Ezai
6 Afuɛ nga i nun yɛ Famiɛn Oziasi wuli’n,+ n wunnin Zoova, ɔ ti famiɛn bia+ kun m’ɔ ti nglonglo kpa’n su. I tralɛ dan’n i nuan m’ɔ bubu gua’n, ɔ yili i sua’n. 2 Serafɛn mun be o i ti su nglo. Be tinuntinun be le ndɛwa nsiɛnnsiɛn. Be fa nɲɔn be kata be ɲrun, be fa nɲɔn be kata be ja’m be wun, kpɛkun be fa nɲɔn be tu.
3 Yɛ be kpan be se be wiengu kɛ:
“Zoova m’ɔ ti sonja’m be su kpɛn’n, ɔ ti sanwun, ɔ ti sanwun, ɔ ti sanwun.+
I aɲrunɲan’n w’a de asiɛ wunmuan’n.”
4 Kɛ bé kpán’n, nn anuan’n i kadri mun bé kéje, yɛ sin wunsrɛn yili sua’n.+
5 Kpɛkun n seli kɛ: “M’an wu-o!
M’an wu w’a wie,*
afin n ti sran kun mɔ i nuan bui’m be ti fiɛn-ɔn,+
yɛ n tran nvle kun mɔ i nunfuɛ’m be nuan bui’m be ti fiɛn’n i nun.
Afin m’an wun Famiɛn’n, m’an wun Zoova m’ɔ ti sonja’m be su kpɛn’n i bɔbɔ ba’n!”
6 Kɛ ɔ yoli sɔ’n, Serafɛn’m be nun kun tu bali min wun lɛ. Kɛ ɔ́ bá’n ɔ fali lawlɛ kun, ɔ fa fali sɛnmlɛn ba+ kun tɛ yiwlɛ’n+ su, ɔ o i sa nun. 7 Ɔ kannin min nuan’n, kpɛkun ɔ seli kɛ:
“Nian! Like nga w’a kan ɔ nuan bui mun.
Ɔ fɔnlɛ’n w’a wie,
b’a yaci ɔ sa tɛ’n b’a cɛ wɔ.”
8 Kpɛkun n tili Zoova i nɛn’n, ɔ usali kɛ: “?Wan yɛ ń súnmɛn i-ɔ? ?Wan yɛ ɔ́ kɔ́ e dunman nun-ɔn?”+ Yɛ n tɛli i su kɛ: “Min yɛ! Sunman min!”+
9 Kpɛkun ɔ tɛli su kɛ: “Kɔ ko se nvle nga i nunfuɛ’m be kɛ:
‘Amún tíe i kpɛ sunman,
sanngɛ amun su wunmɛn
i wlɛ,
amún wún i kpɛ sunman,
sanngɛ amun su siman sa.’+
10 Yo naan nvle nga i nunfuɛ’m be awlɛn’n kete,+
yo naan be su mun b’a timan sa,+
yɛ kata be ɲinma mun
naan be ɲinma mun b’a wunman ase kun,
naan be su mun b’a timan
sa kun,
naan be awlɛn’n w’a wunman sa wlɛ,
naan b’a saman be sin, naan b’a yoman juejue.”+
11 Yɛ n usali kɛ: “?Ee, Zoova, cɛn benin ko?” Kpɛkun ɔ seli kɛ:
“Ɔ́ yó sɔ lele klɔ’m bé wíe sáci, yɛ sran fi su tranman be su,
sran fi su tranman sua’m be nun,
yɛ mɛn’n sáci, kpɛkun ɔ́ tɔ́ srolo.+
12 Ɔ́ yó sɔ lele saan Zoova w’a fa sran mun w’a ɔ mmua,+
yɛ mɛn’n i dan lika ɔ́ tɔ́ srolo kpa liɛ su.
13 Sanngɛ sɛ be bubu Izraɛlifuɛ’m be nun blu’n, i bue kun ká lɛ, yɛ bé yrá bue kun sɔ’n ekun, ɔ́ yó kɛ waka dan wie sa. Ɔ́ yó kɛ sɛnin waka mɔ kɛ be ko bu be’n, be bo’n ka lɛ’n sa. I bo ng’ɔ ka lɛ’n, ɔ́ fɛ́fɛ́,* yɛ ɔ́ yó Ɲanmiɛn liɛ klonglo.”