Nunga godang halak na so olo be laho tu parmingguan ala ndang mandapot pangantusion nasida manang apulapul. Alani i, marhua do hamu ro tu parpunguan ni Sitindangi Ni Jahowa, na somal didok hami ”parpunguan”? Aha do na boi dapot muna disi?

Las ni roha ala rap marpungu dohot angka halak na lambok dohot parholong. Di abad na parjolo, halak Karisten diorhanisasi di bagasan ruas ni angka huria, jala dibahen nasida do parpunguan laho manomba Debata, mamparsiajari Bibel, huhut marsiantoan. (Heber 10:24, 25) Tingki marpungu dibagasan gok holong, dihilala nasida do songon na raphon aleale, i ma angka dongan sahaporseaon nasida. (2 Tessalonik 1:3; 3 Johannes 14) Hami mangihuthon tiruan na binahen ni halak Karisten di abad na parjolo jala rap manghilala halalas ni roha.

Adong labana molo mamparsiajari songon dia mangulahon prinsip ni Bibel. Songon angka halak na disurat di Bibel, baoa, borua, suang songon i dakdanak rap marpungu. Angka guru na marbisuk boi mamangke Bibel laho mangurupi hita mangulahon angka prinsip na di bagasan parngoluon siganup ari. (5 Musa 31:12; Nehemia 8:8) Sude boi dohot rap marende jala mangalehon hatorangan, dibahen i boi hita paboahon haporseaon taringot pangkirimonta.​—Heber 10:23.

Dipasupasu ala dipatogu haporseaonta tu Debata. Dipaboa Apostel Paulus tu sada ruas huria di tingki i, ”Ai masihol do ahu marnida hamu, . . . Naeng dapotan hiras ni roha nang ahu sian hamu hinorhon ni haporseaonta be.” (Rom 1:11, 12) Molo sai ro hita tu parpunguan pajumpang dohot dongan sahaporseaon lam dipatogu ma haporseaonta dohot pos ni rohanta laho mangulahon na hombar tu prinsip ni Bibel.

Digokhon hami do hamu asa ro tu parpunguan di huria nami jala boi ma hamu manghilala labana. Dijanghon do hamu di bagasan las ni roha. Ndang adong guguan​—ndang adong durungdurung.

• Sitiruon sian dia do na diihuthon di parpunguan ni huria nami?

• Aha ma laba na tadapot molo ro hita tu parpunguan huria Karisten?

Tung pe hami ingkon mamolus ramba bolak, udan, las ni ari sai ro do hami tongtong tu parpunguan nami. Tung pe mangadopi godang parungkilon jala loja ala naung karejo sadari manipat, boasa Sitindangi Ni Jahowa marsitutu laho pajumpang dohot dongan sahaporseaon di huria nasida?

Asa mangolu partondion nami. Si Paulus manjujui angka dongan na adong di huria asa ”marsiantoan ma hita”. (Heber 10:24) Hata on marlapatan ”manat mamingkirhon” manang mananda na sada tu na asing. Jadi hata ni si Paulus on mangonjar roha nami asa manarihon dongan na asing. Lamu ditanda hami sasaripe na asing na adong di huria, lamu diboto hami ma na adong do pigapiga sian nasida naung boi mangatasi ambatambat na tong diadopi hami, jala nasida boi mangurupi hami laho mangatasi i.

Mambahen sada paralealean na gomos. Di parpunguan, hami marpungu, ndang tu asal dongan, tu aleale na solhot do. Di tingki na asing, hami pe rap mardalani do jala rap manganmangan. Aha ma laba ni parsaoran sisongon on? Hami marsiajar asa lam mangargai na sada tu na asing, jala lamu gomos ma holong nami sama hami. Molo adong aleale nami na marsitaonon, las do roha nami mangurupi nasida ala naung gomos paralealean nami. (Poda Sian Salomo 17:17) Molo rap marsaor hami dohot sude ruas ni huria, patuduhon na ”denggan marsipasarisarian” do hami.​—1 Korint 12:25, 26.

