Sa nga Akoto’m be yoli’n

12 Blɛ sɔ nun’n, famiɛn Erɔdu kleli asɔnun’n i nunfuɛ wie’m be yalɛ.+ 2 Ɔ fali tokofi kunnin+ Zaki m’ɔ ti Zan i niaan bian’n.+ 3 Kɛ ɔ wunnin kɛ i sɔ’n yoli Zifu’m be fɛ’n, ɔ trali Piɛli wie. (Sa sɔ’n juli Kpanwun mɔ Levii Nunman nun’n i Cɛn dilɛ’n nun.)+ 4 Kɛ ɔ trɛli i’n, ɔ wlɛli i bisua.+ Sonja akpasua nnan be niɛn i su. Akpasua kun nun sonja nnan, kun nun sonja nnan. I waan sɛ Zifu’m be Delɛ Cɛn’n sin’n, ɔ́ fɛ́ i kɔ́ nvlefuɛ’m be ɲrun.* 5 Ɔ maan Piɛli kali bisua lɔ. Sanngɛ asɔnun’n i nunfuɛ’m be srɛ Ɲanmiɛn tankaan kpa be mɛn i titi.+

6 Kɔnguɛ nga mɔ Erɔdu waan sɛ i aliɛ cɛn’n, ɔ́ fá Piɛli fíte’n, Piɛli o sonja nɲɔn be afiɛn ɔ su lafi. Be fali jrɔkɔ nɲɔn be cili i, kpɛkun sonja nɲɔn be o anuan’n i ɲrun lɛ bé nían bisua’n su. 7 Kpɛkun-ɔn, Zoova* i anzi’n w’a bo nun.+ Ɔ maan lika nga Piɛli wo lɛ’n kpajali wauun. Ɔ finnin Piɛli i nvɛnwun tinngeli i, yɛ ɔ seli kɛ: “Jaso ndɛndɛ.” Yɛ jrɔkɔ’m be floli i sa be guali-ɔ.+ 8 Anzi’n seli i kɛ: “Wla ɔ tralɛ’n* nin ɔ ngbabua’n.” Yɛ ɔ wlali-ɔ. I sin’n, ɔ seli i kɛ: “Wla ɔ tralɛ dan’n naan su min su, nán jran.” 9 Yɛ ɔ fiteli lɔ-ɔ. Ɔ suli i su, w’a yacimɛn i su sulɛ. Sanngɛ ɔ siman kɛ sa kwlaa nga anzi’n yó be lɛ’n, be su ju sakpa. Ɔ bu i kɛ nn aolia nun like wie yɛ ɔ su wun i-ɔ. 10 Be sannin sonja akpasua klikli’n nin sonja akpasua nɲɔn su’n be wun. Kpɛkun be juli blalɛ anuan nga be sin nun be wlu klɔ’n nun lɔ’n i wun lɛ. Anuan’n bɔbɔ tikeli i wun mannin be. Kɛ be fiteli lɔ’n, be fali atin kun su, yɛ anzi’n mlinnin i ɲrun-ɔn. 11 Kɛ Piɛli i ɲin su titili i’n, ɔ seli kɛ: “Siɛn’n, m’an wun i wlɛ weiin kɛ Zoova* sunmɛnnin i anzi’n naan ɔ de min Erɔdu sa nun, naan ɔ de min sa kwlaa nga Zifu’m be sunnzunnin kɛ be tɔ min su’n be nun.”+

12 Kɛ ɔ wunnin sa sɔ’n i wlɛ’n, ɔ ɔli Zan mɔ be flɛ i ekun kɛ Marki’n+ i nin Mari i awlo lɔ. Sran lɔun kpa b’a yia lɔ be su srɛ Ɲanmiɛn. 13 Kɛ ɔ boboli anuan’n, talua kun m’ɔ di junman lɔ mɔ be flɛ i Rɔdu’n, ɔ ɔli kɛ ɔ́ kó nían sran ng’ɔ boboli anuan’n. 14 Kɛ ɔ tili Piɛli i nɛn’n, m’ɔ wunnin i wlɛ’n, i wun m’ɔ blibli i dan’n ti’n, w’a tikeman anuan’n. Sanngɛ ɔ wanndi ɔli sua’n i klun lɔ, ɔ ko seli sran’m be kɛ Piɛli jin anuan’n i sin lɛ. 15 Yɛ be seli i kɛ: “A kpɛnman su kpa.” Sanngɛ ɔ jrannin su kpa kɛ Piɛli sakpa-ɔ. Be seli kɛ: “I anzi’n niɔn.” 16 Kɛ ɔ́ yó sɔ’n, nn Piɛli te jin lɛ te bobo anuan’n. Kɛ be tikeli anuan’n mɔ be wunnin i’n, ɔ boli be nuan. 17 Sanngɛ ɔ fɛli i sa’n sieli i nuan’n su kɛ be muan be nuan. Yɛ wafa nga Zoova* fɛli i bisua’n nun lɔ fiteli’n, ɔ yiyili i kwlaa nun kleli be weiin. I sin’n, ɔ seli be kɛ: “Amun ko bo su kle Zaki+ ɔ nin aniaan mun.” Yɛ ɔ fite ɔli lika uflɛ-ɔ.

18 Kɛ aliɛ cɛnnin’n, sonja’m be akunndan’n sanngannin dan kpa. Afin be wunman lika nga Piɛli ɔli-ɔ. 19 Erɔdu kunndɛli i kpa, sanngɛ w’a wunmɛn i. Ɔ maan, ɔ flɛli sonja mun usausali be. Kpɛkun ɔ seli kɛ be fa sonja mun wɔ naan be ko tu be fɔ.+ I sin’n, Erɔdu jasoli Zide lɛ ɔ ɔli Sezare ko dili le nɲɔn kun lɔ.

20 Erɔdu fali Tirfuɛ nin Sidɔnfuɛ’m be wun ya dan kpa. I sɔ’n ti’n, be bo yoli kun be bɛli i wun wunlɛ. Kɛ be nin Blastisi m’ɔ nian famiɛn’n i awlo lɔ ninnge’m be su’n* be tili be wun aniɛn’n, be seli kɛ be nin famiɛn’n bé síesíe be afiɛn. Afin famiɛn’n i nvle’n nun lɛ yɛ aliɛ fin kɔ be nvle liɛ’n nun lɔ-ɔ. 21 Cɛn kun mɔ sran’m be yiali’n, Erɔdu wlɛli i famiɛn tralɛ’n. Kpɛkun ɔ ko trannin ase jɔlɛ diwlɛ lɛ, naan w’a kan ndɛ w’a kle be. 22 Yɛ be nga be yiali lɛ’n, be kpannin kɛ: “I nɛn’n tɛ kɛ Ɲanmiɛn liɛ’n sa, nán klɔ sran nɛn-ɔn!” 23 Be ja nun lɛ’n, Zoova* i anzi’n yoli i like yaya. Afin w’a faman manmanlɛ ng’ɔ ti Ɲanmiɛn liɛ’n w’a mɛnmɛn i. Ɔ maan kakaa’m be loli i wun yɛ ɔ wuli-ɔ.

24 Sanngɛ Zoova* i ndɛ’n truli, kpɛkun sran kpanngban kpa be wa lafili su.+

25 Baanabasi+ nin Sɔlu be liɛ’n, kɛ be wieli aniaan nga be o Zerizalɛmun lɔ’n be uka’n,+ be sali be sin. Kɛ bé kɔ́’n, be fali Zan+ mɔ be flɛ i ekun kɛ Marki’n be ɔli.