Jɔlɛ Difuɛ Mun

3 Zoova yacili nvle wie’m be lɛ naan be sa Izraɛlifuɛ’m be kwlaa nga b’a kunman Kanaan alɛ’n wie’n be nian.+ 2 (Ɔ yoli sɔ naan Izraɛlifuɛ nga be jasoli su’n mɔ be nin-a kunman alɛ le’n, be si like nga be flɛ i alɛ kunlɛ’n.) 3 Nvle sɔ mun yɛ: Filistifuɛ’m be siefuɛ nnun mun,+ ɔ nin Kanaanfuɛ’m be kwlaa, nin Sidɔnfuɛ mun,+ nin Ivifuɛ+ nga be tran Liban Oka’n+ su lɔ’n, ɔ fɛ i Baali-Ɛrmɔn Oka’n su lele fa ju Lebo-Amati.*+ 4 Izraɛlifuɛ’m be sa nianlɛ ti yɛ nvle sɔ’m be kali lɛ-ɔ, sɛ Izraɛlifuɛ’m bé nánti Zoova i mmla ng’ɔ sinnin Moizi i lika fa mannin be si mun’n be su-o.+ 5 Ɔ maan Izraɛlifuɛ’m be trannin Kanaanfuɛ mun,+ nin Ɛtifuɛ mun, nin Amɔɔfuɛ mun, nin Perizifuɛ mun, nin Ivifuɛ mun, nin Zebisifuɛ’m be afiɛn. 6 Be jali be mma bla mun, yɛ be fali be bɔbɔ be mma bla’m be mannin be mma yasua’m be kɛ be ja be, yɛ be sɔli be amuin mun.+

7 Ɔ maan Izraɛlifuɛ’m be yoli sa tɛ Zoova ɲrun, be wla fili be Ɲanmiɛn Zoova su, yɛ be sɔli Baali mun,+ nin waka nga be sɔ be’n.*+ 8 Kɛ ɔ yoli sɔ’n, Zoova fali Izraɛlifuɛ’m be wun ya dan kpa, ɔ fali be wlali Kusanin-Risataimun m’ɔ ti Mezopotamin* famiɛn’n i sa nun. Izraɛlifuɛ’m be suli Kusanin-Risataimun afuɛ mɔcuɛ. 9 Kɛ Izraɛlifuɛ’m be kpan flɛli Zoova kɛ ɔ uka be’n,+ Zoova mannin be defuɛ kun naan ɔ de be.+ Be flɛ i kɛ Ɔtiniɛli.+ Kalɛbu i sinma yasua Kenazi i wa-ɔ. 10 Zoova wawɛ’n jrɛli i su,+ yɛ ɔ kacili Izraɛlifuɛ’m be jɔlɛ difuɛ. Kɛ ɔ ɔli alɛ kunlɛ’n, Zoova fali Kusanin-Risataimun m’ɔ ti Mezopotamin* famiɛn’n wlɛli i sa nun, ɔ maan ɔ kwlali Kusanin-Risataimun. 11 Kɛ ɔ yoli sɔ’n, mɛn’n tɔli fɔuun lele afuɛ ablanan (40). I sin’n, Kenazi i wa Ɔtiniɛli wuli.

12 Izraɛlifuɛ’m be wa yoli sa tɛ Zoova ɲrun ekun.+ Ɔ maan Zoova yacili Eglɔn m’ɔ ti Moabu+ famiɛn’n lɛ naan ɔ kwla Izraɛlifuɛ mun, afin be yoli sa tɛ Zoova ɲrun. 13 Asa ekun’n, ɔ yoli maan Amɔnfuɛ mun,+ nin Amalɛkifuɛ mun+ be nin be wa kunnin alɛ. Be wa tɔli Izraɛlifuɛ’m be su, yɛ be fali nglesia klɔ’n.+ 14 Izraɛlifuɛ’m be suli Eglɔn m’ɔ ti Moabu famiɛn’n afuɛ blu-nin-mɔcuɛ (18).+ 15 I sin’n, Izraɛlifuɛ’m be kpan flɛli Zoova kɛ ɔ uka be.+ Ɔ maan Zoova mannin be defuɛ kun.+ Be flɛ i Eidi,+ ɔ ti Gera i wa, ɔ ti Bɛnzamɛnfuɛ,+ yɛ ɔ di bɛ.+ Kɛ ɔ cɛli kan’n, Izraɛlifuɛ’m be sunmɛnnin i kɛ ɔ fa like ko man Eglɔn m’ɔ ti Moabu famiɛn’n. 16 Kɛ ɔ yoli sɔ’n, Eidi yoli tokofi kun, i tɛnndɛn nun’n ti kude kun,* ɔ lɛ i ɲrun lɛ i sin. Ɔ fa fiali i tralɛ’n i bo i sɔwa fama’n su. 17 I sin’n, ɔ fali like’n ko mannin Eglɔn m’ɔ ti Moabu famiɛn’n. Eglɔn ti sran m’ɔ cɛnnin kpa-ɔ.

