Zeremin

44 Ndɛ nga Ɲanmiɛn seli Zeremin kɛ ɔ kan kle Zifu’m be kwlaa nga be tran Ezipti nvle’n+ nun lɔ’n, nin be nga be tran Migidɔlu,+ nin Tapanɛsi,+ nin Nɔfu,*+ nin Patrɔsu+ asa’n su lɔ’n yɛ: 2 “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Amun wunnin ɲrɛnnɛn kwlaa nga n fa yili Zerizalɛmun+ nin Zida klɔ’m be kwlaa be su’n. Andɛ’n, b’a bubu sekeseke, sran fi tranman be su kun.+ 3 Sa tɛtɛ kwlaa nga amun yoli fa fɔkɔli min awlɛn’n ti-ɔ. Yɛle kɛ amun yili tɛ+ mannin amuin mun. Kpɛkun amun sɔli amuin mɔ amun bɔbɔ nin amun nannan mun amun a siman be’n.+ 4 N sunmannin min sufuɛ kwlaa nga be ti min nuan ijɔfuɛ’n amun sin titi. N sunmannin be lelele* naan be se amun kɛ: “Amun yaci, tete like sɔ mɔ n kpɔ i’n, nán amun yo.”+ 5 Sanngɛ amun a sieman amun su naan se kɛ amún tíe naan amún yáci amun klunwi’n. Amun yili tɛ fa sɔli amuin mun titi.+ 6 I sɔ’n ti’n, min ya dan’n jueli Zida klɔ mun nin Zerizalɛmun akpɔ’m be su kɛ sin sa, yɛ ɔ yrali be kɔlikɔli. Yɛ b’a kaci klɔ nvuɛn, sran fi tranman be su, kɛ nga be fa wun i andɛ’n sa.’+

7 “Siɛn’n Zoova, Ɲanmiɛn m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘?Ngue ti yɛ amún yó naan ɲrɛnnɛn dan nga tɔ amun bɔbɔ amun su-ɔ? Afin yasua’m be kwlaa, nin bla mun, nin ba kanngan mun, ɔ nin ba nɔnman nga be fin Zida’n be kwlaa bé wú, sran fi su kaman lɛ. 8 ?Ngue ti yɛ amun fa amun nzuɛn tɛ’n fa fɔkɔ min awlɛn-ɔn? Amun yi tɛ man Ezipti nvle mɔ amun ko trannin nun’n, i nun amuin mun. Amún núnnún mlɔnmlɔn. Yɛ sran’m bé fá amun dunman’n bó sannzan. Asiɛ’n su nvlenvle kwlaa be nunfuɛ’m bé yó amun finfin.+ 9 ?Sa tɛtɛ nga amun nannan mun nin sa tɛtɛ nga Zida famiɛn mun,+ nin sa tɛtɛ nga be yi mun,+ nin sa tɛtɛ nga amun bɔbɔ nin amun yi mun+ amun yoli i Zida nvle’n nun nin Zerizalɛmun akpɔ’m be su’n, amun wla w’a fi be su? 10 Andɛ nin andɛ’n, amun nin-a kanman amun wun ase.* Amun a kleman kɛ amun sro min,+ yɛ amun a nantiman mmla nin afɔtuɛ nga n fa mannin amun bɔbɔ nin amun nannan mun’n be su.’+

11 “I sɔ’n ti’n, Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘M’an gugu kɛ ń fá ɲrɛnnɛn ń yí amun su naan ń núnnún Zidafuɛ’m be kwlaa. 12 Zidafuɛ’m be onga nga be kali lɛ mɔ be waan san fii bé kó trán Ezipti’n, ń trá be, yɛ bé wú Ezipti nvle’n nun lɔ.+ Bé fá tokofi kún be, yɛ awe’n kún be lele bé wú. Kɛ ɔ fɛ i be nga be leman ɲrun’n be su lele m’ɔ́ fá jú be nga be le ɲrun’n be su’n, alɛ’n dí be, yɛ awe’n kún be lele bé wú. Yɛ sran’m bé fá be dunman’n bó sannzan. Ɲrɛnnɛn ng’ɔ́ wá tɔ́ be su’n, ɔ́ yó sran’m be sro. Be su ɲanman ye le, yɛ be ɲin gúa ase.+ 13 Ń fá tokofi’n nin awe’n nin tukpacɛ m’ɔ sa ndɛndɛ’n ń klé be nga be tran Ezipti’n be nun, kɛ nga n fa kleli Zerizalɛmunfuɛ’m be nun’n sa.+ 14 Yɛ Zidafuɛ’m be onga nga be kali lɛ mɔ be ko trannin Ezipti’n, be su fiteman nun naan se kɛ bé sá be sin Zida nvle’n nun lɔ ekun. Bé kúnndɛ kɛ bé sá be sin naan bé kó trán lɔ. Sanngɛ be su saman be sin, saan be nun kaan sa yɛ bé sá be sin-ɔn.’”

15 Yasua kwlaa nga be si kɛ be yi’m be yili tɛ mannin amuin mun’n, nin bla kwlaa nga be ko jranjrannin lika sɔ’n nun mɔ be sɔnnin kpanngban kpa’n, nin be kwlaa nga be tran Ezipti’n+ nin Patrɔsu’n+ be tɛli Zeremin su kɛ: 16 “Ndɛ nga Zoova fa wlali ɔ nuan kɛ a kan kle e’n, e su faman su. 17 Sanngɛ ndɛ kwlaa ng’ɔ fin e nuan fiteli’n i su yɛ é dí-ɔ. É yí tɛ mán ɲanmiɛn su lɔ Famiɛn Bla’n.* Yɛ é gúa nzan é mɛ́n i,+ kɛ nga e nannan mun nin e famiɛn mun nin e nvle’n nun sran dandan’m be yoli i Zida klɔ’m be su nin Zerizalɛmun akpɔ’m be su’n sa. I sɔ blɛ nun’n, e di like lele e ku yi, e sa mianman like fi wun, yɛ ɲrɛnnɛn fi nunman e su. 18 Sanngɛ kɛ ɔ fin cɛn mɔ e yiman tɛ e manman ɲanmiɛn su lɔ Famiɛn Bla’n* kun’n, mɔ e guaman nzan e mɛnmɛn i kun’n, e ɲanman like fi kun. Yɛ tokofi’n nin awe’n be kle e ɲrɛnnɛn.”

