Sa nga Akoto’m be yoli’n

8 Sɔlu liɛ’n, Etiɛnin i kunlɛ’n yoli i fɛ.+

Kɛ ɔ fɛ i cɛn sɔ’n nun’n, be kleli asɔnun ng’ɔ o Zerizalɛmun lɔ’n i nunfuɛ’m be ɲrɛnnɛn dan kpa. Ɔ maan be kwlaa be bo sanndili Zide nin Samari asa’n su. Saan akoto mun yɛ be kali lɛ-ɔ.+ 2 Sanngɛ yasua wie mɔ be sro Ɲanmiɛn’n, be fali Etiɛnin be ko sieli i, kpɛkun be sunnin i kpa. 3 Sɔlu liɛ’n, ɔ kleli asɔnun’n i nunfuɛ’m be ɲrɛnnɛn. Ɔ wlu sua’m be nun, kpɛkun i yasua-o, i bla-o, ɔ cuɛn be fite ko wla be bisua.+

4 Sanngɛ be nga be bo sanndili’n, kɛ bé kɔ́’n, nn bé kán Ɲanmiɛn ndɛ’n bé klé sran mun.+ 5 Filipu liɛ’n, ɔ ɔli Samari+ klɔ’n su lɔ,* yɛ ɔ kannin Klisi’n i ndɛ kleli lɔfuɛ mun. 6 Sran kpanngban be fali be ɲin sieli ndɛ nga Filipu kannin’n su kpa. Be sieli be su be tili i nuan ndɛ’n, yɛ be fali be ɲin sieli sa dandan ng’ɔ yoli be’n be su kpa. 7 Afin mmusu’m be o be nun kpanngban be su. Yɛ mmusu sɔ’m be kpan kekle kpa, kpɛkun be jaso be su.+ Asa ekun’n, bubuwafuɛ kpanngban nin sran kpanngban mɔ be ja yo be ya’n, be yoli juejue. 8 Ɔ maan klɔ sɔ’n sufuɛ’m be klun jɔli dan.

9 Bian kun o klɔ sɔ’n su lɛ. Be flɛ i kɛ Simɔn. Laa’n, ɔ yi atrɛ. I sɔ’n bo Samari mɛn’n nunfuɛ’m be nuan. Bian sɔ’n waan ɔ ti tinwa. 10 Ɔ maan be nga be leman ɲrun-o, be nga be le ɲrun-o, be kwlaa be fa be ɲin be sie i su, yɛ be se kɛ: “Bian nga yɛ ɔ ti Ɲanmiɛn i Tinmin mɔ be flɛ i kɛ Tinmin Dan’n niɔn.” 11 Atrɛ m’ɔ yi’n ti’n, sran’m be nuan bo be wun titi. I sɔ’n ti’n, be suli i su. 12 Sanngɛ kɛ Filipu boli Ɲanmiɛn Sielɛ’n i jasin fɛ’n+ kleli be mɔ be fali su’n, i yasua-o, i bla-o, be yoli be batɛmun Zezi Klisi dunman nun.+ 13 Simɔn bɔbɔ fali su wie. Kɛ be yoli i batɛmun’n, ɔ suli Filipu su.+ Kɛ ɔ wunnin sa dandan nin abonuan sa mɔ Filipu yo be’n, ɔ boli i nuan.

14 Kɛ akoto mɔ be o Zerizalɛmun lɔ’n be tili i kɛ Samarifuɛ’m be sɔli Ɲanmiɛn ndɛ’n nun kpa’n,+ be sunmannin Piɛli nin Zan be wun lɔ. 15 Kɛ be juli lɔ’n, be srɛli Ɲanmiɛn mannin be naan ɔ fɛ i wawɛ’n man be.+ 16 Afin Ɲanmiɛn wawɛ’n nin-a jraman be nun wie fi su. Batɛmun ngunmin yɛ be yoli be e Min Zezi i dunman nun-ɔn.+ 17 Ɔ maan be fali be sa fuali be su.+ Yɛ Ɲanmiɛn wawɛ’n jrali be su.

18 Simɔn wunnin kɛ, kɛ akoto’m be fa be sa fua sran’m be su’n, Ɲanmiɛn wawɛ’n jra be su. Ɔ maan ɔ mannin be sika 19 naan w’a se kɛ: “An man min tinmin sɔ’n wie naan sran nga n fa min sa n fuɛ i su’n, Ɲanmiɛn wawɛ’n jrɛ i su.” 20 Yɛ Piɛli seli i kɛ: “Maan a nin ɔ sika’n amun nunnun. Afin a bu i kɛ a kwla fa sika to like nga Ɲanmiɛn fa cɛ’n.+ 21 Junman nga timan ɔ liɛ wie. Afin Ɲanmiɛn ɲrun’n, ɔ klun akunndan’n timan kpa. 22 Ɔ maan kaci wɔ akunndan tɛ’n, kpɛkun kpata Zoova.* I liɛ atrɛkpa’n, ɔ́ yáci akunndan tɛ sɔ mɔ a buli’n ɔ́ cɛ́ wɔ. 23 Afin a ti kɛ ayre tɛ wie sa, yɛ a ti sa tɛ’n i kanga.” 24 Simɔn tɛli be su kɛ: “Amun kpata Zoova* man min naan ndɛ nga amun kɛnnin i lɛ’n, be nun wie fi w’a ɲanman min.”

