SUKKUN-SUKKUN NI AKKA NA POSO
Songon dia do asa Boi Dihaporseai Natua-tuakku Au?
Na porlu diboto ho
Asa boi ho dihaporseai, ikkon boi do ho diandalhon. Bayakkon ma maminjam hepeng ho tu bank. Molo dang tarlambat ho mambayar utangmu, pasti lam porsea ma pihak bank tu ho. Jala molo maminjam hepeng ho muse, boi ma unggodang pinjaman na dilehon bank. Mangoloi aturan na dibahen natua-tua dos ma i songon na mambayar utang. Lam dioloi ho aturan ni natua-tuam, lam porsea ma nasida tu ho.
Porlu do tikki asa boi ho dihaporseai natua-tuam. Asa boi lam godang kebebasan na dilehon natua-tuam tu ho, porlu do patuduonmu halak na martanggung jawab ho.
PENGALAMAN: “Tikki remaja au, takkas do huboto aha na dipangido natua-tuakku sian au. Molo di jolo ni nasida, hira na huoloi do pangidoan ni nasida i. Alai sasittongna lomo ni rohakku do na huulahon. Alani i gabe maol ma natua-tuakku porsea tu au. Ujungna gabe huboto ma ikkon jujur do hita asa boi dihaporseai jala dilehon lam godang kebebasan.”—Craig.
Aha do na boi diulahon ho
Jujur ma ho nang pe dang mura i. Sude halak do boi mambahen hasalaan. Alai molo ditabunihon ho hasalaanmi jala gabe margabus ho (manang dang dipaboa ho na sasittongna) i mambahen natua-tuam dang porsea be tu ho. Alai molo torus ho jujur jala diakkui ho hasalaanmu, boi ma diida natua-tuam nga gabe halak na dewasa be ho. Molo diulahon ho i, tarida ma halak na boi dihaporseai ho.
“Dang alani hasalaanmu mambahen dang dihaporseai ho, alai ala ditabunihon ho do hasalaanmi.”—Anna.
Na didok Bibel: “Lomo do rohanami asa jujur di saluhutna.”—Heber 13:18.
Pikkirhon ma: Tikki disukkun natua-tuam lao tudia ho jala aha na naeng diulahon ho, jujur do ho paboahon i tu nasida? Manang tikki disukkun natua-tuam sian dia ho jala marhua ho nakkin, adong do na ditabunihon ho?
Martangggung jawab ma. Oloi ma sude aturan na dibahen di jabu. Hatop ma ulahon sude karejom. Tepati ma sude janjim. Karejohon ma tugas sikkolam. Molo mulak borngin oloi ma aturan ni natua-tuam ikkon jam piga mulak.
“Molo dipaloas natua-tuam ho mardalani dohot akka donganmu alai ikkon mulak jam 09.00 borngin, hape mulak ho jam 10.30 borngin, dang boi be harappononmu dipaloas natua-tuam muse ho mardalani dohot akka donganmu di tikki na asing.”—Ryan.
Na didok Bibel: “Ganup do halak martanggung jawab tu na diulahon ibana.”—Galatia 6:5.
Pikkirhon ma: Ditanda do ho halak na tepat waktu, pasaehon sude akka tugas, jala mangihutton akka aturan nang pe sipata dang cocok di roham?
Sabar ma. Molo dang porsea be natua-tuam tu ho, porlu do tikki asa porsea muse nasida tu ho. Sabar ma paimahon.
“Kecewa do au tu natua-tuakku tikki dang dilean nasida tanggung jawab na balga tu au hape nga tamba umurhu. Dang sadar au molo tamba umur dang otomatis gabe dewasa cara marpikkirta. Jadi hupangido ma tu natua-tuakku kesempatan lao mambuktihon na boi do au dihaporseai. Memang porlu do tikki, alai ujungna gabe porsea do nasida tu au. Jadi asa boi hita dihaporseai, dang bergantung tu umurta alai bergantung tu pambahenatta.”—Rachel.
Na didok Bibel: “Toktong ma . . . pareso hamu dirimuna.”—2 Korint 13:5.
Pikkirhon ma: Asa boi dihaporseai natua-tuam ho, aha ma na boi diulahon ho lao mambuktihon i?
TIPS: Bahen ma tujuan. Uppamana, boi tepat waktu, pasaehon akka tugas, mulak borngin di tikkina, manang na asing. Paboa ma tujuanmi tu natua-tuam jala sukkun ma aha na ikkon diulahon ho asa boi porsea nasida tu ho. Dung i marsitutu ma mangihutton poda na di Bibel na mandok, “Unang dipakke hamu be pangalahomuna na leleng, i ma akka na niulahonmuna najolo.” (Epesus 4:22) Di tikkina boi ma diida natua-tuam hamajuonmu.