Di bagasan orhanisasi nami, ndang adong digoari pandita na ingkon sigajion. Alai, songon di huria Karisten di tingki parjolo, angka sintua naung ditontuhon na dipajongjong ”asa diparmahani hamu huria ni Tuhan i”. (Ulaon ni Apostel 20:28) Angka sintua on i ma angka baoa na togu partondionna laho mangulahon angka na ringkot di bagasan huria jala mamparmahani angka punguan ”unang songon na pinaksa, sian las ni roha ma mangihuthon Debata; unang alani pangomoan hailaon, sian ringkot ni roha ma”. (1 Petrus 5:1-3) Aha ma na diulahon nasida tu hami?

Manarihon jala manjaga hami. Angka sintua manogunogu jala mangondingi partondion nami. Ala diboto nasida Debata do na mangalehon ulaon na ringkot on, ndang olo angka sintua on hira na mangarajai ruas ni Debata; gariada marsitutu do nasida laho mambahen hami asa marlas ni roha jala mangolu partondion nami. (2 Korint 1:24) Songon parmahan na marsitutu manarihon ganup birubiruna, angka sintua pe marsitutu do laho mananda ganup ruas ni huria.—Poda Sian Raja Salomo 27:23.

Mangajari hami laho mangulahon lomo ni roha ni Debata. Ganup minggu, angka sintua mangajar di parpunguan laho patoguhon haporseaon nami. (Ulaon ni Apostel 15:32) Angka baoa na daulat roha on pe gabe sitiruon do laho marbarita na uli, rap marbarita dohot hami jala mangajari hami mangulahon sude ragam ni parbaritaon.

Mangalehon apoapo tu diri nami be. Asa mangan partondion nami be, olo do sipata sintua ro tu jabu nami manang di Bale Harajaon laho mangalehon pangurupion dohot pangapulion na sian Bibel.​—Jakobus 5:14, 15.

Angkup ni ulaon di huria, adong do ulaon siganup ari ni angka sintua jala adong do parsaripeonna be na porlu disarihon jala diparateatehon. Angka dongan naung manghalojahon on patut ma taargai.—1 Tessalonik 5:12, 13.

• Angka aha do na diulahon sintua di huria?

• Songon dia do dibahen sintua laho manarihon hami?

Hata ni Bibel, adong do dua punguan ni halak Karisten na padalanhon angka ulaon di huria, i ma ”angka sintua dohot pangurupi”. (Pilippi 1:1) Di ganup huria, somalna adong marpigapiga sintua dohot parhobas. Aha do ulaon ni parhobas i?

Mangurupi punguan ni sintua. Angka parhobas, na matoras manang na poso, i ma angka baoa na marroha partondion, tarparbaga, jala marsitutu. Dipangke nasida do gogona mangula siulaon na somal na ringkot tu huria dohot tu Bale Harajaon. Dibahen i, angka sintua boi ma denggan mandalanhon pangajarion dohot mamparmahan.

Mangulahon angka siulaon. Na deba sian parhobas manjakhon angka halak na ro tu parpunguan. Deba nai mangaradoti tata soara, mambagi buku, maniop parhepengon ni huria, jala patuduhon inganan laho marbarita. Dohot do nasida tongtong mangurus Bale Harajaon. Boi do dipangido sintua nasida laho mangurupi angka na matua. Patut do asa sude hormat maradophon angka parhobas ala na olo nasida rade mangulahon angka ulaon aha pe na dipangido tu nasida.​—1 Timoteus 3:13.

Mangalehon sitiruon songon sahalak Karisten na burju. Pangula dipillit alani parniulaan nasida na denggan di partondion. Tingki na pasahathon turpuk di ulaon parpunguan, dipatogu nasida do partondion nami. Ala sitiruon do nasida di ulaon parbaritaon na uli, hami pe gabe hibas. Ala olo do nasida marsiurupan, on gabe manamba silas ni roha jala mambahen sada ni roha. (Epesus 4:16) Di tingkina, nasida pe boi do mangula gabe sintua.

• Angka baoa na songon dia do angka parhobas?