Hami manogihon hamu asa mamillit aleale na mangulahon lomo ni roha ni Debata. Boi do dapot muna aleale sisongon i di huria Sitindangi Ni Jahowa. Unang ganggu roha muna laho marsaor tu hami.

• Boasa mansai marlaba parsaoran di parpunguan?

• Andigan do adong tingki muna laho mananda huria nami lam jonok?

Halak Karisten di abad parjolo somalna marende, martangiang, jala manjaha huhut mangulas Buku na Badia tingki na marpungu i nasida; ndang adong disi ritual na asing. (1 Korint 14:26) Hirahira songon i ma parpunguan nami.

Parsiajaranna sian Bibel jala boi do diulahon. Di ujung ni minggu, ganup huria marpungu laho manangihon jamita sian Bibel 30 minut taringot songon dia do Bibel marlapatan tu parngoluon dohot tu tingkinta nuaeng on. Dipangidohon asa sude manjaha angka ayat na adong dipaboa di jamita i. Dung sae jamita i, adong Parsiajaran ”Joujou Paboahon”, i ma na dibahas sian Joujou Paboahon siparsiajaran, jala sude halak na ro boi mangalehon pandapot. Pambahasan on mangurupi hami mangulahon sitiruon na adong di Bibel di parngoluon nami. Sisongon i do tong diparsiajari di lobi sian 110.000 huria di sandok liat portibi on.

Diurupi do hami asa denggan mangajar. Di parsitongaan ni minggu, marpungu do hami laho mangihuthon acara na digoari Hangoluan dohot Pangkobasion ni Halak Kristen. Bahan dibuat sian Hangoluan dohot Pangkobasion na Laho Diparsiajari. Bagian na parjolo, i ma Arta na Arga na Adong di Bibel. Di bagian i, diurupi do hami mangantusi hatorangan taringot tu sada bagian sian Bibel naung jumolo dijahahon. Dung i, bagian Marsitutu ma Hamu di Ulaon Marbarita, adong pertunjukan na patuduhon cara marsiajar Bibel dohot halak na asing. Sahalak sintua na dipillit mangalehon tudutudu tu hami asa lam denggan manjaha dohot mangajari. (1 Timoteus 4:13) Bagian na parpudi, i ma Hangoluan ni Halak Kristen na manjujui hami asa mangihuthon prinsip ni Bibel di parngoluon siganup ari. Di bagian on adong sungkunsungkun maralus na boi pabagashon pangantusionnami tu isi ni Bibel.

Molo ro hamu tu parpunguan nami, boi do idaonmu songon dia denggan ni parsiajaran Bibel na binegemu.​—Jesaya 54:13.

• Angka ulaon aha do na diida hamu di parpunguan ni Sitindangi Ni Jahowa?

• Parpunguan dia ma na olo hamu ro di minggu i?

Diida hamu do gombar ni Sitindangi Ni Jahowa na di buku on? Mansai patut do pahean nasida tingki ro tu parpunguan. Boasa mansai diparrohahon hami pahean nami?

Laho pataridahon unduk na sian roha tu Debata nami. Toho, ndang siida rupa Debata. (1 Samuel 16:7) Alai, tingki hami marpungu laho manomba, lomo do roha nami pasangaphon Debata dohot angka dongan sahaporseaon nami. Aut sugari hita mangadopi sahalak panguhum di pangadilan, tontu hita mamparrohahon paheanta marningot hadirion ni sahalak panguhum. Suang songon i do, pahean nami di parpunguan patuduhon pangargaan nami tu ”Siuhumi liat portibi on”, Debata Jahowa, dohot tu inganan parpunguan nami.​—1 Musa 18:25.

Laho patuduhon prinsip ni ngolu nami. Dipaboahon Bibel tu halak Karisten, asa marpahean hahormaton dohot pingkiran na ias. (1 Timoteus 2:9, 10) Marpahean ”hahormaton” lapatanna ndang mamangke pahean na marmengomengo, ndang patut, manang na so tama. Jala, ”pingkiran na ias” mangurupi hami laho mamillit pahean na tama idaon, na so rundut marmengomengo. Tung pe hami mangihuthon angka prinsip on, godang dope pahean na boi sipilliton laho pangkeon nami. Marhite pahean na ias dohot na patut, ”asa sandok marsangap poda ni Debata” dohot ”dipasangap nasida Debata”. (Titus 2:10; 1 Petrus 2:12) Molo marpahean na patut tu parpunguan, mangkorhon na denggan ma on tu halak na asing, taringot panombaon tu Jahowa.

