2 Famiɛn Mun

10 Akabu+ le ba ableso (70) Samari lɔ. Ɔ maan Zei klɛli fluwa ɔli Samari ko mannin Zizreɛli lɔ sran dandan mun nin kpɛnngbɛn mun,+ ɔ nin be nga be nian Akabu i mma’m be lika’n.* Ɔ seli be kɛ: 2 “Amun sa nun yɛ amun min’n i mma mun nin i alɛ kunlɛ kakaklolo mun, nin i nnɛn kpanngɔ mun, nin klɔ nga be sisili i wun’n, ɔ nin i alɛ kunlɛ ninnge’m be wo-ɔ. I sɔ’n ti’n, sɛ amun sa kan fluwa nga’n, 3 maan amun fa amun min’n i mma’m be nun kpafuɛ’n, m’ɔ ti ndɛnmanfuɛ’n naan amun fɛ i sie i si i famiɛn bia’n su. I sin’n, amun kun amun min’n i awlo’n i ti alɛ.”

4 Sanngɛ srɛ dan kpa kunnin be. I sɔ’n ti’n, be seli kɛ: “Nian, famiɛn nɲɔn b’a kwlá jrɛnmɛn i ɲrun.+ ?É yó sɛ naan y’a kwla jrɛn i ɲrun?” 5 Ɔ maan famiɛn’n i awlo’n sunianfuɛ’n, nin klɔ siefuɛ’n, nin kpɛnngbɛn mun, nin be nga be nian famiɛn’n i mma’m be lika’n be ko seli Zei kɛ: “E ti ɔ sufuɛ, yɛ like kwlaa nga a se e kɛ e yo’n, é yó. E su sieman sran fi famiɛn. Yo like kwlaa ng’ɔ ti kpa ɔ ɲrun’n.”

6 Zei klɛli be fluwa kun ekun, ɔ seli be kɛ: “Sɛ amun ti min liɛ naan amun klun klo su amun ɲin yi min’n, amun fa amun min’n i mma’m be ti mun blɛ min Zizreɛli wa ainman dɔ kɛ nga sa su.”

Famiɛn’n i mma ableso (70) mun be tran klɔ’n su sran nga be le ɲrun’n be awlo lɔ, be yɛ be ta be-ɔ. 7 Kɛ be sa kannin fluwa’n cɛ’n, be fali famiɛn’n i mma ableso (70) mun,+ be kunnin be. Kpɛkun be fali be ti mun guɛli i gbogbo wie’m be nun, yɛ be fa ko mɛnnin i Zizreɛli lɔ. 8 Ngaliɛ kanfuɛ’n wluli i sin lɔ, kpɛkun ɔ seli i kɛ: “B’a fa famiɛn’n i mma’m be ti mun b’a ba.” Yɛ ɔ seli kɛ: “An tian be nuan kwle nɲɔn klɔ’n i anuan’n nun lɛ lele nglɛmun.” 9 Kɛ Zei fiteli nglɛmun’n, ɔ jrannin nvlefuɛ’m be kwlaa be ɲrun lɛ kpɛkun ɔ seli kɛ: “Amun a yoman sa fi.* Min liɛ’n, n cicili min min’n i wun ndɛ kpɛkun n kunnin i.+ ?Sanngɛ wan yɛ ɔ kunnin sran nga mun-ɔn? 10 Maan amun si kɛ Zoova i ndɛ’n i kwlaa kpɛnnin su. Akabu i awlo’n i wun ndɛ nga Zoova kannin’n ɔ kpɛnnin su.+ Zoova yiali ndɛ ng’ɔ sinnin i sufuɛ Eli i lika kannin’n i nuan.”+ 11 Zei kunnin Akabu i awlo’n nunfuɛ nga be kali Zizreɛli lɔ’n be kwlaa, ɔ kunnin i sran nga be le ɲrun mun, nin i janvuɛ mun, ɔ nin i ɲanmiɛn ɲrun jranfuɛ mun,+ w’a yaciman sran fi nguan nun.+