• Songon dia do nasida laho mangurupi ulaon di huria asa denggan?

Buku na Badia na disurat di hata Junani jotjot manghatahon taringot si Barnabas dohot apostel Paulus. Nasida do sintua kaliling na ro manopot angka huria di tingki na parjolo. Boasa? Ala sari do nasida tu haporluon partondion ni angka dongan sahaporseaon nasida. Didok si Paulus do molo naeng do rohana ”mangulahi marnida angka donganta” laho mangida boha do nasida. Rade do rohana naeng mardalan marratus kilometer laho ro pahothon partondion nasida. (Ulaon ni Apostel 15:36) Angka sintua kaliling nami saonari on pe giot do roha ni nasida laho mangulahon sisongon i.

Ro do nasida laho pahothon partondion nami. Ganup sintua kaliling manopot hirahira 20 huria, jala sasaminggu nasida di sada huria, dua hali ma ditopot huria i di bagasan sataon. Godang do laba na didapot hami sian pangalaman ni nasida dohot ripena di angka naung marripe. Diusahahon nasida do laho mananda nasa ruas ni huria i, na matua, dohot na poso, jala girgir do nasida laho mangurupi hami marbarita na uli dohot mangajar. Diparade angka sintua kaliling on do tingki raphon angka sintua na di huria i, laho mamparmahani ruas na adong di huria i. Jala, laho patoguhon haporseaon nami, dipasahat nasida do angka jamita na mangapoi di parpunguan dohot di parpunguan na bolon.​—Ulaon ni Apostel 15:35.

Diparrohahon nasida do sude. Dilehon angka sintua kaliling do rohana tu partondion ni angka huria i. Marrapot do angka sintua kaliling dohot angka sintua di huria i dohot angka parhobas, laho mangida hamajuon naung dibahen jala mangalehon poda na mura ulaon laho mandalanhon tanggung jawab di huria i. Diurupi nasida do angka parintis asa marhasil laho marbarita na uli. Las do roha nasida marsitandaan tu angka na baru ro tu huria i, jala manangihon hamajuon partondion nasida. Angka sintua kaliling on mangalehon dirina gabe ”donganhu manghongkop hamu”. (2 Korint 8:23) Haporseaon dohot panghobasion nasida tu Debata patut do taihuthon.​—Heber 13:7.

• Aha do na tinuju ni sintua kaliling manopoti angka huria?

• Aha do laba na boi tadapot sian haroro ni nasida?

Molo adong na hona mara, Sitindangi Ni Jahowa pintor hatop mangatur asa adong na mangalehon pangurupion tu angka dongan na hona mara i. Angka i patuduhon na marholong situtu do hami. (Johannes 13:34, 35; 1 Johannes 3:17, 18) Songon dia do dibahen hami laho mangurupi?

Silehonlehon hepeng. Tingki masa haleon potir di huta Judea di tingki na parjolo, angka halak Karisten di huta Antiokia manongoshon hepeng laho mangurupi angka dongan sahaporseaon nasida. (Ulaon ni Apostel 11:27-30) Suang songon i ma, molo diboto hami adong angka dongan di luat na asing na manghilala hasusaan, hami manongoshon silehonlehon marhitehite huria asa sahat tu angka na manghaporluhon.​—2 Korint 8:13-15.

Paradehon silehonlehon na boi dipargunahon. Angka sintua na adong di luat na hona mara mangalului angka ruas ni huria laho mangida songon dia do nasida. Punguan pangurupi boi mangatur laho mambagihon sipanganon, siinumon, pahean, inganan, ubat dohot pangubati. Godang Sitindangi na pande mangalehon dirina asa lao sandiri jala mangalehon pangurupion manang padengganhon angka jabu dohot Bale Harajaon na sega. Alani parsadaan na adong di orhanisasi nami jala nunga jotjot hami rap marsiurupan, boi ma hami hatop mangalehon pangurupion. Tung pe hami mangalehon pangurupion ”gumodang ma tu donganta sahaporseaon”, hami pe marsitutu do laho mangurupi angka jolma na asing, aha pe ugamo nasida.​—Galatia 6:10.

