1 Be Ɲoliɛ

22 I sin’n, Davidi seli kɛ: “Wa yɛ bé kplán Zoova m’ɔ ti Ɲanmiɛn Kpli’n i sua’n niɔn. Yɛ wa yɛ bé kplán tɛ yiwlɛ nga i su yɛ Izraɛlifuɛ’m bé yí tɛ nga kɛ bé yí’n be yra nnɛn’n i kɔlikɔli’n niɔn.”+

2 Davidi waan be yia aofuɛ+ nga be o Izraɛli nvle’n nun’n. Kpɛkun ɔ sieli be yɔbuɛ sɛfuɛ. Yɛle kɛ be kpukekpuke yɔbuɛ’m be nun naan be sɛ be fa kplan Ɲanmiɛn Kpli i sua’n.+ 3 Asa ekun’n, Davidi kunndɛli blalɛ kpanngban kpa naan be fa yo kpɛngbɛ nga bé fá bóbó anuan’m be nun’n, nin ninnge wie’m be nun naan b’a sasa su’n. Yɛ aaba ng’ɔ kunndɛ sieli’n ɔ sɔnnin dan ti’n, be sunnzun-ɔn, ɔ yoman ye.+ 4 Sɛdri waka’m+ be kusu be siman be nuan. Afin Sidɔnfuɛ mun+ nin Tirfuɛ mun+ be fali sɛdri waka kpanngban kpa be blɛli Davidi. 5 Davidi seli kɛ: “Min wa Salomɔn te yo gbanflɛn kan, ɔ siman sa.*+ Asa kusu’n, sua nga bé kplán bé fá mán Zoova’n, ɔ fata kɛ ɔ yo klanman kpa+ naan be kɛn i ndɛ yɛ be kannvu i+ nvle kwlaa nun.+ I sɔ’n ti’n, ń má kúnndɛ i wun ninnge mun ń mɛ́n i.” Davidi kunndɛli sua’n i wun ninnge kpanngban kpa sieli ka naan w’a wu.

6 Asa ekun’n, ɔ flɛli i wa Salomɔn, kpɛkun ɔ seli i kɛ ɔ kplan sua kun man Zoova m’ɔ ti Izraɛli Ɲanmiɛn’n. 7 Davidi seli i wa Salomɔn kɛ: “N kunndɛli kpa kɛ ń kplán súa kun naan be fa Zoova m’ɔ ti min Ɲanmiɛn’n i dunman’n sie su.+ 8 Sanngɛ Zoova seli min kɛ: ‘A guali mmoja ase dan ngboko. A kunnin alɛ dandan mun. I sɔ’n ti’n, nán wɔ yɛ á kplán sua nga min dunman’n trán su’n niɔn.+ Afin mmoja nga a guɛli i ase min ɲrun’n, ɔ ti dan ngboko. 9 Nian, á wá wú ba yasua kun.+ Ba sɔ’n yó sran wɛtɛɛfuɛ. Ń má yó maan i kpɔfuɛ nga be bo sin yiɛ i’n, be su klemɛn i yalɛ.+ I sɔ’n ti’n, bé flɛ́ i kɛ Salomɔn.*+ I blɛ su’n, ń yó maan Izraɛlifuɛ’m bé dí alaje, yɛ bé trán fɔundi nun.+ 10 I yɛ ɔ́ wá kplán súa kun naan n dunman’n tran su-ɔ.+ Ɔ́ káci min wa, yɛ ń káci i si.+ Ń yó maan i famiɛn dilɛ’n táka kpa Izraɛli nvle’n su tititi.’+

11 “Min wa, maan Zoova jran ɔ sin. Maan like nga á wá yó’n, ɔ yo ye. Kplan Zoova m’ɔ ti ɔ Ɲanmiɛn’n i sua’n, kɛ ng’ɔ fa kɛnnin i kɛ á wá yó’n sa.+ 12 Kɛ Zoova wá fá wɔ síe Izraɛli nvle’n su’n, maan ɔ man ɔ akunndan nin ngwlɛlɛ.+ I liɛ’n, á fá Zoova m’ɔ ti ɔ Ɲanmiɛn’n i mmla’n su.+ 13 Sɛ a nian nun nanti mmla+ nin afɔtuɛ nga Zoova seli Moizi kɛ ɔ fa man Izraɛlifuɛ mun’n be su’n,+ like nga á wá yó’n, ɔ́ yó ye. Yo yakpafuɛ yɛ jran kekle. Nán srɛ kun wɔ, nán ɔ wun usu wɔ.+ 14 Zoova i sua’n i wun ninnge’m be kunndɛlɛ nun’n, n kplinnin min ɲin kpa naan m’an ɲan sika ɔkwlɛ talan akpiakpi ya (100.000), nin sika talan miliɔn kun (1.000.000), nin aaba nin blalɛ.+ Aaba nin blalɛ sɔ’m be sɔnnin dan ti’n, be kwlá sunnzunman. Asa ekun’n, n kunndɛli waka nin yɔbuɛ mun.+ Sanngɛ á wá kúnndɛ wie úka su. 15 Junman difuɛ nga be o ɔ sa nun’n, be diman be yalɛ. Wie’m be sɛ yɔbuɛ, wie’m be fa yɔbuɛ be kplan sua,+ wie’m be sɛ waka. Junman difuɛ wafawafa kwlaa nga be si be junman’n i di kpa’n, be o lɛ ekun.+ 16 Sika ɔkwlɛ, nin sika, nin aaba, nin blalɛ’m be sɔnnin dan ti’n, be kwlá sunnzunman.+ I sɔ’n ti’n, nán sisi ɔ bo, bo junman’n i bo. Maan Zoova jran ɔ sin.”+

17 I sin’n, Davidi seli Izraɛli lɔ kpɛnngbɛn’m be kwlaa be kɛ be ukɛ i wa Salomɔn. Ɔ seli be kɛ: 18 “Zoova m’ɔ ti amun Ɲanmiɛn’n jin amun sin. I yɛ maan amun a ɲan amun ti lika kwlaa nun-ɔn. Afin ɔ fali mɛn nga i nunfuɛ mun wlali min sa nun. Yɛ Zoova nin i nvle’n nunfuɛ mun yɛ be sie mɛn nga-ɔ. 19 I sɔ’n ti’n, amun fa amun awlɛn’n kwlaa nin amun wunmiɛn’n kwlaa kunndɛ Zoova m’ɔ ti amun Ɲanmiɛn’n.+ Amun bo Zoova m’ɔ ti Ɲanmiɛn Kpli’n i sulɛ sua’n i kplanlɛ bo.+ I liɛ’n, be kwla fa Zoova i aenguɛ’n i alaka’n nin ninnge nga be ti Ɲanmiɛn Kpli liɛ klonglo’n,+ be sie i sua nga Zoova i dunman’n trán su’n nun.”+