1 Be Ɲoliɛ

29 Famiɛn Davidi seli sran’m be kwlaa kɛ: “Min wa Salomɔn mɔ Ɲanmiɛn kpɛli i’n,+ ɔ te yo gbanflɛn kan, ɔ siman sa.*+ Junman’n kusu ti dan, afin sua’n timan klɔ sran liɛ, ɔ ti Ɲanmiɛn Zoova liɛ.+ 2 N kplinnin min ɲin lele n ɲannin ninnge nga bé fá kplán min Ɲanmiɛn’n i sua’n. N mannin sika ɔkwlɛ naan be fa yo sika ɔkwlɛ ninnge mun, nin sika naan be fa yo sika ninnge mun, nin aaba naan be fa yo aaba ninnge mun, nin blalɛ naan be fa yo blalɛ ninnge mun,+ nin waka,+ nin yɔbuɛ nga be flɛ i kɛ oniksi’n, nin yɔbuɛ nga be trɛ i ase nin laso’n, nin yɔbuɛ kpakpa nga be fa yo sua klanman’n, nin yɔbuɛ kpakpa fanunfanun kwlaa, ɔ nin yɔbuɛ nga be flɛ i kɛ albatri’n be kpanngban kpa naan be fa di junman’n. 3 Asa ekun’n, klolɛ mɔ n klo min Ɲanmiɛn’n i sua’n ti’n,+ ń fá min bɔbɔ min ninnge kpakpa’m be siewlɛ’n+ nun sika ɔkwlɛ’n nin min sika’n wie ń úka ninnge nga n kunndɛli be n sieli’n be su naan be fa kplan sua m’ɔ ti Ɲanmiɛn liɛ klonglo’n. 4 Ninnge nga ń mán’n yɛ: Sika ɔkwlɛ m’ɔ fin Ofii’n+ talan akpi nsan (3.000),* nin sika jrɛiin talan akpi nso (7.000)* naan be fa kata sua ba’m* be talɛ’m be wun. 5 Maan be fa sika ɔkwlɛ’n be yo sua’n i wun sika ɔkwlɛ ninnge mun, yɛ maan be fa sika’n be yo i wun sika ninnge mun. Yɛ maan ajuin difuɛ’m be fa di junman kwlaa nga be fa mannin be’n. ?Amun nun onin yɛ ɔ klo kɛ ɔ́ fɛ́ i sa nun like mán Zoova andɛ-ɔ?”+

6 Kɛ ɔ yoli sɔ’n, Izraɛli awloboawlobo’m be su kpɛn mun, nin akpasua’m be su kpɛn mun, nin sran akpi su kpɛn mun, nin sran ya su kpɛn mun,+ nin kpɛnngbɛn nga be di junman man famiɛn’n+ be bali be klun klo su. 7 Kpɛkun be mannin ninnge nga mun naan be fa kplan Ɲanmiɛn Kpli i sua’n: Sika ɔkwlɛ talan akpi nnun (5.000), nin dariki* akpiakpi blu (10.000), nin sika talan akpiakpi blu (10.000), nin aaba talan akpiakpi blu-nin-mɔcuɛ (18.000), nin blalɛ talan akpiakpi ya (100.000). 8 Be kwlaa nga be le yɔbuɛ kpakpa wie’n, be fa mannin naan be fa guɛ i Zoova i sua’n nun ninnge siewlɛ’n nun. Zeiɛli+ m’ɔ ti Gɛɛsɔn i osu’n nunfuɛ’n+ yɛ ɔ nian su-ɔ. 9 Sran’m be mannin be klunklo like aklunjɔɛ su. Afin be tuli be klun be mannin Zoova i like.+ I sɔ’n yoli Famiɛn Davidi i fɛ dan.

10 Kpɛkun Davidi srɛli Zoova sran’m be kwlaa be ɲrun lɛ. Ɔ seli kɛ: “Zoova, wɔ mɔ a ti e si Izraɛli i Ɲanmiɛn’n, maan be manman wɔ tititi. 11 Zoova, a ti dan,+ a le tinmin,+ a yo ɲɛnmɛn dan, klanman’n nin aɲrunɲan’n+ be ti ɔ liɛ. Afin nglo lɔ’n nin asiɛ’n su wa ninnge kwlaa ti ɔ liɛ.+ Zoova, famiɛn dilɛ’n ti ɔ liɛ.+ Wɔ yɛ a o like kwlaa ti su-ɔ. 12 Aɲanbeun’n nin aɲrunɲan’n be fin wɔ.+ Yɛ a sie like kwlakwla.+ Tinmin’n+ nin kwlalɛ’n+ be ti ɔ liɛ. A kwla yo maan sran kwlaa ɲan ɲrun,+ yɛ a kwla man sran kwlaa wunmiɛn.+ 13 Ɔ maan e Ɲanmiɛn, é lá wɔ ase, yɛ é mánmán ɔ dunman dan’n.

