonari, jala Jesus Kristus Anakna ma na gabe Raja di Harajaonna. Diawasi Jahowa dohot Jesus do sudena jala adil do nasida.