1. Aha do na boi taboto sian surirang na adong di Bibel?

AHA DO na lao masa tu akka naposo ni Jahowa? Marhite surirang na adong di Bibel, boi do taboto aha do na lao masa tu hita satokkin nai. Adong do sada surirang na paboahon aha do na lao ulahonon ni akka parhuaso di tano on. Disurat do i di Daniel 11. Dipaboa do disi adong dua raja na marporang. I ma raja utara dohot raja selatan. Nungnga masa be deba sian surirang i. Alani i, pos do rohatta molo haduan pasti do masa sude isi ni surirang i.

2. Songon na dipaboa di 1 Musa 3:15, Pangungkapon 11:7 dohot 12:17, aha do na ikkon taingot tikki mamparsiajari surirang ni si Daniel?

² Asa boi taattusi surirang na disurat di Daniel 11, ikkon taingot do molo surirang i mangulas holan taringot akka pamarettaon na mangalo naposo ni Debata. Memang otik do naposo ni Debata dibandingkon godang ni akka halak di portibi on. Alai nasida do na umjotjot dialo akka pamarettaon i. Boasa? Alana holan sada do tujuan ni Sibolis dohot pamarettaonna, i ma lao mambunu akka halak na manomba Jahowa jala mangihutton Jesus. (Jaha 1 Musa 3:15 dohot Pangungkapon 11:7; 12:17.) Asing ni i, ikkon sadalan do surirang ni si Daniel on tu akka surirang na asing na disurat di Bibel. Jadi asa lam takkas taattusi surirang ni si Daniel on, porlu do tabandingkon i tu akka ayat na asing na adong di Bibel.

3. Aha do na lao taulas di parsiajaran on dohot di parsiajaran na mangihut?

³ Saonari, taulas ma taringot Daniel 11:25-39. Taida ma ise do na gabe raja utara dohot raja selatan sian taon 1870 sahat tu 1991. Jala taida ma boasa adong na ikkon tapauba sian pangattusionta taringot surirang i. Di parsiajaran na mangihut, taulas ma taringot Daniel 11:40–12:1. Jala taida ma bagian dia do sian surirang i na digohi sian taon 1990-an sahat tu Armagedon. Huhut taulas dua parsiajaran on, boi do taida bagan “Dua Raja na Bersaing di Ari Parpudi” asa lam takkas taattusi surirang i. Alai na parjolo, porlu do taboto ise do dua raja na dipaboa di surirang i.

SONGON DIA DO ASA BOI TABOTO ISE RAJA UTARA DOHOT RAJA SELATAN

4. Aha do tolu na ikkon taingot asa taboto ise do raja utara dohot raja selatan i?

⁴ Molo najolo, ‘raja utara’ i manggombarhon parhuaso na adong di sabola utara ni Israel. Jala ‘raja selatan’ manggombarhon parhuaso di sabola selatan ni Israel. Boasa boi tadok songon i? Parrohahon ma na didok suru-suruan na paboahon surirang i tu si Daniel. Didok ibana do, “Ro pe ahu nuaeng, naeng mangajari ho do taringot tu na masa sogot, di ujung ni angka ari tu bangsom.” (Dan. 10:14) Andorang so Pentakosta 33 M, halak Israel dope na gabe bangso ni Debata. Alai dung ari Pentakosta, dipillit Jahowa ma akka sisean ni Jesus gabe bangsona. Alani i, surirang na dipaboa si Daniel di bindu 11 i godangan mangulas taringot halak Kristen do, dang na taringot halak Israel najolo. (Ul. 2:1-4; Rom 9:6-8; Gal. 6:15, 16) Jala sian tikki tu tikki, marganti-ganti do ise na gabe raja utara dohot raja selatan on. Alai adong do na sarupa sian nasida. Na parjolo, dianiaya nasida do godang naposo ni Debata na tading di luat na dirajai nasida. Na paduahon, sian pambahenan ni nasida tu naposo ni Debata, tarida do sogo rohana tu Debata na sittong, i ma Jahowa. Jala na patoluhon, na bersaing do na dua raja i asa gabe na umgogo.

5. Adong do raja utara dohot raja selatan di abad 2 sahat tu ujung ni abad 19 M? Patorang ma.

⁵ Saleleng abad 2 M, gabe lam otik do halak Kristen, alana lam godang do halak Kristen na so sittong. Diajarhon nasida do akka ajaran na palsu, jala ditabunihon nasida do akka ajaran na sittong na sian Bibel. Mulai sian i sahat tu ujung ni abad 19, dang adong punguan ni naposo ni Debata di tano on. Lam godang do halak Kristen na so sittong, jala gabe maol ma mamboto ise do halak Kristen na sittong. (Mat. 13:36-43) Boasa porlu taboto on? Alana on patuduhon molo surirang taringot raja utara dohot raja selatan i dang marlakku di abad 2 sahat tu abad 19 M. Alana tikki i dang adong dope naposo ni Debata na mambahen sada punguan.b Alai boi ma tadok, mulai ma tarida muse raja utara dohot raja selatan i di ujung ni abad 19. Sian dia taboto i?

