PARSIAJARAN 8
Si Josia dohot Alealena na Burju
Molo pandapotmu, maol do mangulahon na sintong?— Ndang mura mangulahon i. Adong do dipaboa di Bibel sahalak dakdanak na margoar si Josia. Maol do dihilala si Josia mangulahon na sintong. Alai, adong do alealena na mangurupi ibana. Taparsiajari ma taringot si Josia dohot alealena i.
Si Josia anak ni si Amon, raja sian Juda. Jahat do si Amon jala sisomba ganaganaan. Dung mate si Amon, si Josia ma raja di Juda. Alai, ualu taon dope umurna! Molo pandapotmu, jahat do si Josia, songon amana?— Ndang jahat ibana!
Masiurupan do si Jeremia dohot si Josia laho mangulahon na sintong
Nang pe dakdanak si Josia, sai dioloi ibana do Jahowa. Alani i, holan tu angka jolma na mangkaholongi Jahowa do ibana maraleale. Angka alealena on ma na mangurupi si Josia mangulahon na sintong. Ise do aleale ni si Josia on?
Sada sian alealena on, i ma si Sepania. Sahalak panurirang do si Sepania. Jotjot do ibana mangalehon sipasingot tu halak Juda. Ibana mandok, molo disomba nasida ganaganaan godang ma hasusaan na ro tu nasida. Ditangihon si Josia do si Sepania. Alani i, ndang olo si Josia manomba ganaganaan. Sai tongtong do ibana manomba Jahowa.
Aleale ni si Josia na asing, i ma si Jeremia. Hirahira saumur do nasida. Denggan do paralealeon ni nasida. Dung mate si Josia, disurat si Jeremia do sada ende na patuduhon holong ni rohana tu si Josia. Masiurupan do si Jeremia dohot si Josia mangulahon na sintong dohot mangoloi Jahowa.
Dipasingot si Sepania do halak Juda asa unang manomba ganaganaan
Aha do na taparsiajari sian si Josia?— Sian dakdanak, lomo do roha ni si Josia mangulahon na sintong. Diboto do molo ibana ingkon mardongan tu na mangkaholongi Jahowa. Alani i, maraleale ma hamu tu na mangkaholongi Jahowa jala na mangurupi hamu mangulahon na sintong!