18 Kɛ Eidi fali like’n mannin famiɛn’n, ɔ mannin be nga be suali like’n bali’n be atin kɛ be wɔ. 19 Kɛ ɔ juli ninnge nga be sɛli be’n* be wun lɛ Gilgali+ lɔ’n, ɔ sɛli i sin yɛ ɔ seli kɛ: “Nannan, n kunndɛ kɛ ń kán ndɛ kun ń klé ɔ ngunmin.” Ɔ maan famiɛn’n seli kɛ: “Amun yaci e ngunmin!”* Kɛ ɔ yoli sɔ’n, i sufuɛ’m be kwlaa be yacili i lɛ be ɔli. 20 Ɔ maan Eidi wunngeli i wun lɔ, kɛ ɔ́ yó sɔ’n nn i ngunmin ti i sua ba m’ɔ o sua’n i ti su nglo lɔ’n, mɔ i nun jɔ klanman’n nun. Eidi seli i kɛ: “Ɲanmiɛn sunmannin min kɛ n kan ndɛ kun n kle wɔ.” Yɛ famiɛn’n jasoli i famiɛn bia’n su-ɔ. 21 I sin’n, Eidi fɛli i sa bɛ’n cuɛnnin tokofi ng’ɔ o i sɔwa fama’n su’n, kpɛkun ɔ fa wɔli famiɛn’n i ku’n nun. 22 Tokofi’n i ba’n nin i waka’n kwlaa wluli i ku’n nun, kpɛkun i klun lui’n bu katali tokofi’n su, afin ɔ yacili tokofi’n i ku’n nun, yɛ i sewie’n fiteli. 23 Eidi ɲinnin sua ba m’ɔ o sua’n i ti su nglo lɔ’n i anuan mun yɛ ɔ toli be nun i sin, kpɛkun ɔ sinnin sua’n i lika fleiin nga be sin i bo’n* i nun fiteli. 24 Kɛ ɔ ɔli’n, i sin’n famiɛn’n i sufuɛ’m be bali, be wunnin kɛ sua ba m’ɔ o sua’n i ti su nglo lɔ’n i anuan’m be nun ti towa. Be seli be wun kɛ: “Atrɛkpa’n, i sa w’a mian kan* i sua ba mɔ i nun jɔ klanman’n nun lɔ.” 25 Be minndɛli lele, ɔ maan be klun titili be. Kɛ be wunnin kɛ ɔ tikeman sua ba’n i anuan mun’n, be fali lakle’n be tikeli anuan mun. Bé nían-ɔn, be famiɛn’n yɛ ɔ la asiɛ wun yɛ, w’a wu.

26 Kɛ be o lɔ bé kpɛ́kpɛ́ be wun’n nn Eidi w’a wanndi lalaa. Ɔ sinnin ninnge nga be sɛli be’n*+ be wun lɛ, yɛ ɔ juli Seira lɔ klanman. 27 Kɛ ɔ juli lɔ’n, ɔ boli awɛ+ Efraimun okaoka lika’n+ nun lɔ, yɛ Izraɛlifuɛ’m be fin okaoka lika’n nun lɔ be jrali-ɔ, Eidi dun mmua be ɲrun. 28 I sin’n, ɔ seli be kɛ: “An su min su, afin Zoova w’a fa Moabufuɛ mɔ be ti amun kpɔfuɛ’n w’a wla amun sa nun.” Ɔ maan be suli i su, yɛ be fali lika nga be kpɛ Zurdɛn’n be ja nun lɛ’n, naan Moabufuɛ’m b’a kwlá sinman. B’a manman sran fi atin kɛ ɔ kpɛ nzue’n. 29 Blɛ sɔ’n nun’n, be kunnin Moabufuɛ akpiakpi blu (10.000),+ be kwlaa sɔ’m be le wunmiɛn yɛ be ti yakpafuɛ. Be nun ba kun sa w’a kwlá wanndiman.+ 30 Ɔ maan kɛ ɔ fɛ i cɛn sɔ’n nun’n, Moabufuɛ’m be loli be wun be mannin Izraɛlifuɛ mun. Yɛ mɛn’n tɔli fɔuun afuɛ ablaɔcuɛ (80).+

31 Kɛ Eidi i blɛ’n sinnin’n, sran ng’ɔ bɛli i sin’n yɛle Anati i wa Samgaa.+ Ɔ fali nannin kankanlɛ waka pienbie kun+ kunnin Filistifuɛ ya nsiɛn (600).+ I kusu deli Izraɛlifuɛ mun wie.