Nang pe Parila, Boi do Au Gabe Misionaris

Taon 1951 do au tubu di Vienna, Austria. Katolik do hami. Memang maila do au makkatai tu halak. Alai molo tu Debata, dang songon i. Jotjot do au martangiang tu Ibana jala porsea do au tu Ibana. Tikki marumur sia taon au, marsiajar Bibel ma bapak dohot Saksi Jahowa. Jala dang leleng dukkon i, dohot do tong omak marsiajar.

Margabung di huria Döbling do hami, di Vienna. Kompak do hami sakeluarga. Rap manjaha jala mamparsiajari Bibel do hami, rap marpungu, jala gabe relawan di kebaktian. Mulai sian na gelleng, sai diurupi bapak do au asa holong rohakku tu Jahowa. Bahkan, jotjot do ditangiakkon bapak asa gabe perintis au dohot adekku. Alai di tikki i, dang adong dope rencanakku naeng merintis.

MULAI MELAYANI SEPENUH WAKTU

Au tardidi taon 1965, tikki marumur 14 taon. Alai maol do hurasa marbarita tu akka halak na so hutanda. Jotjot do au merasa undenggan do akka na poso na asing sian au, jala lomo do rohakku asa godang halak na olo mardongan tu au. Alani i, dang leleng dukkon tardidi mardongan ma au dohot akka halak na so manomba Jahowa. Las do rohakku mardongan dohot halak i. Alai gabe targanggu do panggora ni rohakku ala nga pagodangku tikkikku habis rap dohot akka halak na so Saksi. Maol do hurasa maninggalhon akka donganki. Alai aha do na mangurupi au asa boi muba?

Adong ma sahalak borua na margoar si Dorothée di hurianami, umurna 16 taon. Nungnga penyiar ibana. Uttua do saotik umurhu sian ibana. Alai huida semangat hian do ibana marbarita. Hape au dang songon i. Didok rohakku ma, ‘Saksi do natua-tuakku. Hape si Dorothée, dang Saksi natua-tuana. Tinggal dohot omakna do ibana jala marsahit do omakna i. Alai sai semangat do ibana marbarita!’ Gabe taronjar ma rohakku naeng maniru ibana, lao mangalehon unggodang tikkikku tu Jahowa. Di pudian ni ari, rap merintis ma hami. Mulana merintis ekstra ma hami, dung i merintis biasa. Ala semangat si Dorothée marbarita, au pe gabe semangat do. Mulai ma adong studikku, jala diurupi si Dorothée do au mangajari studikki. Lam leleng, gabe lam barani ma au marbarita tu akka halak di jabu, di dalan, manang di akka inganan na asing.

Di taon na parjolo dung merintis biasa au, adong ma ditugasson sahalak perintis istimewa tu hurianami. Goarna si Heinz. Sian Austria do ibana. Si Heinz mandapot hasittongan sian abangna, tikki lao ibana manjuppangi abangna di Kanada. Tikki parjolo sahali pajuppang au dohot si Heinz, nga lomo rohakku tu ibana. Alai molo ibana, lomo do rohana gabe misionaris, hape au daong. Jadi dang hupaboa na adong rohakku tu ibana. Alai ujungna, gabe marhallet do hami jala menikah. Dung i, rap merintis ma hami di Austria.

CITA-CITA LAO GABE MISIONARIS

Sering do dihatai si Heinz tu au taringot cita-citana lao gabe misionaris i. Memang dang dipaksa ibana asa olo au gabe misionaris. Alai olo do sipata didok ibana songon on tu au, “Kan dang adong gellengta. Boi do talehon unggodang muse tikkitta tu Jahowa?” Ala parila i au, mabiar do au gabe misionaris. Memang merintis do au. Alai molo taringot gabe misionaris, borat hian do i hurasa. Alai, sabar do si Heinz mangurupi au asa unang songon i pandanganku. Jala dijujui ibana do asa unang holan dirikku na hupikkiri. Marguna situtu do hurasa nasehat ni si Heinz i.

Ujungna, olo ma au gabe misionaris. Jadi mandaftar ma hami tu Sikkola Gilead. Alai dipangido hamba cabang ma asa unggodang muse au marsiajar bahasa Inggris. Tolu taon dukkon i, ditugasson ma hami tu huria Yugoslavia di Salzburg, Austria. Pitu taon ma hami melayani disi jala saleleng sataon gabe pengawas wilayah ma suamikku disi. Maol do diattusi hami bahasa Serbo-Kroasia. Alai godang do parsiajar Bibelnami.

