8 “‘Sanngɛ sɛ nannin yasua kun yɛ amún fá yí tɛ nga kɛ bé yí’n be yra nnɛn’n i kɔlikɔli’n,+ annzɛ amún fá yí nda kun m’ɔ ti i liɛ ngunmin i ti tɛ’n,+ annzɛ bo kun yolɛ tɛ mán Zoova’n,+ 9 amun fa sanmlɛn mlɛnnɛnnɛn kpa efa kun naan amun bubu nun nsan, naan amun fa bue kun uka nannin’n su naan amun a fa ba.+ Amun bu ngo inin sin kun naan amun fa sanngan sanmlɛn sɔ’n nun. 10 Asa ekun’n, amun fa duvɛn inin sin kun gua tɛ yiwlɛ’n su+ kɛ like mɔ be fa sie i sin’n su naan ɔ bɔn Zoova i bue nun fannin’n sa.