Mangalehon pangurupion partondion dohot apulapul ni roha. Angka na hona mara tarlumobi manghaporluhon apulapul. Di tingki sisongon i ma, hami manghilala huaso na sian Jahowa, ”Sipangapul na sumurung”. (2 Korint 1:3, 4) Las do roha nami paboahon bagabaga ni Bibel tu angka halak na mandele, paposhon roha nasida na gira do ro Harajaon ni Debata paujunghon sude mara na mambahen pardangolan dohot sitaonon.​—Pangungkapon 21:4.

• Boasa boi gira angka Sitindangi mangurupi tingki adong mara?

• Aha do pangapulon na dilehon hami tu angka na hona mara?

Ndang sadia leleng andorang so mate, manghatai ma Jesus dohot opat siseanna i ma si Petrus, si Jakobus, si Johanes, dohot si Andreas. Tingki dipaboa tanda ni harorona di ariari parpudi, dihatahon Jesus ma sada sungkunsungkun na ringkot, ”Asa didia do naposo haposan jala na marroha, na pinabangkit ni indukna mangalehon angka naposona mangan di tingkina?” (Mateus 24:3, 45; Markus 13:3, 4) Dipapos Jesus do roha ni siseanna songon sada ’induk’ nasida, pajongjonganna do angka na mangalehon mangan partondion ni angka na mangihuthonsa di tingki ari parpudi. Ise do na didokna naposona?

Naposo on i ma punguan na metmet siihuthon Jesus angka na nimiahan ni tondi parbadia. ”Naposo” i ma na ni goaranna Punguan na Manguluhon Orhanisasi ni Sitindangi Ni Jahowa. Naposo on paradehon sipanganon partondion di tingkina tu angka dongan na manomba Jahowa. Sian naposo haposan on do manjalo ”bohal nasida di tingkina”.​—Lukas 12:42.

Naposo on manghobasi rumatangga ni Debata. (1 Timoteus 3:15) Dilehon Jesus do ulaon na balga tu naposo on laho manghobasi ulaon ni orhanisasi ni Jahowa di tano on songon manghobasi angka arta, manguluhon parbaritaon, jala mangajari hami marhitehite huria. Jadi, laho patupahon aha na dihaporluhon hami di tingkina, ”naposo haposan jala na marroha” mangalehon sipanganon partondion marhite publikasi na dipangke hami di ulaon parbaritaon, dohot marhite angka na dipasahat di parpunguan na somal dohot parpunguan bolon.

Naposo on haposan tu hasintongan ni Bibel dohot ulaon siulahononna i ma marbarita na uli, jala marroha laho manghobasi angka na hombar tu Kristus di tano on. (Ulaon ni Apostel 10:42) Dipasupasu Jahowa do ulaon nasida on martambatamba jala godang sipanganon partondion.​—Jesaya 60:22; 65:13.

• Ise do na pinabangkit ni Jesus laho mangalehon mangan partondion ni angka na mangihuthonsa?

• Boasa didok naposo on haposan jala marroha?

Di abad na parjolo, adong punguan na metmet ”angka apostel dohot angka pangituai” manghobasi songon punguan na mangaradoti orhanisasi na mambahen haputusan na ringkot na gabe siihuthonon ni sude ruas ni huria Karisten na nimiahan ni tondi. (Ulaon ni Apostel 15:2) Nasida sada soara mambahen haputusan dung diulas nasida aha na didok Bibel jala mangihuthon tudutudu sian tondi ni Debata. (Ulaon ni Apostel 15:25) I do sitiruon, na diihuthon saonari on.

