Sa nga Akoto’m be yoli’n
26 Agripa+ seli Pɔlu kɛ: “Atin o nun. Kan ɔ ndɛ liɛ’n.” Yɛ Pɔlu tinngɛli i sa’n nun-ɔn. Ɔ seli kɛ:
2 “Nannan Agripa, Zifu’m be waan n yoli ninnge tɛtɛ kpanngban.+ Ɔ maan andɛ’n kɛ mɔ ɔ ɲrun wa yɛ ń má kán min ndɛ liɛ’n, ɔ yo min fɛ kpa. 3 Afin a si wafa nga Zifu’m be yo be ninnge mun’n i kpa, yɛ a si be afiɛn akplowa ndɛ mun. Ɔ maan ń srɛ́ wɔ kpa kɛ a sie ɔ su tie min ndɛ’n.
4 “Nanwlɛ, kɛ ɔ fɛ i min gbanflɛn nun lele’n, ninnge nga n yoli be min nvle’n nunfuɛ’m be afiɛn’n, ɔ nin Zerizalɛmun lɔ’n, Zifu’m be kwlaa be si nun kpa.+ 5 Be si min w’a cɛ kpa. Sɛ be waan bé dí i nanwlɛ’n, bé sé kɛ n ti Farizifuɛ+ laa, naan n niannin e Ɲanmiɛn sulɛ wafa sɔ’n+ i mmla’m be kwlaa be su n nantili seiin kpa. 6 Sanngɛ like nga ti yɛ be su di min jɔlɛ’n, yɛle like nga Ɲanmiɛn waan ɔ́ yó mán e nannan mun mɔ n lafi su’n.+ 7 E akpasua blu-nin-nɲɔn (12) mun be lafi su kɛ Ɲanmiɛn yó like kunngba sɔ’n mán be. I sɔ’n ti yɛ be su i kɔnguɛ nin wia nun’n niɔn. Nannan, like sɔ mɔ be lafi su’n, i ti yɛ Zifu’m be sanmannin min-ɔn.+
8 “?Ngue ti yɛ amun lafiman su kɛ Ɲanmiɛn cɛn be nga be wuli’n niɔn? 9 Min liɛ’n, n buli i kɛ ɔ fata kɛ n yo ninnge kpanngban n fa tanndan Zezi m’ɔ fin Nazarɛti’n i ɲrun.* 10 Like nga n yoli i Zerizalɛmun lɔ’n, yɛ ɔ o lɛ-ɔ. Asa ekun’n, n wlali Ɲanmiɛn i sran’m be bisua,+ afin Ɲanmiɛn ɲrun jranfuɛ’m be su kpɛn’m be mannin min i sɔ yolɛ’n i wun atin.+ Yɛ sɛ ɔ fata kɛ be kun be’n, min klun jɔ su. 11 N kleli be ɲrɛnnɛn kpɛ sunman Ɲanmiɛn sulɛ sua’m be kwlaa be nun. Afin min waan ń mían be naan be kaci be sin si Zezi. Asa ekun’n, kɛ mɔ n fali be wun ya dan’n ti’n, n ɔli klɔ uflɛ wie’m be su n ko kleli be yalɛ lɔ.
12 “Ɔ maan n fali Damasi atin’n kɛ ń kó klé lɔfuɛ’m be ɲrɛnnɛn wie. Afin Ɲanmiɛn ɲrun jranfuɛ’m be su kpɛn’m be mannin min i sɔ yolɛ’n i wun atin, kpɛkun be sunmannin min. 13 Nannan, kɛ n wo atin’n su mɔ mindi juliʼn, ɲanmiɛn’n kpajali piaa guali min su. I kpajalɛ sɔ’n tra wia’n i bolɛ’n. Ɔ kpajali be nga be nin min su tu ajalɛ’n be su wie.+ 14 Kɛ e kwlaa e tɔli’n, n tili sran kun nɛn. Ɔ kɛnnin i Ebre nun kɛ: ‘?Sɔlu, Sɔlu, ngue ti yɛ a kle min yalɛ-ɔ? Kɛ a tu si waka mɔ i ti’n ti pienbie’n,* ɔ bɔbɔ ɔ wun yalɛ yɛ a su kle-ɔ.’ 15 Sanngɛ n seli kɛ: ‘?Min Min, wan yɛle wɔ?’ Yɛ e Min’n seli kɛ: ‘Min-ɔn, Zezi-ɔ. Min yɛ a kle min yalɛ’n niɔn. 16 Sanngɛ jaso jran. Like nga ti yɛ n yili min wun nglo n kleli wɔ’n, yɛle kɛ n kpali wɔ kɛ a kaci min junman difuɛ naan a kan ninnge nga a wunnin be’n, ɔ nin min su ninnge nga ń wá fá ń klé wɔ’n, be ndɛ.+ 17 Ń má súnman wɔ nvle nga i nunfuɛ mun nin be nga be timan Zifu’n be sin,+ yɛ ń dé wɔ be sa nun. 18 Ń má súnman wɔ naan be ɲinma’m be tike,+ naan be jaso aosin’n nun+ be bla kpajalɛ’n nun+ naan be kaci be sin si Satan,+ yɛ be bla Ɲanmiɛn i sin. I liɛ’n, bé yáci be sa tɛ mun cɛ́ be.+ Asa ekun’n, aja like nga be nga be lafi min su’n bé ɲɛ́n i’n, bé ɲán wie.’