Tung sura pe ndang adong pahean muna na pantas, unang ganggu roha muna laho ro tu Bale Harajaon. Paheanta ndang porlu arga, manang ingkon mansai uli asa tarida na ias, patut dohot pantas.

• Sadia ringkot do mamparateatehon pahean tingki manomba Debata?

• Prinsip apala na dia do na boi mangurupi hita laho mamillit pahean?

Molo nunga marsiajar hamu rap dohot sada sian Sitindangi Ni Jahowa saonari, andorang so diulas dope tontu dipamanat hamu parjolo parsiajaran i. Songon i ma nian bahenonmu andorang so ro tu parpunguan asa godang labana di hamu. Mansai godang do labana boi tahilala molo sai tongtong ta pasomal ringgas marsiajar.

Tontuhon tingki dohot inganan laho marsiajar. Andigan do tingki na dumenggan di hamu boi mangalehon roha laho marsiajar? Manogot do andorang so karejo manang tingki botari dung modom angka ianakhon muna? Tung pe ndang boi leleng hamu marsiajar, tontuhon ma sadia leleng tingki na boi dipangke hamu laho marsiajar, unang paloas manang aha pe na manggugai hamu. Lului ma inganan na denggan, jala padao ma angka na boi manggugai, pamate ma radio, televisi, manang handphone. Martangiang ma andorang so marsiajar asa boi dilehon hamu roha muna mamparsiajari Hata ni Debata ndang mamingkirhon angka na asing.​—Pilippi 4:6, 7.

Tandai ma na laho diparsiajari, jala bahen ma asa boi mangalehon hatorangan. Parjolo sahali, pingkirhon ma hirahira aha do na laho diparsiajari taringot tu judul i. Pingkirhon ma angka judul ni parsiajaran i, dung i ida ma songon dia angka pasal i domu tu angka judul i, jala ida ma angka gombar dohot sungkunsungkun na pahantushon apala na ringkot disi. Dungkon i, jaha ma ganup paragrap, jala lului ma alus ni sungkunsungkun na adong disi. Ida huhut jaha ma angka ayat na adong disi, jala pingkirhon ma songon dia angka ayat i domu tu parsiajaran i. (Ulaon ni Apostel 17:11) Dung dapot muna alusna, tandai ma pigapiga angka hata na boi mangurupi hamu mangingot alusna. Dung i, molo olo hamu, boi do hamu martudu di parpungan laho pasahathon alus manang hatoranganta sandiri.

Molo godang diparsiajari hamu di parpunguan ganup minggu, lamu godang ma parbinotoanmu sian Bibel.​—Mateus 13:51, 52.

• Hasomalan aha do na porlu bahenonmu laho patupahon na laho diparsiajari di parpunguan?

• Songon dia do hamu boi patupahon hatorangan na laho dipasahat di parpunguan?

Sian na jolo, dihalomohon Jahowa do asa ganup ripe marpungu laho patoguhon partondion huhut laho pasolhothon na marsaripe. (5 Musa 6:6, 7) I do mambahen ganup ripe ni Sitindangi Ni Jahowa, mangalehon tingki ganup minggu—manghatai na ringkot di partondion na hombar tu hinaporluhon nasida, di tingki na longgar. Nang pe sasada hamu maringanan, boi do aturonmu tingki laho pajonokhon dirimu tu Debata, i ma marsiajar sian sada ruhut ni Bibel, holan hamu sambing.