Dipangke Debata laho mangulahon lomo ni rohaNa. Sian angka na nimiahan ni tondi parbadia do angka punguan na mangaradoti orhanisasi on jala nasida mangaradoti Hata ni Debata, jala mansai marparniahapan do nasida laho mangaradoti angka partondion dohot angka ulaon na asing. Ganup minggu do nasida marrapot laho mangulas na dihaporluhon ni angka dongan sahaporseaon di liat portibi on. Songon di abad na parjolo, tudutudu na sian Bibel dipasahat marhite surat manang sintua kaliling dohot angka dalan na asing. Sisongon on do na mangurupi ruas ni Debata asa marroha jala gabe sada mangulahon ulaon partondion. (Ulaon ni Apostel 16:4, 5) Punguan na Mangaradoti Orhanisasi on mangaradoti jala paradehon sipanganon partondion, patujolo ulaon mambaritahon taringot tu Harajaon, dohot mangaradoti sude dongan sahaporseaon na ditabalhon maniop tanggung jawab.

Tangi tu tudutudu na sian tondi ni Debata. Punguan na Mangaradoti Orhanisasi on, mangido panogunoguon sian Jahowa na marhuaso di surgo nang di tano on, dohot Jesus, i ma Ulu Ni Huria i. (1 Korint 11:3; Epesus 5:23) Ndang hirim roha nasida gabe Ulu ni huria. Nasida, dohot sude halak Karisten na asing na nimiahan ni tondi parbadia, ”diihuthon nasida do birubiru i [Jesus], manang tu dia pe i laho”. (Pangungkapon 14:4) Balga do roha ni Punguan na Mangaradoti Orhanisasi on molo tatangianghon nasida.

• Angka ise do na dohot gabe punguan na mangaradoti orhanisasi di abad na parjolo?

• Boha do Punguan na Mangaradoti Orhanisasi di tingkinta on mangido tudutudu sian Debata?

Goar ”Betel” sian hata Heber marlapatan ”Bagas ni Debata”. (1 Musa 28:17, 19) Suman do goar on pangkeon tu kantor ni Sitindangi Ni Jahowa na adong di liat portibi on i ma inganan laho manguluhon jala manghobasi ulaon parbaritaon. Punguan na Mangaradoti Orhanisasi, nasida maringanan di kantor pusat di New York, AS, jala sian i ma nasida mangaradoti ulaon ni angka kantor cabang na adong di ganup bangso. Sude nasida, na marulaon di angka inganan sisongon on didok ma nasida keluarga Betel. Songon somal ni sada parsaripeon, nasida rap maringanan dohot rap karejo, rap mangan, jala rap marsiajar Bibel di bagasan sada ni roha.​—Psalmen 133:1.

Inganan na tandi tu sada parsaripeon na rap karejo sian ias ni roha. Halak Karisten angka baoa dohot borua na marulaon di Betel dilehon do dirina dohot ganup tingkina laho mangulahon lomo ni roha ni Debata dohot patujolohon ulaon tu Harajaon. (Mateus 6:33) Ndang adong na manjalo gaji, alai diparade do inganan dohot sipanganon tu nasida jala diurupi do nasida di parhepengon tung pe ndang haru sadia, laho tu haporluan nasida sandiri. Ganup halak na karejo di Betel adong do karejona be, di kantor, di dapur, manang di inganan laho mangan. Adong do na marulaon di parcetakan manang panjilidan, dohot marulaon di bagian na paiashon, na paturehon pahean, na mangaradoti inganan, dohot angka na asing dope.

Inganan laho mangurupi ulaon mambaritahon Harajaon. Na rumingkot tinuju ni ganup Betel i ma paradehon angka na hombar tu hasintongan na sian Bibel tu sude jolma. Buku on ma sada sian na dipatupa. Punguan na Mangaradoti Orhanisasi on, nasida ma na mangaradoti angka na manurat. Dung i, dikirim ma angka buku on marhite komputer tu marratus angka panalin di liat portibi on, laos dicetak ma mamangke masin na mansai hatop di pigapiga parcetakan Betel, jala dikirim ma tu lobi sian 110.000 huria. Marhite angka ulaon na dikarejohon i, keluarga Betel mangurupi ulaon na rumingkot di tingki on—mambaritahon barita na uli.​—Markus 13:10.

• Ise do na marulaon di Betel, jala aha do na diparade tu nasida?

• Ulaon na rumingkot aha ma na diulahon di ganup Betel?