6. Andigan do punguan ni naposo ni Debata mulai tarida muse? Patorang ma.

⁶ Mulai sian taon 1870, dibahen akka naposo ni Debata ma sada punguan. Rap ma si Charles T. Russell dohot akka donganna mambahen punguan lao mamparsiajari Bibel. Nasida ma na manggohi surirang taringot suruan na ‘paradehon dalan’ andorang so dipajongjong Harajaon ni Debata. (Mal. 3:1, Bibel siganup ari) Di tikki i, mulai ma boi tarida ise do akka halak na manomba Jahowa! Adong do pamarettaon na mangalo akka naposo ni Debata on? Taida ma piga-piga buktina.

ISE DO RAJA SELATAN?

7. Ise do na gabe raja selatan sahat tu Porang Dunia I?

⁷ Taon 1870, Inggris do pamarettaon na umbalga jala na umgogo pasukan militerna di liat portibi on. Digombarhon do ibana songon tanduk na metmet na manaluhon tolu tanduk na asing, i ma Prancis, Spanyol, dohot Belanda. (Dan. 7:7, 8) Inggris ma na gabe raja selatan sahat tu Porang Dunia I. Di tikki i, Amerika Serikat do negara na umgogo di bidang ekonomi. Jala kerjasama do ibana dohot Inggris.

8. Ise do na gabe raja selatan saleleng ari parpudi?

⁸ Saleleng Porang Dunia I, marsada ma Inggris dohot Amerika lao mambahen pasukan militer na umgogo. Mulai sian i ma, nasida gabe Kuasa Dunia Inggris-Amerika. Songon naung disurirangkon si Daniel, rap do nasida paradehon ‘tentara na mansai godang’ jala massai gogo. (Dan. 11:25, Bibel siganup ari) Saleleng ari parpudi, Inggris-Amerika ma na gabe raja selatan.c Molo songon i, ise ma na gabe raja utara?

ISE DO RAJA UTARA?

9. Andigan do mulai tarida muse raja utara, jala songon dia Daniel 11:25 digohi?

⁹ Taon 1871, tikki dibahen si Russell dohot akka donganna punguan Parsiajar Bibel, mulai ma tarida muse raja utara i. Di taon i, marsitutu ma si Otto von Bismarck pasadahon piga-piga luat jala mambahen sada negara na digoari Jerman. Raja Prusia Wilhelm I ma na gabe rajana, jala dipillit ibana ma si Bismarck lao gabe penasehat.d Dung marpulu taon, gabe lam balga do huaso ni Jerman on. Jerman do na mangarajai akka negara di Afrika dohot Samudera Pasifik. Jala marsitutu do Jerman on lao mangalo Inggris. (Jaha Daniel 11:25.) Pasukan militer ni Jerman on ma na umgogo nomor dua di liat portibi on. On ma na dipakke Jerman lao mangalo akka musuna tikki Porang Dunia I.

10. Songon dia Daniel 11:25b, 26 digohi?

¹⁰ Dung i dipaboa si Daniel do aha na lao masa tu Jerman dohot pasukan militerna. Didok do di surirang i, molo raja utara i “ndang boi martahan.” Boasa? “Ai sangkap jehejehe disangkapi nasida dompak ibana. Gari halak na manganhon indahanna padapot ibana.” (Dan. 11:25b, 26a) Di tikki ni si Daniel, akka ‘halak na manganhon indahan ni raja’, i ma akka pejabat na ‘marhobas dijolo ni raja’. (Dan. 1:5, Bibel siganup ari) Jadi manggombarhon ise do on? On manggombarhon akka pejabat na adong di pamarettaon ni Jerman, i ma akka jenderal dohot penasehat militerna. Nasida do na mambahen gabe mago huaso ni raja i dohot pamarettaonna.e Jala dipaboa do di surirang i, songon dia hasil ni parporangon ni raja utara i dohot raja selatan. Didok do taringot raja utara, “Godang ma tentarana hona bunu, gabe apushononna ma sude tentarana na torop i.” (Dan. 11:26b, Bibel siganup ari) Dos songon naung disurirangkon i, di tikki porang dunia na parjolo, talu ma tentara ni Jerman. Jala godang ma akka halak “na hona bunu”. Dang hea dope songon i godang ni halak na mate alani porang.