Di taon 1979, dipangido ma hami lao satokkin tu Bulgaria. Diorai do ulaonta marbarita disi. Tujuannami lao tusan, dang na lao marbarita. Alai dipangido do asa diboan hami akka publikasi na gelleng-gelleng ukkuranna. Jala dilehon hami ma i tu lima donganta borua na tinggal di Sofia, ibu kota ni Bulgaria. Mabiar hian do au di tikki i. Alai diurupi Jahowa do au asa boi huulahon tugas i. Asing ni i, boi do huida tetap do marlas ni roha akka donganta borua i. Jala tetap do nasida barani nang pe boi do gabe dipenjarahon nasida alani haporseaonna. Gabe sitiruon do nasida di au, asa toktong au barani mangulahon tugas na dilehon Jahowa.

Dung i mandaftar ma muse hami tu Sikkola Gilead jala diundang do hami. Dirippu hami tu kelas marbahasa Inggris na di Amerika Serikat do hami diundang. Hape di bulan November taon 1981, adong dibahen kelas Gilead di kantor cabang na di Wiesbaden, Jerman. Jala tu kelas on do hami diundang. Ala marbahasa Jerman do kelas on, gabe ummura ma huattusi akka bahan di sikkola i. Dung sae sikkola, tudia ma hami ditugasson?

DITUGASSON TU NEGARA NA JOTJOT MASA PORANG

Ditugasson ma hami tu Kenya! Alai disukkun kantor cabang Kenya ma hami, olo do hami melayani di Uganda manang na daong. Mabiar do au sebenarna molo ditugasson tusi. Lobi sian sappulu taon na sebelumna, adong sahalak jenderal na manaluhon pamaretta ni Uganda. Goar ni jenderal i, i ma si Idi Amin. Saleleng mamaretta ibana di Uganda, gaor do situasina, marribu do akka halak na dipamate, jala susa do ngolu ni marjuta halak disi. Alai di taon 1979, ditaluhon akka musu ni si Idi Amin ma ibana jala akka musuna i ma na mamaretta di Uganda. Nang pe songon i situasina, dioloi hami do pangidoan ni kantor cabang Kenya i. Boasa? Alana nungnga diurupi hami di Sikkola Gilead asa marpos ni roha tu Jahowa.

Susa hian do situasi di Uganda. Dang adong boi diparade pamaretta aek, listrik, dohot akka na asing. Sinyal pe dang adong. Jotjot do terjadi penembakan jala godang do akka pangarampok tarlumobi tikki borngin. Molo nga borngin, dang barani be akka halak kaluar. Sai martangiang do nasida asa unang adong na ro tu jabu lao mangarampok manang mambunu nasida. Nang pe songon i, toktong do togu haporseaon ni akka dongan tu Jahowa.

Taon 1982, sahat ma au dohot si Heinz di Kampala, ibu kota ni Uganda. Saleleng lima bulan na parjolo, di jabu ni si Sam dohot si Christina Waiswa do hami tinggal. Adong do lima gelleng ni nasida jala adong muse opat halak keluargana na tinggal di jabu i. Susa do ngolu ni keluarga Waiswa on. Jotjot do holan sahali nasida mangan di bagasan sadari. Alai burju hian do nasida tu hami. Godang do na boi ditiru hami sian keluarga on. Contohna, boha ma carana asa boi dipakke hami aek na saotik lao maridi jala aek i muse na dipakke hami lao maniram kamar mandi. Dung i di taon 1983, dapotnami ma jabu di Kampala. Lumayan aman do tinggal disi.

Las hian do rohanami marbarita dison. Hea ma huingot adong lobi sian 4.000 majalah na dibagihon hami tu akka halak di bagasan sabulan. Alai adong dope na undenggan sian i, i ma akka halak na olo manjalo hasittongan. Porsea do nasida tu Debata, jala lomo do roha ni nasida makkata-hatai taringot Bibel. Adong ma parsiajar Bibelhu 10 sahat tu 15 halak, songon i nang parsiajar Bibel ni si Heinz. Godang do tong na boi diparsiajari hami sian akka studinami. Contohna, toktong do nasida semangat lao marpungu nang pe ikkon mardalan pat. Dang hea nasida marungut-ungut jala sai las do roha ni nasida.

Di taon 1985 dohot 1986, terjadi do muse dua porang di Uganda. Di tikki i, adong do akka dakdanak na dibahen gabe tentara. Jotjot do diida hami diboan akka dakdanak i sinjata jala nasida do na memeriksa akka halak na lewat di dalan. Di tikki i, sai martangiang do hami asa dibahen Jahowa hami barani jala manat tikki marbarita. Dialusi Jahowa do tangiangnami i. Molo pajuppang hami dohot akka halak na lomo rohana manangihon barita na uli, gabe tenang do dihilala hami nang pe sebenarna mabiar do hami.