Angka anggota keluarga ni Betel manghobasi ulaon di angka departemen laho manarihon ulaon parbaritaon di sada manang piga luat. Adong na manghobasi laho marsalin hata, mancetak buku, manjilid buku, manongos lektur, patupahon rekaman soara/video, manang manarihon angka na asing dope.

Punguan na Mangaradoti ulaon di kantor cabang. Dihaposi Punguan na Mangaradoti Orhanisasi on do Punguan na mangaradoti kantor cabang, tolu halak manang lobi sintua na marbisuk laho padalanhon ganup kantor cabang. Punguan on sai tongtong do pasahathon barita tu Punguan na Mangaradoti Orhanisasi taringot tu hamajuon di ganup luat na ni radotanna, dohot angka parsoalan na olo ro. Alualu sisongon on mangurupi Punguan na Mangaradoti Orhanisasi on, laho mambahen haputusan taringot siulason tu buku di ari na mangihut, angka na hombar tu parpunguan na somal dohot tu parpunguan bolon. Suruan ni Punguan na Mangaradoti Orhanisasi, disuru do ro di tingkina tu angka kantor cabang laho mangalehon tudutudu tu Punguan na Mangaradoti Cabang taringot aha do sibahenon nasida laho mangulahon ulaon nasida. (Poda Sian Raja Salomo 11:14) Suruan ni kantor pusat pasahathon jamita di sada ulaon na sumurung na dipatupa laho patoguhon angka halak na adong di luat ni cabang i.

Mangalehon pangurupion tu angka huria di luat i. Angka na martanggung jawab di kantor cabang manolopi molo dipajongjong huria na baru jala manabalhon sintua dohot parhobas. Nasida do tongtong na manguluhon ulaon ni angka parintis, missionari, dohot sintua kaliling na mangaradoti wilayah cabang i. Nasida do na manguluhon parpunguan bolon, manguluhon pajongjong Bale Harajaon na baru, jala mangaradoti angka buku na ditongos tu huria, na dihaporluhon angka huria. Alani pangurupion ni kantor cabang di ulaon parbaritaon i gabe ”marruhut na denggan jala maratur”.​—1 Korint 14:33, 40.

• Songon dia do Punguan na Mangaradoti Cabang mangurupi Punguan na Mangaradoti Orhanisasi?

• Angka aha do na diulahon di kantor cabang?

Di na laho mambaritahon ”barita na uli” tu ”saluhut bangso dohot marga dohot hata dohot houm”, dibahen hami ma buku di bagasan hirahira 750 bahasa. (Pangungkapon 14:6) Songon dia do hami boi mangulahon ulaon on? Marhite pangurupion ni angka panurat na adong di godang negeri dohot angka penerjemah na dipillit mangulahon i—sude Sitindangi Ni Jahowa do nasida.

Surat na asli disurat dibagasan hata Inggris. Punguan na Mangaradoti Orhanisasi on, mangaradoti ulaon ni Punguan na Manurathon di kantor pusat. Punguan on manguluhon ulaon ni panurat na manghobasi di kantor pusat dohot di angka kantor cabang na asing. Ala na marragam do halak na adong di punguan on, hami pe mangulas hasomalan na marragam, dibahen i buku nami pe lam dihalomohon godang bangso ma.

Surat i ditongos tu angka panalin. Dung disusun jala ditolopi, surat i ditongos sian internet tu angka punguan panalin di liat portibi on, na mamareso manang naung une jala suman tu parpeak ni hata i. Dipamanat nasida do laho mandiori ”angka hata na sintong” na boi pasahathon lapatan ni teks hata Inggris tu bagasan hata nasida.​—Parjamita 12:10.

Komputer do na pahatophon parkarejoan i. Komputer ndang na boi manggantihon ulaon ni panurat dohot panalin. Alai, parkarejoan nasida boi lam hatop ala na adong kamus, program, dohot angka bahan riset na di komputer. Sitindangi Ni Jahowa mambahen Sistem Komputer Napabinsarhon Godang Hata (MEPS), sada program na boi pasadahon teks di bagasan marratus hata dohot gombar, jala mangatur parpeakna asa boi dicetak.