11. Songon na disurat di Daniel 11:27-30, aha do na diulahon raja utara dohot raja selatan?

¹¹ Di Daniel 11:27, 28, dipaboa do aha na masa andorang so Porang Dunia I. Didok do molo raja utara dohot raja selatan ‘rap di sada meja mangkatahon gabus’. Jala didok do raja utara i mamboan ‘arta na mansai godang’. Tutu do on masa. Didok Jerman dohot Inggris do molo nasida naeng mardame, alai gabus do sude hatana i. Alana gabe masa do porang taon 1914. Asing ni i, saleleng marpulu taon andorang so masa porang, lam mamora do negara Jerman. Ibana do negara na ummora nomor dua di liat portibi on. Dung i, songon na dipaboa di Daniel 11:29 dohot 30a, hehe ma Jerman lao mangalo raja selatan. Alai talu do ibana.

DIALO NASIDA DO NAPOSO NI DEBATA

12. Aha do na diulahon raja utara dohot raja selatan tikki porang dunia na parjolo?

¹² Sian 1914, sai marporang do na dua raja on. Jala dialo nasida do naposo ni Debata. Misalna, di Porang Dunia I dianiaya pamaretta Jerman dohot Inggris do akka naposo ni Debata ala dang olo dohot marporang. Jala dipenjarahon pamaretta ni Amerika Serikat do manang ise na dohot di ulaon marbarita. Akka penganiayaan on patuduhon na tutu do masa surirang na disurat di Pangungkapon 11:7-10.

13. Aha ma na diulahon raja utara di taon 1930-an dohot saleleng Porang Dunia II?

¹³ Dung i di taon 1930-an, tarlumobi tikki masa Porang Dunia II, kejam situtu do cara ni raja utara on lao menganiaya naposo ni Debata. Tikki i, Nazi do na mangarajai Jerman. Diorai si Hitler dohot anggotana ma ulaon marbarita. Jala dibunu nasida ma marratus Sitindangi Ni Jahowa, jala marribu na dikirim tu kamp konsentrasi. Nungnga disurirangkon si Daniel hian i. Didok di surirang i, ro ma raja utara “mangaramuni Bagas Joro”, jala mangorai “pasahathon pelean siganup ari”. Lapatanna, diorai nasida do ulaon marbarita na uli. (Dan. 11:30b, 31a, Bibel siganup ari) Jala marjanji do si Hitler pamimpin ni nasida, lao mambunu sude Sitindangi Ni Jahowa na adong di Jerman.

HEHE MA RAJA UTARA NA BARU

14. Dung sae Porang Dunia na paduahon, ise ma na gabe raja utara? Patorang ma.

¹⁴ Dung sae Porang Dunia II, Uni Soviet ma na gabe raja utara. Dirajai ibana akka luat na hea dirajai Jerman. Songon Nazi najolo, Uni Soviet on pe tong do menganiaya akka naposo ni Debata.

15. Aha do na diulahon raja utara i dung sae Porang Dunia II?

¹⁵ Dang sadia leleng dung sae Porang Dunia II, hehe ma raja utara, i ma Uni Soviet dohot sekutuna lao mangalo naposo ni Debata. Songon na disurat di Pangungkapon 12:15-17, diorai raja on ma ulaonta marbarita. Jala dikirim ma marribu Sitindangi Ni Jahowa tu pengasingan. Saleleng ari parpudi, sai torus do raja utara on menganiaya Sitindangi Ni Jahowa. Alai, dang boi marhasil nasida pasohon ulaon ni naposo ni Debata.f

16. Songon dia Uni Soviet manggohi surirang na disurat di Daniel 11:37-39?

¹⁶ Jaha Daniel 11:37-39. Tutu ma digohi surirang i. Dipatudu raja utara i do, dang parduli ibana tu “debata ni angka ompuna”. Marsakkap do Uni Soviet lao mangaripasson akka agama. Marsitutu do ibana asa unang be marhuaso organisasi ni agama di luat i. Alani i mulai sian taon 1918, dibahen pamaretta Uni Soviet ma asa akka sikkola mangajarhon dang adong Debata. Songon dia do raja utara i pasangappon “debata ni [akka benteng] di huta”? Dipakke Uni Soviet ma godang hepeng lao mambahen lam gogo muse pasukan militerna. Jala dibahen do marribu sinjata nuklir asa lam balga huasona. Ala godang do sinjata ni raja utara dohot raja selatan on, boi do nasida mambunu marmiliar halak di portibi on!