Marbarita do tong hami tu akka halak na pinda tu Uganda. Contohna, pajuppang ma hami dohot sapasang suami istri sian Tatarstan, Rusia Tengah. Goar ni nasida si Murat dohot si Dilbar Ibatullin. Dokter do si Murat. Olo do nasida marsiajar Bibel jala tardidi. Toktong do nasida setia manomba Jahowa sappe saonari. Dung i pajuppang do muse au dohot si Tatjana Vileyska. Sian Ukraina do ibana. Sanga do ibana naeng bunuh diri alani godang ni sitaononna. Dung tardidi si Tatjana, mulak ma muse ibana tu Ukraina. Jala di pudian ni ari, ibana mangurupi manerjemahon publikasitta tu bahasa Ukraina.a

TANTANGAN NA BARU

Taon 1991, tikki liburan hami di Austria, dihubungi kantor cabang na disi ma hami. Didok nasida, na lao ditugasson do hami tu Bulgaria. Saleleng martaon-taon, diorai do ulaonta marbarita di piga-piga negara di Eropa. Alai di tikki i, dang songon i be situasina. Nga diloas be Saksi Jahowa marbarita di akka negara i, termasuk ma i di Bulgaria. Songon naung hupaboa sebelumna, tikki diorai dope ulaonta marbarita di Bulgaria, hea do hami mamboan akka publikasitta tusi. Alai saonari, ditugasson do hami asa marbarita disi.

Dipangido akka dongan na di kantor cabang i ma asa langsung hami borhat tu Bulgaria, dang pola mulak be tu Uganda. Jadi dang sanga be hami lao mambuat akka barangnami jala pajuppang dohot akka dongan disi. Alani i, borhat ma hami tu Betel Jerman. Jala dilehon organisasi ma tu hami mobil, dung i pittor borhat ma hami tu Bulgaria. Ditugasson ma hami tu sada kelompok di Sofia. Disi adong hira-hira 20 penyiar.

Adong piga-piga tantangan na diadopi hami di Bulgaria. Na parjolo, dang diattusi hami bahasa na dison. Na paduahon, holan dua do bukkutta di bahasa Bulgaria, i ma Kebenaran yang Membimbing kepada Hidup yang Kekal dohot Buku Cerita Alkitab. Na patoluhon, maol do dison mangalului akka halak na olo marsiajar Bibel. Nang pe songon i, toktong do semangat akka donganta marbarita. Alai, dang lomo roha ni akka ruas Gareja Ortodoks mangida i. Alani i ma gabe dianiaya nasida hami.

Taon 1994, dang diakkui pamaretta be Saksi Jahowa dison. Jala godang do halak na mandok, sekte na berbahaya do hita. Adong do piga-piga donganta na ditakkup. Dipaboa do di koran dohot di TV akka na so toho taringot Saksi Jahowa. Didok nasida, lomo do roha ni Saksi Jahowa mate gellengna. Alana, dang diloas Saksi Jahowa gellengna manjalo transfusi darah. Jala didok nasida do tong, dijujui Saksi Jahowa do donganna asa bunuh diri. Alani on gabe maol ma hami marbarita dison. Tikki marbarita, jotjot do akka halak muruk tu hami, dilaporhon do hami tu polisi, jala dilempari do hami. Gabe maol ma masuk akka publikasitta tuson, jala maol do manewa inganan lao dipakke tu parpunguan. Hea do tong dibubarhon polisi kebaktianta. Borat hian do dihilala hami situasi dison. Alana, beda hian do akka halak di Bulgaria on dohot na di Uganda. Molo di Uganda, godang do halak na lomo rohana marsiajar Bibel. Nang pe songon i, toktong do hami marlas ni roha dison. Aha do na mangurupi hami?

Las do rohanami rap bergaul dohot akka dongan dison. Massai arga do hasittongan i di nasida, jala diargai nasida do sude na diulahon hami lao mangurupi nasida. Akrab do hami sude dison jala marsiurupan. Jadi sian akka pengalamannami, diboto hami ma boi do hita marlas ni roha mangulahon tugas manang aha pe. Kuncina, fokus ma hita mangurupi halak na asing, dang holan mamikkirhon diri sandiri.

