Adong do Akhir ni Terorisme?

Tikki adong serangan teroris, wajar do molo sukkun-sukkun rohamuna: ‘Parduli dope Debata tu jolma? Boasa dipasombu terjadi sisongon i? Adong do akhir ni terorisme?a Songon dia do carana asa unang torus au mabiar?’ Adong do alus ni sukkun-sukkun on di Bibel.

Songon dia do perasaan ni Debata mangida terorisme?

Sogo do roha ni Debata tu na jahat dohot tu akka ulaon ni teroris. (Psalmen 11:5; Poda 6:16, 17) Sebagai wakil ni Debata, hea do dipasingot Jesus akka apostelna ala dipakke nasida cara kekerasan tu na asing. (Mateus 26:50-52) Adong do halak na mandok, boi do dipakke nasida cara kekerasan lao mambela goar ni Debata. Alai sebenarna, dang lomo roha ni Debata tu tindakan ni nasida i, justru dang ditangihon Debata tangiang ni nasida.—Jesaya 1:15.

Parduli do Debata tu sude halak na susa, termasuk ma akka korban ni teroris. (Psalmen 31:7; 1 Petrus 5:7) Bahkan dipaboa do di Bibel na lao diakhiri Debata do sude hajahaton sian tano on.—Jesaya 60:18.

Boasa gabe adong teroris?

Dipaboa do di Bibel boasa boi terjadi terorisme. Didok, “Susa do molo jolma na mangarajai jolma.” (Parjamita 8:9) Mulai sian najolo, dipakke akka halak na marhuaso do ulaon terorisme lao menekan halak na asing, alai dibalas ma muse pambahenanna i mamakke ulaon terorisme.—Parjamita 7:7.

Akhir ni terorisme

Marjanji do Debata lao mambahen tano on gabe inganan na dame. Dang adong be annon na mambahen hita mabiar, jala dang adong be na mangulahon na jahat. (Jesaya 32:18; Mika 4:3, 4) On ma janjina i:

Lao disingkirhon Debata ma penyebab utama ni terorisme. Lao gattion ni Debata ma sude pamarettaon ni jolma gabe pamarettaonna. Jala holan pamarettaonna i ma na lao mamaretta di sude liat portibi on. Jesus Kristus ma na dipillit Debata na lao Raja di pamarettaonna i. Bahenonna do na adil tu sude halak jala lao singkirhononna do akka halak na mangulahon na jahat. (Psalmen 72:2, 14) Jadi, dang adong be haduan terorisme. Alani i, ‘marlas ni roha situtu ma sude jolma, ai dame do ngolu ni nasida’.—Psalmen 37:10, 11.
Lao dihapus Debata ma sude dampak ni terorisme. Godang do halak na gabe lukka jala trauma alani ulaon ni teroris. Alai lao disalpuhon Debata do sude dampak ni terorisme i. (Jesaya 65:17; Pangungkapon 21:3, 4) Bahkan marjanji do Debata lao pahehehon sude halak naung mate, jala dame ma dihilala nasida mangolu di tano on.—Johannes 5:28, 29.

Molo taparsiajari Bibel pos do rohatta satokkin nai nama lao diakhiri Debata ulaon na jahat sian tano on. Alai olo do ra sukkun-sukkun rohamuna, ‘Boasa dang diakhiri Debata dope ulaon ni teroris sahat tu saonari?’ Lao mamboto alusna, tonton hamu ma video Boasa Dipaloas Debata Masa Hasusaan?

a Istilah “terorisme” i ma ancaman manang cara kekerasan na dibahen tu akka halak khususna tu masyarakat biasa. Tujuanna lao pabiar-biarhon nasida asa adong perubahan di bidang politik, agama, manang sosial. Alai molo pe sada ancaman i didok ulaon ni teroris, belum tentu halak na asing setuju molo i ulaon ni teroris.

Ayat ni Bibel na boi mangurupi

Adong dua ayat ni Bibel na boi mangurupi hamu.

Martangiang ma tu Debata.—Pilippi 4:6, 7.
Torus ma pikkirhon akka janji ni Debata na disurat di Bibel.—Heber 6:19.

Lao mamboto saran na asing sian Bibel, ida ma artikel “Cara Asa Unang Terlalu Khawatir”.

Adong do Saksi Jahowa na gabe korban ni terorisme. Alai boi do nasida tetap setia ala diurupi dongan sahaporseaon. Taida ma dua contohna:

Adong ma sekelompok teroris na bersenjata masuk tu sada sikkola di Beslan, Rusia. Disandra nasida ma lobi sian 1.000 halak, termasuk ma i si Natalya dohot anakna si Aslan na marumur sia taon. Marratus do halak mate jala godangan dakdanak. Nang pe selamat si Natalya dohot si Aslan, alai trauma do nasida alani kejadian i. Jaha ma artikel na paboahon taringot i asa diboto hamu aha do na mangurupi nasida mangatasi rasa traumana i.
Tikki adong serangan teroris di Menara Kembar, New York, Amerika Serikat mate do anak ni si Pablo dohot si Sophie disi. Tonton ma video on asa diboto hamu aha do na mangurupi nasida dohot halak na asing na hona dampak ni teroris i.