MARMUSU ALAI KERJA SAMA

17. Aha do “ulaon na dihagigihon Debata na mambahen hancur”?

¹⁷ Hea do raja utara on kerja sama dohot raja selatan. Rap do nasida mambahen “ulaon na dihagigihon Debata na mambahen hancur”. (Dan. 11:31, Terjemahan Dunia Baru) “Ulaon na dihagigihon Debata” i, i ma Perserikatan Bangsa-Bangsa manang PBB.

18. Boasa didok PBB i “ulaon na dihagigihon Debata”?

¹⁸ Didok do PBB i “ulaon na dihagigihon Debata”. Alana marsitutu do nasida mambahen asa dame portibi on, hape holan Harajaon ni Debata do na boi mangulahon i. Jala didok do ulaon i mambahen hancur. Alana, PBB on do haduan na lao mangaripasson sude agama palsu.​—Ida bagan “Dua Raja na Bersaing di Ari Parpudi”.

BOASA PORLU TABOTO SEJARAH ON?

19-20. (a) Boasa porlu taboto taringot sejarah on? (b) Sukkun-sukkun aha do na lao taulas di parsiajaran na mangihut?

¹⁹ Porlu do taboto taringot sejarah on, alana on do bukti na digohi do surirang ni si Daniel taringot raja utara dohot raja selatan di taon 1870 sahat tu 1990-an. Jadi, pos do rohatta haduan pe pasti do saut sude isi ni surirang i.

²⁰ Di taon 1991, dabu ma pamarettaon Uni Soviet. Molo songon i, ise do raja utara di tikkinta saonari? Taulas ma i di parsiajaran na mangihut.

1-2. Aha do na lao taulas di parsiajaran on?

LAM GODANG do bukti na patuduhon molo hita mangolu di ari parpudi. Satokkin nai, ripassonon ni Jahowa dohot Jesus ma akka pamarettaon na mangalo Harajaon ni Debata. Alai andorang so i, toktong dope marporang raja utara dohot raja selatan, jala dialo nasida do naposo ni Debata.

² Di parsiajaran on, taulas ma taringot surirang na disurat di Daniel 11:40–12:1. Lao taboto ma, ise do raja utara di tikkinta saonari, jala boasa boi pos rohatta sai jagaon ni Jahowa do hita manang aha pe na masa.

RAJA UTARA NA BARU

3-4. Ise do na gabe raja utara di tikkinta saonari? Patorang ma.

³ Dung tarbagi pamarettaon ni Uni Soviet taon 1991, dihilala akka naposo ni Debata ma saotik pangurupion, i ma tikki nungnga bebas nasida. (Dan. 11:34) Hasilna, gabe ummura ma nasida marbarita, jala adong marratus ribu Sitindangi na tamba di akka negara na hea margabung tu Uni Soviet najolo. Ujungna, Rusia dohot sekutuna ma na gabe raja utara. Songon naung taulas di parsiajaran sebelumna, adong do tolu na diulahon sada pamarettaon na patuduhon molo pamarettaon i nungnga gabe raja utara manang raja selatan: (1) pamarettaon i mambahen keputusan na mambahen susa naposo ni Debata, (2) sian pambahenan ni nasida i tarida do na marmusu nasida tu Jahowa dohot tu akka naposona, jala (3) bersaing do nasida.

⁴ Adong do alasanna boasa boi tadok Rusia dohot sekutuna do na gabe raja utara di tikkinta saonari. (1) Dibahen nasida do susa akka naposo ni Debata, diorai nasida do ulaon marbarita, jala dianiaya do marratus ribu akka donganta na tading disi. (2) Sian ulaon ni nasida i, tarida ma na sogo rohana tu Jahowa dohot tu naposona. (3) Bersaing do ibana dohot raja selatan, i ma Inggris-Amerika. Saonari taida ma, akka aha do naung diulahon Rusia on, na patuduhon ibana nungnga gabe raja utara.

BERSAING DO RAJA UTARA DOHOT RAJA SELATAN

5. Aha do na diulas di Daniel 11:40-43?

⁵ Jaha Daniel 11:40-43. Ayat on manurat taringot akka na lao masa di ari parpudi. Di ayat on, diulas do taringot parporangan ni raja utara dohot raja selatan. Songon naung dipaboa si Daniel, di tikki ari parpudi, “masijonapan” manang bersaing do raja utara dohot raja selatan i.​—Dan. 11:40.