Tingki laho pajonokhon diri tu Jahowa. ”Pajonok hamu ma tu Debata, dung i pajonohonna ma tu hamu.” (Jakobus 4:8) Di na mamparsiajari angka parange dohot ulaon ni Jahowa na tarsurat di Bibel, boi ma hami lam mananda Ibana. Sada dalan na mura laho mamungka panombaon na marsaripe i ma rap manjaha Bibel huhut marsoara, boi mangihuthon tording sasaminggu na adong di Hangoluan dohot Pangkobasion. Sude na adong di ripe i boi margantiganti manjahahon sabagian sian Bibel, dung i rap mambahas aha ma na boi diulahon sian i.

Tingki asa boi lam solhot na marsaripe. Na marripe, natuatua dohot ianakhon, boi do lam solhot sude nasida tingki na rap mamparsiajari Bibel. I ma nian ulaon na pasonang roha jala na dipaimaima ganup minggu. Hombar tu umur ni dakdanak, boi do pilliton ni natuatua aha do na suman laho dibahas, tarsongon mamangke angka rubrik na adong di Joujou Paboahon dohot Sadarlah! manang di situs webnami, jw.org. Boi do sungkunonmu aha do angka parsoalan na ni adopan ni ianakhon muna di singkola jala boha do bahenon ni nasida laho mangatasi i. Tonton hamu ma JW Broadcasting (tv.jw.org) dung i, rap ma hamu mangulas parsiajaran sian i. Boi do tongtong marsiajar mangendehon logu na laho diendehon di parpunguan dung sidung boi ma manganhon sipanganon.

Ulaon na sumurung on, i ma rap manomba tu Jahowa ganup minggu boi do i mangurupi sude na saripe manghalomohon hata ni Debata, jala sai na lehononNa do pasupasuNa godang tu hita.​—Psalmen 1:1-3.

• Boasa dilehon hami tingki laho panombaon na marsaripe?

• Songon dia do natuatua boi mambahen ulaon on na gabe pasonanghon sude na di saripe i?

Boasa angka halak on idaon marlas ni roha? Ala ro nasida tu sada sian parpunguan bolon nami. Songon bangso ni Debata na jolo, diparentahon do laho marpungu tolu hali sataon, sai tarpaima do hami laho ro tu parpunguan bolon. (5 Musa 16:16) Ganup taon, dibahen hami do tolu parpunguan na bolon: dua hali parpunguan bolon na sasadari dohot parpunguan bolon sitolu ari. Aha do labana di hami molo ro tu angka parpunguan na bolon i?

Lam hot ma paralealeon nami. Songon bangso Israel marlas ni roha mamuji Jahowa ”di bagasan angka luhutan”, songon i do dihilala hami di tingki manomba tu Debata di angka ulaon na sumurung on. (Psalmen 26:12; 111:1) Sada tingki na denggan do di hami laho pajumpang jala marsaor dohot Sitindangi na marroan sian huria di luat na dao manang sian bangso na asing. Di tonga ni ari, rap mangan ma hami di inganan parpunguan bolon i, gabe tamba ma las ni roha nami di ulaon na patoguhon partondion on. (Ulaon ni Apostel 2:42) Disi, dihilala hami ma holong na pasadahon dohot ”angka dongan” di liat portibi on.​—1 Petrus 2:17.

Diurupi do hami asa mangolu partondion nami. Mandapot laba do bangso Israel dung ”tangkas diantusi nasida hata” ni Buku na Badia na dipatorang tu nasida. (Nehemia 8:8, 12) Arga do di hami pangajarion na sian Bibel na dapot nami di parpunguan bolon. Ganup parpunguan na bolon on judulna marojahan tu Bibel. Marhite jamita, dohot jamita na dipasahat pigapiga halak (simposium), sitonduron na tabo idaon dohot begeon, marsiajar do hami laho mangulahon lomo ni roha ni Debata di parngoluon nami. Balga situtu do roha nami di na manangihon pangalaman ni angka dongan na boi malua sian abatabat na somal tu halak Karisten di tingki na susa saonari on. Di parpunguan bolon si tolu ari, jotjot do dipentashon sada drama na sian Bibel na mangalehon pangajarion. Di ganup parpunguan na bolon, dibahen do pandidion tu angka halak na laho manghatindanghon di jolo ni na torop naung dilehon do dirina tu Debata.

