Na Porlu Diingot Akka Natua-tua:

Hamu akka natua-tua, porlu do diurupi hamu anakkonmuna makkaholongi Jahowa, mangalehon dirina tu Jahowa, jala tardidi. Aha do na ikkon diulahon hamu lao mangurupi ibana asa boi tardidi? Jala aha do na ikkon diulahon ibana asa boi tardidi?

Didok Jesus do tu akka siseanna, “Bahen hamu ma saluhut halak sian nasa bangso gabe siseanku. Didi hamu ma nasida.” (Mat. 28:19) Songon na didok di ayat i, tujuan ni sasahalak tardidi, i ma gabe sisean ni Jesus. Sahalak sisean, dang holan mangattusi jala porsea tu ajaran ni Kristus, alai ikkon diulahon ibana do i. Akka na poso pe boi do mangulahon i.

Gabe sitiruon na denggan ma hamu tu anakkonmuna, jala ajarhon ma taringot Jahowa tu ibana. (5 Mus. 6:6-9) Pakke ma bukku Mangolu Saleleng ni Lelengna lao mangajari ibana ajaran dasar ni Bibel, jala asa boi diihutton ibana akka prinsip ni Bibel. Ajari ma anakkonmuna patorakkon haporseaonna mamakke alusna sandiri. (1 Ptr. 3:15) Molo lam bagas parbinotoanna, boi ma ibana tardidi. Dapotna ma i sian hamu tikki diajari hamu ibana, tikki belajar pribadi, sian ibadat keluarga, parpunguan, dohot sian akka dongan. Urupi ma ibana asa toktong jonok tu Jahowa.

Didok do di Poda 20:11, “Haru dakdanak pe boi do tandaon sian pangalahona, atik na tulus do ibana jala denggan pangalahona.” Aha do buktina molo sahalak dakdanak, bawa manang borua, nungnga rade gabe sisean ni Jesus Kristus jala tardidi?

Akka dakdanak na naeng tardidi, ikkon unduk do tu natua-tuana. (Ul. 5:29; Kol. 3:20) Tikki marumur 12 taon Jesus, didok Bibel “toktong do dioloi ibana [natua-tuana]”. (Luk. 2:51) Unang ma didok rohamuna ikkon sempurna anakkonmuna i. Alai molo naeng tardidi ibana, ikkon ditiru ibana do Jesus jala unduk tu natua-tuana.

Ikkon dipatudu dakdanak i do na lomo rohana marsiajar Bibel. (Luk. 2:46) Olo do anakkonmuna ro tu parpunguan jala mangalehon komentar? (Ps. 122:1) Lomo do rohana manjaha Bibel ganup ari jala belajar pribadi?—Mat. 4:4. Ikkon Harajaon ni Debata do na uppetting di ngoluna. (Mat. 6:33)

Ikkon marbarita na uli do ibana, ala i do tanggung jawabna na uppetting. Termasuk ma i marbarita na uli sian jabu tu jabu, di tempat umum, kesaksian tidak resmi, dohot cara marbarita na asing. Ikkon barani do ibana paboahon tu guru manang tu dongan sasikkolana molo ibana sahalak Saksi Jahowa. Molo dapot tugas sikkola ibana, i ma di parpunguan Hangoluan dohot Pangkobasion ni Halak Kristen, ikkon denggan do i diulahon ibana.

Ikkon toktong do ias pangalahona jala dang mardongan tu halak na so denggan pangalahona. (Poda 13:20; 1 Kor. 15:33) Tarida do on sian musik na dibege, film manang acara TV na ditotton, video game, dohot aha na diida ibana di Internet.

Molo berupaya hamu mangurupi anakkonmuna makkaholongi Jahowa, boi ma diihutton ibana hasittongan jala tardidi tikki poso dope. Anggiat ma dipasu-pasu Jahowa upayamuna i, jala diurupi anakkonmuna mamillit keputusan na paling penting di ngoluna, i ma marale-ale tu Jahowa.

Na Porlu Diingot Penyiar na So Tardidi:

Sada hasangapon do gabe penyiar na so tardidi di huria. Patut do hamu dipuji ala nungnga dibahen hamu kemajuan. Sian parsiajaran Bibelmuna, nungnga ditanda hamu be Debata jala porsea do hamu tu akka janjina.​—Joh. 17:3; Heb. 11:6.