6. Aha do bukti na patuduhon na bersaing raja utara dohot raja selatan?

⁶ Bersaing do raja utara dohot raja selatan asa gabe pamarettaon na unjago. Misalna, parrohahon ma aha na masa dung sae Porang Dunia II. Rusia dohot sekutuna ma na mangarajai godang luat di Eropa. Alani i, gabe marsitutu ma raja selatan asa kerjasama dohot akka negara na asing lao mambahen sada pasukan militer na digoari NATO. Dipakke nasida do godang hepeng asa mambahen pasukan militerna gabe lam jago. Diurupi raja utara do akka musu ni raja selatan tikki marporang. Piga-piga taon na parpudi on, gabe lam godang pengaruh ni Rusia dohot sekutuna tu portibi on. Dipakke nasida do program komputer asa mambahen raja selatan on gabe susa parhepengonna jala sega pamarettaonna. Jala songon naung disurirangkon si Daniel, toktong do raja utara on menyerang akka naposo ni Debata.​—Dan. 11:41.

RAJA UTARA MASUK TU “TANO BAGABAGA NA MARMULIA”

7. Aha do “tano bagabaga na marmulia” i?

⁷ Di Daniel 11:41 didok, masuk do raja utara i tu “tano bagabaga na marmulia”. Aha do lapatan ni i? Najolo, luat Israel do na didok “tano na marmulia on sian saluhut angka luat.” (Hes. 20:6) Alai na mambahen undenggan luat i sian luat na asing, ala disi do adong ulaon panombaon tu Jahowa. Mulai sian Pentakosta 33 M, “tano” i dang be manggombarhon sada inganan. Alana saonari, nungnga tarsar be akka naposo ni Jahowa di liat portibi on. Jadi saonari, “tano bagabaga na marmulia” i manggombarhon akka ulaon ni Sitindangi Ni Jahowa, i ma marpungu dohot marbarita na uli.

8. Songon dia do raja utara masuk tu “tano bagabaga na marmulia” i?

⁸ Saleleng ari parpudi, marulak-ulak do raja utara masuk tu “tano bagabaga na marmulia” i. Misalna, tikki masa Porang Dunia II, Nazi Jerman do na gabe raja utara. Marsitutu do ibana menganiaya jala mambunu akka naposo ni Debata. Jala dung sae Porang Dunia II, Uni Soviet ma na gabe raja utara. Ibana pe dohot do menganiaya akka naposo ni Debata, jala diboan do nasida tu pengasingan.

9. Di piga-piga taon na parpudi on, songon dia Rusia dohot sekutuna masuk tu “tano bagabaga na marmulia” i?

⁹ Piga-piga taon na parpudi on, Rusia dohot sekutuna pe tong do masuk tu “tano bagabaga na marmulia” i. Taon 2017, diorai pamaretta Rusia ma ulaon ni Sitindangi Ni Jahowa jala adong piga-piga donganta na dipenjarahon. Diorai nasida do akka sijahaonta, tarmasuk Bibel Terjemahan Dunia Baru. Jala disita do kantor cabang di Rusia, tarmasuk ma akka Bale Harajaon dohot Bale Kebaktian. Dung masa i, di taon 2018, dipaboa Punguan na Mangaradoti Organisasi ma, Rusia dohot sekutuna i do na gabe raja utara di tikki saonari. Alai, nang pe dianiaya naposo ni Jahowa, dang olo nasida mangalo pamarettaon i manang marsitutu asa diganti halak na mamaretta di luat i. Toktong do nasida mangihutton poda ni Bibel asa manangiakkon “angka na marhuaso”, tarlumobi molo naeng dibahen keputusan taringot ulaon ni Sitindangi Ni Jahowa.​—1 Tim. 2:1, 2.

NA LAO TALU DO RAJA SELATAN I DIBAHEN RAJA UTARA?

10. Na lao talu do raja selatan i dibahen raja utara? Patorang ma.

¹⁰ Surirang na disurat di Daniel 11:40-45 i godangan manurat taringot aha na diulahon raja utara. Na lao talu do bahenonna raja selatan i? Daong. Toktong do “mangolu” raja selatan tikki Jahowa dohot Jesus mangaripasson sude pamarettaon ni jolma di Armagedon. (Pgk. 19:20) Sian dia taboto? Taparrohahon ma surirang na disurat di bukku Daniel dohot Pangungkapon.

11. Aha do lapatan ni surirang na disurat di Daniel 2:43-45? (Ida gambar sampul.)

¹¹ Jaha Daniel 2:43-45. Di surirang ni si Daniel on, digombarhon do adong sada patung na balga. Akka bagian ni patung i dibahen sian marragam jenis logam. Ganup bagian i manggombarhon akka pamarettaon na hea mangarajai luat na diingani akka naposo ni Debata. Ganup pamarettaon i dang mamaretta di tikki na sarupa. Pat ni patung i, dibahen sian bosi dohot tano liat. On manggombarhon pamarettaon Inggris-Amerika. Jadi surirang on patuduhon, toktong do marhuaso Inggris dohot Amerika tikki ro Harajaon ni Debata mangaripasson sude pamarettaon ni jolma.

