Jesus Pahehehon Anak ni Ina na Mabalu

Dung dipalum Jesus naposo ni perwira Rom i, laho ma ibana sian Kapernaum. Borhat ma ibana tu huta Nain, lobi sian 32 kilometer tu sabola barat. Rap do ibana dohot angka siseanna jala torop do halak mangihuthon ibana. Tingki naeng sahat tu huta i, pajumpang ma nasida dohot rombongan ni halak Jahudi. Diboan nasida do bangke ni sahalak doli-doli na laho dikuburhon di luar ni huta i.

Lungun situtu do roha ni omak ni doli-doli i. Tingki mabalu ibana, tarapul dope rohana ala adong dope anakna gabe donganna. Hirim do rohana, anakna i ma na manarihon ibana di ari na naeng ro. Alai nunga mate be anakna i. Ise be na mandongani jala na manarihon ibana?

Tingki diida Jesus ina na mabalu i, asi hian ma rohana. Ai boi do dihilala Jesus na lungun rohana jala holan sahalakna nama. Lambok ma didok Jesus tu ibana, dipapos ma rohana, ninna ma, “Unang be tumatangis.” Dung i, dijama Jesus ma tandu ni bangke i. (Lukas 7:13, 14) Alani i, gabe so ma rombongan na mamboan bangke i. Ra sungkun-sungkun do roha ni nasida, ‘Boasa didok ibana songon i? Aha do na naeng bahenonna?’

Asing ni i, aha do na boi ro tu pingkiran ni halak na mangihuthon Jesus i? Nunga diida nasida Jesus mambahen godang mukjizat manang tanda halongangan, jala pamalumhon godang na marsahit. Alai ra, ndang hea dope diida nasida Jesus pahehehon halak na mate. Najolo, hea do dipahehe angka panurirang halak na mate. Alai boi do bahenon ni Jesus songon i saonari? (1 Rajaraja 17:17-23; 2 Rajaraja 4:32-37) Didok Jesus ma, “O doli-doli, hudok ma tu ho, hehe ma!” (Lukas 7:14) Pintor hundul ma doli-doli i, jala mangkatai ma ibana! Tontu, songgot situtu do roha ni omakna i. Alai las situtu do rohana, ai ndang sahalakna be.

Tingki diida angka jolma i naung mulak mangolu doli-doli i, dipuji nasida ma Jahowa, Silehon Hangoluan. Didok nasida ma, “Nunga hehe sahalak panurirang na gogo di tonga-tonganta.” Jala adong do muse na mandok, “Nunga diparrohahon Debata bangsona.” (Lukas 7:16) Hatop do diboto godang halak na di huta i barita i. Ra sahat do barita i tu Nasaret, huta ni Jesus, hira-hira 10 kilometer sian huta i. Jala sahat do muse barita i tu Judea di sabola selatan.

Di penjara dope si Johannes Pandidi di tingki i. Lomo do rohana naeng mamboto ulaon ni Jesus. Dipaboa angka sisean ni si Johannes ma tu ibana taringot tu tanda halongangan na binahenna. Songon dia do pangkilalaan ni si Johannes mamboto i?