Boasa hami mangalehon nasa gogo nami, dohot tu hata na dipangke holan pigapiga ribu halak? Ala Jahowa do na manghalomohon asa ”saluhut jolma malua jala sahat mananda hasintongan i”.​—1 Timoteus 2:3, 4.

• Songon dia do pardalan ni panurathon buku nami?

• Boasa hami manalin buku di bagasan marragam hata?

Orhanisasi nami pabinsarhon jala mambagi marratus juta Bibel dohot angka buku na asing ganup taon ndang margarar. Hami pajongjonghon jala mangaradoti godang Bale Harajaon dohot kantor cabang. Hami mambalanjoi marribu halak na marulaon di Betel dohot misionari, jala hami pe mangalehon pangurupion molo masa sada mara. Olo do ra sungkunsungkun roha muna, ’Songon dia do sude on dibalanjoi?’

Hami ndang papunguhon parsampuluan, guguan, manang durungdurung. Tung pe mansai godang hepeng na dihaporluhon laho mambalanjoi ulaon marbarita na uli, ndang hea hami mangidoido hepeng. Lobi sian saabad naung salpu, majalla Joujou Paboahon na paduahon dipabinsar mandok na pos do roha nami Jahowa mangurupi jala ”tung na so hea mangidoido manang mangelekelek jolma laho mangurupi”—jala memang ndang hea!​—Mateus 10:8.

Ulaon nami diurupi sibasa-basa. Godang halak manghamuliatehon ulaon pangajarion sian Bibel na diulahon hami, gabe taronjar roha nasida mangalehon hepeng. Angka Sitindangi sandiri las do roha nasida mangalehon tingki, gogo, hepeng, dohot angka na asing laho mangulahon lomo ni roha ni Debata di liat portibi on. (1 Kronika 29:9) Angka na taronjar rohana mangalehon hepeng boi do dipamasuk tu poti inganan ni hepeng na adong di Bale Harajaon dohot di parpunguan na bolon. Boi do muse lehononmu marhite situs webnami, jw.org. Hepeng na dipapungu tu poti on godangan silehonlehon sian angka halak na bulus, songon sahalak na mabalu jala pogos na dipuji ni Jesus ala mandabuhon dua rimis tu bagasan poti parasian di bagas joro. (Lukas 21:1-4) Alani i, manang ise pe boi do tongtong ”marguru tu na tarbahensa” laho dilehon gabe silehonlehon na ”nionjar ni rohana”.​—1 Korint 16:2; 2 Korint 9:7.

Pos do roha nami Jahowa sai tongtong mangonjar roha ni angka na naeng ’pasangaphon Ibana marhite sian sandok pangomoan’ laho mangulahon lomo ni roha ni Debata marhite ulaon mambaritahon Harajaon.​—Poda Sian Raja Salomo 3:9.

• Aha do na mambahen orhanisasi nami imbar tu ugamo na asing?

• Laho tu dia do dipangke hepeng na dipapungu i?

Songon na tarida sian goar Bale Harajaon, parsiajaran Bibel na diulas dison i ma na tartuju tu Harajaon Ni Debata—ondolan ni parbaritaon ni Jesus.​—Lukas 8:1.

Inganan laho mangulahon lomo ni roha ni Jahowa di sada luat. Sitindangi ni jahowa manguluhon parbaritaon na uli taringot tu harajaon sian inganan on. (Mateus 24:14) Adong do marpigapiga rumang dohot parbalga ni Bale Harajaon i, alai sudena i holan inganan na bulus, jala adong do deba bale on dipangke lobi sian sada huria. Nuaeng on, nunga dipajongjong hami marpulu ribu Bale Harajaon angka na baru (hira-hira lima ganup ari) laho mangampu huria na martambatamba i. Songon dia do i boi diulahon?​—Mateus 19:26.

Dipajongjong sian hepeng silehonlehon. Sude hepeng sibasabasa on ditongoshon tu kantor cabang asa boi dipargunahon angka huria tingki pajongjonghon manang padengganhon Bale Harajaon.