• Boasa parpunguan na bolon sada ulaon na pasonanghon roha?

• Aha do laba na boi tadapot molo ro hita tu parpunguan bolon?

Tagan so mate Jesus, didok ma, ”Laos baritahononhon do barita na uli on na taringot tu Harajaon i di liat portibi on; dung pe i asa ro ujungna.” (Mateus 24:14) Songon dia ulaon mambaritahon Harajaon, manang marbarita, di liat portibi on diulahon? Mangihuthon sitiruon naung ditinggalhon Jesus tingki di tano on ibana.​—Lukas 8:1.

Marsitutu do hami laho manjumpangi angka halak di jabu nasida. Diajari Jesus do angka siseanna laho mambaritahon barita na uli sian jabu tu jabu. (Mateus 10:11-13; Ulaon Ni Apostel 5:42; 20:20) Angka parbarita na di abad parjolo i diparentahon laho marbarita di luat naung ditontuhon. (Mateus 10:5, 6; 2 Korint 10:13) Saonari on, ulaon parbaritaon nami pe denggan diuluhon, jala ganup huria dilehon do luat naung ditontuhon laho sikarejoan. Songon i ma, hami boi manggohi parenta ni Jesus laho ”manjamitahon dohot mangkatindangkon tu na torop”.​—Ulaon ni Apostel 10:42.

Marsitutu do hami laho manjumpangi angka halak di dia pe nasida. Dilehon Jesus do sada sitiruon marbarita di inganan na torop jolma, songon di topi tao manang di jonok ni mata mual. (Markus 4:1; Johannes 4:5-15) Ditaringoti hami do Bibel tu angka jolma manang di dia pe—di dalan, di onan, di topi laut, manang marhite telepon. Asing ni i hami pe marbarita do tu hombar jabu, dongan sakarejo, dongan sasingkola, dohot tu angka sisolhot molo adong tingki na pas. Sude na dibahen hami on laho mangalehon dalan tu marjuta halak di liat portibi on asa mambege ”hatuaonna”.​—Psalmen 96:2.

Lomo do roha muna laho paboahon barita na uli taringot Harajaon ni Debata dohot labana di hita tu ari na naeng ro? Unang ma holan di hita sambing barita panghirimon on. Hatop ma paboahon tu angka halak!

• ”Barita na uli” aha do na ingkon dibaritahon?

• Songon dia do Sitindangi Ni Jahowa mangihuthon isara ni Jesus marbarita?

Hata ”parintis” jotjot didok tu halak na lao tu sadasada luat laho mamungka dalan tu halak na asing. Jesus pe boi do didok parintis alana ibana disuru tu tano on laho marbarita huhut mamungka dalan laho tu hangoluan. (Mateus 20:28) Saonari on, angka na mangihuthon ibana pe mangalehon gok tingkina laho ’mamodai saluhut bangso’. (Mateus 28:19, 20) Jala, adong do pigapiga sian hami boi parsidohot di ulaon na digoari parintis.

Parintis i ma halak na mangalehon sude tingkina marbarita. Sude do Sitindangi Ni Jahowa parbarita na uli. Alai, adong do deba na mangalehon tingki na gumodangan asa boi gabe parintis biasa, dipangke ma tingkina 70 jom ganup bulan marbarita na uli. Dibahen i, godang do na holan satonga ari ma karejo mangalului hepeng. Adong do na digoari parintis istimewa, nasida disuru tu inganan manang tu luat na mamorluhon parbarita. Dipangke nasida do tingkina 130 jom manang lobi sian i di ulaon i ganup bulan. Las do roha nasida disi nang so godang hepeng ditiop, jala pos do roha nasida diboto Jahowa do aha angka na ringkot na dihaporluhon nasida. (Mateus 6:31-33; 1 Timoteus 6:6-8) Na deba ala so boi mangalehon tingki na godang, boi do gabe parintis ekstra i ma na mangalehon 30 manang 50 jom sabulan i ma dibahen laho manambai tingki nasida marbarita na uli.

