Ɛsdrasi
6 Famiɛn Dariisi yoli maan be nianniannin fluwa* nga be o kan be sie ninnge kpakpa mun Babilɔnin lɔ’n be nun. 2 Be wunnin fluwa kun sua fleiin ng’ɔ o Ɛkibatan lɔ’n nun, Medi mɛn’n nun lɔ. Fluwa sɔ’n nun’n be klɛli i kɛ:
3 “Kɛ Sirisi kacili famiɛn’n i afuɛ klikli’n nun’n, ɔ kannin Ɲanmiɛn sua m’ɔ o Zerizalɛmun lɔ’n i ndɛ seli kɛ:+ ‘Maan be kplan sua’n i uflɛ naan ɔ yo tɛ yiwlɛ lika, maan be wlɛ i bo ase, maan i nglonglo su’n yo kude ablesiɛn (60),* yɛ maan i tɛtrɛ nun’n yo kude ablesiɛn (60).+ 4 Maan be kondo yɔbuɛ dandan wie mun be ju lika sɔ’n nun lɔ naan be siesie be ɲanman nsan, yɛ be siesie su waka ɲanman kun.+ Maan be fa sika’n famiɛn’n i awlo lɔ be fa to ninnge sɔ mun.+ 5 Asa ekun’n, Ɲanmiɛn sua’n nun lɔ sika ɔkwlɛ nin sika kpongbo nga Nebikadnezaa fali be Ɲanmiɛn sua m’ɔ o Zerizalɛmun lɔ’n nun bali Babilɔnin’n,+ maan be fa sa be sin naan be ko sie be be osu’n nun Ɲanmiɛn sua’n nun Zerizalɛmun lɔ. Maan be sie be Ɲanmiɛn sua’n nun lɔ.’+
6 “Ɔ maan siɛn’n, Tatenai, wɔ mɔ a ti Nzue’n i bue kun lɔ* lika’n i siefuɛ’n, a nin Setaa-Bozinai nin amun wiengu junman difuɛ mɔ be ti famiɛn’n i janunfuɛ’n,+ nán amun kle be yalɛ. 7 Nán amun tanndan Ɲanmiɛn i sua sɔ’n i kplanlɛ’n i ɲrun. Zifu’m be siefuɛ’n nin Zifu’m be kpɛnngbɛn’m bé wá kplán Ɲanmiɛn sua sɔ’n i osu laa’n nun. 8 Asa ekun’n, ń má klé amun like ng’ɔ fata kɛ amun yo man Zifu’m be kpɛnngbɛn mun naan b’a kwla kplan Ɲanmiɛn sua sɔ’n: Maan be fa sika’n famiɛn’n i ninnge kpakpa’m be nun,+ maan be fa lapo nga be su i Nzue’n i bue kun lɔ lika’n nun’n be man yasua sɔ mun ndɛndɛ, kɛ ɔ ko yo naan junman’n w’a jranman’n ti.+ 9 Like kwlaa nga be sa miɛn i wun’n, maan be fa man be cɛn kwlaa, nán maan be kpɛ nun cɛn. Ninnge sɔ mun yɛ: Nannin gbanflɛn+ nin bua ɲin,+ ɔ nin bua ba+ mɔ be fa yi tɛ nga kɛ bé yí’n be yra nnɛn’n i kɔlikɔli be man Ɲanmiɛn m’ɔ o nglo lɔ’n, ɔ nin ble,+ nin njin,+ nin duvɛn,+ nin ngo,+ kɛ nga Ɲanmiɛn ɲrun jranfuɛ mɔ be o Zerizalɛmun lɔ’n be kannin’n sa. 10 I liɛ’n, bé kwlá yí tɛ m’ɔ jɔ Ɲanmiɛn m’ɔ o nglo lɔ’n i klun’n titi, yɛ bé srɛ́ Ɲanmiɛn mán famiɛn’n nin i mma mun naan be cɛ nguan nun.+ 11 N seli ekun kɛ sran kwlaa ng’ɔ fɔn mmla nga’n, bé yí i sua’n nun waka kun, bé kplán, kpɛkun bé cící i waka sɔ’n su.* Sa ng’ɔ yoli’n ti’n, i sua’n káci sran’m be kwlaa be atin nun kɔwlɛ.* 12 Famiɛn kwlaa nin sran kwlaa ng’ɔ fɔn mmla nga naan ɔ saci Ɲanmiɛn sua m’ɔ o Zerizalɛmun lɔ’n, maan Ɲanmiɛn m’ɔ yoli maan i bɔbɔ i dunman’n trannin lika sɔ’n su’n,+ ɔ yi i ase. N bɔbɔ min Dariisi yɛ n kan ndɛ sɔ’n niɔn. Maan amun nian nun be yo i ndɛndɛ.”