12. Manggombarhon aha do ulu na papituhon sian binatang buas i, jala boasa rikkot taboto on?

¹² Apostel Johannes pe hea do manggombarhon taringot kuasa dunia na mangarajai luat na diingani naposo ni Debata. Digombarhon do nasida songon binatang buas na pitu uluna. Ulu na papituhon manggombarhon kuasa dunia Inggris-Amerika. Rikkot do taboto on, alana dang adong ulu na tamba asing ni na pitu ulu i. Jadi, toktong dope ulu na papituhon i na mamaretta di tikki ro Jesus Kristus dohot pasukanna lao mangaripasson ibana dohot binatang buas i.b​—Pgk. 13:1, 2; 17:13, 14.

AHA DO NA LAO DIULAHON RAJA UTARA HADUAN?

13-14. Ise do “Gog di tano Magog”, jala boasa nasida menyerang naposo ni Debata?

¹³ Sian surirang ni si Hesekiel, gabe lam taboto ma aha do na masa andorang so diripasson raja utara dohot raja selatan. Molo tasulingkiti surirang di Hesekiel 38:10-23; Daniel 2:43-45; 11:44–12:1; dohot Pangungkapon 16:13-16, 21, hira na sarupa do aha na digombarhon di ayat i. Molo tutu do sarupa i, ra akka on ma na lao masa haduan.

¹⁴ Dung dimulai hasusaan bolon, sude ma akka raja di tano on mambahen sada punguan. (Pgk. 16:13, 14; 19:19) Nasida ma na didok “Gog di tano Magog”. (Hes. 38:2) Punguan on ma haduan na marsitutu lao menyerang jala mambunu sude naposo ni Debata. Boasa? Taringot on, nungnga disurirangkon apostel Johannes na ro do udan es na balga manipa akka musu ni Debata. Ra, udan es na balga on manggombarhon barita panguhuman na karas na dipasahat naposo ni Jahowa. Jadi barita on do na mambahen Gog di tano Magog marsitutu lao menyerang sude naposo ni Debata.​—Pgk. 16:21.

15-16. (a) Manggombarhon taringot aha do Daniel 11:44, 45? (b) Aha do na lao masa tu raja utara dohot Gog di tano Magog?

¹⁵ Barita panguhuman dohot serangan musu ni Debata on, ra sarupa do tu na disurat di Daniel 11:44, 45. (Jaha.) Di ayat i, didok si Daniel do, gabe tarsonggot do raja utara i alani “barita angin, angka sian habinsaran dohot sian utara”. Gabe borhat ma ibana “marmurukmuruk situtu”. Naeng dibunu raja utara on ma “torop halak”. “Torop halak” dison manggombarhon akka naposo ni Jahowa.c Jadi na disurat si Daniel dison ra manggombarhon serangan sian akka musu ni Debata tu naposona.

¹⁶ Ala marsitutu raja utara dohot akka pamarettaon na asing lao menyerang naposo ni Debata, gabe muruk situtu ma Debata na Sun Hinagogo i. Dung i, masa ma porang Armagedon. (Pgk. 16:14, 16) Tikki i, diripasson ma Gog di tano Magog na manggombarhon raja utara dohot akka negara na asing jala “ndang adong nanggo sahalak mangurupi ibana”.​—Dan. 11:45.

17. Ise do Mikhael “induk na balga i” na disurat di Daniel 12:1, jala aha do na diulahon ibana?

¹⁷ Sian surirang ni si Daniel i taboto ma songon dia do Debata mangaripasson raja utara dohot sekutuna, jala songon dia hita dipalua. (Jaha Daniel 12:1.) Aha do lapatan ni ayat on? Si Mikhael, i ma goar na asing sian Jesus Kristus, Rajanta. Ibana ma na “hehe humongkop” akka naposo ni Debata di taon 1914, tikki gabe Raja ibana di Harajaon ni Debata na di surgo. Haduan, “hehe” do ibana lao mangaripasson akka musuna di porang Armagedon. Porang on ma na gabe ujung ni “tingki hagogotan” na disurat si Daniel. Di surirang ni si Johannes na di bukku Pangungkapon, digoari ma tikki hagogotan on “hasusaan bolon”.​—Pgk. 6:2; 7:14.