Parintis na taronjar ala manghaholongi Debata dohot dongan jolma. Songon Jesus, diparrohahon hami do godang na manghaporluhon panogunoguan di partondion. (Markus 6:34) Jala, adong parbinotoan nami na boi mangurupi nasida saonari jala na boi mangalehon panghirimon situtu tu joloan ni ari on. Holong tu dongan jolma do umbahen na taronjar sasahalak parintis laho mangalehon godang tingki dohot gogo laho mangurupi dongan na asing di partondion. (Mateus 22:39; 1 Tessalonik 2:8) Songon tamba ni i, lam togu ma haporseaonna, lam jonok tu Debata, jala manghilala silas ni roha.​—Ulaon ni Apostel 20:35.

• Patorang ma aha do na digoari parintis?

• Aha do mambahen angka parintis mangalehon gok tingkina?

Nunga leleng pangajarion tu partondion gabe partinandaan na tandi sian Sitindangi Ni Jahowa. Adong do singkola tu angka na mangalehon gumodangan tingkina laho mambaritahon barita taringot Harajaon. Marhite angka singkola i, boi ma nasida mangaradoti ulaon marbarita na uli.​—2 Timoteus 4:5.

Singkola tu Parintis. Dung sataon gabe parintis biasa, boi ma gabe parsidohot tu singkola parintis na lelengna onom ari. Olo do ra singkola on dibahen di Bale Harajaon na jumonok. Singkola on dibahen laho mangurupi parintis i lam pajonokhon diri tu Jahowa, asa lam marhasil laho marbarita na uli, jala hot mangulahon ulaonna marbarita na uli.

Singkola tu Parbaritaon Harajaon. Singkola on lelengna dua bulan. Dibahen on laho mangajari angka parintis naung marpangalaman na olo manadinghon hutana laho marbarita na uli di dia pe nasida dihaporluhon. Nasida songon na mandok ”Dison do ahu, suru ma ahu!”, mangihuthon tiruan songon naung dibahen si Parbarita na umbalga i ma na hea marbarita na uli di tano on, Jesus Kristus. (Jesaya 6:8; Johannes 7:29) Ala dao sian hutana, olo do ra dihaporluon pahombarhon diri tu hasomalan parngoluon na sesep. Asing do ra hasomalan, ari, dohot sipanganon sian na somal di hutana. Gariada, olo do ra ibana ingkon marsiajar hata na imbaru. Singkola on boi mangurupi angka donganta baoa dohot borua nang na marripe, na marumur 23 sahat 65 taon, asa mandapot pangantusion partondion na dihaporluhon tingki martugas nasida. Nasida pe, olo do mulaulaon na marragam asa boi leleng pangkeon ni Jahowa dohot orhanisasiNa.

Singkola Bibel Gilead Manara Panjaga. Di hata Heber, goar ”Gilead” lapatanna ”Purguk na Gabe Sitindangi”. Dung dipajongjong singkola on taon 1943, lobi sian 8.000 halak naung tammat jala disuru nasida lao gabe misionari asa manghatindakhon ”ro di ujung ni tano on”, jala lam godang na porsea. (Ulaon ni Apostel 13:47) Tingki pigapiga tammatan sian Gilead na parjolo sahat di Peru, ndang adong dope huria ni Karisten disi. Alai saonari, adong lobi sian 1.000 huria ni Karisten disan. Tingki misionari nami sahat di Jepang, Sitindangi disan ndang sahat sampulu halak. Alai saonari, adong lobi sian 200.000 Sitindangi di luat i. Ala naung mandapot pangajarion saleleng lima bulan di Gilead jala radot diparsiajari Hata ni Debata. Nasida na dijou tu singkola on, i ma angka parintis istimewa manang utusan injil, na karejo di kantor ni Sitindang Ni Jahowa di sada bangso, manang na mangulahon ulaon sintua kaliling. Singkola on pe mangalehon nasida pigapiga pangajarion na marsintuhu asa pajegeshon ulaon di liat portibi on.

• Aha tinuju ni Singkola tu Parintis?

• Singkola tu Parbaritaon Harajaon dipatupa laho tu ise?