13 Ɔ maan Tatenai m’ɔ sie Nzue’n i bue kun lɔ lika’n, nin Setaa-Bozinai,+ ɔ nin be wiengu junman difuɛ’m be ka lɛ yoli like kwlaa nga Famiɛn Dariisi seli kɛ be yo’n. 14 Zifu’m be kpɛnngbɛn mun be kplannin sua’n titi,+ yɛ junman’n ɔli i ɲrun. Ɲanmiɛn i nuan ndɛ nga Ɲanmiɛn nuan ijɔfuɛ Aze,+ nin Zakari+ m’ɔ ti Ido i anunman’n be kannin’n, ɔ wlali be fanngan. Be niannin ndɛ nga Izraɛli Ɲanmiɛn’n,+ nin Sirisi+ nin Dariisi,+ ɔ nin Atazɛɛzɛsi+ m’ɔ ti Pɛɛsi famiɛn’n be kannin’n su be wieli sua’n i kplan. 15 Kɛ Dariisi kacili famiɛn’n i afuɛ nsiɛn su’n, Adaa* anglo’n i cɛn ba nsan su’n, be wieli sua’n i kplan.
16 I sin’n, Izraɛlifuɛ mun, nin Ɲanmiɛn ɲrun jranfuɛ mun, nin Levifuɛ mun,+ ɔ nin be nga be sali be sin’n be onga’m be yili Ɲanmiɛn sua sɔ’n i nglo* aklunjɔɛ su. 17 Ɲanmiɛn sua sɔ’n i nglo yilɛ nun’n, be fali nannin tola ya kun (100), bua ɲin ya nɲɔn (200), bua ba ya nnan (400). Be fali boli yasua blu-nin-nɲɔn (12) be fa yili sa tɛ’n i ti tɛ, be niannin Izraɛli akpasua’m be nuan’n su yɛ be fali boli mun-ɔn.+ 18 Be sieli Ɲanmiɛn ɲrun jranfuɛ mun be akpasua’m be nun, ɔ nin Levifuɛ mun be akpasua’m be nun naan be di Ɲanmiɛn i junman’n Zerizalɛmun lɔ,+ kɛ nga be fa klɛli i Moizi i fluwa’n nun’n sa.+
19 Anglo klikli’n i cɛn ba blu-nin-nnan (14) su’n, be nga be sali be sin’n be dili Delɛ Cɛn’n.+ 20 Ɲanmiɛn ɲrun jranfuɛ mun nin Levifuɛ’m be kwlaa be yoli be wun sanwun,+ ɔ maan be kwlaa be yoli sanwun. Be kunnin Delɛ Cɛn nnɛn mun, be bɔbɔ nin be kwlaa nga be sali be sin’n, ɔ nin be wiengu Ɲanmiɛn ɲrun jranfuɛ mun de dunman nun. 21 I sin’n, Izraɛlifuɛ nga be sali be sin’n be dili nnɛn’n, be nin be kwlaa nga be suli be su mɔ be yoman ninnge fiɛnfiɛn nga nvle kun nga mun be yo’n, mɔ be su* Izraɛli Ɲanmiɛn Zoova’n yɛ be dili-ɔ.+ 22 Asa ekun’n, be dili Kpanwun mɔ Levii Nunman nun’n i ti Cɛn’n+ cɛn ba nso, afin Zoova yoli maan be dili aklunjɔɛ, yɛ ɔ yoli maan Asiri famiɛn’n i klun jɔli be wun,+ ɔ maan ɔ suannin be bo Ɲanmiɛn Kpli m’ɔ ti Izraɛli Ɲanmiɛn’n i sua’n i wun junman’n i dilɛ nun.