1 Famiɛn Mun

14 Blɛ sɔ’n nun’n, Zeroboamun i wa Abia tɔli tukpacɛ. 2 Ɔ maan Zeroboamun seli i yi kɛ: “Yaci, jaso ko wlawla ɔ wun wafa wie mɔ be su kwlá wunman ɔ wlɛ kɛ a ti Zeroboamun i yi’n. Kpɛkun kɔ Silo lɔ. Lɔ yɛ Aia m’ɔ ti Ɲanmiɛn nuan ijɔfuɛ’n wo-ɔ. I yɛ ɔ seli kɛ ń má káci nvle nga su famiɛn’n niɔn.+ 3 Fa kpanwun blu nin gato, ɔ nin awɛma nzue towa kun naan kɔ ko wun i wun. Ɔ́ wá kán sa ng’ɔ́ wá jú ba’n su’n i ndɛ klé wɔ.”

4 Zeroboamun i yi’n yoli nga i wun’n kan kleli i’n. Ɔ jaso ɔli Silo,+ ɔ ɔli Aia i awlo lɔ. Aia i ɲinma’n gua su sa ngbɛn, ɔ wunman ase. Afin w’a yo kpɛnngbɛn.

5 Zoova seli Aia kɛ: “Zeroboamun i yi’n su ba ɔ sin naan ɔ́ wá úsa wɔ sa ng’ɔ́ wá jú i wa’n su’n, afin ba’n i wun sanndimɛn i. Ndɛ ng’ɔ fata kɛ a kan kle i’n, ń má kán klé wɔ. Kɛ ɔ́ wá bá’n, wafa ng’ɔ wlɛwlɛ i wun’n ti’n, be su wunmɛn i wlɛ.”

6 Kɛ ɔ juli anuan’n nun lɛ mɔ Aia tili i ja bo’n i tɛlɛ’n cɛ’n, ɔ seli kɛ: “Zeroboamun i yi, wlu wa. ?Ngue ti yɛ a kunndɛman kɛ be wun ɔ wlɛ-ɔ? Ɲanmiɛn seli min kɛ n kan jasin tɛ kpa kun n kle wɔ. 7 Kɔ ko se Zeroboamun kɛ: ‘Ndɛ nga Zoova m’ɔ ti Izraɛli Ɲanmiɛn’n kan’n yɛ: “N fali wɔ ɔ nvlefuɛ’m be nun naan a yo Izraɛli m’ɔ ti min nvle’n i su kpɛn kun.+ 8 N deli famiɛn diwlɛ’n Davidi i osu’n nunfuɛ’m be sa nun n fa mannin wɔ.+ Sanngɛ w’a yoman kɛ min sufuɛ Davidi sa. Ɔ fali min mmla’m be su, ɔ tuli i klun suli min, sa ng’ɔ ti kpa min ɲrun’n, i ngunmin cɛ yɛ ɔ yoli-ɔ.+ 9 Sanngɛ ɔ liɛ’n, a yoli sa tɛ dan trali be nga be dunnin mmua ɔ ɲrun’n. A yoli ɔ bɔbɔ ɔ amuin, a kloli blalɛ yoli amuin mun naan á fá fɔ́kɔ min awlɛn.+ Min yɛ a kacili ɔ sin sili min-ɔn.+ 10 I sɔ’n ti’n, ń má fá ɲrɛnnɛn ń yí i Zeroboamun i awlo’n su. Ń núnnún Zeroboamun i awlo’n nun yasua’m* be kwlaa, be nun nga be leman ɲrun Izraɛli mɛn’n nun bɔbɔ’n ń núnnún be wie. Yɛ ń núnnún Zeroboamun i awlo’n nun yɛiin,+ kɛ nga sran kun fa nunnun nnɛn’m be wakasu’n lele m’ɔ wie mlɔnmlɔn’n sa. 11 Zeroboamun i awlo’n nun sran kwlaa ng’ɔ wu klɔ’n nun’n, alua’m bé dí i fuɛn’n. Nga kusu m’ɔ wu blo lɔ’n, anunman nga be tu sin nglo lɔ’n bé dí i fuɛn’n. Afin Zoova kannin sɔ.”’

12 “Siɛn’n, jaso naan kɔ ɔ awlo. Kɛ ɔ ja tía klɔ’n nun cɛ’n, ba’n wú. 13 Izraɛlifuɛ’m be kwlaa bé yó i sɛ yɛ bé síe i. Zeroboamun i awlo’n nun’n, i kunngba cɛ yɛ bé síe i asieliɛ nun-ɔn. Afin Zeroboamun i awlo’n nun’n, i kunngba cɛ yɛ Zoova m’ɔ ti Izraɛli Ɲanmiɛn’n ɔ wunnin like kpa i nun-ɔn. 14 Kɛ ɔ fɛ i andɛ’n, Zoova wá síe famiɛn kun Izraɛli nvle’n su, ɔ́ wá núnnún Zeroboamun i awlo’n nunfuɛ mun,+ ɔ́ bó be nunnunlɛ bo andɛ bɔbɔ. 15 Zoova wá bó Izraɛlifuɛ mun, ɔ maan bé káci kɛ ndɛma m’ɔ o nzue nun m’ɔ keje’n sa. Ɔ́ wá tú Izraɛlifuɛ’m be bo mɛn ng’ɔ fa mannin be nannan mun’n i nun.+ Ɔ́ fá be guá Nzue’n* i bue kun lɔ.+ Afin be takali waka nga be sɔ be’n,*+ be fa fɔkɔli Zoova i awlɛn. 16 Kpɛkun ɔ́ yí Izraɛlifuɛ’m be blo. Afin Zeroboamun yoli sa tɛ, yɛ ɔ yoli maan Izraɛlifuɛ’m be yoli sa tɛ wie.”+