TARSURAT DO GOARMUNA DI BUKKU HANGOLUAN?

18. Boasa boi toktong dame rohatta manang aha pe na masa di ari na naeng ro?

¹⁸ Didok si Daniel dohot si Johannes, sai dijaga Jahowa dohot Jesus do akka naposona tikki hasusaan bolon. On boi mambahen dame rohatta lao mangadopi manang aha pe na masa di ari na naeng ro. Didok si Daniel akka halak na dipalua sian hasusaan bolon i, i ma akka halak na tarsurat goarna di bukku hangoluan. (Dan. 12:1) Jadi songon dia do asa boi disurat goarta di bukku i? Ikkon tapatudu do na porsea hita tu Jesus, Biru-biru ni Debata. (Joh 1:29) Ikkon tardidi do hita, alana i patuduhon nungnga talehon diritta tu Debata. (1 Ptr. 3:21) Ikkon tadukung do Harajaon ni Debata, carana marsitutu ma hita mangurupi akka halak asa mananda Jahowa.

19. Aha do na ikkon taulahon saonari, jala boasa?

¹⁹ Saonari ma tikkina hita ikkon patoguhon haporseaonta tu Jahowa jala marpos ni roha tu organisasina. Saonari ma tikkina hita ikkon mendukung Harajaon ni Debata. Molo taulahon i, gabe dipalua ma hita tikki ro Harajaon i lao mangaripasson raja utara dohot raja selatan.

Piga-piga surirang na disurat di bagan on manggombarhon akka peristiwa na masa di tikki na sarupa. Sude on patuduhon molo hita mangolu di ari parpudi.​—Dan. 12:4.

• 

  

  Ayat Pgk. 11:7; 12:13, 17; 13:1-8, 12

  Surirang Saleleng marribu taon, “binatang buas” i nungnga mangarajai portibi on. Di ari parpudi, gabe lukka ma uluna na papituhon. Dung i, malum ma uluna i, jala “sude jolma di tano on” mangihutton ibana. Ibana ma na dipakke Sibolis lao ‘mamorangi angka pinompar ni borua i na tading dope’.

  Saut Dukkon Aek na Sumar, akka pamarettaon na mangalo Jahowa do na mangarajai portibi on. Marratus taon dukkon i, Inggris ma na gabe Kuasa Dunia. Gabe gale do ibana saleleng Porang Dunia I. Alai gabe margogo do muse ibana dung marsada dohot Amerika Serikat. Di ari parpudi, dipakke Sibolis ma sude pamarettaon di portibi on lao menganiaya naposo ni Debata.

• 

  Ayat Dan. 11:25-45

  Surirang Saleleng ari parpudi, bersaing do raja utara dohot raja selatan.

  Saut Bersaing do Jerman dohot Inggris-Amerika. Taon 1945, Uni Soviet dohot sekutuna ma na gabe raja utara. Taon 1991, dabu ma pamarettaon Uni Soviet. Ujungna, Rusia dohot sekutuna ma na gabe raja utara.

• 

  Ayat Jes. 61:1; Mal. 3:1; Luk. 4:18

  Surirang Disuru Jahowa do ‘suruanna’ lao paradehon dalan andorang so dipajongjong Harajaon ni Messias. Punguan on ma na “mamaritahon barita na uli tu halak na dangol”.

  Saut Mulai taon 1870-an, marsitutu do si Russell dohot akka donganna mamparsiajari hasittongan sian Bibel. Saleleng taon 1880-an, diboto nasida ma rikkot do akka naposo ni Debata marbarita na uli. Dipabissar nasida ma akka sijahaon na marjudul “Dilului 1.000 Halak Parbarita” dohot “Dimiahi laho Marbarita”.

• 

  Ayat Mat. 13:24-30, 36-43

  Surirang Sahalak bawa manabur eme di ladang. Ro ma musuna, ditabur ibana ma simareme-eme di ladang i. Gabe rap tubu ma eme dohot simareme-eme i. Di tikki panen, dipapulik ma dia na eme jala dia do na simereme-eme.

  Saut Mulai sian ujung ni taon 1800-an, gabe lam takkas ma tarida dia halak Kristen na sittong jala dia halak Kristen na so sittong. Saleleng ari parpudi, rap marpungu ma akka halak Kristen na sittong jala pulik ma nasida sian halak Kristen na so sittong.

• 

  Ayat Dan. 2:31-33, 41-43

  Surirang Adong sada patung na dibahen sian marragam jenis logam. Pat ni patung i dibahen sian bosi dohot tano liat.