19 “I sɔ’n ti’n, Nannan Agripa, ndɛ sɔ m’ɔ fin ɲanmiɛn su’n, mɔ be kan kleli min aolia nun’n, n fali su. 20 N dun mmua n kannin ndɛ’n n kleli be nga be o Damasi+ lɔ’n. I sin’n, n kan kleli be nga be o Zerizalɛmun lɔ’n,+ ɔ nin be nga be o Zide wunmuan’n nun’n, ɔ nin be nga be timan Zifu’n be wie. N seli be kɛ ɔ fata kɛ be kaci be akunndan’n. Kpɛkun be sa be sin Ɲanmiɛn wun. Yɛle kɛ be yo sa ng’ɔ kle kɛ b’a kaci be akunndan’n.+ 21 I sɔ’n ti yɛ Zifu’m be trali min Ɲanmiɛn sua’n nun lɔ mɔ be waan bé kún min’n niɔn.+ 22 Sanngɛ Ɲanmiɛn ukali min. I sɔ’n ti’n, lele nin andɛ’n n te kan ndɛ n te kle be nga be leman ɲrun’n, ɔ nin be nga be le ɲrun’n. Ndɛ nga Ɲanmiɛn nuan ijɔfuɛ mun nin Moizi be seli kɛ ɔ́ wá kpɛ́n su’n be ndɛ yɛ n kan-ɔn,+ n kanman ndɛ uflɛ fi. 23 Yɛle kɛ ɔ fata kɛ Klisi’n wun ɲrɛnnɛn.+ Kpɛkun ɔ fata kɛ ɔ yo be nga be wuli mɔ bé wá cɛ́n’n,+ be nun klikli’n. Asa ekun’n, ɔ fata kɛ ɔ kan kpajalɛ’n i ndɛ kle nvle nga i nunfuɛ mun, ɔ nin be nga be timan Zifu’n.”+
24 Kɛ Pɔlu kán ndɛ sɔ mun’n, Fɛstisi kpan seli kɛ: “Pɔlu, ɔ ti su saci! Ɔ sa silɛ dan’n su bo ɔ fia!” 25 Sanngɛ Pɔlu seli kɛ: “Nannan Fɛstisi, nán kɛ min ti su saci ti-ɔ. Ndɛ nga n kan’n ti nanwlɛ, yɛ ndɛ kpa yɛ n su kan-ɔn. 26 Afin famiɛn’n bɔbɔ mɔ n su kan ndɛ’n ń klé i’n, ɔ si nun. Yɛ n si kɛ ndɛ nga n su kɛn i yɛ’n, wie fi nunman lɛ m’ɔ siman nun-ɔn. Afin b’a yoman nvialiɛ nun.+ 27 ?Nannan Agripa, a lafi Ɲanmiɛn nuan ijɔfuɛ’m be ndɛ’n su? N si kpa kɛ a lafi su.” 28 Sanngɛ Agripa seli Pɔlu kɛ: “Sɛ n cɛ wa kan ekun’n, á yó maan ń káci Klisifuɛ.” 29 Yɛ Pɔlu seli kɛ: “Ń srɛ́ Ɲanmiɛn kɛ sɛ andɛ-o, sɛ ainman-o, a kaci kɛ min sa. Nán maan ɔ yo ɔ kunngba, sanngɛ ń srɛ́ Ɲanmiɛn kɛ amun kwlaa nga amun tieli min ndɛ’n andɛ’n, an kaci kɛ min sa wie. Sanngɛ n sunnzunman kɛ be ci amun nin jrɔkɔ kɛ min sa.”
30 I sin’n, famiɛn’n jasoli. Kpɛkun mɛn siefuɛ’n nin Berenisi, ɔ nin be nga be trannin be wun lɛ’n, be jasoli wie. 31 Kɛ bé kɔ́’n, be kɛn i be afiɛn lɔ kɛ: “Bian nga w’a yoman sa tɛ m’ɔ nin kunlɛ annzɛ bisua wlalɛ fata-ɔ.”+ 32 Agripa seli Fɛstisi kɛ: “Sɛ ɔ ti kɛ bian nga w’a seman kɛ be ko di i jɔlɛ Sezaa i ja su sa’n, nn e yacili i nun.”+