Dipajongjong angka na so digaji na ro sian marragam huta. Di godang inganan, adong do Punguan Sipajongjong Bale Harajaon. Punguan on ma angka tungkang na nionjar ni roha na olo pinda tu huta na dao sian sada huria tu huria na adong di sada luat, mangurupi huria na adong disi laho pajongjonghon Bale Harajaon nasida. Di angka luat na asing, disuru ma angka sitindangi na tau laho mangaradoti ulaon, pajongjonghon manang padengganhon Bale Harajaon di inganan naung ditontuhon. Nang pe godang na boi martungkang na mangurupi di luat i, alai gumodang ma angka na ro sian huria na adong di inganan i. Sude on boi tarpatupa holan alani pasupasu sian Jahowa do, dohot ala roha na marsitutu sian sude angka na mangoloi Ibana.​—Psalmen 127:1; Kolosse 3:23.

• Boasa inganan nami laho manomba digoari Bale Harajaon?

• Songon dia do torop Bale Harajaon boi dipajongjong di sandok liat portibi on?

Goar ni Debata na badia tarida do di sude Bale Harajaon ni Sitindangi Ni Jahowa. Alani i, ringkot do dihilala hami laho manjaga bangunan i asa tongtong ias, tama, jala tarurus i ma hasurungan dohot turpuk na ringkot sian panombaon nami na badia. Sude boi parsidohot.

Rade laho paiashon dung sae parpunguan. Dung sae parpunguan, las do roha ni sude na ro tu parpunguan i laho paiashon dohot patuturhon Bale Harajaon. Diatur do tingki sahali saminggu laho paiashon humaliang inganan i. Sahalak sintua manang parhobas do na manguluhon angka parkarejoan na laho diulahon, somalna adong daptar siparesoon na laho diihuthon. Hombar tu na dihaporluhon, adong na rade manapu, mangapel, mangalap, patuturhon kursi, paiashon kamar mandi, paiashon kaca dohot sormin, mambolonghon sampah manang paiashon alaman. Pinomatna sahali sataon, adong sadari dilehon tingki laho paiashon sude Bale Harajaon i. Molo ditogihon angka dakdanak asa dohot rap paiashon, sada pangajarion nami ma i tu nasida isara pataridahon panghargaan tu inganan panombaon nami.​—Parjamita 5:1.

Rade mangurupi molo adong na porlu dipature. Ganup taon, dipareso do saluhut na dibagasan dohot na di ruar ni Bale Harajaon. Dung i, sai tongtong do diradoti bale i asa tarurus, asa unang godang pangaluaran na so dihaporluhon. (2 Kronika 24:13; 34:10) Bale Harajaon na ias jala tarurus i ma inganan na tama laho manomba Debata nami. Molo dohot hami, i patuduhon molo hami manghaholongi Jahowa dohot mangargai inganan parpunguan nami. (Psalmen 122:1) Jala on pe gabe manghorhon na denggan tu roha ni jolma na torop.​—2 Korint 6:3.

• Boasa hami ingkon paiashon Bale Harajaon nami?

• Songon dia do dibahen laho manjaga asa ias Bale Harajaon i?

Giot do roha muna laho manambai parbinotoan muna sian Bibel? Giot do roha muna naeng mamboto taringot sada ayat, halak, inganan, manang ugasan na hea didok dibagasan Bibel? Manang, hea do hamu marpingkir songon dia Hata ni Debata boi mangurupi hita tingki adong parungkilon? Molo giot roha muna, parhaseang ma perpustakan na adong di Bale Harajaon.

Paradehon angka buku parsiajaran na mangurupi molo naeng manulingkiti. Olo do ra, ndang sude angka buku na dipabinsar ni Sitindangi Ni Jahowa na sian Bibel adong di hamu. Alai, adong do di perpustakaan Bale Harajaon ganup angka buku na baru. Ra adong do disi Bibel sian marragam salinan hata, kamus na mansai denggan, dohot angka buku na asing na boi mangurupi hita. Boi do hamu mampargunahon perpustakaan i tagan so marpungu manang dung sidung parpunguan. Molo adong komputer, olo do ra adong Watchtower Library disi. I ma program komputer na marisi godang angka buku nami jala adong sipilliton na mura dipargunahon laho mangalului hatorangan taringot sada parsiajaran, hata, manang ayat.