  Saut Tano liat manggombarhon akka halak na dirajai pamarettaon Inggris-Amerika, alai gabe mangalo tu pamarettaon i. Alani nasida, dang gogo be pamarettaon i songon bosi.

• 

  

  Ayat Mat. 13:30; 24:14, 45; 28:19, 20

  Surirang Dipapungu ma “eme” tu bagasan “poti”, jala dipillit ma “naposo haposan jala na marbisuk” lao mangaradoti “angka naposona na asing”. Mulai ma dibaritahon “barita na uli taringot tu Harajaon i di liat portibi on”.

  Saut Di taon 1919, dipillit ma naposo haposan lao mangaradoti naposo ni Debata. Mulai sian i, gabe lam marsitutu ma Parsiajar Bibel lao marbarita na uli. Saonari, Sitindangi Ni Jahowa marbarita di lobi sian 200 negeri jala pabissarhon akka sijahaon di lobi sian 1.000 bahasa.

• 

  Ayat Dan. 12:11; Pgk. 13:11, 14, 15

  Surirang Binatang buas na martanduk dua manjujui akka jolma di tano on asa mambahen “patung ni binatang buas”. Jala dilehon ibana ma “hosa tu patung ni binatang buas i”.

  Saut Inggris-Amerika do na mambahen Liga Bangsa-Bangsa. Gabe dohot do akka negara na asing bergabung tu organisasi on. Raja utara pe dohot do tu organisasi on, alai holan sian taon 1926-​1933. Godang halak porsea, boi do Liga Bangsa-Bangsa on mambahen dame portibi on, hape sasittongna holan Harajaon ni Debata do na boi mangulahon i. Jala i do tong na dihirim akka halak tikki dibahen muse PBB.

• 

  

  Ayat Dan. 8:23, 24

  Surirang Sahalak raja na jahat mambahen hasusaan na massai balga.

  Saut Inggris-Amerika mambunu godang halak jala mambahen godang hasusaan. Misalna tikki Porang Dunia II, didabuhon Amerika Serikat do dua bom atom tu sada negara na gabe musu ni Inggris-Amerika. Godang do na hancur alani bom i.

• 

  Ayat Dan. 11:31; Pgk. 17:3, 7-11

  Surirang “Binatang buas na rara songon api” kaluar sian lombang jala manggombarhon raja na paualuhon. Sappulu tandukna pamatehon “boru-boru na so hasea”. Dung i binatang buas i pe dohot do gabe mate. Di bukku Daniel digombarhon do raja on gabe “ulaon na dihagigihon Debata na mambahen hancur”.

  Saut Dang adong be Liga Bangsa-Bangsa saleleng Porang Dunia II. Dung sae porang i, dibahen ma PBB. Songon Liga Bangsa-Bangsa i, PBB on pe marsitutu lao mambahen dame portibi on, hape holan Harajaon ni Debata do na boi mangulahon i. PBB on do haduan na lao mangaripasson akka agama.

• 

  

  Ayat 1 Tes. 5:3; Pgk. 17:16

  Surirang Akka pamaretta pasahatton boa-boa “dame do jala ndang adong be sihabiaran!” Ro ma “sampulu tanduk” dohot “binatang buas” i lao menyerang “boru-boru na so hasea”. Dung i, diripasson ma akka bangso i.

  Saut Akka pamaretta mandok, nungnga dibahen nasida dame jala aman portibi on. Dung i, didukung akka bangso i ma PBB lao mangaripasson agama palsu. On ma mula ni hasusaan bolon i. Di ujung ni hasusaan bolon, diripasson ma sude pamarettaon ni portibi on di porang Armagedon.

• 

  Ayat Hes. 38:11, 14-17; Mat. 24:31

  Surirang Ro ma Gog menyerang naposo ni Debata. Dung i, ro ma suru-suruan papunguhon “angka na tarpillit”.

  Saut Rap ma raja utara dohot akka pamarettaon na asing lao menyerang naposo ni Debata. Dung dimulai serangan on, dipapungu ma akka na miniahan na adong dope di tano on asa naek tu surgo.

• 

  Ayat Hes. 38:18-23; Dan. 2:34, 35, 44, 45; Pgk. 6:2; 16:14, 16; 17:14; 19:20

  Surirang ‘Na hundul di hoda na bontar’ i “manaluhon” Gog dohot akka tentarana. Disappatton ma “binatang buas” i “tu laut api”, jala dirumpakkon ma patung na balga i.

  Saut Jesus na gabe Raja di Harajaon ni Debata ro lao paluahon akka naposo ni Debata. Rap ma ibana dohot 144.000 donganna dohot akka suru-suruan. Diripasson nasida ma akka bangso dohot portibi ni Sibolis on.