Tongtong do Jesus Patuduhon Unduk ni Roha

Mura do dihilala hamu unduk tu natuatuamuna?​— Sipata, maol do i. Diboto hamu do molo Jesus tongtong mangoloi Jahowa dohot natuatuana?​— Molo dijaha hamu taringot Jesus, on boi mangurupi hamu mangoloi natuatuamuna nang pe sipata maol mangulahon i. Taparsiajari ma taringot on.

Andorang so ro Jesus tu portibi on, di surgo do ibana raphon Amana, Jahowa. Alai adong do natuatua ni Jesus di portibi on, i ma si Josep dohot si Maria. Diboto hamu do boasa nasida boi gabe natuatua ni Jesus?​—

Marhite tanda halongangan, dipapinda Jahowa ma ngolu ni Jesus tu bortian ni si Maria. Tubu ma Jesus di portibi on. Sarupa do hatutubu ni Jesus dohot posoposo na asing. Dung sia bulan di bortian ni si Maria, tubu ma Jesus. Gabe anak ni si Maria dohot si Josep ma ibana.

Holong do roha ni Jesus tu Jahowa. Lam patar ma holong ni Jesus tu Jahowa dung marumur 12 taon ibana. Tingki i, laho ma Jesus dohot keluargana tu Jerusalem mangulahon Paska. Dao do pardalanan ni nasida. Di pardalanan laho mulak, diboto si Josep dohot si Maria ma ndang rap nasida dohot Jesus. Diboto hamu do didia Jesus?​—

Mulak ma nasida tu Jerusalem mangalului Jesus. Busisaon do nasida ala so jumpang dohot Jesus. Dung tolu ari, jumpang ma nasida dohot Jesus di bagas joro! Diboto hamu do aha na diulahon Jesus disi?​— Marsiajar do ibana disi taringot Amana, Jahowa. Dihaholongi ibana do Jahowa jala lomo do rohana mamboto songon dia palashon roha ni Jahowa. Tongtong do Jesus mangoloi Jahowa nang pe adong sitaonon. Dioloi Jesus do si Josep dohot si Maria?​— I do. Bibel mandok, dioloi ibana do nasida.

Aha do na taparsiajari sian Jesus?​— Oloi hamu ma natuatuamuna, nang pe sipata maol mangulahon i. Olo do hamu mangulahon i?​—