12 I sin’n, ɔ fali atin’n naan ɔ́ kɔ́ Samari. Nnɛn kankanfuɛ’m be sua nga i nun yɛ be cici nnɛn mun’n,* ɔ o atin sɔ’n su. 13 Zei nin Akazia+ m’ɔ ti Zida famiɛn’n i niaan bian’m be yiali lika sɔ’n nun lɛ. Ɔ usali be kɛ: “?Wan yɛle amun?” Be tɛli i su kɛ: “E ti Akazia i niaan, yɛ e su kɔ naan é kó nían sɛ famiɛn’n i mma mun nin famiɛn bla’n i mma’m be wun ti kpa-o.” 14 Ɔ ka lɛ seli kɛ: “Amun tra be!” Ɔ maan be trali be yɛ be kunnin be nnɛn kankanfuɛ’m be sua’n i nzue guawlɛ’n i wun lɛ. Be ti sran ablanan-nin-nɲɔn (42). B’a yaciman sran fi nguan nun.+

15 Kɛ ɔ jasoli lɛ’n, ɔ nin Rekabu+ i wa Zonadabu+ m’ɔ su kɔ i atin kpalɛ’n be yiali. Kɛ ɔ yoli i like’n,* ɔ usɛli i kɛ: “?A bu min wun akunndan kpa kɛ n fa bu ɔ wun akunndan kpa’n sa?”

Zonadabu tɛli i su kɛ: “Ɛɛn-ɛn!”

Yɛ Zei seli i kɛ: “Sɛ ɔ ti sɔ’n, fa ɔ sa’n man min.”

Ɔ tinngɛli i sa’n nun mɛnnin i. Kpɛkun Zei sɔli i sa’n naan w’a fɛ i w’a fu i kakaklolo’n nun. 16 I sin’n, ɔ seli kɛ: “Bla maan e wɔ, yɛ á wá wún kɛ be nga be nin Zoova nantiman klanman’n, n yaciman be wun sa n cɛman be.”+ Ɔ maan Zei fɛli i i alɛ kunlɛ kakaklolo’n nun ɔli. 17 I sin’n, ɔ ɔli Samari lɔ. Ɔ ko kunnin Akabu i awlo’n nunfuɛ nga be kali Samari lɔ’n be kwlaa. Ɔ nunnunnin be ngba,+ kɛ nga Zoova kan kleli Eli’n sa.+

18 Asa ekun’n, ɔ yiali nvlefuɛ’m be kwlaa kpɛkun ɔ seli be kɛ: “Akabu sɔli Baali kaan sa,+ sanngɛ Zei wá sɔ́ i kpa trátrá su. 19 I sɔ’n ti’n, amun yia Baali i nuan ijɔfuɛ’m+ be kwlaa nin i sɔfuɛ’m be kwlaa, ɔ nin i ɲrun jranfuɛ’m+ be kwlaa min wun wa. Nán be nun kun sa ka lɔ. Afin n su wa yi tɛ dan kpa n man Baali. Sran nga w’a baman’n, ɔ su kaman nguan nun.” Sanngɛ Zei su laka be naan ɔ́ núnnún Baali i sɔfuɛ mun.

20 Zei kan guali su kɛ: “Amun kle cɛn kun naan e yia e sɔ Baali.” Ɔ maan be kleli cɛn kun. 21 I sin’n, Zei sunmannin sran mun Izraɛli mɛn wunmuan’n nun. Ɔ maan Baali i sɔfuɛ’m be kwlaa be bali. Be nun kun sa nunman lɛ mɔ w’a baman-ɔn. Be wluli Baali i sua’n+ nun lɔ, yɛ Baali i sua’n yili piɛ. 22 Zei seli sran ng’ɔ nian tralɛ’m be su’n kɛ: “Fa tralɛ blɛ Baali i sɔfuɛ’m be kwlaa.” Ɔ maan ɔ fali tralɛ blɛli be. 23 I sin’n, Zei nin Rekabu i wa Zonadabu+ be wluli Baali i sua’n nun lɔ. Zei seli Baali i sɔfuɛ’m be kɛ: “Amun niannian wa kpa, nán Zoova i sufuɛ wie fi tran wa, saan Baali i sɔfuɛ’m be ngunmin.” 24 I sin’n, be yili tɛ mun, yɛ be yili tɛ nga kɛ bé yí’n be yra nnɛn’n i kɔlikɔli’n. Zei fɛli i sran’m be nun ablaɔcuɛ (80) sieli i gua su lɔ. Ɔ seli be kɛ: “Sɛ sran nga n fa be wlali amun sa nun’n be nun kun wanndi’n, bé kún amun síe i osu.”

