Paradeiso Nunga Jonok!

Angka hasusaan na masa di portibi saonari on patuduhon Paradeiso nunga jonok. Bibel mandok na ro ma angka ari hasusaan andorang so ro dope Paradeiso. Hita mangolu di tingki sisongon i saonari! On ma pigapiga na didok ni Bibel na laho masa:

Angka porang na bolon. ”Ai na hehe do sogot bangso maralohon bangso, harajaon maralohon harajaon.” (Mateus 24:7) Surirang on nunga masa be. Sian taon 1914, adong masa dua porang na bolon dohot angka porang na asing. Marjuta halak mate alani i.

Lam rarat angka sahit. Masa ma ”angka sahit bala marluatluat.” (Lukas 21:11) Nunga masa on? Nunga. Kanker, sahit jantung, tuberkolosis (TBC), malaria, AIDS, dohot angka sahit na asing dope na boi mambahen marjuta halak mate.

Haraparon. Di liat portibi on, godang do halak na so boi mandapot sipanganon. Ganup taon, marjuta halak mate alani haraparon. On, sada tanda na asing na patuduhon nunga jonok be Paradeiso. Bibel mandok, ”masa ma nang haleon.”—Markus 13:8.

Angka Lalo. ”Masa ma . . . lalo marluatluat.” (Mateus 24:7) On, nunga be masa di tingkinta saonari. Sian taon 1914, lobi marjuta halak mate alani lalo.

Halak parjahat. Angka jolma gabe ”impolan di perak” dohot ”mangkaholongi dirina.” Nasida gabe ”Holongan di hisap ni daging asa di Debata.” Angka ianakhon ”na so mangoloi natorasna.” (2 Timoteus 3:1-5) Taparhatutu do saonari nunga godangan halak songon i? Ndang adong be biar ni nasida tu Debata, jala diorai do angka jolma na laho marsiajar taringot Debata.

Hajahaton. ”Lam rarat ma na so uhum.” (Mateus 24:12) Ra, diparhatutu hamu do molo hajahaton saonari umjahat sian angka taon naung salpu. Manang didia pe angka jolma, mabiar ditodong, dipaotooto, manang dibunu.

Sude on patuduhon naung jonok Harajaon ni Debata. Bibel mandok, ”Ia dung masa angka i diida hamu, boto hamu ma, naung jonok harajaon ni Debata.” (Lukas 21:31) Aha do Harajaon ni Debata i? I ma pamerentaon ni Debata na di surgo na naeng paulihon Paradeiso di tano on. Harajaon ni Debata manggantihon angka pamarentaon ni jolma.—Daniel 2:44.