Andorang so marsiajar Bibel tu Saksi Jahowa, bergabung do ra hamu tu sada agama manang dang adong agamamuna. Olo do ra diulahon hamu ulaon na maralo tu prinsip ni Bibel. Alai saonari, nungnga muba be hamu. Menyesal do hamu ala hea diulahon hamu na sala i. Alani i, dang diulahon hamu be i jala berupaya do hamu mangulahon lomo ni roha ni Debata.​—Ul. 3:19.

Alai, olo do ra nungnga “sian na metmet” ditanda hamu Jahowa. Alani i, dang hea ra diulahon hamu ulaon na sala manang dosa na balga. (2 Tim. 3:15) Alana nungnga diajari hamu songon dia menolak godaan sian dongan manang sian halak na asing. Setia do hamu tu Jahowa, jala nungnga dipaboa hamu haporseaonmuna tu na asing. Nungnga dilatik hamu marbarita na uli. Jala dibahen hamu ma keputusan gabe penyiar na so tardidi.

Saonari ikkon dipikkiri hamu do dua langkah na penting on, i ma mangalehon diri tu Jahowa jala tardidi, dang soal sian na metmet hamu mananda Jahowa manang dung magodang. Mangalehon diri tu Jahowa, diulahon hamu lewat tangiang. Tikki na martangiang i, marjanji ma hamu tu Jahowa, holan Ibana ma disomba hamu salelengna. (Mat. 16:24) Dung i, dipatudu hamu ma naung mangalehon diri hamu tu Jahowa tikki tardidi, dibonompon di bagasan aek. (Mat. 28:19, 20) Dung mangalehon diri jala tardidi, resmi ma hamu gabe Saksi Jahowa. Sada hasangapon do i!

Alai songon naung diparsiajari hamu, olo do gabe godang hasusaan na diadopi hamu alani keputusan on. Jesus pe najolo songon i do. Dang sadia leleng dung tardidi, “ditogu-togu tondi parbadia ma Jesus tu padang gurun, jala disi ma ibana digoda Sibolis”. (Mat. 4:1) Jadi dung tardidi hamu, olo do ra lam godang annon tantanganmuna. (Joh. 15:20) Boi do i sian keluarga. (Mat. 10:36) Boi do muse sian dongan sasikkola, dongan sakarejo, manang na asing. Alai, ingot ma hata ni Jesus na disurat di Markus 10:29, 30, “Tutu do na hudok on tu hamu, manang ise na manadikkon jabuna, haha anggina, ibotona, omakna, bapakna, anakkonna, manang tanona alani au dohot alani barita na uli, jaloonna do 100 hali loppit unggodang di tikki on. Jaloonna do unggodang jabu, haha anggi, iboto, omak, anakkon, dohot tano, nang pe ikkon manaon na haccit ibana. Jala jaloonna do hangoluan saleleng ni lelengna di tikki na naeng ro.” Alani i, bahen hamu ma sian nasa gogomuna asa toktong jonok tu Jahowa, jala mangihutton akka aturanna.

Molo nungnga rade hamu tardidi, paboa ma tu koordinator punguan ni akka sintua di huria. Dibahas akka sintua ma sukkun-sukkun di halaman na mangihut rap dohot hamu, lao mamastihon nungnga memenuhi syarat hamu tardidi manang na dang. Alani i, parsiajari ma sukkun-sukkun i tikki belajar pribadi hamu.

Tikki persiapan hamu, jaha ma akka ayat ni Bibel na adong disi jala rimangi ma i. Boi do dibahen hamu catatan pribadi di bukku on manang di bukku na asing. Boi do dibukka hamu bukku on dohot catatanmuna i tikki mangulas sukkun-sukkun i. Molo adong na maol diattusi hamu sian sukkun-sukkun i, unang ma maila manukkun tu guru studimuna manang tu akka sintua.

Tikki mangulas i dohot akka sintua, dang pola porlu paganjangku alusmuna. Dumenggan do alus na jeppek, takkas, jala mamakke hatamuna sandiri. Denggan do molo dipakke hamu sada manang dua ayat sebagai dasar ni jawabanmuna i.

Molo dang bagas dope parbinotoanmuna taringot ajaran dasar ni Bibel, paboaon ni sintua ma dang memenuhi syarat dope hamu tardidi. Alai pasti diurupi nasida do hamu asa lam bagas mangattusi Bibel jala boi patorakkon i. Dung i, boi ma hamu tardidi di tikki na asing.

[Petunjuk tu akka sintua: Petunjuk lao mangulas sukkun-sukkun tu na lao tardidi adong di halaman 54-59.]