Pahala Molo Unduk tu Debata

Nabi Musa mandok, molo unduk hita tu Debata dapotta ma pahala. (5 Musa 10:13; 11:27) Unduk pe hita tu Debata dang ala mabiar hita diuhum. Ala burju do Debata, gabe taoloi, tahaholongi ma Ibana jala dang olo be hita mambahen haccit rohana. Didok Kitab Suci, “Ai on do holong ni roha tu Debata, i ma molo taoloi angka parentana.”​—1 Johannes 5:3.

Aha do hasilna molo unduk hita tu Debata? Adong dua naeng tabahas.

1. UNDUK TU DEBATA BOI MAMBAHEN HITA MARBISUK

“Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.”​—JESAYA 48:17.

Sitoppa hita i ma Jahowa, diboto do aha na tahaporluhon jala diajari do hita. Molo olo hita marsiajar sian Kitab Suci, gabe boi ma hita mambahen keputusan na denggan. Jadi ikkon taparsiajari do Hata ni Debata sian Kitab Suci dung i taulahon ma i.

2. UNDUK TU DEBATA MAMBAHEN LAS ROHA

“Halak na manangihon hata ni Debata jala na mangulahon i do na marlas ni roha!”​—LUKAS 11:28.

Saonari on, marlas ni roha do godang halak ala mangulahon na didok Kitab Suci. Contohna, pengalaman ni sahalak bawa di Spanyol. Ibana halakna parmuruk-muruk jala kasar tu sude jolma termasuk tu istrina. Hea ma dijaha ibana surat ni nabi Musa taringot anak ni si Jakkob, i ma si Josep. Halak na lambok do si Josep. Alai dijual do si Josep gabe hatoban jala dipenjarahon. Nang pe songon i, toktong do ibana lambok, dame jala olo manalpuhon hasalaan. (1 Musa, pasal 37-45) Didok bawa i ma, “Dung hujaha carita ni si Josep on gabe hutiru ma ibana. Gabe halak na lambok ma au, dang parmuruk-muruk be jala burju. Las hian ma rohakku.”

Godang do parsiajaran sian Kitab Suci. Contohna, carana mardongan tu na asing. Lao mamboto hatorangan i taparsiajari ma muse.