25 Kɛ Zei wieli tɛ nga kɛ bé yí’n be yra nnɛn’n i kɔlikɔli’n i yi cɛ’n, ɔ seli gladi difuɛ mun* nin i awlo lɔ sonja’m be kɛ: “An wlu wa naan amun kun be! Nán amun yaci be nun kun sa lɛ!”+ Ɔ maan gladi difuɛ mun nin i awlo lɔ sonja’m be fali tokofi be ko kunnin be, kpɛkun be toli be guɛli i gua su lɔ. Be ɔli lele be juli Baali i sua ba kpa’n* nun lɔ. 26 I sin’n, be fali yɔbuɛ nga be sɔ be+ mɔ be o Baali i sua’n nun lɔ’n be fiteli, yɛ be wɔli be kwlaa be nun.+ 27 Be bubuli Baali i yɔbuɛ nga be sɔ be’n,+ yɛ be bubuli Baali i sua’n.+ Be fa yoli atin nun kɔwlɛ, yɛ ɔ kali sɔ lele andɛ.

28 Kɛ Zei nunnunnin Baali i sɔlɛ’n Izraɛli mɛn’n nun kɛ ngalɛ’n sa. 29 Sanngɛ Zei w’a kacimɛn i sin w’a siman sa tɛ nga Nebati i wa Zeroboamun yoli mɔ i ti yɛ, Izraɛlifuɛ’m be tɔli sa tɛ yolɛ nun’n. Ɔ sɔli sika ɔkwlɛ nannin ba nga be o Betɛli nin Dan lɔ’n.+ 30 Ɔ maan Zoova seli Zei kɛ: “A yoli sa kpa, a yoli like ng’ɔ ti kpa min ɲrun’n, afin a yoli sa kwlaa nga n sunnzunnin kɛ ń fá yó Akabu i awlo’n nunfuɛ mun’n.+ I sɔ’n ti’n, ɔ mma’m bé trán Izraɛli famiɛn bia’n su lele fá jú be akpasua nnan su’n su.”+ 31 Sanngɛ Zei w’a tumɛn i klun w’a faman Zoova m’ɔ ti Izraɛli Ɲanmiɛn’n i Mmla’m be su.+ W’a kacimɛn i sin w’a siman sa tɛ nga Zeroboamun yoli mɔ i ti’n, Izraɛlifuɛ’m be tɔli sa tɛ yolɛ’n nun’n.+

32 Blɛ sɔ’n nun’n, Zoova wa kpɛkpɛli Izraɛli mɛn’n i sin kannganngan. Azaɛli fali alɛ wlali be sin titi Izraɛli nvle wunmuan’n nun.+ 33 Ɔ fali Zurdɛn’n i wia afiliɛ lɔ lika’n, Galaadi mɛn wunmuan’n, yɛle kɛ Gadifuɛ mun, nin Ribɛninfuɛ mun, ɔ nin Manasefuɛ’m+ be mɛn’n. Asa ekun’n, ɔ fali Aroɛɛ m’ɔ o Aanɔn Kongo’n i wun lɔ’n, lele fa juli Galaadi nin Basan.+

34 Zei i su ndɛ’n i onga’n, like kwlaa ng’ɔ yoli be’n, ɔ nin i kwlalɛ’n, be klɛli be fluwa ng’ɔ kan Izraɛli famiɛn’m be ndɛ’n i nun. 35 Zei wuli,* be sieli i Samari lɔ. Yɛ i wa Zoakazi+ sinnin i osu kacili famiɛn-ɔn. 36 Zei sieli Izraɛli mɛn’n afuɛ ablaɔn-nin-mɔcuɛ (28) Samari lɔ.