Piga-piga taon dukkon i, denggan ma situasi dison. Taon 1998, diakkui pamaretta ma muse Saksi Jahowa dison, jala lam godang ma publikasitta na diterjemahon tu bahasa Bulgaria. Dung i di taon 2004, diresmihon ma kantor cabang dison. Saonari, adong do 57 huria di Bulgaria, jala adong 2.953 penyiar. Di taon dinas naung salpu, adong 6.475 halak na ro tu Borngin Parningotan. Najolo, holan lima halak do Saksi di Sofia on. Alai saonari, nungnga adong sia huria dison. Jadi tutu do na didok Bibel i, “Na otik gabe saribu.”—Jes. 60:22.

MANGADOPI SAHIT NA PARAH

Saleleng on, jotjot do au marsahit-sahit. Tikki lao hami tu dokter, didok dokter do adong piga-piga tumorhu, termasuk ma di ulukku. Alani i, hea ma au terapi radiasi jala dioperasi saleleng 12 jom di India, lao mambuat tumor na di ulukkon. Dung sae operasi, toktong do hami tinggal di Betel India. Alai dung lam sehat huhilala, mulak ma hami muse tu Bulgaria.

Si Heinz pe marsahit do. Hona sahit Huntington do ibana. Jarang do halak hona sahit on. Alani sahitna i, gabe maol ma ibana mardalan, makkatai, jala maol mengendalihon gerakanna. Ala lam parah sahitna i, gabe ikkon sai huurupi ma ibana. Sipata, loja hian do huhilala. Jala mabiar do au sanggup do au mangurus ibana torus manang na daong. Alai adong ma sada donganta bawa na poso, goarna si Bobi. Jotjot do diajak si Bobi ibana marbarita. Dang maila si Bobi on mamboan ibana, nang pe dang takkas si Heinz makkatai jala dang boi dikendalihon ibana tanganna dohot patna. Sai rade do si Bobi mangurupi si Heinz. Memang, dang adong gellengnami saonari. Alai dihilala hami, hira na dilehon Jahowa do si Bobi i gabe anaknami.—Mrk. 10:​29, 30.

Hona kanker do tong si Heinz. Jala mate do ibana taon 2015. Masihol hian do au tu ibana. Ibana do na sai toktong mangurupi au asa unang pamarsakhu. Jadi, borat hian do huhilala dung na mate i ibana. Alai, sai huingot do si Heinz. Gabe hira na mangolu dope ibana di au! (Luk. 20:38) Sai huingot do akka na didok ibana tu au dohot akka nasehatna na denggan i. Las hian do rohakku ala boi hami rap melayani Jahowa saleleng martaon-taon.

SAI DIURUPI JAHOWA DO AU

Sai diurupi Jahowa do au asa toktong togu jala sabar mangadopi akka sitaononku. Nang pe parila au, diurupi Ibana do asa boi au gabe misionaris na parduli tu akka halak. (2 Tim. 1:7) Mandok mauliate do au tu Jahowa, ala boi do au dohot adekku melayani sepenuh waktu. Saonari, ibana dohot suamina melayani di akka huria na marbahasa Serbia di Eropa. Jadi, dialusi Jahowa do tangiang ni bapaknami i!

Molo huparsiajari Bibel, gabe tenang jala dame do huhilala. Molo adong sitaononku, “lam gomos” ma au martangiang tu Jahowa songon na diulahon Jesus. (Luk. 22:44) Dialusi Jahowa do tangiakku marhite akka dongan di hurianami, i ma di Nadezhda, Sofia. Holong do roha ni nasida tu au. Jala jotjot do diajak nasida au rap bergaul, jala didokkon nasida do na holong roha ni nasida tu au. Sudena i mambahen gabe las hian rohakku.

Jotjot do hubayakkon taringot haheheon. Hubayakkon do rap hami sakeluarga di Paradeiso. Huida ma hundul natua-tuakku di jolo ni jabunami. Nungnga mulak poso nasida songon tikki baru menikah. Huida do muse adekku mangaloppa. Hubayakkon do nungnga jongjong si Heinz di labbung ni hodana. Molo hubayakkon sudena i, gabe toktong ma au sabar, marlas ni roha, jala mandok mauliate tu Jahowa.

Molo huingot sude pasu-pasu ni Jahowa naung hujalo saleleng on dohot na lao lehononna di ari na naeng ro, gabe huingot ma hata ni si Daud na disurat di Psalmen 27:​13, 14. Didok di ayat i, “Porsea do au na boi idaokku haburjuon ni Jahowa saleleng ni ngolukku, ai molo dang porsea au, pasti dang boi au martahan. Marpos ni roha ma tu Jahowa. Barani ma ho jala patogu ma roham. Pos ma roham tu Jahowa.”