25 Ɔ maan kɛ be kannin Zoova* i ndɛ’n lika kwlaa wieli’n, be sali be sin Zerizalɛmun lɔ. Kɛ bé kɔ́’n, be boli jasin fɛ’n Samari klɔ kpanngban su.+

26 Sanngɛ Zoova* i anzi’n+ kannin ndɛ kun kleli Filipu. Ɔ seli i kɛ: “Jaso naan kɔ ngua lɔ. Kɔ atin ng’ɔ fɛ i Zerizalɛmun kɔ Gaza’n su.” (Atin sɔ’n sin aawlɛ flɛnnɛn’n nun.) 27 Ɔ maan ɔ jaso ɔli, kpɛkun ɔ wunnin Etiopi bian kun.* Bian sɔ’n ti Etiopi famiɛn bla mɔ be flɛ i Kandasi’n, i awlo lɔ sran dan kun. I yɛ ɔ niɛn i ninnge kpakpa’m be kwlaa be su-ɔ. Ɔ fin Ɲanmiɛn sulɛ Zerizalɛmun lɔ,+ 28 ɔ su sɛ i sin. Ɔ ti i kakaklolo’n nun, ɔ su kanngan Ɲanmiɛn nuan ijɔfuɛ Ezai i fluwa’n nun. Ɔ mɛn i nɛn’n su yɛ ɔ kanngan-ɔn. 29 Yɛ Ɲanmiɛn wawɛ’n seli Filipu kɛ: “Kɔ kakaklolo nga i wun lɔ, naan kɛ i wun koko lɛ.” 30 Filipu wanndili naan w’a mantan kakaklolo’n. Ɔ wunnin kɛ bian’n su kanngan Ɲanmiɛn nuan ijɔfuɛ Ezai i fluwa’n nun. Ɔ mɛn i nɛn’n su yɛ ɔ kanngan nun-ɔn. Ɔ usɛli i kɛ: “?Ndɛ nga a su kɛnngɛn i lɛ’n, a wun i wlɛ?” 31 Bian’n seli kɛ: “?Nanwlɛ, sɛ sran w’a ukaman min’n, ɔ́ yó sɛ naan m’an wun i wlɛ?” Ɔ maan ɔ srɛli Filipu kɛ ɔ fu naan ɔ trɛn i wun lɛ. 32 Ɲanmiɛn ndɛ ng’ɔ su kanngan nun’n yɛ: “Kɛ bua sa’n, be fɛ i ɔli kɛ bé kó kún i. Yɛ kɛ bua ba mɔ kɛ bé kpɛ́kpɛ́ i ndrɛ’n, ɔ ukemɛn i nuan’n sa’n, i kusu ɔ ukemɛn i nuan.+ 33 Be guɛli i ɲin ase, b’a dimɛn i jɔlɛ nanwlɛ su.+ ?Wan yɛ ɔ́ kɛ́n i finwlɛ’n* i su ndɛ tɛkɛtɛkɛ mun-ɔn? Afin be fɛli i nguan’n asiɛ’n su be ɔli.”+

34 Yɛ famiɛn bla’n i junman difuɛ’n seli Filipu kɛ: “?Yaci, wan ndɛ yɛ Ɲanmiɛn nuan ijɔfuɛ’n kan-ɔn? ?I bɔbɔ i ndɛ yɛ ɔ su kan-ɔn, annzɛ sran uflɛ ndɛ yɛ ɔ su kan-ɔn?” 35 Yɛ Filipu boli ijɔlɛ bo-ɔ. Ɔ boli i bo Ɲanmiɛn ndɛ sɔ’n su naan w’a bo Zezi i su jasin fɛ’n w’a kle i. 36 Kɛ bé kɔ́’n, be juli nzue ba kun i wun lɛ. Yɛ famiɛn bla’n i junman difuɛ’n seli kɛ: “Nian! Nzue ba kun yɛ. ?Ngue ti yɛ be kwlá yoman min batɛmun yɛ?” 37 *—— 38 Ɔ maan ɔ seli kɛ be jran kakaklolo’n. Kpɛkun Filipu nin famiɛn bla’n i awlo lɔ junman difuɛ’n be nɲɔn’n, be jrali nzue’n nun, naan Filipu w’a yo i batɛmun. 39 Kɛ be fin nzue’n nun fiteli’n, Zoova* i wawɛ’n fali Filipu ɔli ndɛndɛ. Ɔ maan famiɛn bla’n i junman difuɛ’n w’a wunmɛn i kun. Yɛ ɔ ɔli i liɛ-ɔ. Kɛ ɔ́ kɔ́’n, i klun ti jɔwa kpa. 40 Sanngɛ be wunnin Filipu Asdɔdu lɔ. Ɔ wlanwlannin lɔ lika’n nun boli jasin fɛ’n klɔ’m be kwlaa be su lele ɔ fa juli Sezare lɔ.+