Ezekiɛli
9 Kpɛkun ɔ kpannin min su’n nun kekle kpa seli kɛ: “Yiayia be nga bé wá tú klɔ’n i fɔ’n. Kɛ bé bá’n, maan alɛ kunlɛ ninnge nga be fa saci like’n ɔ tran be tinuntinun be sa nun!”
2 N wunnin yasua nsiɛn. Be fin nglo lɔ anuan’n+ mɔ i ɲin kpɛ nglo lɔ lika’n nun’n i nun lɔ yɛ be ba-ɔ. Alɛ kunlɛ ninnge nga be fa bubu ninnge mun’n, ɔ o be sa nun sɛsɛsɛ. Be nun kun o lɛ’n ɔ wlali lɛn tralɛ, kpɛkun fluwa klɛfuɛ’m be like nga be fa ayre nzue nga be fa klɛ fluwa’n be gua nun’n ɔ ci i bo. Kɛ be bali’n be wa jranjrannin aaba tɛ yiwlɛ’n i wun lɛ.+
3 I sin’n, Izraɛli Ɲanmiɛn’n i aɲrunɲan’n+ m’ɔ o seribɛn’m be ti su nglo’n ɔ jasoli kan ɔ o lɛ’n, kpɛkun ɔ ɔli sua’n i anuan’n nun lɔ.+ Kpɛkun ɔ flɛli sran nga lɛn tralɛ wlɛ i wun mɔ fluwa klɛfuɛ’m be like nga be fa ayre nzue nga be fa klɛ fluwa’n be gua nun’n ɔ ci i bo’n. 4 Zoova seli i kɛ: “Kɔ ko wlanwlan Zerizalɛmun klɔ’n nun, kpɛkun be nga tete ninnge nga sran’m be yo be klɔ’n nun’n ti’n, be fɛfɛ yɛ be kplin’n,+ sie be ngban’n su nzɔliɛ.”+
5 Kɛ ɔ́ kán ndɛ klé be onga mun’n n tili. Ɔ seli be kɛ: “Amun su i su, amun wlanwlan klɔ’n nun naan amun yo klɔ’n nunfuɛ’m be like yaya. Nán amun si be aunnvɔɛ, yɛ nán maan be yo amun annvɔ.+ 6 I oke-o, i gbanflɛn-o, i talua m’ɔ nin-a siman bian-o, i bakan-o, i bla-o, ɔ fata kɛ amun kun be kwlaa kpan.+ Sanngɛ be nga nzɔliɛ o be wun’n be liɛ’n, nán amun mantan be nun wie fi lɔ.+ Ɔ fata kɛ amun bo i bo min sua’n nun.”+ Ɔ maan be boli i bo kpɛnngbɛn nga be o sua’n i ɲrun lɛ’n be su.+ 7 I sin’n, ɔ seli be kɛ: “Amun yo sua’n i fiɛn, amun fa be nga be wuli’n be fuɛn’n+ yi awlo klun mun. Amun wɔ!” Ɔ maan be ɔli, kpɛkun be kunnin klɔ’n nun sran mun.
8 Kɛ bé kún be’n min ngunmin yɛ be yacili min lɛ-ɔ. N utuli min ɲin ase, yɛ n kpan n seli kɛ: “?Ee, min Min Zoova, wɔ mɔ a Sie Like Kwlakwla’n, á fá ɔ ya dan’n á gúa Zerizalɛmun su naan á núnnún Izraɛlifuɛ nga be kali lɛ’n be kwlaa?”+
9 Ɔ maan ɔ seli min kɛ: “Izraɛlifuɛ nin Zidafuɛ’m be fɔnlɛ’n cɛnnin dan.+ Mmoja ase gualɛ’n w’a yi nvle’n,+ yɛ ndrunmun dilɛ’n w’a yi klɔ’n.+ Afin be se kɛ: ‘Zoova w’a jaso mɛn’n nun, Zoova wunman like fi.’+ 10 Sanngɛ min liɛ’n, n su siman be aunnvɔɛ,* yɛ be su yoman min annvɔ.+ Ń má yó maan bé wún atin nga be fali su’n i su afɛ’n.”
11 I sin’n, n wunnin sran nga lɛn tralɛ wlɛ i wun mɔ like nga be fa ayre nzue nga be fa klɛ fluwa’n be gua nun’n ɔ ci i bo’n. Ɔ bali like nga be seli i kɛ ɔ yo’n i su ndɛ kanlɛ. Ɔ seli kɛ: “N niannin nga a seli min kɛ n yo’n su sɛsɛsɛ n yoli.”