20 Ɲanmiɛn wawɛ’n jrali Zoyada+ m’ɔ ti Ɲanmiɛn ɲrun jranfuɛ’n i wa Zakari i su. Yɛ ɔ ko jrannin lika kun m’ɔ ti nglonglo’n su naan w’a se nvlefuɛ’m be kɛ: “Ndɛ nga Ɲanmiɛn Kpli kan’n yɛ: ‘?Ngue ti yɛ amun nantiman Zoova i mmla’m be su-ɔ? I bo’n su guaman kpa manman amun! Kɛ mɔ amun kacili amun sin sili Zoova ti’n, i kusu ɔ́ káci i sin sí amun.’”+ 21 Sanngɛ be cicili i wun ndɛ,+ kpɛkun famiɛn’n maan be finfinnin i yɔbuɛ Zoova i sua’n i awlo klun’n nun lɛ.+