19 Bla’m be kan guali su kɛ: “?I nun nga e yi tɛ man Ɲanmiɛn su lɔ Famiɛn Bla’n,* mɔ e gua nzan e mɛn i’n, nán e wun mun yɛ be man e atin kɛ e tɔn gato mɔ bla sɔ’n i nzɔliɛ o su’n, naan e fa mɛn i-ɔ? ?Nán be yɛ be man e atin kɛ e gua nzan e mɛn i-ɔ?”

20 Yɛ Zeremin seli nvlefuɛ’m be kwlaa, nin yasua mun, nin be yi mun, nin be kwlaa nga be nin i su ijɔ’n be kɛ: 21 “Tɛ nga amun bɔbɔ, nin amun nannan mun, nin amun famiɛn mun, nin amun nvle’n nun sran dandan mun, nin nvle nunfuɛ’m be yili be Zida klɔ’m be su nin Zerizalɛmun akpɔ’m be su’n,+ Zoova i wla te kpɛn be su. Be te o i klun. 22 I agualiɛ su’n, tete like nga amun yo’n, nin sa tɛtɛ nga amun yo’n, be wa yoli Zoova i tɛ dan. Yɛ amun nvle’n tɔli srolo, sran fi tranman su kun. Kɛ sran’m be wun i’n, ɔ yo be sro, yɛ be fa amun dunman’n bo sannzan, kɛ nga e fa wun i andɛ yɛ’n sa.+ 23 Kɛ mɔ amun yili tɛ mannin amuin mun mɔ amun fɔnnin Zoova wun’n, mɔ amun a faman Zoova i nuan ndɛ’n su’n, mɔ amun a faman mmla fanunfanun ng’ɔ fa mannin amun’n be su’n, i ti yɛ ɲrɛnnɛn nga o amun su kɛ nga e fa wun i andɛ yɛ’n sa-ɔ.”+

24 Yɛ Zeremin seli nvlefuɛ kwlaa nga be o lɛ’n nin bla’m be kwlaa be ekun kɛ: “Zidafuɛ mun, amun mɔ amun o Ezipti nvle’n nun’n, amun tie ndɛ nga Zoova kan’n. 25 Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Ndɛ ng’ɔ fin amun bɔbɔ nin amun yi’m be nuan fiteli’n, amun yoli i nuan su like. Afin amun seli kɛ: “Nda nga e tɛli i kɛ é yí tɛ mán Ɲanmiɛn su lɔ Famiɛn Bla’n* naan é gúa nzan é mɛ́n i’n, saan é yíɛ i nuan.”+ Yɛ bla mun, amun kusu, n si kɛ nda nga amun tali’n, saan amún yíɛ i nuan.’

26 “I sɔ’n ti’n Zidafuɛ mun, amun kwlaa mɔ amun tran Ezipti’n, amun tie ndɛ nga Zoova kan’n: ‘Zoova waan yoo: “Ń fá min bɔbɔ min dunman m’ɔ ti dan’n ń tá nda kɛ Zida lɔ yasua kwlaa+ nga be tran Ezipti’n, be nun wie fi su faman min dunman’n taman nda kɛ: ‘N kan min Min Zoova m’ɔ Sie Like Kwlakwla’n, m’ɔ lafiman’n,’ kun.+ 27 N su fa min ɲin n sie be su naan ń fá ɲrɛnnɛn ń yí be su. N su yoman be kpa.+ Tokofi’n nin awe’n bé klé Zidafuɛ’m be nun lele saan b’a wie nunnun sekeseke.+ 28 Be nun kaan sa yɛ be su faman tokofi kunman be yɛ bé fín Ezipti nvle’n nun fíte kɔ́ Zida-ɔ.+ Kpɛkun Zidafuɛ nga be kali lɛ’n mɔ be ko trannin Ezipti’n be kwlaa bé sí sran nga i ndɛ liɛ’n kpɛnnin su’n, sɛ min liɛ’n nin-o annzɛ be liɛ’n nin-o.”’”

29 “Zoova waan yoo: ‘Kɛ ɔ ko yo naan amun a wun i wlɛ kɛ ń má tú amun fɔ lika nga nun, naan amun a wun i wlɛ kɛ ndɛ nga n kannin mɔ n seli kɛ ń fá ɲrɛnnɛn ń yí amun su’n, ɔ́ kpɛ́n su sakpasakpa’n, ń má mán amun nzɔliɛ kun. Nzɔliɛ sɔ’n yɛ: 30 Zoova waan yoo: “Ń má fá Faraɔn Ofra m’ɔ ti Ezipti famiɛn’n ń wlɛ́ i i kpɔfuɛ mun nin be nga be kunndɛ kɛ bé kún i’n be sa nun, kɛ nga n fali famiɛn Sedesiasi m’ɔ sie Zida’n n wlali i kpɔfuɛ Famiɛn Nebikadnezaa* m’ɔ sie Babilɔnin’n m’ɔ kunndɛli kɛ ɔ́ kún i’n i sa nun’n sa.”’”+