Marlaba tu na dapot bagian di Parpunguan Hangoluan dohot Pangkobasion. Boi do pangkeonmu perpustakaan na adong di Bale Harajaon tingki paradehon tugas. Na mangaradoti perpustakaan on, i ma sintua na mangkobasi Parpunguan Hangoluan dohot Pangkobasion. Ibana mamastihon angka buku na baru nunga adong jala denggan disusun. Ibana manang na mangajari Bibel tu hamu boi patuduhon songon dia do laho mangalului hatorangan na dihaporluhon hamu. Alai, sude buku i ndang boi diboan haluar sian Bale Harajaon. Jala, hita pe ingkon manjaga asa tongtong denggan paratur ni angka buku i jala unang digorgeti.

Bibel patoranghon molo laho mandapot ”parbinotoan ni Debata”, hita ingkon olo mangalului ”songon arta na buni”. (Poda Sian Raja Salomo 2:1-5) Perpustakaan di Bale Harajon boi mangurupi hamu laho mangalului parbinotoan tu Debata.

• Angka buku parsiajaran aha ma na adong di perpustakaan di Bale Harajaon?

• Ise do na boi mangurupi hamu laho mampargunahon perpustakaan on?

Jesus Kristus pabotohon tu angka siihuthon ibana, ”Naeng songon i ma marsinondang palito muna di jolo ni halak, asa diida angka pambahenan muna na denggan i, asa dipuji nasida ama muna na di banua ginjang i.” (Mateus 5:16) Dibahen i, dipangke hami do teknologi sinuaeng, Internet. Situs webnami, jw.org, i ma na boi mangalehon hatorangan na sintong taringot tu haporseaon nami dohot ulaon ni Sitindangi Ni Jahowa. Aha do na dapot idaon mu disi?

Alus ni Bibel na jotjot tasungkun. Boi do idaonmu alus ni angka sungkunsungkun na ringkot na jotjot disungkun halak. Umpamana, risalah Boi do Salpu Parungkilon On? na asing muse, Boi do na Mate Mulak Mangolu? nunga diparade lobi sian 600 bahasa. Boi do tongtong idaonmu Bibel Terjemahan Dunia Baru di bagasan lobi sian 130 bahasa dohot pigapiga buku na boi mangurupi hamu marsiajar tu Bibel, songon buku Aha do na Diajarhon Bibel tu Hita? dohot Joujou Paboahon dohot Sadarlah! na imbaru dipabinsar. Godang angka publikasi on boi dijaha manang na dijahahon na boi tabege di Internet manang dibuat di bagasan pormat MP3, PDF, manang EPUB. Gariada boi do dicetak pigapiga alaman asa dilehon tu halak na manghalomohon, hombar tu hatana! Deba buku di hata ni na ngungu rade do di bagasan video. Boi do buaton drama panjahaon sian Bibel, drama Bibel, dohot musik na tabo begeon di tingki na lumbang.

Hatorangan sisaonari taringot tu Sitindangi Ni Jahowa. Adong do tongtong hatorangan sisaonari dohot klip video taringot ulaon nami di liat portibi on, angka na masa tu Sitindangi Ni Jahowa, dohot ulaon na mangurupi angka dongan na hona mara. Boi do idaonmu hatorangan taringot tu parpunguan bolon sitolu ari di tingki na laho ro dohot inganan ni angka kantor cabang nami.

Marhite sian on, dipatarida hami ma sinondang tu inganan na dao di tano on. Angka halak sian ganup banua, songon Antartika, manghilalahon laba ni situs on. Ditangianghon hami do asa ”marlojong hata ni Tuhan i” jala marsangap, songon na dihamu.​—2 Tessalonik 3:1.

• Songon dia do jw.org mangurupi lam godang halak mananda hasintongan na sian Bibel?

• Aha do na laho siluluanmu di situs webnami?