Olo Diajar-ajari Halak Naung Dewasa

ISE DO NA IKKON MANGAJAR-AJARI?

Porlu do dakdanak dinasehati jala diajar-ajari halak naung dewasa. Natua-tua ma na paling cocok mangajar-ajari gellengna. Jala memang tanggung jawab ni nasida do i. Alai boi do tong halak na asing naung dewasa dohot mangajar-ajari gellengmuna.

BOASA PENTING?

Di godang negara, jarang do akka na poso mardongan tu halak naung dewasa. Boasa?

• Unggodang do tikki ni nasida di sikkola, jala unggodang do di sikkola ni nasida donganna sebaya sian apala guru dohot halak naung dewasa.

• Karejo do bapakna dohot omakna. Jadi jarang ma gellengna pajuppang dohot natua-tuana di jabu dung mulak sikkola.

• Menurut sada penelitian di Amerika Serikat, hira-hira onom jom ma sadari dakdanak na marumur 8 sahat tu 12 taon mamakke perangkat elektronik ni nasida.a

Bukku Hold On to Your Kids mandok, “Molo akka na poso saonari, tu dongan sebayana do nasida mangido nasehat. Dongan sebayana do na gabe sitiruon, jala dongan sebayana do na mangajar-ajari nasida. Dang natua-tua, guru, manang halak na asing naung dewasa.

CARA MANGAJARHON I

Lehon ma tikkimuna lao rap dohot gellengmuna.

PRINSIP NI BIBEL: “Ajar-ajari ma anakmu asa mardalan ibana di dalan na ikkon sidalananna. Dang na lao manirpang ibana sian i sahat tu na matua.”​—Poda 22:6.

Sebenarna lomo do roha ni dakdanak diajar-ajari natua-tuana. Didok akka ahli, dung remaja dakdanak, biasana lebih diargai nasida do poda ni natua-tuana sian apala poda ni akka donganna. Disurat Dr. Laurence Steinberg do di bukku You and Your Adolescent, “Balga do pengaruh ni natua-tua tu sifat dohot pangalaho ni gelleng ni nasida, mulai sian na remaja gellengna i sahat tu na balga. Memang sipata hira na cuek do akka remaja mambege hata ni natua-tuana jala hira na so setuju. Alai sebenarna, ditangihon nasida do i. Jala lomo do roha ni nasida mambege hata ni natua-tuana.”

Hamu akka natua-tua, denggan ma ajari gellengmuna. Alana sebenarna lomo do roha ni akka dakdanak diajari natua-tuana. Lehon ma tikkimuna asa boi rap dohot nasida. Ceritahon ma songon dia perasaanmuna dohot pengalamanmuna. Jala paboa ma tu nasida aha na paling penting di hamu.

Urupi ma gellengmuna asa olo mardongan tu halak naung dewasa.

PRINSIP NI BIBEL: “Gabe marbisuk do manang ise na mardongan tu halak na marbisuk. Alai gabe marjea do manang ise pe na mardongan tu halak na oto.”​—Poda 13:20.

Adong do donganmuna na boi gabe sitiruon tu gellengmuna naung remaja? Molo adong, pangido ma asa olo ibana mangalehon tikkina rap dohot gellengmuna. Molo dibahen hamu songon i, on dang patuduhon naung dilehon hamu tanggung jawabmuna tu ibana. Alai porlu do dipastihon hamu, memang halak na boi dihaporseai do ibana, dang bahenonna na so denggan tu gellengmuna, jala sarupa do prinsip na diajarhon ibana tu prinsipmuna. Di Bibel, adong dipaboa taringot sahalak bawa na margoar si Timoteus. Godang do manfaat na dirasahon ibana ala mardongan tu Apostel Paulus mulai sian na poso. Jala si Paulus pe lomo rohana mardongan tu si Timoteus.​—Pilippi 2:​20, 22.

Olo do ra dang sahuta hamu dohot keluargamuna. Manang adong na tinggal di luar negeri. Molo songon i situasimuna, urupi ma gellengmuna asa adong tikkina lao mardongan tu halak naung dewasa na boi gabe sitiruon di ibana.