14 “?Wan yɛle min? ?Yɛ wan yɛle min nvle’n nunfuɛ mun mɔ i ti yɛ e kwla man e klunklo like kɛ nga sa-ɔ? Afin like kwlaa fin wɔ. Yɛ ɔ bɔbɔ ɔ sa nun like yɛ e fa mannin wɔ-ɔ. 15 E ti aofuɛ ɔ ɲrun, yɛ e ti wlanwlanfuɛ, kɛ e nannan’m be kwlaa be sa.+ Cɛn nga e di i asiɛ’n su’n ti kɛ fɔnvɔ’n sa.+ Be kwlá faman be wla guaman su. 16 Zoova, e Ɲanmiɛn, aɲanbeun like kwlaa nga e kunndɛli naan é fá kplán sua kun mán wɔ naan ɔ dunman m’ɔ ti sanwun’n tran su’n, be fin ɔ bɔbɔ ɔ sa nun. Yɛ be kwlaa be ti ɔ liɛ. 17 Min Ɲanmiɛn, n si kpa kɛ a nian sran’n i awlɛn’n nun.+ Sran ng’ɔ nanti seiin’n, i wun yo ɔ fɛ.+ Min awlɛn’n ti kpa, min klun klo su yɛ n mannin wɔ ninnge kwlaa sɔ mun-ɔn. Kpɛkun kɛ n wun kɛ ɔ sran mɔ be o wa yɛ’n, be su fa be klunklo like mán wɔ’n, ɔ yo min fɛ tratra su. 18 Zoova, wɔ mɔ a ti e nannan Abraamun, nin Izaaki, nin Izraɛli be Ɲanmiɛn’n, uka ɔ sran mun naan be bu akunndan kpa sɔ’n titi, naan be fa be awlɛn’n kwlaa be su wɔ.+ 19 Uka min wa Salomɔn kusu naan ɔ fɛ i awlɛn’n kwlaa+ nanti ɔ mmla mun,+ nin ndɛ nga a fa kpɛn e wla’n, ɔ nin ɔ afɔtuɛ fanunfanun kwlaa be su. Ukɛ i naan ɔ yo ninnge kwlaa sɔ mun naan ɔ kplan ɔ sua mɔ i ti yɛ n kunndɛli ninnge mun n sieli’n.”+

20 Davidi seli sran’m be kwlaa kɛ: “Siɛn’n, amun manman Zoova m’ɔ ti amun Ɲanmiɛn’n.” Yɛ sran’m be kwlaa be manmannin Zoova m’ɔ ti be nannan’m be Ɲanmiɛn’n niɔn. Be kluli kpɛkun be utuli be ɲin ase Zoova nin famiɛn’n be bo. 21 Cɛn sɔ’n nun’n, ɔ nin cɛn ng’ɔ su i su’n nun’n, be yili tɛ mannin Zoova. Yɛ be yili tɛ nga kɛ bé yí’n be yra nnɛn’n i kɔlikɔli’n+ mannin Zoova. I sɔ yolɛ nun’n, be kunnin nannin ba akpi kun (1.000), nin bua ɲin akpi kun (1.000), nin bua ba yasua akpi kun (1.000). Yɛ be sieli su nzan sɛsɛsɛ.+ Nanwlɛ, be yili tɛ kpanngban kpa Izraɛlifuɛ’m be ti.+ 22 Cɛn sɔ’n nun’n, be dili like lele yɛ be nɔnnin nzan Zoova ɲrun. Be dili aklunjɔɛ kpa.+ Kpɛkun be sieli Davidi i wa Salomɔn famiɛn ekun. I kpɛ nɲɔn su nga bé síe i famiɛn’n yɛ ɔ o lɛ-ɔ. Be guɛli i ti su ngo Zoova ɲrun naan ɔ yo be su kpɛn.+ Asa ekun’n, be sieli Zadɔku Ɲanmiɛn ɲrun jranfuɛ.+ 23 Salomɔn trannin Zoova i famiɛn bia’n su,+ ɔ sinnin i si Davidi i osu dili famiɛn. Ɔ yoli famiɛn kpa, yɛ Izraɛlifuɛ’m be kwlaa be ɲin yili i. 24 Kpɛnngbɛn’m be kwlaa,+ nin safuɲrɛn mun,+ nin Famiɛn Davidi i wa yasua’m be kwlaa+ be loli be wun mannin Famiɛn Salomɔn naan ɔ sie be. 25 Zoova yoli maan Salomɔn ɲannin ɲrun kpa Izraɛlifuɛ’m be kwlaa be ɲrun. Famiɛn kwlaa nga be dun mmua sieli Izraɛli nvle’n be nun wie fi w’a ɲanman ɲrun kɛ i sa.+

26 Zese i wa Davidi sieli Izraɛli nvle wunmuan’n. 27 Ɔ yoli Izraɛli famiɛn afuɛ ablanan (40). Ɔ dili famiɛn Ebrɔn lɔ afuɛ nso,+ yɛ ɔ dili famiɛn Zerizalɛmun lɔ afuɛ ablasan-nin-nsan (33).+ 28 Ɔ cɛli yɛ ɔ dili ye lele naan w’a wu.+ Kɛ ɔ́ wú’n, nn w’a yo oke kpa. Ɔ ɲannin ninnge kpanngban kpa, yɛ ɔ ɲannin ɲrun dan. I wa Salomɔn sinnin i osu dili famiɛn.+ 29 Famiɛn Davidi i su ndɛ kwlaa, kɛ ɔ fɛ i i bo bolɛ’n nun lele m’ɔ́ fá wie’n, ɔ ti klɛwa Samiɛli m’ɔ ti jeliwafuɛ’n, nin Natan+ m’ɔ ti Ɲanmiɛn nuan ijɔfuɛ’n, nin Gadi m’ɔ wun aolia nun sa mun’n, be fluwa’m be nun. 30 Davidi i famiɛn dilɛ’n, nin i kwlalɛ’n, nin sa nga be juli i bɔbɔ, nin Izraɛlifuɛ mun, nin nvle nga be mantan be lɛ’n be su’n, be su ndɛ o fluwa sɔ’m be nun wie.