Sungkunsungkun Di Kotak
◼ Denggan do molo sahalak penyiar mamangke internet laho marbarita manang marsiajar dohot halak na so ditanda, na tading di negara na asing?
Pigapiga penyiar mamangke internet laho mambahen parsiajaran Bibel, tu halak na tading di inganan na so apala diorai, manang tu inganan na otik dope penyiarna. Di pigapiga situasi adong do laba na denggan mamangke isara on. Alai, tingki martungkar e-mail angka penyiar manang marsiajar marhite chatroom tu halak na so ditanda boi do on parohon jea. (Ida Pelayanan Kerajaan Kita Juli 2007, alaman 3.) Nang pe hita marsangkap mambahen parsiajaran Bibel dohot halak na olo manjangkon, alai marsiajar marhite Internet boi mambahen hita marsaor tu halak naung dipabali na mangajarhon na so sintong. (1 Korint 1:19-25; Kolosse 2:8) Asing ni i, molo takirim surat tu halak na manjangkon di negara na diorai manang naso pola diorai, boi do on parohon jea tu angka donganta na tading disi. Alani i, ndang denggan molo sahalak penyiar mangalului halak na olo manjangkon barita na uli di negara na asing marhite Internet.
Molo adong halak na ro sian negara na asing na manjangkon barita na uli, unang ma tapaima jolo sahat ibana tu negarana asa taurupi. Alai, patudu ma songon dia mamangke jw.org laho mandapot gumodang hatorangan manang songon dia manghubungi Kantor Cabang na adong di ingananna. Boi do tajujui ibana asa ro tu Bale Harajaon na jonok di ingananna. Ra, ndang di sude negara adong Bale Harajaon. Alai, molo olo ibana dijumpangi Sitindangi na adong di negarana, taisi ma formulir, Silahkan Tindak Lanjuti (S-43) dung i, talehon ma tu sekretaris dikirim marhite bagian ”sidang” di jw.org. Kantor Cabang na mangaradoti parkarejoan marbarita na adong di negara i, boi mananda songon dia situasi ni inganan ni halak na manjangkon i, jala boi paradehon parsiajaran Bibel tu ibana.—Ida Pelayanan Kerajaan Kita Juni 2014, alaman 7, dohot Pelayanan Kerajaan Kita November 2011, alaman 2.
Molo adong parsiajar Bibel na pinda tu negara na asing, manang parsiajar Bibel na tading di negara na asing alai ndang tatanda halakna, taihuthon ma tudutudu na di ginjang i. Alai, boi do tauduti parsiajaran dohot ibana sahat tu na jumpang ibana dohot penyiar na adong di ingananna. Alai, taingot ma boi do parohon jea molo marsiajar Bibel hita dohot sasahalak na manjangkon na tading di negara na diorai manang na so apala diorai marhite surat, telepon manang alat elektronik na asing.—Mateus 10:16.