17 Kɛ ɔ kannin sɔ’n, Zeroboamun i yi’n jasoli, kpɛkun ɔ ɔli, ɔ juli Tiiza lɔ. Kɛ ɔ juli sua’n i anuan’n nun lɛ cɛ’n yɛ ba’n wuli-ɔ. 18 Be sieli ba’n, yɛ Izraɛlifuɛ’m be kwlaa be yoli i sɛ, kɛ nga Zoova sinnin i sufuɛ Aia m’ɔ ti Ɲanmiɛn ɲrun jranfuɛ’n i lika fa kannin’n sa.

19 Zeroboamun i su ndɛ’n i onga’n, wafa ng’ɔ kunnin alɛ’n,+ ɔ nin wafa ng’ɔ dili famiɛn’n, be klɛli be fluwa ng’ɔ kan Izraɛli famiɛn’m be ndɛ’n i nun. 20 Zeroboamun dili famiɛn afuɛ ablaɔn-nin-nɲɔn (22) yɛ ɔ wuli-ɔ.*+ Kpɛkun i wa Nadabu sinnin i osu kacili famiɛn.+

21 Salomɔn i wa Roboamun kacili Zida famiɛn. Kɛ ɔ́ yó famiɛn’n, nn ɔ le afuɛ ablanan-nin-kun (41). Ɔ dili famiɛn afuɛ blu-nin-nso (17) Zerizalɛmun lɔ. Kɛ Zoova niannin Izraɛli akpasua’m be kwlaa be nun’n, klɔ sɔ’n yɛ ɔ fali+ naan i dunman’n tran su-ɔ.+ Be flɛ Roboamun i nin’n kɛ Naama, ɔ ti Amɔnfuɛ.+ 22 Zidafuɛ’m be yoli sa ng’ɔ ti tɛ Zoova ɲrun’n.+ Sa tɛ nga be yoli’n ɔ kunnin i ya dan trali sa nga be nannan’m be yoli’n.+ 23 Afin be kusu be kplannin lika nglonglo mun titi, be takali yɔbuɛ nga be sɔ be’n, ɔ nin waka nga be sɔ be’n*+ kpɔlɛ+ dandan’m be kwlaa be su, ɔ nin waka kwlaa nga be le nɲa kpanngban’n be bo.+ 24 Yasua wie’m be kusu be bo tekle amuin sua’m be nun mɛn’n nun.+ Sa tɛtɛ nga nvle nga Zoova fuannin be Izraɛlifuɛ’m be ɲrun be yoli’n, i wie yɛ be yoli-ɔ.

25 Kɛ Roboamun kacili famiɛn’n, i afuɛ nnun su’n, Famiɛn Sisaki+ m’ɔ ti Ezipti famiɛn’n fali alɛ wlali Zerizalɛmunfuɛ’m be sin.+ 26 Ɔ fali ninnge kpakpa kwlaa nga be o Zoova i sua’n nun lɔ’n nin famiɛn’n i sua’n nun lɔ’n.+ Ɔ fali like kwlaa. Sika ɔkwlɛ ɲrɛn kwlaa nga Salomɔn yoli be’n,+ ɔ fali be wie. 27 I sɔ’n ti’n, Famiɛn Roboamun wa yoli aaba ɲrɛn fa sieli be osu. Kpɛkun ɔ fa be wlali gladi difuɛ mun* be su kpɛn’m be sa nun. Be yɛ be nian famiɛn’n i awlo’n i anuan’n su-ɔ. 28 Blɛ kwlaa nga famiɛn’n kɔ Zoova i sua’n nun lɔ’n, gladi difuɛ’m be fa ɲrɛn mun be tra nun. I sin’n, be fa be ko sie be osu’n nun, gladi difuɛ’m be sua ba’n nun lɔ.

29 Roboamun i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.+ 30 Alɛ trannin Roboamun nin Zeroboamun be afiɛn titi.+ 31 Roboamun wa wuli,* kpɛkun be sieli i Davidi Klɔ’n su lɔ.+ Be flɛ i nin’n kɛ Naama, ɔ ti Amɔnfuɛ.+ Roboamun i wa Abiamun*+ sinnin i osu kacili famiɛn.